Ginluwas sa Tion sang mga Kalamidad — Watchtower ONLINE NGA LIBRARY

Ginluwas sa Tion sang mga Kalamidad

ANG lima-ka-panalgan nga department store sa Seoul, Korea, hinali nga nawasdak, kag ginatos ka tawo ang nabukot sa sulod! Ang mga manugsalbar nangabudlay adlaw kag gab-i agod maluwas ang madamo nga kabuhi kon mahimo. Samtang nagaligad ang mga inadlaw, halos nadula na ang posibilidad nga makakita sing iban pa nga mga buhi nga natabunan sing tinumpok nga mga semento kag salsalon.

Sang halos nadula na ang tanan nga paglaum, may makahalawhaw nga butang nga natabo. Isa ka mahinay kag masinulub-on nga tingog ang nabatian sa idalom sang kagulub-an. Madasig nga nagkutkot ang mga manugsalbar nga nagagamit lamang sang ila mga kamot agod makuha ang 19-anyos nga babayi nga nalubong sing buhi sa sulod sang 16 ka malawig nga adlaw. Ang nawasdak nga puwertahan sang elebeytor nangin pangamlig kag panaming niya gikan sa nagakalahulog nga mga tonelada nga semento. Bisan pa namalhan sing tubig kag napilasan sing malubha, nakalampuwas sia sa kamatayon!

Sa karon, halos kada bulan may mga balita tuhoy sa kalamidad, ayhan isa ka linog, mabaskog nga bagyo, naglupok nga bulkan, aksidente, ukon tiggulutom. Kag ang makahalawathawat nga mga sugilanon sang mga manugsalbar kag mga nakasalbar nagganyat kag nagwili sa minilyon nga nagabantay sa balita. Apang, ang paandam tuhoy sa nagapakari nga kalamidad—⁠isa nga daku pa sangsa bisan ano nga kalamidad sa maragtas sang tawo—⁠kinaandan nga wala ginasapak. (Mateo 24:21) Ginalaragway sang Biblia ining nagapakari nga hitabo sa sining mga pinamulong: “Yari karon! Ang kalamidad magalapnag sa pungsod pa pungsod, kag ang daku nga unos magagikan sa mga ukbong sang duta. Kag ang mga pinatay ni Jehova sa sadto nga adlaw mangin kutob sa isa ka ukbong sang duta tubtob gid sa isa ka ukbong sang duta. Indi sila paghayaan, ukon tipunon ukon ilubong. Mangin ipot sila sa kadaygan sang duta.”—⁠Jeremias 25:32, 33.

Makakilibang gid nga mga pinamulong! Apang indi kaangay sang kinaugali nga mga kalamidad kag mga aksidente, ini nga kalamidad indi mangin isa ka patarasak nga pagpatay. Sa katunayan, ang paglampuwas—⁠ang imo paglampuwas—⁠posible!

Isa ka Hilingagawon nga Tion

Agod mahangpan ini sing bug-os, dapat mahangpan sang isa kon ngaa ining tugob-globo nga kalamidad mahanabo una sa tanan. Sa katunayan, amo lamang ini ang tunay nga solusyon sa mga problema sang katawhan. Pila lamang ka tawo karon ang nagabatyag nga luwas kag may kalig-unan. Walay sapayan sang labing maayo nga mga panikasog sang siensia, ang makalalaton nga mga balatian padayon nga nagapapas sa populasyon sang duta. Ang mga inaway nga resulta sang relihioso, tribo, kag politikal nga mga di-paghisugtanay nagkutol sang linibo ka kabuhi. Ang gutom nagadugang sa kalisod kag pag-antos sang inosente nga mga lalaki, babayi, kag kabataan. Ang malain nga moralidad nagapaluya sa pinakapundasyon sang katilingban; bisan ang mga kabataan ginhimo nga malain.

Ginlaragway gid sing husto sang isa ka tagna sa Biblia, nga ginsulat sang nagligad nga kapin sa 1,900 ka tuig, ang aton kahimtangan. Ini nagasiling: “Dapat ninyo mahibaluan nga sa katapusan nga mga adlaw ang mga tion mapuno sing katalagman.”—⁠2 Timoteo 3:1, The New Testament in Modern English, ni J. B. Phillips; ipaanggid ang Mateo 24:3-22.

Daw rasonable bala para sa imo nga ang isa ka mahigugmaon nga Dios indi magasapak sa aton kahimtangan? Ang Biblia nagasiling: “Sia nga matuod nga Dios, nga Naghuman sang duta kag Naghimo sini, . . . wala magtuga sini nga walay pulos, ginhuman [niya] ini agod puy-an.” (Isaias 45:18) Huo, sa baylo nga tugutan ining matahom nga planeta nga maguba kag malaglag ang tanan nga pumuluyo sini, ang Dios magapasilabot. Ang pamangkot amo, Paano niya ini himuon?

Pilia ang Kabuhi!

Ang Biblia nagasabat sa Salmo 92:7: “Kon ang malauton magtubo subong sang hilamon kag kon ang tanan nga manughikot sang kalautan maglambo, ini amo agod nga laglagon sila sing dayon.” Ang solusyon sang Dios sa mga problema sa duta amo ang pagdula mismo sa kalautan. Sing makalilipay, wala ini nagakahulugan nga ang tanan nga tawo kinahanglan nga dulaon. Ang Salmo 37:34 nagapasalig sa aton: “Maglaum kay Jehova kag bantayi ang iya dalanon, kag sia magapataas sa imo sa pagpanag-iya sang duta. Kon ang malauton utdon, makita mo ini.”

Ginapakita sining mga pinamulong nga may yara kahigayunan nga makalampuwas sa labing daku nga kalamidad nga mahanabo sa katawhan. Ang Dios naghatag sa aton sing mapilian. Ang laygay ni Moises sa mga Israelinhon samtang manugsulod sila sa Ginsaad nga Duta maaplikar man sa aton karon: “Ginbutang ko sa atubangan mo ang kabuhi kag ang kamatayon, ang pagpakamaayo kag ang pagpakamalaut; kag dapat mo pilion ang kabuhi agod nga magkabuhi ka, ikaw kag ang imo mga kaliwatan.” (Deuteronomio 30:19) Apang paano ang isa ‘makapili sing kabuhi’ kag makalampuwas? Ano gid bala ang kahulugan sang matuod nga kaluwasan?

[Picture Credit Line sa pahina 2]

[Picture Credit Line sa pahina 3]

Yunhap News Agency/Sipa Press