Malain Bala ang Tanan nga Pagreklamo?

Ano ang mas masakit sangsa indi kita makareklamo?—Marquis De Custine, 1790-1857.

SA SULOD sang duha ka tuig gin-antos niya ang seksuwal nga paghingalit sang isa ka kaupod sa trabaho. Ang iya mga reklamo nagresulta sa pagbuyayaw kag hungod nga indi pagsapak. Ang tago nga kahuol nagaapektar sa iya panglawas, apang ano ang iya mahimo? Sing kaanggid, isa ka estudyante nga nagapanguna sa iya klase ang ginpaguwa sa eskwelahan bangod indi magtugot ang iya konsiensia nga mag-entra sia sa paghanas sing martial arts nga ginapatuman sang eskwelahan. Nagapati sila nga sala ang ginhimo sa ila, apang dapat bala sila magreklamo? Kon magreklamo sila, makahatag bala ini sa ila sing kaumpawan ukon magapalala lamang ini sa sitwasyon?

Ang mga reklamo kaangay sini kag ang iban pa kinaandan na sa karon, bangod nagakabuhi kita sa tunga sang dihimpit nga mga tawo sa malaut nga kalibutan. Ang pagreklamo nagalakip sing halin sa pagpabutyag sing dikahamuot, kalisod, kalain sang buot, ukon hinakit sa pila ka sitwasyon tubtob sa isa ka pormal nga deklarasyon batok sa isa ka tawo. Ginapili sang kalabanan nga likawan ang pagreklamo kag pagbangigay; apang, dapat bala nga maghipos na lamang pirme ang isa? Ano ang pagtamod sang Biblia?

Malain nga mga Epekto sa Kaugalingon kag sa Iban

Walay duhaduha nga ang palareklamo nga espiritu makahalalit, kag ginapakamalaut ini sang Biblia. Ang reklamador magadala sing pisikal kag espirituwal nga halit sa iya kaugalingon kag kasakitan sa sadtong iya ginareklamo. Ginapatuhuyan ang isa ka reklamador nga asawa, ang hulubaton sa Biblia nagasiling: “Ang dalayon nga tulo nga nagapahilayo sa isa sa maulanon gid nga adlaw kag ang babaying makisuayon magkaanggid.” (Hulubaton 27:15) Ang pagreklamo batok kay Jehova ukon sa isa sang iya mga aman malain gid. Sang ang pungsod sang Israel nagreklamo tuhoy sa milagruso nga manna nga gin-aman sa tion sang 40-ka-tuig nga pagpanlakatan nila sa kahanayakan, ginatawag ini nga “talamayon nga tinapay,” nagpadala si Jehova sing dalitan nga mga man-ug agod silutan ang dimatinahuron nga mga reklamador, kag madamo ang napatay.​—⁠Numeros 21:​5, 6.

Dugang pa, ginlaygayan ni Jesus ang iya mga sumulunod, nga indi magreklamo tuhoy sa “puling” sang kasaypanan sang aton mga isigkatawo, kundi talupangdon ang mas daku nga “balayan” sang aton mismo mga kasaypanan. (Mateo 7:​1-5) Sa kaanggid nga paagi, ginpakamalaut ni Pablo ang paghukom (isa ka porma sang pagreklamo) sa iban subong “indi balibad . . . kay ikaw nga nagahukom nagahimo sang amo man nga mga butang.” Ining mga paandam batok sa pagreklamo dapat magpahulag sa aton nga likawan nga mangin mamulayon kag magpalambo sing reklamador nga espiritu.​—⁠Roma 2:⁠1.

Ginapakamalaut Bala ang Tanan nga Pagreklamo?

Dapat bala kita maghinakop, nian, nga ang tanan nga porma sang reklamo dapat pakamalauton? Indi. Ginapakita sang Biblia nga madamo sing inhustisya sa malaut nga kalibutan nga aton ginapuy-an nga nagakaigo nga tadlungon. Sa isa ka ilustrasyon, ginsambit ni Jesus ang isa ka dimatarong nga hukom nga napilitan sa paghukom sa ginpigos nga balo nga babayi agod indi sia “padayon nga magkari kag pabudlayan [sia] tubtob sa katapusan.” (Lucas 18:​1-8) Sa pila ka paagi mahimo man nga padayunon naton ang aton mga reklamo tubtob nga matadlong ang mga sayop.

