Ang Iban nga mga Karnero kag ang Bag-ong Katipan

“Ang mga dumuluong . . . , ang tanan nga nagabantay sang inugpahuway agod indi mapasipalahan ini kag nagahupot sing malig-on sang akon katipan, dalhon ko man sila sa akon balaan nga bukid.”​—⁠ISAIAS 56:​6, 7.

1. (a) Suno sa palanan-awon ni Juan, ano ang ginahimo samtang ginapunggan ang hangin sang paghukom ni Jehova? (b) Anong talalupangdon nga kadam-an ang nakita ni Juan?

SA IKAP-AT nga palanan-awon sa tulun-an sang Bugna, nakita ni apostol Juan nga ginapunggan ang malaglagon nga hangin sang paghukom ni Jehova samtang ginatapos ang pagpat-in sa tanan nga katapo sang “Israel sang Dios.” Amo ini sila ang una nga pakamaayuhon paagi kay Jesus, ang panguna nga bahin sang binhi ni Abraham. (Galacia 6:​16; Genesis 22:​18; Bugna 7:​1-4) Sa amo gihapon nga palanan-awon, nakita ni Juan ang “isa ka dakung kadam-an nga wala sing tawo nga makaisip, gikan sa tanan nga pungsod kag tribo kag katawhan kag hambal . . . , nga nagasinggit sa mabaskog nga tingog, nga nagasiling: ‘Ang kaluwasan utang namon sa amon Dios, nga nagalingkod sa trono, kag gikan sa Kordero.’ ” (Bugna 7:​9, 10) Sa pagsiling, “Ang kaluwasan utang namon . . . sa Kordero,” ginapakita sang dakung kadam-an nga sila man ginapakamaayo paagi sa Binhi ni Abraham.

2. San-o naglutaw ang dakung kadam-an, kag paano ini ginapakilala?

² Ining dakung kadam-an ginkilala sang 1935, kag karon may kadamuon ini nga kapin sa lima ka milyon. Natandaan para sa kaluwasan sa dakung kapipit-an, ang mga katapo sini pagapainon para sa kabuhi nga walay katapusan kon painon ni Jesus “ang mga karnero” gikan sa “mga kanding.” Ang mga Cristiano sang dakung kadam-an nalakip sa “iban nga mga karnero” sa ilustrasyon ni Jesus tuhoy sa mga toril. Nagalaum sila nga mabuhi sing dayon sa paraiso nga duta.​—⁠Mateo 25:​31-46; Juan 10:​16; Bugna 21:​3, 4.

3. Paano magkatuhay ang hinaplas nga mga Cristiano kag ang iban nga mga karnero kon tuhoy sa bag-ong katipan?

³ Para sa 144,000, ang mga pagpakamaayo sang Abrahamikong katipan ginahatag paagi sa bag-ong katipan. Subong mga umalambit sa sining katipan, yara sila “sa idalom sang dibagay nga kaluoy” kag “sa idalom sang kasuguan kay Cristo.” (Roma 6:​15; 1 Corinto 9:21) Busa, ang 144,000 lamang nga katapo sang Israel sang Dios ang nagakaigo nga nagaambit sa mga emblema sa tion sang Memoryal sang kamatayon ni Jesus, kag sa ila lamang si Jesus nakigkatipan para sa isa ka Ginharian. (Lucas 22:​19, 20, 29) Ang mga katapo sang dakung kadam-an indi mga umalambit sa bag-ong katipan. Apang, nagapakig-upod sila sa Israel sang Dios kag nagapuyo man sa ila “duta.” (Isaias 66:8) Gani makatarunganon isiling nga sila man yara sa idalom sang dibagay nga kaluoy ni Jehova kag sa idalom sang kasuguan kay Cristo. Bisan pa indi sila mga umalambit sa bag-ong katipan, kaupod sila nga makabenepisyo sa sini.

