Report sang mga Manugbantala sang Ginharian

Nakita Niya “ang Perlas nga Daku sing Bili”

“ANG ginharian sang langit kaangay sa isa ka negosyante nga nagpangita sing maayo nga mga perlas. Sang nakita niya ang isa ka perlas nga daku sing bili, naglakat sia kag ginbaligya ang tanan niya nga pagkabutang kag ginbakal ang amo nga perlas.” Paagi sa sining mga pulong, gin-ilustrar ni Jesus ang pagkamalahalon sang Ginharian sang Dios. (Mateo 13:​45, 46) Yadtong nakahibalo sa bili sang Ginharian masami nga nagahimo sing daku nga mga sakripisyo agod mabaton ini. Gin-ilustrar ini sa masunod nga eksperiensia sa Pingtung County, sa Taiwan.

Sang 1991, sanday G. kag Gng. Lin nagsugod sa pagtuon sa Biblia upod sa mga Saksi ni Jehova. Sang mahibal-an ini sang isa ka klero sa ila duog, ginhaylo niya sila nga magsulod sa iya simbahan. Sanglit ang mga Lin may negosyo nga nagabaligya sing karne sang baboy kag dugo sang pato sa tiendahan, ginpamangkot nila kon ano ang masiling sining klero bahin sa sini. “Ang tanan nga butang nga gintuga sang Dios mahimo nga makaon sang tawo,” sabat niya. Sa pihak nga bahin, ang mga Saksi nagpalig-on sa ila nga binagbinagon kon ano ang ginasiling sang Pulong sang Dios sa sini nga butang. Nahibaluan nila nga ginatamod ni Jehova nga Dios ang dugo subong balaan, kay ‘ang kabuhi sang tinuga amo ang dugo.’ (Levitico 17:​10, 11, The New English Bible) Ang matuod nga Cristiano nian dapat “maglihi . . . sa dugo.” (Binuhatan 15:20) Subong resulta sang pag-usisa sa Kasulatan sa sini nga butang, nagdesisyon ang mga Lin nga mag-untat sa pagbaligya sing dugo, walay sapayan nga amo ini ang daku nga ginahalinan sang ila kita. Apang, sa sulod lang sang malip-ot nga tion, nag-atubang sila sing daku pa nga pagtilaw.

Sang wala pa makatuon ang mga Lin sing kamatuoran, nakatanom sila sing 1,300 ka puno sang bunga sa ila duta. Bisan lima ka tuig pa antes mapuslan ining tanom, kon ini magpamunga na, makapaabot sila sing kita nga $77,000 sa isa ka tuig. Samtang nagahilapit ang tion sa una nga pagdugos, ang mga Lin dapat maghimo sing isa ka importante nga desisyon. Natun-an nila sa Biblia nga ang mga Cristiano dapat magtinlo sang ila kaugalingon ‘sa tanan nga kadagtaan sa unod kag espiritu’ paagi sa indi paggamit, ukon pagsakdag sa dimatinlo nga mga batasan subong sang pagtabako, pag-abuso sa droga, kag pagmama. (2 Corinto 7:⁠1) Ano ang dapat nila himuon?

Bangod ginatublag sang konsiensia, si G. Lin nagdesisyon nga untatan ang iya pagtuon sa Biblia. Sa amo man nga tion, nakabaligya si Gng. Lin sing bunga sang gulang na nga mga tanom kag nakaganansia sing sobra sa $3,000. Panugod lamang ini sang ila matigayon kon ila atipanon ang ila mga kahoy. Apang, padayon nga ginatublag si G. Lin sang iya konsiensia.

Padayon niya nga ginahunahuna ini tubtob isa ka adlaw ginpangabay niya ang lokal nga mga Saksi nga pudlon ang iya mga puno sang bunga. Ginpaathag sang mga Saksi nga iya ina nga desisyon; busa, dapat nga sia ang magdala “sang iya kaugalingon nga lulan” kag sia amo ang magapulod sang kahoy. (Galacia 6:​4, 5) Ginpalig-on nila sia nga dumdumon ang saad sa 1 Corinto 10:​13, nga nagasiling: “Walay pagsulay nga nakaabot sa inyo nga indi masarangan sang tawo. Apang ang Dios matutom, kag indi magtugot nga sulayon kamo labaw sa inyo masarangan, kundi kaupod sang pagsulay magahatag man sia sing lulutsan, agod nga makasarang kamo sa pagbatas.” Dugang nga nagpangatarungan ang mga Saksi, nga nagsiling: “Kon kami ang magpulod sing kahoy, mahimo ikaw maghinulsol kag kami ang imo basulon sa nadula.” Pila ka adlaw sang ulihi, nakamata si Gng. Lin, sang isa ka aga, sa gahod sang chain saw. Ginapulod sang iya bana kag kabataan ang mga puno sang bunga!

Napamatud-an ni G. Lin nga si Jehova nagatuman sang Iya saad. Nakakita sia sing trabaho nga nakahatag sa iya sing matinlo nga konsiensia, kag nakahimo sa iya nga isa ka manugdayaw ni Jehova. Nabawtismuhan sia sa isa ka sirkito nga asambleya sang mga Saksi ni Jehova sadtong Abril 1996.

Huo, maathag nga si G. Lin “nagbaligya sang iya tanan nga pagkabutang” kag nagbakal sing isa ka “perlas nga daku sing bili.” May yara sia karon dimapaanggid nga pribilehiyo nga isa ka personal nga relasyon kay Jehova nga Dios kag pag-alagad sa interes sang Iya Ginharian.