Ginhimo Nila Ang Kabubut-on Ni Jehova

Ginbayaw ni Elias ang Matuod nga Dios

SIA ang tawo nga ginapangita gid anay sa Israel. Daw pat-od gid nga patyon sia kon makita sia sang hari. Sin-o ining ginapangita nga tawo? Ang manalagna ni Jehova nga si Elias.

Si Hari Ahab kag ang iya paganong asawa nga si Jezebel, nagpalapnag sang pagsimba kay Baal sa Israel. Subong resulta, ginpahanabo ni Jehova ang tigpalamangag sa duta, nga yara na sa ikap-at nga tuig. Ang akig nga si Jezebel nagplano sa pagpapatay sa mga manalagna ni Jehova, apang ilabi na nga ginpapangita ni Ahab si Elias. Si Elias ang nagsiling kay Ahab kapin sa tatlo ka tuig na ang nagligad: “Mahanabo sa sining mga tuig nga wala sing tun-og ukon ulan, luwas sa mando sang akon pulong!” (1 Hari 17:⁠1) Kag ang resulta nga tigpalamangag nagpadayon gihapon.

Sa sining makatalagam nga kahimtangan, nagsiling si Jehova kay Elias: “Lakat, pakita ka kay Ahab, kay magapaulan ako sa kadaygan sang duta.” Bisan yara sa daku nga katalagman, gintuman ni Elias ang sugo ni Jehova.​—⁠1 Hari 18:​1, 2.

Ang Duha ka Magkasumpong Nagkitaay

“Ikaw bala ini, ang manugdala sing kagamo sa Israel?” pamangkot ni Ahab, sang nakita si Elias. “Wala ako magdala sing kagamo sa Israel,” maisugon nga sabat ni Elias, “kundi ikaw kag ang panimalay sang imo amay, bangod nagbiya kamo sa mga sugo ni Jehova, kag nagsunod kamo sa mga Baal.” Nian nagsiling si Elias nga ang bug-os nga Israel magtipon sa Bukid Carmelo, lakip “ang apat ka gatos kag kalim-an ka manalagna ni Baal kag ang apat ka gatos ka manalagna sang sagrado nga poste.” Nian ginsilingan ni Elias ang kadam-an: “Tubtob pa bala san-o magkimpangkimpang kamo sa duha ka magkatuhay nga panghunahuna?a Kon si Jehova amo ang matuod nga Dios, sunda sia; apang kon si Baal, sunda sia.”​—⁠1 Hari 18:​17-21.

Naghipos ang katawhan. Ayhan nahibaluan nila ang ila sayop nga indi paghatag sing eksklusibo nga debosyon kay Jehova. (Exodo 20:​4, 5) Ukon mahimo nga ang ila konsiensia nagkabalan na gid amo nga wala nila ginkabig nga sala ang pagbahin nila sang ila pag-unong kay Jehova kag kay Baal. Ano man ang kahimtangan, ginsugo ni Elias ang katawhan nga magkuha sing duha ka tinday nga baka​—⁠ang isa para sa mga manalagna ni Baal kag ang isa para sa iya. Ang duha ka baka ihanda para sa halad, apang wala sing isindi nga kalayo. “Panawag kamo sa ngalan sang inyo dios,” siling ni Elias, “kag ako, sa akon bahin, magapanawag sa ngalan ni Jehova; kag mahanabo nga ang matuod nga Dios nga magasabat paagi sa kalayo amo ang matuod nga Dios.”​—⁠1 Hari 18:​23, 24.

Si Jehova Ginbayaw

Ang mga manalagna ni Baal “nagkimpangkimpang sa palibot sang halaran nga ila ginhimo.” Nagpanawag sila sa bug-os nga aga: “O Baal, sabta kami!” Apang wala magsabat si Baal. (1 Hari 18:26) Kag gin-uligyat sila ni Elias: “Panawag kamo sing mabaskog, kay dios sia.” (1 Hari 18:27) Ginpilasan pa gani sang mga manalagna ni Baal ang ila kaugalingon paagi sa mga sundang kag mga bangkaw​—⁠isa ka kinabatasan nga ginahimo sang mga pagano agod pukawon ang kaluoy sang ila mga dios.b​—⁠1 Hari 18:⁠28.

