Mapinasalamaton sa Bug-os nga Kabuhi sang Pag-alagad kay Jehova

PANUGIRON NI OTTILIE MYDLAND

Sa talipuspusan sang ika-19 nga siglo, nagatinuparay lang ang nagdungka nga mga barko sa pantalan sang Kopervik sa nakatundan nga Norway. Sadtong mga adlaw ang mga tawo nagatulod sing mga kariton kag ang mga kabayo nagaguyod sing mga karo sa mga kalye. Ang mga tawo nagagamit sing mga kingki subong suga, kag ang napintahan sing puti nga mga balay nga himo sa kahoy ginapainit paagi sa mga kahoy kag uling. Natawo ako didto sang Hunyo 1898, ikaduha sa lima ka kabataan.

SANG 1905, nadulaan sing trabaho si Tatay, gani nagkadto sia sa Estados Unidos. Nagpauli sia pagligad sang tatlo ka tuig, nga may dala nga maleta nga puno sing matahom nga mga regalo para sa kabataan kag seda nga mga tela kag iban pa nga butang para kay Nanay. Apang ang iya labing hamili nga ginapanag-iyahan amo ang mga tomo ni Charles Taze Russell nga natig-uluhan Studies in the Scriptures.

Ginsugiran ni Tatay ang mga abyan kag mga paryente sing mga butang nga natun-an niya gikan sa sining mga libro. Sa mga pagtinipon sa lokal nga kapelya, gingamit niya ang Biblia agod ipakita nga wala sing kalayuhon nga impierno. (Manugwali 9:​5, 10) Sang 1909, ang tuig sa tapos makapauli si Tatay halin sa Estados Unidos, ginduaw ni Utod Russel ang Norway kag nagpamulongpulong sa Bergen kag Kristiania, Oslo na karon. Nagkadto si Tatay sa Bergen agod mamati sa iya.

Ginsumbong sang kalabanan nga tawo si Tatay nga nagapalapnag sing butig nga mga panudlo. Naluoy ako sa iya kag ginbuligan ko sia sa pagpanagtag sing mga tract sa Biblia sa mga kaingod. Sang 1912, nagdul-ong ako sing tract tuhoy sa impierno sa bata nga babayi sang isa ka klerigo. Ginbuyayaw niya kami ni Tatay. Nakibot ako nga ang anak sang klerigo nakahambal sadtong binastos nga hambalanon!

Ginaduaw kami kon kaisa sa Kopervik, sang iban nga mga Estudyante Sang Biblia, subong amo anay ang pagtawag sa mga Saksi ni Jehova, lakip na si Theodor Simonsen, isa ka sangkol nga manugpamulongpulong. Ginaagda ko ang mga tawo sa mga pamulongpulong nga iya ginahatag sa amon balay. Antes sang iya pamulongpulong nagakuskos sia sing zither kag nagakanta, kag pagkatapos sang iya pamulongpulong nagkanta sia sing nagahinakop nga ambahanon. Daku gid ang amon pagtahod sa iya.

Ang isa pa ka bisita sa amon balay amo si Anna Andersen, isa ka colporteur, ukon bug-os tion nga ministro. Nagalakbay sia sa mga kabanwahanan sa bug-os nga Norway, masami paagi sa bisikleta, nga nagapahamtang sing mga literatura sa Biblia sa mga tawo. Isa sia anay ka opisyal sang Salvation Army kag kilala niya ang pila ka mga opisyales sang Salvation Army sa Kopervik. Gintugutan nila sia nga magpamulongpulong tuhoy sa Biblia sa ila ginatipunan nga balay, kag gin-agda ko ang mga tawo sa pagkari kag sa pagpamati sa iya.

Ang isa pa ka colporteur nga nagduaw sa amon sa Kopervik amo si Karl Gunberg. Ining maugdang, hipuson, apang palalahog nga tawo nag-alagad man kon kaisa subong isa ka manugbadbad sa sanga talatapan sa Oslo. Pila ka tuig sang ulihi magkaupod kami nga nagtrabaho didto.

