Kon Paano Makasapo sing Paglaum sa Tion sang Pagluya sing Buot
HANDURAWA nga maagihan mo ang masunod nga mga eksperiensia: Ang imo tanan materyal nga mga pagkabutang nadula, nagbilin sa imo nga imol na katama. Ang imo mga anak—ang kalipay sang imo kabuhi—nagkalamatay. Ang imo tiayon wala maghatag sa imo sing bisan ano nga pagpalig-on. Ang imo panglawason literal nga nagluya. Ang tagsa ka adlaw isa ka masakit nga pagtilaw.
Kon amo sina ang imo kahimtangan, may rason ka pa bala agod mabuhi? Ukon maluyahan ka bala sing buot?
Ang masubo nga kahimtangan nga ginlaragway bag-o lang amo ang matuod gid nga naeksperiensiahan ni Job, isa ka lalaki nga nagkabuhi sadtong panahon sang Biblia. (Job, kapitulo 1, 2) Sa daku nga kapung-aw, si Job nanalambiton: “Ang akon kalag ginatak-an na gid sang akon kabuhi.” Handa niya gani nga batunon ang kamatayon subong paumpaw. (Job 10:1; 14:13) Apang, walay sapayan sang iya daku nga pag-antos, ginhuptan ni Job ang iya integridad sa Dios. Busa “ginpakamaayo [ni Jehova] ang kaulihian ni Job labi pa sangsa iya pamuno.” Busa napatay sia nga may kalinong, “tigulang kag naayawan sa mga adlaw.”—Job 42:12, 17.
Si Job naghatag sing halimbawa sang pagbatas nga bantog bisan tubtob karon. Ang iya mga pagtilaw nagpauswag sang iya personalidad kag nagpahulag sa iban sa paghimo sing maayo. (Santiago 5:10, 11) Labing importante sa tanan, ang walay kasaypanan nga integridad ni Job nagpahalipay sa tagipusuon ni Jehova. (Hulubaton 27:11) Busa ang tuman nga kasakit nangin isa ka daku nga kadalag-an sang ulihi sang pagkadiosnon, pagtuo, kag integridad nga nagdala sing mga pagpakamaayo kay Job kag sa tanan nga napahulag sang iya halimbawa.
Paglaum Walay Sapayan sang Madamo nga Pagtilaw
Mahimo nga mag-antos ka sing mga pagtilaw nga kaanggid sa naeksperiensiahan ni Job. Ang pagkapatay sang isa ka hinigugma mahimo gid nga magpalisod sa imo. Ang grabe nga balatian mahimo nga isa ka masakit nga pagtilaw sa imo kabuhi. Ang imo bug-os nga pagkabuhi mahimo nga naguba bangod sang masakit nga diborsio. Ang mga problema sa pangabuhi mahimo nga nagpaimol sa imo. Mahimo ginahingabot ka sing daku sang madinumtanon nga mga manugpamatok sang matuod nga pagsimba. Mahimo ikaw magbatyag nga ang imo palaabuton wala na gid sing paglaum bangod sang paghimakas mo nga malandas ang imo mga pagtilaw.—1 Pedro 1:6.
Sa baylo nga maluyahan sing buot, pamangkuta ang imo kaugalingon, ‘Ngaa bala nagaantos ako.’ Nagaantos ka bangod nagakabuhi ka sa kalibutan nga “yara sa gahom sang isa nga malauton,” si Satanas nga Yawa. (1 Juan 5:19) Bangod sini, ang tanan nagaantos. Sa pila ka paagi kita tanan naapektuhan sang ginasugyot-sang-Yawa nga pagdumot sa mensahe sang Ginharian, sang dimahigugmaon nga mga hambal sang iban, ukon sang makasiligni nga mga buhat sang didiosnon nga paggawi nga kinaandan katama sa sining “makahalanguyos nga mga tion.”—2 Timoteo 3:1-5.
Kon may trahedya nga natabo sa imo kabuhi, mahimo nangin biktima ka sang “tion kag wala ginapaabot nga hitabo.” (Manugwali 9:11) Sa pihak nga bahin, mahimo nga may natabo nga sala sa kabuhi bangod sang aton napanubli nga pagkamakasasala. (Roma 5:12) Bisan pa nakasala ka sing malubha apang naghinulsol kag nangayo sing espirituwal nga bulig, indi magbatyag nga ginbayaan na ikaw sang Dios. (Salmo 103:10-14; Santiago 5:13-15) Labaw kay bisan sin-o, nagaulikid sia sa aton. (1 Pedro 5:6, 7) Makasalig ka nga “si Jehova malapit sa mga buong sing tagipusuon; kag ginaluwas niya ang mga nadugmok sa espiritu.” (Salmo 34:18) Bisan kon daw ano man kasubo ukon kalubha ang imo pagtilaw, si Jehova makahatag sa imo sing kaalam agod madaug ini. (Santiago 1:5-8) Dumduma pirme nga sarang mabulong ni Jehova ang tanan nga pilas. Kon nahamuot sia sa imo, wala sing makapugong sa imo nga matigayon ang padya sang kabuhi.—Roma 8:38, 39.
