Naggradwar nga mga Estudyante sang Pulong sang Dios

SUBONG pag-ilog sa unang-siglo nga mga Cristiano, ang mga Saksi ni Jehova kilala sa bug-os nga kalibutan bangod sang ila pamalaybalay nga pagbantala. Ining hilikuton ginpadaku sa nagabukas nga pamulongpulong sa gradwasyon sang ika-102 nga klase sang Watchtower Bible School of Gilead.

Sang Marso 1, 1997, ginpatalupangod ni Albert Schroeder, isa ka katapo sang Nagadumala nga Hubon sang mga Saksi ni Jehova, ang artikulo sining karon lang sa Pranses nga pamantalaan nga Le Point. Ginsiling sini ang tuhoy sa plano sang Romano Katoliko nga magpamalaybalay sa pagbantala sa Italya. “Agod nga [ang mga misyonero sang Batikano] may magamit man samtang nagakompetensia sila sa teritoryo sang mga Saksi ni Jehova,” siling sang artikulo, “nag-imprinta pa gani ang Batikano sing minilyon ka kopya sang Ebanghelyo ni San Marcos, samtang nagapaindis sila sa mga eksperto [mga Saksi] sa pamalaybalay nga ‘pagpahamtang’ sing maaayong balita.”

Ang 48 ka gradwado nalakip sa mga nagailog sa lantip nga pamaagi sang pagbantala ni Jesus sa pagpalapnag sa Pulong sang Dios. Naghalin sila sa walo ka pungsod pakadto sa Watchtower Educational Center sa Patterson, New York. Sa sulod sang lima ka bulan nga pag-eskwela, gintun-an nila ang bug-os nga Biblia. Nalakip man sa ila klase ang maragtas sang organisasyon sang Dios, mga kahimtangan sa kabuhi sang misyonero, kag ang mga bunga sang espiritu sang Dios. Isa lamang ang katuyuan sining tanan​—⁠ihanda sila sa pagmisyonero sa 17 ka kadutaan diin ipadala sila. Sa ila gradwasyon, ang 5,015 ka tumalambong halin sa lainlain nga pungsod nag-ambit sa kalipay sang okasyon. Anong katapusan praktikal nga mga laygay ang nabaton sadtong mga estudyante sa Gilead?

Suno sa Tion nga Pagpalig-on Para sa Bag-o nga mga Misyonero

Pagkatapos sang nagabukas nga pamulongpulong sang tsirman, ginhatag ni Ralph Walls, isa ka kabulig sang Personnel Committee sang Nagadumala nga Hubon, ang nahaunang malip-ot nga pamulongpulong upod ang praktikal nga laygay para sa bag-o nga mga misyonero. Ang iya tema amo ang “Indi Gid Pagkalimti ang Pagpakita sing Gugma.” Ginpatalupangod niya nga gintagna sang Biblia, sa 2 Timoteo kapitulo 3, nga ang kalibutan dugang nga madulaan sing gugma. Ginhatag niya ining suno sa tion nga pahanumdom sa bag-o nga mga misyonero, nahisuno sa paglaragway sa gugma nga masapwan sa 1 Corinto 13:​1-7: “Subong mga misyonero, mahimo ninyo malabawan ang inyo tulumuron nga oras. Mahimo nga may madamo na kamo nga ihibalo gikan sa paghanas ninyo sa Gilead. Ukon mahimo kita magtrabaho sing makugi sa aton mga asaynment sa sanga. Apang ang tanan naton nga panikasog kag sakripisyo wala sing pulos kon malimtan naton ang pagpakita sing gugma.”

Ang masunod nga namulongpulong amo si Carey Barber, sang Nagadumala nga Hubon, nga nagbinagbinag sing tema nga “Si Jehova Nagatuytoy sa Aton Padulong sa Kadalag-an.” Kutob sang pila pa lamang sila pagkatapos sang Inaway Kalibutanon I, ginatuytuyan ni Jehova nga Dios ang iya matutom nga mga alagad padulong sa kadalag-an sa pagbantala sing maayong balita tuhoy sa iya Ginharian, walay sapayan sang mga paghingabot. Sang 1931, ginbaton sang mga Estudyante sa Biblia, subong amo anay ang pagkilala sa ila, ang ngalan nga mga Saksi ni Jehova, sa kaugot sang mga klero sang Cristiandad. “Ang ika-102 nga klase sang ginhanas sa Gilead nga mga misyonero may daku karon nga pribilehiyo nga makigbahin sing daku sa mahimayaon nga hilikuton sa paghatag sa madamo kon posible sing kahigayunan nga matun-an inang balaan nga ngalan,” siling ni Utod Barber. Gindugang sila sa malaba nga listahan sang 7,131 ka misyonero nga ginhanas sa Eskwelahan sang Gilead kag nagabulig sa pagpasangkad sa pagbantala sing Pulong sang Dios halin sa 54 ka kadutaan sang 1943 tubtob sa 233 ka kadutaan karon.