Naimpluwensiahan Sang Relihioso nga mga Pagtamod

Sadtong tion kalabanan nga tawo wala lamang sing malig-on nga pagtuo sa Dios kag sa Biblia kundi nagapati man sa mga pagtuluuhan, subong sang kalayuhon nga impierno kag sa Trinidad. Gani ginbangdan ini sang kagumon sang gintudlo sang mga Estudyante Sang Biblia nga ining mga doktrina wala nagahisanto sa Biblia.

Naimpluwensiahan ako sang mabaskog nga mga panumbungon sang amon mga kaingod nga si Tatay isa ka erehes. Sang isa ka bes ginhambalan ko pa gani sia: “Indi matuod ang imo ginatudlo. Kabutigan ini!”

“Dali diri anay, Ottilie,” palig-on niya sa akon, “kag tan-awa kon ano ang ginasiling sang Biblia.” Nian ginbasa niya sa akon ang Kasulatan. Subong resulta, nagdugang ang akon pagsalig sa iya kag sa iya ginatudlo. Ginpalig-on niya ako nga basahon ang Studies in the Scriptures, gani sang tig-ilinit sang 1914, masami ako nagapungkuon nga nagabasa sa isa ka pukatod diin kitaon ang banwa.

Sang Agosto 1914 nagagirinual ang mga tawo sa guwa sang tinukod sang lokal nga pamantalaan nga nagabasa tuhoy sa pagdabdab sang Inaway Kalibutanon I. Nag-abot si Tatay kag nakita ang nagakatabo. “Salamat sa Dios!” tuaw niya. Nakita niya sa pagdabdab sang inaway ang katumanan sang mga tagna sa Biblia nga iya ginabantala. (Mateo 24:7) Madamo sang Estudyante Sang Biblia anay ang nagpati nga sa indi madugay dalhon sila sa langit. Sang wala ini matabo, ang iban ginluyahan sing buot.

Ang Akon Panindugan sa Kamatuoran sa Biblia

Sang 1915, sa edad nga 17, natapos ko ang pag-eskwela sa segondaryo kag nagtrabaho sing sekular sa isa ka opisina. Nian ginbasa ko sing regular Ang Lalantawan. Apang sugod lamang sang 1918 nga ginhiwat sing regular ang mga miting sa Kopervik. Sang primero, lima kami ang nagtambong. Ginbasa namon ang mga publikasyon sang Watch Tower Society, subong sang Studies in the Scriptures, kag ginbinagbinag ang materyal paagi sa mga pamangkot kag sabat. Walay sapayan nga ginapabugal ni Nanay ang mga Estudyante Sang Biblia sa iban, wala gid sia magbuylog sa amon.

Sa opisina nga akon gin-obrahan kutob sang 1918, nakilala ko si Anton Saltnes, nga nabuligan ko nga mangin isa ka Estudyante Sang Biblia. Sa sining tion nangin isa ako ka regular nga manugbantala kag ginbawtismuhan sa isa ka asambleya sa Bergen sang 1921.

Sang Mayo 1925 may isa ka asambleya para sa bug-os nga Scandinavia sa Örebro, Sweden. Kapin sa 500 ang nagtambong, lakip kay Joseph F. Rutherford, presidente sang Watch Tower Society. Mga 30 kami ang naglakbay paagi sa tren sa gintigana sa amon nga bagon.

Ginpahibalo sa sini nga asambleya nga ang Talatapan sa Naaminhan nga Europa pagatukuron sa Copenhagen, Denmark, agod atipanon ang pagbantala nga hilikuton sa bug-os nga Scandinavia kag sa mga pungsod sa Baltic. Gintangdo si William Dey halin sa Scotland sa pagdumala sa pagbantala nga hilikuton. Nahamut-an gid sia, kag wala magdugay nakilala sia subong si Big Scotsman. Sang primero wala sing nahibal-an si Utod Dey sing bisan ano nga lenguahe sa Scandinavia, gani nagapungko sia sa likod sa tion sang mga miting kag mga asambleya kag nagaatipan sa mga bata agod makapamati sing maayo ang ila mga ginikanan sa ginahambal sa plataporma.

