Mga Pamangkot Gikan sa mga Bumalasa

Nalipay kita sang matun-an naton ang parabola ni Jesus tuhoy sa mga karnero kag mga kanding. Sa pagbinagbinag sa bag-ong paghangop nga ginpresentar sa “Ang Lalantawan” sang Oktubre 15, 1995, makasiling bala gihapon kita nga ang mga Saksi ni Jehova karon nagapakigbahin sa pagpain nga hilikuton?

Huo. Natural lamang, madamo ang naghunahuna tuhoy sini bangod ang Mateo 25:​31, 32, nagasiling: “Kon magkari ang Anak sang tawo sa iya himaya, kag ang tanan nga anghel kaupod niya, nian magalingkod sia sa iya mahimayaon nga trono. Kag tipunon sa atubangan niya ang tanan nga pungsod, kag painpainon niya ang mga tawo, subong sang manugpahalab nga nagapain sang mga karnero sa mga kanding.” Ginpakita sang Ang Lalantawan Oktubre 15, 1995, kon ngaa ining mga bersikulo naaplikar pagkatapos nga nagsugod ang dakung kapipit-an. Si Jesus magaabot sa iya himaya kaupod sa iya mga anghel kag magalingkod sa iya trono sang paghukom. Nian, painpainon niya ang mga tawo. Sa anong kahulugan? Magahukom sia pasad sa nahimo ukon wala mahimo sang mga tawo antes sadtong tion.

Mapaanggid naton ini sa isa ka legal nga proseso nga nagadul-ong sa isa ka kaso sa korte. Ang mga ebidensia ginatipon sa sulod sang malawig nga tion antes magaabot ang tion sang pagdesisyon kag pagpamatbat sang korte. Ang mga ebidensia sa kon bala ang mga tawo nga nagakabuhi karon mangin mga karnero ukon mga kanding ginatipon sa malawig na nga tion. Kag padayon pa ini nga ginatipon. Apang kon maglingkod na si Jesus sa iya trono, ang kaso matapos na. Handa na sia sa paghukom. Ang mga tawo painpainon padulong sa walay katapusan nga kalaglagan ukon sa walay katapusan nga kabuhi.

Apang, ang katunayan nga ang pagpain sa mga tawo padulong sa kabuhi ukon kamatayon nga ginhinambitan sa Mateo 25:32 palaabuton pa wala nagakahulugan nga wala sing nagakatabo nga pagpainpain, ukon pagbahinbahin antes sina. Ginahinambitan sang Biblia sa Mateo kapitulo 13, ang isa ka pagpain nga hilikuton nga natabo antes sini. Makawiwili nga ginabinagbinag ini sang libro nga Nahiusa sa Pagsimba sa Lamang Matuod nga Dios, pahina 179-80, sa tig-ulo nga “Pagpain sa Katawhan”.a Ang libro nagasiling: “May yara iban pa importante nga mga hitabo nga gin-angot ni Jesus sa katapusan sang sistema sang mga butang. Ang isa sini amo ang pagpain sa ‘mga anak sang Ginharian’ gikan sa ‘mga anak sang malauton.’ Ginhambal ini ni Jesus sa iya parabola nahanungod sa latagon sang trigo nga ginsabwagan sang kaaway sing mga gamhon.”

Ginapatuhuyan sang libro ang ilustrasyon ni Jesus sa Mateo 13:​24-30 kag ginpaathag sa mga bersikulo 36-43. Talupangda sa bersikulo 38 nga ang maayo nga mga binhi sang trigo nagalaragway sa mga anak sang Ginharian, apang ang mga gamhon nagalaragway sa mga anak sang malauton. Ginapakita sang bersikulo 39 kag 40 nga sa ‘katapusan sang sistema sang mga butang’​—⁠sa tion nga nagakabuhi kita karon​—⁠ang mga gamhon ginatipon. Ginapain sila kag sa ulihi sunugon, laglagon.

Ginapatuhuyan sang ilustrasyon ang hinaplas nga mga Cristiano (nga gintawag mga utod ni Jesus sa parabola tuhoy sa mga karnero kag mga kanding). Maathag gihapon nga ang importante nga pagpain nagakatabo sa aton tion, nga ginakilala ang mga hinaplas gikan sa nagapangangkon nga mga Cristiano apang nagapamatuod sang ila kaugalingon nga “mga anak sang malauton.”

Naghatag si Jesus sing iban pa nga mga halimbawa sang pagbahinbahin sa mga tawo, ukon pagpain. Dumduma nga nagsiling sia nahanungod sa malapad nga dalan nga nagapadulong sa kalaglagan: “Madamo ang nagasulod sa sini.” (Mateo 7:​13) Indi lamang yadto isa ka komento tuhoy sa katapusan nga resulta. Komento yadto tuhoy sa nagapadayon nga hitabo, subong nga matuod ini karon sa pila nga nakasapo sa masipot nga dalan nga nagapadulong sa kabuhi. Dumduma man, nga sang ginpadala niya ang mga apostoles, nagsiling si Jesus nga makasapo sila sing pila nga mga takus. Ang iban mangin indi takus, kag itaktak sang mga apostoles ang yab-ok sa ila mga tiil ‘para pamatuod batok’ sa sinang mga tawo. (Lucas 9:⁠5) Indi bala nga amo man ang nagakatabo samtang ginahimo sang mga Cristiano ang ila ministeryo sa publiko karon? Ang iban nagabaton, samtang ang iban nagasikway sa mensahe sang Dios nga aton ginadala.

Ang mga artikulo sa Ang Lalantawan nga nagabinagbinag nahanungod sa mga karnero kag mga kanding nagsiling: “Samtang ang paghukom nga ginlaragway sa parabola yara pa sa palaabuton, bisan sa karon may importante nga butang nga nagakatabo. Kita nga mga Cristiano nagapakigbahin sa nagaluwas kabuhi nga hilikuton sang pagbantala sing mensahe nga ginabangdan sang pagbinahinbahin sa mga tawo. (Mateo 10:​32-​39).” Sa sinang teksto sa Mateo kapitulo 10, aton mabasa nga si Jesus nagsiling nga ang pagsunod sa iya pagabangdan sang pagbahinbahin​—⁠amay batok sa anak nga lalaki, anak nga babayi batok sa iloy.

Sa katapusan, ginapangunahan sang hinaplas sang espiritu nga mga kauturan ni Cristo ang bug-os kalibutan nga pagbantala sing mensahe sang Ginharian. Sa tion nga mabatian ini sang mga tawo kag maghulag sing positibo ukon indi, ginapakilala nila ang ila kaugalingon. Kita nga mga tawo indi mahimo, kag indi dapat, magsiling, ‘Ini nga tawo isa ka karnero; inang isa kanding,’ suno sa ginapahangop sa Mateo kapitulo 25. Apang, ang pagdala naton sing maayong balita sa mga tawo nagatugot sa ila nga ipakita ang ila panindugan​—⁠kon ano sila nga sahi sang mga tawo kag kon paano nila ginatamod ang mga kauturan ni Jesus. Busa, kaangay sa nagadugang nga ebidensia para sa isa ka kaso sa korte, ang pagbahinbahin sa ulot sang mga nagasakdag sa kauturan ni Jesus kag sa mga wala nagasakdag sa ila labi nga nagaathag. (Malaquias 3:​18) Subong sang ginpakita sang Ang Lalantawan, sa dili madugay magalingkod si Jesus sa iya trono kag magahatag sing sentensia, nian hukman ang mga tawo kag painpainon sa bug-os nga kahulugan sa kabuhi ukon sa kamatayon.

[Footnote]