Ang “mga Dumuluong” kag “ang Israel sang Dios”

4, 5. (a) Suno kay Isaias, ano nga grupo ang magaalagad kay Jehova? (b) Paano nagakatuman ang Isaias 56:​6, 7 sa dakung kadam-an?

⁴ Si manalagna Isaias nagsulat: “Ang mga dumuluong nga nagbuylog kay Jehova sa pag-alagad sa iya kag sa paghigugma sang ngalan ni Jehova, nga mangin iya mga alagad, ang tanan nga nagabantay sang adlaw nga inugpahuway agod indi mapasipalahan ini kag nagahupot sing malig-on sang akon katipan, sila man dalhon ko sa akon balaan nga bukid kag lipayon sila sa akon balay sang pangamuyo. Ang ila mga halad-nga-sinunog kag ang ila mga halad batunon sa akon halaran.” (Isaias 56:​6, 7) Sa Israel anay, nagkahulugan ini nga ang “mga dumuluong,” ang mga di-Israelinhon, nagasimba kay Jehova​—⁠nagahigugma sa iya ngalan, nagatuman sa mga kondisyon sang Kasuguan nga katipan, nagabantay sang Adlaw nga Inugpahuway, kag nagadulot sing mga halad sa templo, ang “balay sang pangamuyo” sang Dios.​—⁠Mateo 21:⁠13.

⁵ Sa aton adlaw, “ang mga dumuluong nga nagbuylog kay Jehova” amo ang dakung kadam-an. Nagaalagad sila kay Jehova upod sa Israel sang Dios. (Zacarias 8:23) Nagadulot sila sing kalahamut-an nga mga halad pareho sa ginadulot sang Israel sang Dios. (Hebreo 13:​15, 16) Nagasimba sila sa espirituwal nga templo sang Dios, ang iya “balay sang pangamuyo.” (Ipaanggid ang Bugna 7:⁠15.) Nagabantay bala sila sang semanal nga Adlaw nga Inugpahuway? Wala ini ginapatuman sa mga hinaplas ukon sa iban nga mga karnero. (Colosas 2:​16, 17) Apang, nagsiling si Pablo sa hinaplas nga Hebreong mga Cristiano: “May nabilin pa nga adlaw nga inugpahuway para sa katawhan sang Dios. Kay ang tawo nga nagsulod sa kapahuwayan sang Dios nagpahuway man gikan sa iya mismo mga buhat, subong sang ginhimo sang Dios gikan sa iya kaugalingon nga mga buhat.” (Hebreo 4:⁠9, 10) Ang mga Hebreo nagsulod sa sining “kapahuwayan” sang ginpaidalom nila ang ila kaugalingon sa “pagkamatarong sang Dios” kag nagpahuway gikan sa pagtinguha nga pakamatarungon ang ila kaugalingon paagi sa mga buhat sang Kasuguan. (Roma 10:​3, 4) Ang hinaplas Gentil nga mga Cristiano nagapahuway man paagi sa pagpaidalom sang ila kaugalingon sa pagkamatarong ni Jehova. Ang dakung kadam-an nagabuylog sa ila sa sina nga pagpahuway.