Ginbinagbinag sang Ang Lalantawan Marso 1, 1925 ang Bugna kapitulo 12 kag ginpaathag nga ining kapitulo nagapatuhoy sa pagkabun-ag sang Ginharian sang Dios kag nga ining pagkabun-ag nahanabo sa langit sang 1914. Nabudlayan ako sa paghangop sini, gani ginbasa ko ang artikulo sing sulitsulit. Sang nahangpan ko ini sang ulihi, nalipay gid ako.

Sang ginhimo ang mga pagbag-o sa amon paghangop tuhoy sa mga tema sa Biblia, nasandad ang iban kag nagbulag sa katawhan sang Dios. Apang kon ina nga mga pagbag-o mabudlay hangpon, pirme ko ginasulitsulit basa ang materyal agod tinguhaan nga mahangpan ang pangatarungan sini. Kon indi ko gihapon mahangpan ang bag-o nga pagpaathag, ginahulat ko ang pagklaro sini. Sa liwat kag liwat, ginpadyaan ako bangod sinang pagpailob.

Pag-alagad sa Bethel

Sa sulod sang pila ka tuig nagtrabaho ako subong bookkeeper, sekretaryo, kag county auditor. Sang 1928 nagmasakit ang tawo nga nagaasikaso sa mga kuwenta sa pinansial sang Sosiedad kag naghalin sa Bethel. Sanglit may eksperiensia ako sa sina nga trabaho, ginpangabay ako nga magbulos sa iya. Nagsugod ako sa pag-alagad sa Bethel sang Hunyo 1928. Kon kaisa, ginaduaw kami ni Utod Dey kag ginaawdit ang kuwenta sang Sosiedad. Nagpanguna man ang amon pamilya Bethel sa pagbantala nga hilikuton sa publiko sa Oslo, diin may isa lang kami ka kongregasyon anay.

Ang iban sa amon nagbulig sa alagad sa shipping sa Bethel nga si Utod Sakshammer, sa pag-impaki kag pagdul-ong sing The Golden Age (Magmata! karon). Sanday Utod Simonsen kag Gunberg amo ang pila sang nagbulig sa amon. Malipayon kami, masami nga nagaamba samtang nagatrabaho.

Nagasalig sa Paglaum sa Ginharian

Sang 1935 nahangpan namon nga ang “dakung kadam-an” indi ang ikaduha langitnon nga klase. Natun-an namon nga sa baylo nagatiglawas ini sa isa ka klase nga makalampuwas sa dakung kapipit-an kag may kahigayunan nga mabuhi sing dayon sa Paraiso sa duta. (Bugna 7:​9-​14) Bangod sining bag-o nga paghangop, nahisayran sang pila nga nagpakig-ambit sa mga emblema sa Memorial nga dutan-on ang ila paglaum, kag nag-untat sila sa pagpakig-ambit.

Walay sapayan nga wala ko gid ginduhaduhaan ang akon langitnon nga paglaum, masami ko nga ginhunahuna, ‘Ngaa naluyagan ako sang Dios?’ Indi ako takus sa sinang daku nga pribilehiyo. Subong isa ka magamay, mahuluy-on nga babayi, nasaw-ahan ako mamensar sa akon kaugalingon subong isa ka hari nga nagagahom upod kay Cristo sa langit. (2 Timoteo 2:​11, 12; Bugna 5:10) Apang, ginpamalandungan ko ang mga pinamulong ni apostol Pablo nga “indi madamo nga gamhanan” ang gintawag, kundi “ginpili sang Dios ang maluya nga mga butang sang kalibutan, agod mapakahuy-an ang makusog nga mga butang.”​—⁠1 Corinto 1:​26, 27.

Hilikuton sa Tion Sang Inaway Kalibutanon II

Sang Abril 9, 1940, ginsalakay sang mga soldado sang Alemanya ang Norway, kag wala magdugay nasakop nila ang pungsod. Subong resulta sang inaway, madamo ang nagbaton sa mensahe sang Ginharian. Kutob sang Oktubre 1940 tubtob Hunyo 1941, nakapahamtang kami sing kapin sa 272,000 ka libro kag bukleta. Nagakahulugan yadto nga ang kada isa sang kapin sa 470 ka Saksi anay sa Norway nakapahamtang, sa promedyo, sing kapin sa 570 ka libro kag bukleta sa tion sadtong siam ka bulan!