May Maayo Bala nga Resulta ang mga Pagtilaw?
May yara karaan nga hambalanon, “May kasanag sa likod sang gal-om.” Isa ini ka simple nga paghambal nga ano man kalain ang matabo, pirme ka makasapo sing rason nga maglaum. Ang katuyuan sa likod sang tanan nga ginsulat sa Pulong sang Dios amo nga agod “kita mahimo nga may paglaum.” (Roma 15:4) Ano man kalubha ang imo kahimtangan, ang mga saad kag mga prinsipio sa Biblia makahatag sa imo sing bag-o nga kalipay kag paglaum.
Ginapakita sang Kasulatan nga “ang kapipit-an umalagi lamang kag mamag-an” kon ipaanggid sa dayon nga mga pagpakamaayo nga ginapahamtang sa atubangan sang mga nagahigugma sa Dios. (2 Corinto 4:16-18) Ginapakita man sang Biblia nga ang diosnon nga mga kinaiya nga mapalambo sa tunga sang mga pagtilaw mas daku ang kabilihanan sangsa kabantugan ukon materyal nga manggad. (1 Juan 2:15-17) Busa, bisan ang pag-antos mahimo makahatag sing mga kaayuhan. (Hebreo 5:8) Sa katunayan, ang pag-aplikar sa kon ano ang natun-an sa tion sang pagtilaw makahatag sa imo sing wala ginapaabot nga mga pagpakamaayo.
Bangod sang mabudlay nga pagtilaw, mahimo nga mangin mas malulo ka. Ayhan batunon mo nga sang nagligad may kinaiya ka nga makailinit sa iban kag nagaupang pa gani sa imo espirituwal nga pag-uswag. Ayhan sobra ini nga pagsalig sa kaugalingon. Pagkatapos masit-an sing pila ka kalamidad, ayhan marealisar mo sing hinali kon daw ano gali kahuyang sa imo kag kon daw ano gali ang imo pagkinahanglan sa iban. Kon ang imo pagtilaw nagtudlo sa imo sina nga leksion kag naghimo ka sing mga pagbag-o, nakabulig ini sa imo.
Ano abi kon, sang nagligad, nabudlayan ang iban nga makig-angot sa imo bangod madali ka mainit? Mahimo gani ini ang ginbangdan sang imo kasakit may kaangtanan sa imo panglawason. (Hulubaton 14:29, 30) Apang, karon, ang kahimtangan mahimo nga nag-ayo bangod nagsalig ka sa espiritu sang Dios sa pagbulig sa imo nga punggan ang kaugalingon.—Galacia 5:22, 23.
Kaangay sa iban, mahimo nga sadto anay nakulangan ka sing kaawa sa pagkaluoy sa mga nakasala. Apang kon ikaw mismo nangin sa sitwasyon nga nagbatyag ka sing daku nga pagkinahanglan sing kaluoy, mahimo nga mas maluluy-on ka na karon sa iban. Ang makalilipay nga kahanuklog, pag-ulikid, kag kaluoy nga ginpakita sa imo mahimo nga nagparealisar sa imo nga dapat mo man ipakita ini nga mga kinaiya sa mahinulsulon nga nakasala. Kon ang daku nga kasakit nagpahulag sa imo nga tadlungon ining mga kaluyahon sa imo personalidad, isa ini sa kaayuhan nga natigayon mo gikan sa imo naeksperiensiahan. Natun-an mo nga “ang kaluoy nagadaug sa paghukom.”—Santiago 2:13; Mateo 5:7.
Ano kon ang disiplina sang Cristianong kongregasyon nagresulta sa pagkawasi mo sang ginapakabahandi nga mga pribilehiyo kag sang pagtahod sang iban? Indi maluyahan sing buot. Ang disiplina nagabulig agod mahuptan nga matinlo ang kongregasyon, apang lakip sa katuyuan sini amo ang espirituwal nga pagpasag-uli sa nakasala. Ang matuod, “wala sing disiplina ang daw makalilipay sa karon, kundi masakit; apang pagkatapos sina sa mga nahanas sa sini nagapatubas ini sing mahidaiton nga bunga, nga amo, ang pagkamatarong.” (Hebreo 12:11) Bisan pa ang disiplina masakit gid katama, wala sini ginabilin ang tawo nga nagahinulsol sing mapainubuson nga wala sing paglaum. Si Hari David sang dumaan nga Israel gindisiplina sing daku bangod sa sala, apang naghinulsol sia kag nakabaton sang ulihi sing pinasahi nga kadayawan subong isa ka tawo nga may tumalagsahon nga pagtuo.—2 Samuel 12:7-12; Salmo 32:5; Hebreo 11:32-34.
