Abyan Bala Ikaw sang Dios?—Kon Ano ang Ginapakita sang Imo mga Pangamuyo
NAKABATI na bala ikaw sing dihungod sa duha ka tawo nga nagahambalanay? Wala sing duhaduha madali mo nga nahibaluan ang sahi sang ila kaangtanan—kon bala suod gid sila ukon estranghero, kilalahay lamang ukon suod, masaligan nga mag-abyan. Sa amo man nga paagi, mapakita sang aton mga pangamuyo ang aton kaangtanan sa Dios.
Ang Biblia nagapasalig sa aton nga ang Dios “indi malayo sa tagsatagsa sa aton.” (Binuhatan 17:27) Sa pagkamatuod, ginaagda niya kita nga kilalahon sia. Mahimo pa gani nga mangin abyan niya kita. (Salmo 34:8; Santiago 2:23) Mahimo kita makapakigsuod gid sa iya! (Salmo 25:14) Maathag nga ang aton kaangtanan sa Dios amo ang labing bilidhon nga butang nga mahimo panag-iyahan naton nga dihimpit nga mga tawo. Kag ginapakabahandi ni Jehova ang aton pagpakig-abyan sa iya. Matuod ini bangod ang aton pagpakig-abyan sa iya napasad sa aton pagtuo sa iya bugtong nga Anak, nga naghatag sang iya kabuhi tungod sa aton.—Colosas 1:19, 20.
Busa, dapat ginapakita sang aton mga pangamuyo ang tudok nga gugma kag apresasyon kay Jehova. Apang, nabatyagan mo na bala nga ang imo mga pangamuyo, bisan pa hanuot, daw wala sing tinagipusuon nga balatyagon? Kinaandan ini. Ano ang yabi agod mapauswag ini? Ang pagpalambo sang imo pagpakig-abyan kay Jehova nga Dios.
Pagpangita sing Tion Para sa Pagpangamuyo
Una sa tanan, nagakinahanglan sing tion ang pagpatubo kag pagpalambo sa pag-abyanay. Mahimo nga adlaw-adlaw magbugno ikaw ukon makigsugilanon pa gani sa madamo nga tawo—sa mga kaingod, mga kaupod sa trabaho, mga drayber sang bus, kag mga tindera. Walay sapayan, wala ini nagakahulugan nga mga abyan mo gid sila. Ang pag-abyanay nagatubo samtang nagapakighambal ikaw sing madamong butang sa isa, halin sa pag-uluistorya lamang tubtob sa pagpahayag sang imo nasulod nga mga balatyagon kag mga panghunahuna.
Sa amo man nga paagi, ang pangamuyo nagabulig sa aton nga magsuod kay Jehova. Apang dapat ini hatagan sing bastante nga tion; indi lamang isa ka malip-ot nga pangamuyo sang pagpasalamat sa tigkalaon ang kinahanglanon. Kon pirme ikaw nagapakighambal kay Jehova, labi pa nga mahangpan mo ang imo mga balatyagon, mga motibo, kag mga buhat. Masapwan mo ang mga solusyon sa mabudlay nga mga problema samtang ginapahanumdom sang espiritu sang Dios ang mga prinsipio gikan sa iya Pulong. (Salmo 143:10; Juan 14:26) Dugang pa, samtang nagapangamuyo ikaw, mangin matuod pa gid si Jehova sa imo, kag dugang nga mahibaluan mo ang iya mahigugmaon nga interes kag pag-ulikid sa imo.
Matuod gid ini ilabi na kon maeksperiensiahan mo ang sabat sa imo mga pangamuyo. Si Jehova ‘makahimo sing lakas kabugana labaw sa tanan nga butang nga aton ginapangayo ukon ginahunahuna’! (Efeso 3:20) Wala ini nagakahulugan nga nagamilagro ang Dios tungod sa imo. Apang, paagi sa iya nasulat nga Pulong, sa mga publikasyon sang matutom nga ulipon nga klase, ukon sa mga ginahambal sang mahigugmaon nga mga kauturan, mahimo sia mag-aman sa imo sing kinahanglanon nga laygay ukon panuytoy. Ukon mahimo ka niya hatagan sing kinahanglanon nga kusog agod makabatas ukon pamatukan ang pagsulay. (Mateo 24:45; 2 Timoteo 4:17) Ina nga mga eksperiensia nagapuno sa aton tagipusuon sing apresasyon para sa aton langitnon nga Abyan!
Sa amo ang isa dapat maghatag sing tion sa pagpangamuyo. Matuod, kulang ang tion sa sining makapahuol nga mga adlaw. Apang kon nagaulikid gid ikaw sa isa ka tawo, masami ka nga nagapangita sing tion nga mahinguyang upod sa iya. Talupangda ang ginpahayag sang isa ka salmista: “Subong sa usa nga ginahidlaw sa tubig sang mga sapa, sa amo ang akon kalag ginahidlaw sa imo, O Dios. Ang akon kalag nauhaw gid sa Dios, sa Dios nga buhi. San-o bala ako magakari kag magaatubang sa Dios?” (Salmo 42:1, 2) Ginahidlaw man bala ikaw nga makighambal sa Dios? Nian himusli ang tion sa paghimo sini!—Ipaanggid ang Efeso 5:16.