Sang Hulyo 8, 1941, ginduaw sang Gestapo ang tanan nga nagadumala nga manugtatap kag ginsilingan sila nga kon indi mag-untat ang pagbantala nga hilikuton, dalhon sila sa mga kampo konsentrasyon. Lima ka Aleman nga opisyal sang pulisiya ang nagkadto sa Bethel kag ginkompiskar ang madamo nga pagkabutang sang Watch Tower Society. Gindala nila ang pamilya Bethel kag gin-usisa, apang wala sing ginpriso sa amon. Sang ulihi, sang Hulyo 21, 1941, gin-agaw ang tinukod sang Sosiedad, sa Inkognitogaten 28 B, kag gindumilian ang amon pagbantala nga hilikuton. Nagbalik ako sa Kopervik kag nagtrabaho sing sekular sa pagsakdag sang akon kaugalingon.

Sadtong tion, nag-alagad si Tatay subong isa ka payunir. Sang isa ka adlaw, nag-abot ang mga Nazi kag gin-usisa ang balay ni Tatay. Ginkuha nila ang tanan niya nga literatura, lakip ang iya mga Biblia kag mga konkordansia sa Biblia. Hawothawot na lamang nga suplay sang espirituwal nga pagkaon ang nabaton namon sa sining tion. Agod makapabilin nga malig-on sa espirituwal, sulitsulit nga gintun-an namon ang daan nga mga libro, subong sang libro nga Government, kag nagpadayon kami sa pagbantala.

Makapasubo nga sa madamo nga duog nabahinbahin ang mga kauturan. Ang iban nagsiling nga dapat kami magbantala sing dayag kag magpamalaybalay samtang ang iban nagsiling nga dapat kami manghikot sing sekreto, pakig-angutan ang mga tawo sa iban nga paagi. Sa amo ang prominente nga mga kauturan, nga nagabuyluganay anay sing maayo kag palangga gid namon, wala na nagasapakanay. Ang pagbahinbahin sa tunga nila ginbangdan sing mas daku nga kasakit sa akon tagipusuon sangsa iban pa nga kahimtangan sa akon kabuhi subong isa ka Saksi.

Pagpanghikot Liwat sa Tapos Sang Inaway

Pagkatapos sang inaway, sang tig-ilinit sang 1945, ginduaw ni Utod Dey ang Norway kag naghiwat sing mga miting sa Oslo, sa Skien, kag sa Bergen. Nangabay sia sa mga kauturan nga husayon ang dipaghangpanay kag ginpangabay niya ang tanan nga maluyag nga himuon ini sa pagtindog. Ang tanan nagtindog! Ang dipaghangpanay nahusay gid man sang Disiembre 1945, sa tapos sang pagduaw ni Nathan H. Knorr, presidente anay sang Watch Tower Society.

Sa sadtong tion, sang Hulyo 17, 1945, nakabaton ako sing telegrama halin sa manugtatap sa sanga nga si Utod Enok Öman, nga nagasiling: ‘San-o ikaw makabalik sa Bethel?’ Ang iban nagsiling nga dapat ako magpabilin sa balay agod atipanon ang akon amay, nga kapin sa 70 anyos na sadto. Apang ginpalig-on ako ni Tatay nga padayunon ang pag-alagad sa Bethel, nga amo ang ginhimo ko. Sang 1946, si Marvin F. Anderson, isa ka utod halin sa Estados Unidos, amo ang amon nangin manugtatap sa sanga, kag gin-organisar liwat ang pagbantala nga hilikuton.