Ang masunod nga humalambal, si Lloyd Barry, katapo man sang Nagadumala nga Hubon, gradwado anay sang ika-11 nga klase sang Gilead kag nag-alagad subong misyonero sa Japan sa sulod sang kapin sa 25 ka tuig. Nagpalig-on sia sa iya tema nga “Magpadayon sa Sining mga Butang.” “Daku nga kalipay ang inyo masapwan sa pagbatas,” siling niya sa mga estudyante. Anong mga padya ang resulta sang misyonero nga hilikuton ukon sang bisan anong teokratiko nga hilikuton? “Labaw sa tanan, ang aton pagbatas nagapahalipay kay Jehova . . . May daku nga kaayawan sa paghupot sing integridad sa idalom sang pagtilaw . . . Himua ang pagmisyonero nga imo hilikuton sa bug-os nga kabuhi . . . Ang imo padya mangin isa ka makalilipay nga ‘maayo gid.’ ” (Mateo 25:21; Hulubaton 27:11) Sa paghinakop sang iya pamulongpulong, tinagipusuon nga ginpanugyan ni Utod Barry nga ang bag-o nga mga misyonero “magpadayon sa sining mga butang” sa paagi nga mangin determinado nga himuon ang latagon sa pagmisyonero nga ila kabuhi.​—⁠1 Timoteo 4:​16.

Ginpautwas ni Karl Adams nga nakatudlo man sa madamo nga klase sang Gilead ang pamangkot nga “Ano ang Inyo Makita?” Ginsiling niya nga ang makita sang bag-o nga mga misyonero sa ila mga teritoryo nasandig indi lamang sa ila pisikal nga panulok kundi sa mga mata man sang ila tagipusuon. (Efeso 1:​18) Gin-ilustrar ini sa nakita sang Israelinhon nga mga espiya sang gin-usisa nila ang Ginsaad nga Duta. Nakita sang 12 ka espiya ang pareho nga mga butang gikan sa pisikal nga pagtamod, apang duha lamang ang nakakita sa Ginsaad nga Duta gikan sa pagtamod sang Dios. Mahimo man tamdon sang mga misyonero ang mga butang sa nanuhaytuhay nga paagi. Sa pila ka pungsod nga pagaalagaran nila, mahimo nila makita ang kaimulon, pag-antos, kag pagkawalay paglaum. Apang indi sila dapat mangin negatibo kag biyaan ang ila teritoryo. Ginsugid ni Utod Adams ang tuhoy sa isa ka misyonera sang nagligad nga klase nga nagsiling: “Ginparealisar sa akon sining mga eksperiensia nga dapat ako magpabilin diri. Kinahanglan sining mga tawo ang paglaum sa palaabuton. Luyag ko pauswagon ang ila kabuhi.” Naghinakop si Utod Adams paagi sa pagpalig-on sa bag-o nga mga misyonero nga tamdon ang ila teritoryo subong duog nga determinado si Jehova nga himuon nga bahin sang Iya bug-os globo nga Paraiso kag tamdon ang mga tawo didto subong palaabuton nga mga katapo sang bag-ong kalibutan nga katilingban.

Ang katapusan nga diskurso sa sining bahin sang programa ginhatag ni Wallace Liverance, nga nangin misyonero sa sulod sang madamo nga tinuig antes mangin instruktor sa Gilead. “Magpanghikot nga May Paghantop sa Makatilingala nga mga Binuhatan sang Dios” amo ang iya tema. Ang mahinantupon nga pagpanghikot nagalakip sa pagpanghikot nga may kaalam, pag-andam, kag sentido komon. Amo ini ang wala mahimo anay ni Hari Saul.​—⁠1 Samuel 13:​9-​13; 15:​1-​22.