Halimbawa, mahimo mo tilawan ang pagbangon sa kaagahon agod makapangamuyo sing pribado. (Salmo 119:147) Indi ka bala makatulog kon kaisa sa gab-i? Kon amo, kaangay sa salmista, mahimo mo tamdon inang makatulublag nga mga tion subong kahigayunan nga ipahayag sa Dios ang imo mga kabalaka. (Salmo 63:6) Ukon mahimo nga dapat lamang ikaw mangamuyo sing malip-ot sa madamong beses kon adlaw. Ang salmista nagsiling sa Dios: “Sa imo nagapanawag ako sa bug-os nga adlaw.”—Salmo 86:3.
Pagpauswag sa Kalidad sang Aton mga Pangamuyo
Kon kaisa mabuligon man ang pagpalawig sang imo mga pangamuyo. Sa tion sang malip-ot nga pangamuyo, mahimo mo ihambal ang simple lamang nga mga butang. Apang kon mangamuyo ikaw sing malawig kag tudok, labi mo nga mapahayag ang imo mga panghunahuna kag nasulod nga mga balatyagon. Isa ka bes ginhinguyang ni Jesus ang bug-os nga gab-i sa pagpangamuyo. (Lucas 6:12) Wala sing duhaduha masapwan mo nga ang imo mga pangamuyo mangin hanuot kag makahulugan kon wala mo ini ginadalidali.
Wala ini nagakahulugan nga magpalikuliko ikaw kon diutay ang imo inughambal; ukon sulitsuliton ini nga wala sing pulos. Si Jesus nagpaandam: “Kon nagapangamuyo, dili maghambal sing sulitsulit nga mga butang, subong sang ginahimo sang mga tawo sa pungsod, kay ginahunahuna nila nga pamatian sila tungod sang ila madamong paghambal. Gani, dili kamo magpakig-angay sa ila, kay ang Dios nga inyo Amay nakahibalo sang mga butang nga inyo kinahanglan sa wala pa kamo magpangayo sa iya.”—Mateo 6:7, 8.
Ang pangamuyo mas makahulugan kon hunahunaon mo sing abanse ang mga butang nga luyag mo ihambal. Madamo gid ang mahimo ihambal—ang aton kalipay sa ministeryo, ang aton mga kaluyahon kag mga kakulangan, ang aton kaluya sing buot, ang aton mga kabalaka sa ekonomiya, ang mga pag-ipit sa trabaho ukon sa eskwelahan, ang kaayuhan sang aton pamilya, kag ang espirituwal nga kahimtangan sang aton lokal nga kongregasyon, sa paghinambit sing pila lamang.
Nagalagawlagaw bala kon kaisa ang imo hunahuna kon nagapangamuyo ikaw? Nian panikasugi sing dugang agod makakonsentrar. Ti, si Jehova handa sa ‘pagpamati sa aton mga pangabay.’ (Salmo 17:1) Indi bala dapat handa kita sa pagpanikasog nga hatagan sing igtalupangod ang aton mga pangamuyo? Huo, ‘ipahamtang ang inyo hunahuna sa mga butang sang espiritu,’ kag indi ini pagpalagawlagawa.—Roma 8:5.
Importante man ang paagi sang aton pagtawag kay Jehova. Walay sapayan nga luyag niya nga tamdon naton sia subong abyan, indi gid naton pagkalimtan nga nagapakighambal kita sa Soberano sang uniberso. Basaha kag pamalandungi ang makapulunaw nga danyag nga ginlaragway sa Bugna kapitulo 4 kag 5. Nakita didto ni Juan sa palanan-awon ang pagkahalangdon sang Isa nga ginadangpan naton sa pangamuyo. Daw ano nga pribilehiyo nga makadangop kita kag makapalapit sa “Isa nga nagalingkod sa trono”! Indi gid naton luyag nga ang aton panghambal mangin dimatinahuron ukon makapanubo. Sa baylo, dapat gid kita manikasog nga himuon ang ‘mga pulong sang aton baba kag ang pagpamalandong sang aton tagipusuon nga kalahamut-an kay Jehova.’—Salmo 19:14.
Apang, dapat naton mahisayran, nga wala kita nagapadayaw kay Jehova paagi sa matanlas nga panghambal. Nahamuot sia sa aton matinahuron, tinagipusuon nga mga tinaga, bisan ano man ka simple ang pagpahayag sini.—Salmo 62:8.