Nagligad na sadto ang udto, kag ang mga sumilimba ni Baal padayon nga “naggawi subong mga manalagna”​—⁠isa ka prase nga sa sining konteksto nagapahangop sing ideya nga magaris kag wala sing kontrol sa kaugalingon. Sang ulihi sa kahapunanon, nagsiling si Elias sa bug-os nga katawhan: “Palapit kamo sa akon.” Ang tanan nagatan-aw sing maayo samtang gintukod liwat ni Elias ang halaran ni Jehova, nagkutkot sing kalog sa palibot sini, ginhiwahiwa ang tinday nga baka, kag gintungtong ini sa gatong nga kahoy. Pagkatapos sadto, ang baka, ang halaran, kag ang gatong ginbasa kaayo sang tubig, kag ang kalog ginpuno sing tubig (wala sing duhaduha nga tubig sang dagat nga ginkuha sa Dagat Mediterraneo). Kag nagpangamuyo si Elias kay Jehova: “Ipakilala sini nga adlaw nga ikaw ang Dios sang Israel kag ako imo alagad kag paagi sa imo pulong nga ginhimo ko ini tanan nga butang. Sabta ako, O Jehova, sabta ako, agod nga ini nga katawhan magkilala nga ikaw, si Jehova, amo ang matuod nga Dios kag ikaw mismo nagpabalik liwat sang tagipusuon nila.”​—⁠1 Hari 18:​29-37.

Sing hinali, nahulog ang kalayo halin sa langit “kag nag-upos sa halad nga sinunog kag sa gatong kag sa mga bato kag sa yab-ok, kag ang tubig nga yadto sa kalog gindilapan sini.” Ang katawhan nga nagatan-aw gilayon nga naghapa, nga nagasiling: “Si Jehova amo ang matuod nga Dios! Si Jehova amo ang matuod nga Dios!” Sa mando ni Elias, ang mga manalagna ni Baal gindakop kag gindala sa sapa nga Cison, diin ginpatay sila didto.​—⁠1 Hari 18:​38-40.

Leksion Para sa Aton

Ginpadayag ni Elias ang daw labaw sa tawo nga kaisog. Apang, ginapasalig kita sang manunulat sa Biblia nga si Santiago nga “si Elias isa ka tawo nga may balatyagon kaangay sa aton.” (Santiago 5:17) Nagbatyag sia sing kahadlok kag kahuol sa pila ka kasangkaron. Halimbawa, sang nanumpa sang ulihi si Jezebel nga itimalos ang pagpamatay sa mga manalagna ni Baal, nalagyo si Elias kag dayon nagpangamuyo kay Jehova: “Tuman na! Karon, O Jehova, kuhaa ang akon kalag.”​—⁠1 Hari 19:⁠4.

Wala ginkuha ni Jehova ang kabuhi ni Elias. Sa baylo, maluluy-on nga nag-aman sia sing bulig. (1 Hari 19:​5-8) Ang mga alagad sang Dios karon makasalig nga amo man sini ang himuon ni Jehova kon nagaatubang sila sing daku nga kahuol, ayhan bangod sang pagpamatok. Sa pagkamatuod, kon mangamuyo sila sing bulig ni Jehova, makahatag sia sa ila sing “kusog nga labaw sa kinaandan,” agod nga bisan “ginaipit [sila] sa tanan nga paagi,” indi sila “mapiutan nga indi makahulag.” Sa amo, mabuligan sila nga makabatas, subong ni Elias.​—⁠2 Corinto 4:​7, 8.

[Mga footnote]