Ang isa ka paagi sang pagpanghikot nga may kaalam amo ang pagbaton sa mga hangkat sang pagpasibu sa bag-o nga paagi sang pagkabuhi, lakip ang pagtuon sing bag-o nga lenguahe kag pagkilala sa mga tawo. Ang mga eksperiensia sang mga misyonero sa pag-atubang sa mga hangkat kag paglandas sa mga balagbag makapalig-on sa ila sa espirituwal sa paagi nga napalig-on sanday Josue kag Caleb samtang ginsakop nila ang duta nga ginhatag sang Dios sa ila.

Mga Interbyu

Ang masunod nga bahin sang programa naglakip sing sunodsunod nga interbyu. Gin-interbyu ni Harold Jackson si Ulysses Glass, rehistrador kag madugay na nga instruktor sa Eskwelahan sang Gilead, nga 85 anyos na karon. Madamong misyonero nga yara gihapon sa latagon ang indi gid malipat sa iya tinuig sang matutom nga pagtudlo kag paghanas. Ang masunod amo si Mark Noumair, instruktor sa Gilead nga nangin misyonero sa Aprika sing tinuig antes nagbuylog sa talapuanan sang Eskwelahan sang Gilead. Gin-interbyu niya ang mga estudyante tuhoy sa ila ministeryo sa tion sang lima ka bulan nga pag-eskwela nila. Maathag nga ginpakita sang ila mga eksperiensia nga may mga tawo nga interesado sa Pulong sang Dios sa lokal nga teritoryo.

Nakighambal dayon sanday Robert Ciranko kag Charles Molohan upod sa eksperiensiado nga mga tawo nga nagaeskwela sa tuhay nga eskwelahan sa pasilidad, isa ka eskwelahan para sa mga manugtatap sang sanga. Ang ila laygay sa naggradwar nga klase naglakip sa kinahanglanon nga mangin mapainubuson kag mag-amot sa paghiusa sang kongregasyon. Nagpanugyan sila nga ang mga gradwado indi dapat magpaabot kon ano ang matabo sa misyonero nga hilikuton kundi, sa baylo, kinabubut-on nga batunon ang bisan ano nga kahimtangan. Wala sing duhaduha nga ang pag-aplikar sining laygay magabulig sa bag-o nga mga misyonero sa pagtuman sang ila asaynment subong mga manunudlo sing Pulong sang Dios.

Sa katapusan, si Theodore Jaracz, katapo sang Nagadumala nga Hubon, nagpamulongpulong sa tumalambong sa tema nga “Ano ang Nagaimpluwensia Kay Sin-o?” Ginpaathag niya nga kon kita nga mga Cristiano nagapadayag sing mga bunga sang espiritu, mangin maayo kita nga impluwensia sa iban nga tawo. “Ang mga misyonero nga ginapadala sang organisasyon ni Jehova nakahimo sing dalayawon nga mga rekord sang pag-impluwensia sa mga tawo sa isa ka maayo, espirituwal nga paagi,” siling niya. Ginkutlo niya dayon ang pila ka komento sang mga indibiduwal nga nabuligan sa pag-alagad sa Dios subong resulta sang maayo nga mga halimbawa nga ginpakita sang mga misyonero. “Kabay nga huptan ninyo ang reputasyon nga natigayon sang katawhan ni Jehova kag padayon nga magpanuktok sa mga ganhaan sa inyo teritoryo sa iban nga pungsod sa pagpangita sa mga takus . . . Subong man, paagi sa inyo matarong, kag matinlo nga paggawi, pamatuki ang espiritu sining kalibutan, kag mangin maayo nga impluwensia sa kadayawan kag kadungganan ni Jehova,” hinakop niya.

Sa pagsumaryo sa programa, ginpaambit sang tsirman ang mga pagtamyaw halin sa malapit kag malayo nga mga lugar kag dayon ginpanghatag ang mga diploma kag ginlawag ang mga teritoryo sang mga misyonero. Pagkatapos sadto, ginbasa sang isa sang mga gradwado ang sulat sang klase nga nagapabutyag sing pagpasalamat sa gin-aman nga instruksion. Sing maathag, ang gradwasyon sang ika-102 nga klase nagpahulag sa tanan nga tumalambong nga mangin mas determinado nga padayunon ang pagbantala sing Pulong sang Dios.

[Piktyur sa pahina 31]

Ika-102 nga Naggradwar nga Klase sang Watchtower Bible School of Gilead

Sa listahan sa ubos, ang mga idas nanumeruhan halin sa atubang pa likod, kag ang mga ngalan nalista halin sa wala pa tuo sa tagsa ka idas.

(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.