Ang mga Piesta sa Tig-alani Nagapahamuot Bala sa Dios?

ANG natipon nga tuman katam-is nga mga prutas, manamit nga mga utanon, kag pinungpong sing maayo-klase nga mga mais matahom gid tan-awon. Sa tig-alani ang subong sini nga talan-awon nagapuni sa mga halaran kag mga pulpito sang mga simbahan sa bug-os nga Inglaterra. Sa Europa, kag bisan diin man, madamong piesta ang nagapatimaan sang pagsugod kag pagtapos sing tig-alani.

Ang mga may palangabuhian nga nasandig sa duta ilabi na nga nagapasalamat sa patubas sang duta. Sa pagkamatuod, ginsugo sang Dios ang dumaan nga pungsod sang Israel nga saulugon ang tatlo ka tuigan nga piesta nga may kaangtanan gid sa ani. Sa maaga nga bahin sang tigpamulak, sa Piesta sang Tinapay nga Walay Tapay, ang mga Israelinhon nagdulot sa Dios sing pinungpong sang unang mga bunga sing ani nga sebada. Sa Piesta sang mga Semana (ukon, Pentecostes) sa katapusan nga bahin sang tigpamulak, nagdulot sila sing mga tinapay nga ginhimo gikan sa nahaunang mga bunga sing ani nga trigo. Sa tigragas ginasaulog ang Piesta sang Pagdamisag, nga tanda sang katapusan nga tuig sang pagpanguma sang Israel. (Exodo 23:​14-17) Ining mga piesta “balaan nga mga pagtilipon” kag mga tion sa pagkasadya.​—⁠Levitico 23:​2; Deuteronomio 16:⁠16.

Ano, nian, ang tuhoy sa modernong-adlaw nga mga selebrasyon sa tig-alani? Nagapahamuot bala ini sa Dios?

Paganong mga Kaangtanan

Gintublag sang kalibutanon nga kinaugali sang tradisyunal nga sinalusalo sa tig-alani kag sang paghinubog nga ginbuylog sa selebrasyon, isa ka Anglikano nga klerigo sa Cornwall, Inglaterra, ang namat-od sang 1843 nga ibalik ang kinabatasan sa tig-alani sang edad-media. Nagkuha sia sing pila ka nahaunang uyas nga gin-ani kag gikan sini naghimo sing tinapay para sa selebrasyon sang pagpangalawat sa iya simbahan. Paagi sini, ginpadayon niya ang piesta sang Lammas​—⁠isa ka “Cristiano” nga selebrasyon nga ginasiling sang iban nga naghalin kuno sa dumaan nga pagsimba sa Celtic nga dios nga si Lugh.⁠a Busa, ang modernong Anglikanong piesta sa tig-alani may paganong ginhalinan.

Kamusta ang iban pa nga selebrasyon sa katapusan sang tig-alani? Suno sa Encyclopædia Britannica, madamo sa mga kustombre nga nagpakilala sining mga piesta ang nagaasoy sang ila ginhalinan sa “animistiko nga pagpati sa espiritu sang [uyas] sang mais ukon sa iloy nga mais.” Sa iban nga mga rehiyon ang mga mangunguma nagpati nga ang espiritu nagapuyo sa katapusan nga pungpong sang uyas nga alanihon. Agod matabog ang espiritu, ginahampas nila ang uyas sa duta. Sa iban nga mga lugar ginalala nila ang pila ka dahon sang mais nga mangin “monyika” kag ginatago ini subong “swerte” tubtob sa pagpanggas sing binhi sa masunod nga tuig. Nian ginaarado nila ang uhay pabalik sa duta sa paglaum nga magabendisyon ini sing bag-ong patubas.

Ginabuylog sang pila ka leyenda ang tig-alani sa pagsimba sa Babilonianhon nga dios nga si Tamuz, bana sang diosa sang pertilidad nga si Ishtar. Ang pagkutol sa matinggas nga uhay ginpaanggid sa wala ginapaabot nga pagkapatay ni Tamuz. Ginaangot pa gani sang iban nga mga leyenda ang tig-alani sa paghalad sing tawo​—⁠isa ka buhat nga ginakangil-aran ni Jehova nga Dios.​—⁠Levitico 20:​2; Jeremias 7:​30, 31.

Ano ang Pagtamod Sang Dios?

