Mga Pamangkot Gikan sa mga Bumalasa
Masiling bala nga ang bag-o nga paghangop tuhoy sa tinaga nga “kaliwatan” sa Mateo 24:34 nagapahangop nga ang katapusan sang sistema sang mga butang mahimo mapalantang sing madugay pa?
Indi gid ina matuod. Sa kabaliskaran, ang bag-o ginpaathag nga paghangop tuhoy sini dapat magbulig sa aton nga magpadayon sa paghulat sa katapusan. Ngaa?
Bueno, subong ginpaathag sang Ang Lalantawan Nobiembre 1, 1995, gin-aplikar ni Jesus ang prase nga “ining kaliwatan” sa magkadungan malauton nga mga tawo. (Mateo 11:7, 16-19; 12:39, 45; 17:14-17; Binuhatan 2:5, 6, 14, 40) Wala ini nagapatuhoy sa isa ka napat-od nga kalawigon sang tion nga nagasugod sa isa ka espisipiko nga petsa.
Sa katunayan, ginpakita sang “Mga Pamangkot Gikan sa mga Bumalasa” sa amo man nga guwa sang Ang Lalantawan ang duha ka importante nga butang: “Ang isa ka kaliwatan sang mga tawo indi mahimo tamdon subong isa ka panag-on nga may pat-od nga kadamuon sang tinuig” kag, “Ang mga tawo sang isa ka kaliwatan nagakabuhi sa daw malip-ot nga panag-on.”
Masami naton ginagamit ang “kaliwatan” sa sining paagi. Halimbawa, mahimo kita makasiling, ‘Ang mga soldado sang kaliwatan ni Napoléon wala sing nahibaluan tuhoy sa mga eroplano kag mga bomba atomika.’ Ginapatuhuyan lamang bala naton ang mga soldado nga natawo sa pareho nga tuig nga natawo si Napoléon? Ginapatuhuyan lamang bala naton yadtong Pranses nga mga soldado nga napatay antes napatay si Napoléon? Indi gid; kag wala man naton ginagamit ang “kaliwatan” sa amo nga paagi agod pat-uron ang kadamuon sang mga tuig. Busa, ginapatuhuyan naton ang isa ka daw malip-ot nga panahon, indi ang ginatos ka tuig kutob sang panahon ni Napoléon tubtob sa palaabuton.
Kaanggid ini sa aton paghangop tuhoy sa ginsiling ni Jesus sa iya tagna nga ginhatag sa Bukid sang mga Olivo. Ang katumanan sang nanuhaytuhay nga bahin sang tagna nagapamatuod nga malapit na ang katapusan sining sistema. (Mateo 24:32, 33) Dumduma nga suno sa Bugna 12:9, 10, sang matukod ang langitnon nga Ginharian sang Dios sang 1914, gintagbong si Satanas sa duta. Ang Bugna nagadugang nga si Satanas may daku nga kaakig karon. Ngaa? Bangod nakahibalo sia nga “may malip-ot na lamang sia nga tion.”—Bugna 12:12.
Sa amo nagakaigo nga Ang Lalantawan sang Nobiembre 1 may subtitulo: “ ‘Magpabilin nga Nagabantay’!” Ang masunod nga parapo nagasiling sing nagakaigo: “Indi naton kinahanglan hibaluon ang sibu nga tion sang mga hitabo. Sa baylo, dapat kita magmabinantayon, ginapalambo ang malig-on nga pagtuo, kag masako sa pag-alagad kay Jehova—indi sa pagbulubanta sang isa ka petsa.” Nian ginkutlo sini ang pinamulong ni Jesus: “Magpabilin kamo nga nagapanilag, magpabilin kamo nga nagamata, kay wala kamo makahibalo kon san-o ang gintalana nga tion. Apang ang ginasiling ko sa inyo ginasiling ko sa tanan, Magpabilin kamo nga nagabantay.”—Marcos 13:33, 37.