Sa tion sang bakasyon sa tig-ilinit nagapauli ako sa Kopervik agod makigkita sa akon pamilya. Ang akon duha ka utod nga lalaki kag duha ka manghod nga babayi wala mag-Saksi, apang pirme sila mainabyanon sa amon ni Tatay. Ang isa sang akon utod nga lalaki nangin manugdumala sa pantalan kag nangin piloto sa barko, kag ang isa pa nangin manunudlo. Walay sapayan nga pigado ako sa materyal, ginasilingan sila ni Tatay: “Mas manggaranon si Ottilie sangsa inyo.” Kag matuod gid ina! Ang ila naagom indi makatumbas sa espirituwal nga mga manggad nga akon natigayon! Napatay si Tatay sa edad nga 78 sang 1951. Si Nanay napatay sang 1928.

Ang isa ka daku nga hitabo sa akon kabuhi amo ang pagtambong sa internasyonal nga kombension sang katawhan ni Jehova sa Siudad sang New York sang 1953. Sadto nga tuig ang latagon sa kalibutan naglampas sa 500,000 ka manugbantala, kag kapin sa 165,000 ang nagtambong sa kombension! Antes sang 1953 nga kombension, nagtrabaho ako sa sulod sang isa ka semana sa Brooklyn Bethel, ang ulong talatapan sang organisasyon ni Jehova sa duta.

Paghimo Sang Akon Masarangan

Sining ulihi nga mga tinuig nagpigaw ang akon panan-aw bangod sang katarata. Paagi sa mataas sing grado nga antipara kag isa ka lente makabasa pa ako diutay sing dalagku nga mga letra. Kag ginaduaw ako sang Cristianong kauturan nga babayi kag ginabasahan ako duha ka beses sa isa ka semana, nga ginpasalamatan ko gid sing daku.

Limitado man ang akon pagbantala nga hilikuton. Sa tion sang tig-ilinit, ginapaguwa ako kon kaisa sang Cristianong kauturan nga babayi sakay sa akon wheelchair sa duog nga mahimo ako makabantala. Regular man ako nga nagapadala paagi sa koreo sing mga magasin kag mga brosyur sa mga eskwelahan sa Kopervik, subong sa elementarya nga eskwelahan diin nangin estudyante ako sang nagligad nga halos 100 ka tuig. Nalipay ako nga posible gihapon nga mangin isa ako ka regular nga manugbantala.

Maayo lang kay ang hulot kalan-an kag ang Kingdom Hall nahamtang sa panalgan nga nahamtangan sang akon hulot sa Bethel, nga kutob sang 1983 nahamtang sb Ytre Enebakk sa guwa nayon sang Oslo. Gani makatambong gihapon ako sa pagsimba sa aga, sa pagkaon, kag sa amon mga miting paagi sa isa ka walker. Kag malipayon ako nga makatambong gihapon ako sa mga kombension kag mga asambleya. Malipayon ako nga nagapakigkita sa mga abyan nga nakilala ko sa sulod sang madamo na nga tuig, subong man sa bag-o nga mga utod nga lalaki kag babayi kag madamong mabuot nga kabataan.

Paghupot Sing Pagtuo Tubtob sa Katapusan

Isa ka pagpakamaayo nga mapalibutan sang aktibo, maayo, kag espirituwal nga mga tawo diri sa Bethel. Sang nagsugod ako sa pag-alagad sa Bethel, ang bug-os nga pamilya gintapuan sadtong may langitnon nga paglaum. (Filipos 3:14) Sa karon ang tanan sa Bethel luwas sa akon nagalaum nga mabuhi sing dayon sa duta.

Matuod, ginlauman namon nga dapat nanghikot na si Jehova sang una pa. Apang nagakasadya ako nga makita ang dakung kadam-an nga nagadamo kag nagadamo. Daw ano ka daku nga pag-uswag ang akon nakita! Sang nagpakigbahin ako sa ministeryo sa una nga higayon, may mga 5,000 ka manugbantala sa bug-os nga kalibutan. Karon may kapin na sa 5,400,000! Sa pagkamatuod, nakita ko ‘ang diutay . . . nga nangin isa ka libo, kag ang diutay nga nangin isa ka mabakod nga pungsod.’ (Isaias 60:22) Dapat padayon kita nga maghulat kay Jehova, subong sa ginsulat ni manalagna Habacuc: “Bisan pa magpalantang ini, padayon nga paabuta ini; kay pat-od nga magaabot ini.”​—⁠Habacuc 2:⁠3.