Ang pagpakig-angot sang Dios sa dumaan nga Israel maathag nga nagapakita nga si Jehova, ang Manunuga kag Tuburan sang kabuhi, nagpatuman sing eksklusibo nga debosyon sa iya mga sumilimba. (Salmo 36:​9; Nahum 1:2) Sadtong panahon ni manalagna Ezequiel, ang buhat nga pagtangis para sa dios nga si Tamuz ‘kangil-aran sing daku’ sa mga mata ni Jehova. Ini, lakip na ang iban nga mga rito sang butig nga relihion, amo ang rason nga wala ginpamatian sang Dios ang mga pangamuyo sadtong butig nga mga sumilimba.​—⁠Ezequiel 8:​6, 13, 14, 18.

Ipaanggid ini sa ginsugo ni Jehova nga Dios nga saulugon sang Israel may kaangtanan sa ani. Sa Piesta sang Pagdamisag, ang mga Israelinhon naghiwat sing solemne nga asambleya nga sa sini nga tion ang mga bata kag tigulang, manggaranon kag imol, nagpuyo sa temporaryo nga mga puluy-an nga ginpunihan sing madabong nga dahon sang dalagku nga kakahuyan. Tion ini sang daku nga kasadya para sa ila, apang tion man ini sa paghinumdom sa pagluwas sang Dios sa ila mga katigulangan sang panahon sang Exodo (guban nga pagtaliwan) gikan sa Egipto.​—⁠Levitico 23:​40-43.

Sa tion sang Israelinhon nga mga piesta, ang mga halad gindulot kay Jehova, ang lamang matuod nga Dios. (Deuteronomio 8:​10-20) Tuhoy sa nasambit na nga animistiko nga mga pagtuluuhan, ang Biblia wala gid sing ginasiling tuhoy sa patubas, subong sang mga pinungpong nga trigo, nga may kalag.⁠b Kag maathag nga ginapakita sang Kasulatan nga ang mga idolo nagapabilin nga wala sing kabuhi, nga indi makahambal, makakita, makabati, makapanimaho, makabatyag, ukon makahatag sing bulig sa ila mga sumilimba.​—⁠Salmo 115:​5-8; Roma 1:​23-25.

Ang mga Cristiano karon wala napaidalom sa Kasuguan nga ginpakigkatipan sang Dios upod sa dumaan nga pungsod sang Israel. Sa pagkamatuod, ‘ginkuha ini [sang Dios] paagi sa paglansang kay Jesus sa usok sang pag-antos.’ (Colosas 2:​13, 14) Ang modernong-adlaw nga mga alagad ni Jehova nagakabuhi suno sa “kasuguan ni Cristo” kag nagahulag sing mainapresyahon sa tanan nga ginaaman sang Dios.​—⁠Galacia 6:⁠2.

Si apostol Pablo nagsiling sing maathag nga ang Judiyong mga piesta “isa ka landong sang mga butang nga magaabot,” kag nagdugang, “apang ang katunayan iya ni Cristo.” (Col. 2:16, 17) Gani, ginabaton sang matuod nga mga Cristiano ang Makasulatanhon nga pangatarungan: “Ang mga butang nga ginahalad sang mga pungsod ginahalad nila sa mga demonyo, kag indi sa Dios . . . Indi kamo makainom sa tagayan ni Jehova kag sa tagayan sang mga demonyo.” (1 Corinto 10:​20, 21) Dugang pa, ginapamatian sang mga Cristiano ang sugo nga ‘mag-untat sa pagtandog sa dimatinlo nga butang.’ Ang mga piesta bala sa tig-alani sa inyo lugar may pagano ukon butig nga relihiosong kahulugan? Kon amo, mahimo malikawan sang matuod nga mga Cristiano nga indi mapahamut-an si Jehova paagi sa indi gid pagpasilabot sa sining mahigko nga pagsimba.​—⁠2 Corinto 6:⁠17.

Kon ang isa ka mapasalamaton nga bata makabaton sing isa ka dulot gikan sa iya amay, sin-o ang ginapasalamatan niya? Ang isa bala ka estranghero ukon ang iya ginikanan? Paagi sa tinagipusuon nga pagpangamuyo ang mga sumilimba sang Dios nagapasalamat adlaw-adlaw kay Jehova, nga ila langitnon nga Amay, tungod sa iya daku nga kaalwan.​—⁠2 Corinto 6:​18; 1 Tesalonica 5:​17, 18.

[Mga footnote]