Paagi sa pagpalig-on sa aton nga ipangamuyo ang pagkari sang Ginharian sang Dios, indi bala nga ginasugo kita ni Jesus nga kilalahon ang mga kakulangan sining karon nga kalibutan kag ‘mangabay’ sa Dios para sa solusyon? (Mateo 6:10) Sang “ang singgit sang pagreklamo” tuhoy sa kalautan sang dumaan nga Sodoma kag Gomorra nakalab-ot sa iya mga igdulungog, ginpadala ni Jehova ang iya mga mensahero agod ‘tan-awon kon bala [naghikot] sila sing bug-os suno sa singgit tuhoy sini’ kag agod maghatag sing solusyon. (Genesis 18:​20, 21) Para sa kaumpawan sadtong nagreklamo sa iya, ginlubad ni Jehova ang problema paagi sa paglaglag sa duha ka siudad lakip ang imoral nga mga pumuluyo sini.

Ang Cristianong Kongregasyon

Tuhay bala ini sa tunga sang mga kauturan sa Cristianong kongregasyon? Walay sapayan nga dihimpit nga mga lalaki kag mga babayi, ang mga Cristiano hanuot nga nagatinguha sa pag-alagad sa Dios nga may paghidait kag paghiusa. Apang, may mga kahimtangan nga mahimo mag-utwas sa tunga nila nga ginatunaan sang pagreklamo kag nagakinahanglan sing solusyon. Sang una nga siglo, isa ka kahimtangan ang nag-utwas sa kongregasyon sang mga hinaplas wala madugay pagkatapos sang Pentecostes. Madamong bag-o nakumbertir nga Cristiano ang nagpabilin sa Jerusalem para sa dugang nga instruksion kag pagpalig-on. May pagpaambitay sing suplay sang mga pagkaon. Apang, “nag-utwas ang kinumod sa tunga sang mga Judiyo nga nagahambal sing Griego batok sa mga Judiyo nga nagahambal sing Hebreo, bangod wala matatapi ang ila mga babaying balo sa matag-adlaw nga pagpanagtag.” Sa baylo nga pakamalauton ining mga nagreklamo subong mga magamo, naghulag ang mga apostoles agod lubaron ang problema. Huo, ang nagakaigo nga mga reklamo nga ginahimo sing matinahuron kag suno sa nagakaigo nga espiritu pagapamatian kag pagalubaron sang mga nagadumala sa kongregasyon.​—⁠Binuhatan 6:​1-6; 1 Pedro 5:⁠3.

Pagreklamo sa Nagakaigo nga Awtoridad

Natalupangdan bala ninyo sa ginsambit nga mga halimbawa nga ang mga reklamo dapat himuon suno sa nagakaigo nga espiritu kag sa nagakaigo nga awtoridad? Halimbawa, wala sing pulos ang magreklamo sa pulis tuhoy sa mabug-at nga buhis ukon sa isa ka hukom tuhoy sa pisikal nga mga balatian. Subong man, indi nagakaigo ang magreklamo tuhoy sa isa ka kahimtangan sa sulod ukon sa guwa man sang kongregasyon sa isa ka tawo nga wala sing awtoridad ukon sing ikasarang sa pagbulig.

Sa kalabanan nga kadutaan karon, may mga korte kag iban pa nagakaigo nga mga awtoridad nga sarang mareklamuhan agod makatigayon sing kaumpawan. Sang gindala sang estudyante nga ginsambit sa panugod sining artikulo ang iya reklamo sa korte, ang mga hukom nagdesisyon pabor sa iya, kag ginpabalik sia upod ang pagpangayo sing pasaylo sang eskwelahan. Sing kaanggid, ang ginhingalitan sa sekso nga empleyada nakatigayon sing kaumpawan paagi sa unyon sang nagatrabaho nga mga babayi. Nangayo sa iya sing pasaylo ang talapuanan sang kompanya. Ang iya mga ginatrabahuan naghimo sing mga tikang agod mapauntat ang seksuwal nga paghingalit.

Apang, indi dapat paabuton nga ang tanan nga reklamo makatigayon sing pareho nga resulta. Ang maalamon nga si Hari Solomon realistiko nga nagsiling: “Ang tiko indi mapatadlong.” (Manugwali 1:15) Maayo nga batunon naton nga may pila ka butang nga Dios lamang ang makalubad sa iya nagakaigo nga tion.

[Kapsion sa pahina 31]

Ang mga gulang nagapamati kag nagahulag sa nagakaigo nga mga reklamo