Ang isa ka pagtilaw mahimo nga may daku nga epekto sa imo panimuot. Sang nagligad, ang imo igtalupangod mahimo nga nasentro sa materyalistiko nga mga lalab-uton kag mga hinimuan nga naghatag sa imo sing pagkilala kag sosyal nga tindog sa sining kalibutan. Ayhan ang isa ka pagtilaw may kaangtanan sa pagbag-o sa pinansial nga tindog ukon materyal nga kapierdehan nagsentro sang imo hunahuna sa mas importante nga mga butang. (Ipaanggid ang Filipos 1:10.) Narealisar mo karon nga ang espirituwal nga mga kabilihanan kag mga tulumuron sa sagrado nga pag-alagad amo lamang ang mga butang nga nagahatag sing matuod nga kalipay kag dayon nga kaayawan.
Pagsalig kay Jehova
Ang paghimo sing sagrado nga pag-alagad kay Jehova mahimo magresulta sa paghingabot kag pag-antos sa mga kamot sang mga nagapamatok sa imo Cristianong mga pagtuluuhan. Mahimo ka magkasubo bangod sini nga pagtilaw, apang may matigayon nga kaayuhan gikan sa sini. Ini nga pagtilaw mahimo magpabakod sang imo pagtuo. Dugang pa, ang iban nga nagaantos sing paghingabot mahimo mapalig-on kag mapabakod nga makita ang imo pagpadayon. Ang mga makakita sang imo maayong paggawi mahimo mapahulag nga himayaon ang Dios. Bisan ang mga nagapamatok sa imo mahimo mahuy-an kag magkilala sang imo maayong mga buhat!—1 Pedro 2:12; 3:16.
Agod indi maluyahan sing buot kon ginahingabot, dapat ka magsalig kay Jehova. Ginapakita sang iya Pulong nga ang paumpaw gikan sa pagtilaw pat-od gid nga magaabot, apang indi ini magaabot sa gilayon suno sa luyag naton. Sa sini nga tion, “dili kamo mag-untat sa paghimo sing maayo.” (2 Tesalonica 3:13) Padayon sa pagpangita sing mga paagi nga madaug kag mabatas ang mga pagtilaw. Bisan pa nga ang kahimtangan daw wala sing paglaum “itungtong ang imo lulan kay Jehova, kag sia magaalay-ay sa imo. Indi gid sia magtugot nga malingkang ang matarong.” (Salmo 55:22) Sa baylo nga magkaluoy sa kaugalingon, hunahunaa kon daw ano ikaw ka bulahan nga makilala si Jehova, nga may duog sa tunga sang iya katawhan, kag mapanag-iyahan ang paglaum nga walay katapusan nga kabuhi.—Juan 3:16, 36.
Hupti ang imo hunahuna nga nasentro sa kinahanglanon gid nga mga butang. Mangamuyo kay Jehova kada adlaw, nagapangabay sing kusog nga makabatas. (Filipos 4:6, 7, 13) Kalimti ang panghunahuna nga magbalos sa mga ginbangdan sang imo pag-antos. Itugyan ini sa mga kamot ni Jehova. (Roma 12:19) Padayon sa pagpangita sing mga paagi nga mapauswag ang imo personalidad, ginapalambo ang Cristianong mga kinaiya. (2 Pedro 1:5-8) Pasalamati ang tanan nga butang nga ginhimo sang iban sa imo, lakip na ang mga gulang nga nagaatipan sing mahigugmaon sang imo espirituwal nga mga kinahanglanon. (Hebreo 13:7, 17) Magmatutom sa Dios, kag ituon ang imo mata sa padya sang kabuhi, nagasalig nga indi ini makuha gikan sa imo bisan sang kamatayon.—Juan 5:28, 29; 17:3.
Kon ikaw karon may daku nga kasubo ukon tuman nga mga pagtilaw, “magsalig kay Jehova sa bug-os mo nga tagipusuon,” kag ang bugana nga kalipay magabulos sa ulihi sa imo kalisdanan kag kabudlayan. (Hulubaton 3:5, 6; Juan 16:20) Ang kapiutan pagabuslan sing kalipay kon ang Dios magabulahan sa imo subong sa ginhimo niya kay Job. Ang karon nga mga pag-antos indi katumbas sa bisan ano kon ipaanggid sa imo padya. (Ipaanggid ang Roma 8:18.) Ang imo matutom nga pagbatas makapalig-on sa iban kag makabulig sa imo sa pagpalambo sing matahom nga Cristianong mga kinaiya nga nagaupod sa “bag-ong personalidad.” (Efeso 4:23, 24; Colosas 3:10, 12-14) Gani, nian, magkuha sing kaisog gikan sa maalamon nga laygay ni apostol Pedro: “Ang mga nagaantos suno sa kabubut-on sang Dios maghimo sing matarong kag magpanugyan sang ila mga kalag sa matutom nga Manunuga.”—1 Pedro 4:19.
[Kapsion sa pahina 23]
Mangin kaangay ni Job. Indi gid madulaan sing paglaum
[Kapsion sa pahina 24]
Magsalig kay Jehova sa bug-os mo nga tagipusuon