Lugpay kag Paghangop sa Tion sang Pagkinahanglan
Kon nagakinahanglan kita sing bulig kag lugpay, masami kita nagadangop sa isa ka suod nga abyan para sa pagsakdag kag simpatiya. Ti, wala na sing abyan nga mas madali palapitan sangsa kay Jehova. ‘Isa sia ka handa gid nga kabulig sa tion sang kalisdanan.’ (Salmo 46:1) Subong “Dios sang tanan nga paglugpay,” mas mahangpan niya ang aton kahimtangan sangsa kay bisan sin-o. (2 Corinto 1:3, 4; Salmo 5:1; 31:7) Kag may matuod sia nga kahanuklog kag kaawa sa mga nalisdan. (Isaias 63:9; Lucas 1:77, 78) Bangod nahantop naton nga si Jehova isa ka mahinangpanon nga abyan, wala kita nagapangalag-ag sa pagpakighambal sa iya sing hanuot, sing hugot sa balatyagon. Ginapahulag kita sa pagpabutyag sang aton tudok nga mga kahadlok kag mga kabalaka. Sa amo maeksperiensiahan naton mismo kon paano ang ‘paglipay [ni Jehova] nagapasadya sa aton kalag.’—Salmo 94:18, 19.
Kon kaisa nagabatyag kita nga indi takus sa pagdangop sa Dios bangod sang aton mga kasaypanan. Apang ano kon ang isa ka suod nga abyan nakasala batok sa imo kag nangayo sing pasaylo? Indi ka bala mapahulag nga lipayon kag pasaligon sia? Ngaa, nian, wala mo ini ginapaabot kay Jehova? Mahigugmaon sia nga nagapatawad sa iya mga abyan nga nakasala bangod sang tawhanon nga pagkadihimpit. (Salmo 86:5; 103:3, 8-11) Bangod nahibaluan ini, wala kita nagapangalag-ag sa pagtu-ad sang aton mga kasaypanan sa iya; masaligan naton ang iya gugma kag kaluoy. (Salmo 51:17) Kon ginapung-awan kita bangod sang aton mga kakulangan, makalugpay sa aton ang mga pinamulong sa 1 Juan 3:19, 20: “Sa sini mahibaluan naton nga naghalin kita sa kamatuoran, kag mapasalig naton ang aton tagipusuon sa atubangan niya tuhoy sa bisan ano nga ginatagudilian kita sang aton tagipusuon, bangod ang Dios daku pa sa aton tagipusuon kag nakahibalo sang tanan nga butang.”
Apang, indi na kinahanglan nga magkalisod kita agod mabatyagan ang mahigugmaon nga pag-ulikid sang Dios. Interesado si Jehova sa bisan anong butang nga mahimo mag-apektar sang aton espirituwal kag emosyonal nga kaayuhan. Huo, indi gid naton paghunahunaon nga ang aton mga balatyagon, panghunahuna, kag mga kabalaka indi tuman ka importante agod hinambitan sa pangamuyo. (Filipos 4:6) Kon kaupod mo ang isa ka suod nga abyan, ginahambalan lamang bala ninyo ang daku nga mga hitabo sa imo kabuhi? Indi bala nga nagahambalanay man kamo tuhoy sa magagmay nga mga butang? Sa amo man nga paagi, hilway ikaw nga makapakighambal kay Jehova tuhoy sa bisan ano nga bahin sang imo kabuhi, nakahibalo nga ‘nagaulikid sia sa imo.’—1 Pedro 5:7.
Sa pagkamatuod, ang pag-abyanay indi gid magdugay kon ang ginahambal mo pirme tuhoy lamang sa imo kaugalingon. Sa amo man, ang aton mga pangamuyo indi dapat makinaugalingon. Dapat man naton ipabutyag ang aton gugma kag pag-ulikid kay Jehova kag sa iya mga interes. (Mateo 6:9, 10) Ang pangamuyo indi lamang kahigayunan sa pagpangayo sing bulig sa Dios kundi isa man ka kahigayunan sa pagpasalamat kag pagdayaw. (Salmo 34:1; 95:2) ‘Ang pagkuha sing ihibalo’ paagi sa regular nga personal nga pagtuon magabulig sa aton tuhoy sini, kay nagabulig ini sa aton nga makilala pa gid si Jehova kag ang iya mga dalanon. (Juan 17:3) Mahimo masapwan mo nga makabulig kon basahon ang tulun-an sang Salmo kag talupangda kon paano ginapabutyag sang iban nga matutom nga mga alagad ang ila kaugalingon kay Jehova.
Ang pagpakig-abyan kay Jehova isa gid ka hamili nga dulot. Kabay nga ipakita naton nga ginaapresyar naton ini paagi sa paghimo sang aton mga pangamuyo nga labi pa ka suod, tinagipusuon, kag personal. Sa amo matigayon naton ang kalipay nga ginpabutyag sang salmista, nga nagsiling: “Malipayon ang isa nga imo ginapili kag ginapapalapit sa imo.”—Salmo 65:4.
[Kapsion sa pahina 28]
Makapangamuyo kita sa Dios sa bug-os nga adlaw sa tagsa ka higayon