Mabudlay nga mga Tion Para sa mga Tigulang
SI NANAY Oniyan, nga 68 anyos, nagapuyo sa isa ka mayor nga siudad sa Katundan nga Aprika. Sang lamharon pa sia, ginhanduraw niya ang iya pagtigulang nga nagahigda sing malinong, nga ginapalibutan sang iya mga kabataan kag mga apo. Sa baylo ginhinguyang niya ang iya inadlaw sa pagbaligya sing mabugnaw ilimnon nga tubig sa idalom sang mainit nga adlaw. Ang iya diutay nga kinitaan nagabulig sa iya nga mabuhi. Ang iya duha ka anak nga lalaki nagapuyo sa iban nga pungsod sa malayo. Madugay na nga wala sila makapadala sa iya sing kuwarta.
Sang una, ang mga tigulang sa Aprika ginatahod sing daku. Ginatahod sila bangod sang ila eksperiensia kag ihibalo, upod ang kaalam kag paghantop nga ila ginapakita. Nagabulig sila sa pagpadaku sa mga apo. Ginapangayuan sila sing mga laygay kag pahanugot sang mga pamatan-on. Ang mga tawo nagakabuhi suno sa laygay sang Biblia: “Magtindog ka sa atubangan sang ulo nga ubanon, kag magpakita ka sing patugsiling sa tigulang nga lalaki [ukon, babayi].”—Levitico 19:32.
Nagbag-o na ang panahon. Bangod sang kaimulon, pagtaas sing bili sang mga balaklon, pagkawalay palamugnan, kag ang pagsaylo sang madamo sa mga siudad, napabay-an ang mga tigulang sa pagmatumato para sa ila kaugalingon. Ang direktor sang HelpAge Kenya nga si Camillus Were, nagsiling: “Ang tradisyon tuhoy sa pagsakdag kag pag-atipan sa mga tigulang padayon nga nagahuyang.”
Sa pagkamatuod, ang paghuyang sang mga kaangtanan sa pamilya wala lamang nagakatabo sa mga pungsod sa Aprika. Tuhoy sa Japan, ang Guardian Weekly nagareport: “Ang debosyon sang anak sa ginikanan amo ang nangin sadsaran sang sistema sang mga prinsipio sang mga Hapones nga ginbilin sang Confucianismo, apang nadula ini bangod sang pagbag-o sang pangabuhi halin sa kaumhan padulong sa siudad kag sang paglugak sing mga kaangtanan sa pamilya: sa karon, 85 porsiento sang mga Hapones ang nagakapatay sa mga ospital ukon sa mga balay-alaypan para sa mga tigulang.”
Ano man ang kahimtangan, yadtong maluyag gid nga pahamut-an ang Dios nagapanikasog nga tahuron ang ila mga ginikanan. Ginasunod nila ang laygay sang Biblia: “Tahura ang imo amay kag ang imo iloy . . . agod nga magmaayo ini sa imo kag magkabuhi ka sing malawig sa duta.” (Efeso 6:2, 3) Bisan pa ang pagtahod kag pag-atipan sa tigulang nga mga ginikanan indi pirme mahapos, makahatag ini sing daku nga mga padya.