6. Paano ang iban nga mga karnero karon nagahupot sing malig-on sa bag-ong katipan?

⁶ Dugang pa, ang iban nga mga karnero nagahupot sing malig-on sa bag-ong katipan subong nga ang mga dumuluong anay naghupot sing malig-on sa Kasuguan nga katipan. Sa anong paagi? Indi paagi sa pag-ambit sa sini kundi paagi sa pagsunod sa kasuguan nga may kaangtanan sa sini kag pagbenepisyo gikan sa mga kahimusan sini. (Ipaanggid ang Jeremias 31:​33, 34.) Kaangay sang ila hinaplas nga mga kaupod, ang kasuguan ni Jehova nasulat sa ‘tagipusuon’ sang iban nga mga karnero. Tudok nga ginahigugma nila kag ginatuman ang mga sugo kag mga prinsipio ni Jehova. (Salmo 37:​31; 119:97) Kaangay sang hinaplas nga mga Cristiano, kilala nila si Jehova. (Juan 17:3) Kamusta naman ang pagpatuli? Mga 1,500 ka tuig antes ginhimo ang bag-ong katipan, ginpalig-on ni Moises ang mga Israelinhon: “Tulia ang inyo tagipusuon.” (Deuteronomio 10:​16; Jeremias 4:4) Bisan pa ang obligado nga pagpatuli sa unod nagtaliwan na upod sa Kasuguan, dapat ‘tulion’ sang mga hinaplas kag sang iban nga mga karnero ang ila tagipusuon. (Colosas 2:11) Sa katapusan, ginapatawad ni Jehova ang sala sang iban nga mga karnero pasad sa iya ni Jesus ginpaagay nga “dugo sang katipan.” (Mateo 26:​28; 1 Juan 1:​9; 2:2) Wala sila ginaadoptar sang Dios subong espirituwal nga mga anak, subong sang pag-adoptar niya sa 144,000. Apang ginapahayag niya ang iban nga mga karnero nga matarong, sa kahulugan nga si Abraham ginpahayag nga matarong subong abyan sang Dios.​—⁠Mateo 25:​46; Roma 4:​2, 3; Santiago 2:⁠23.

7. Ano ang butang nga malauman sang iban nga mga karnero karon, nga ginapahayag subong matarong kaangay ni Abraham anay?

⁷ Para sa 144,000, ang pagpahayag sa ila nga matarong nagabukas sang dalan padulong sa ila paglaum nga magagahom sila upod kay Jesus sa langitnon nga Ginharian. (Roma 8:​16, 17; Galacia 2:16) Para sa iban nga mga karnero, ang pagpahayag sa ila nga matarong subong mga abyan sang Dios nagatugot sa ila nga matigayon ang ginalauman nila nga kabuhi nga walay katapusan sa isa ka paraiso nga duta​—⁠paagi sa paglampuwas sa Armagedon subong bahin sang dakung kadam-an ukon paagi sa ‘pagkabanhaw sang mga matarong.’ (Binuhatan 24:15) Daw ano nga pribilehiyo nga matigayon ina nga paglaum kag mangin abyan sang Soberano sang uniberso, nga mangin “dumuluaw sa [iya] kayangkayang”! (Salmo 15:​1, 2) Huo, ang mga hinaplas kag ang iban nga mga karnero lunsay ginapakamaayo sa isa ka dalayawon nga paagi paagi kay Jesus, ang Binhi ni Abraham.

Ang Daku Pa nga Adlaw sang Katumbasan

8. Ano ang ginalaragway sang mga halad sa Adlaw sang Katumbasan sa idalom sang Kasuguan?

⁸ Sang ginapaathag ang bag-ong katipan, ginpahanumdom ni Pablo ang iya mga bumalasa sang tuigan nga Adlaw sang Katumbasan sa idalom sang Kasuguan nga katipan. Sa amo nga adlaw, magkatuhay nga mga halad ang ginadulot​—⁠ang isa para sa saserdotenhon nga tribo ni Levi kag ang isa pa gid para sa 12 ka di-saserdotenhon nga mga tribo. Madugay na ini ginapaathag subong nagalaragway sa daku nga halad ni Jesus nga magahatag sing benepisyo sa 144,000 nga may langitnon nga paglaum kag sa minilyon nga may dutan-on nga paglaum.⁠a Ginpakita ni Pablo nga sa katumanan sini ang mga benepisyo sang halad ni Jesus matigayon paagi sa daku pa nga Adlaw sang Katumbasan sa idalom sang bag-ong katipan. Subong Mataas nga Saserdote sining daku pa nga adlaw, ginhatag ni Jesus ang iya himpit nga kabuhi subong isa ka katumbas nga halad agod matigayon ang “pagtubos nga dayon” para sa mga tawo.​—⁠Hebreo 9:​11-24.

9. Subong katapo sang bag-ong katipan, ano ang mabaton sang Hebreong hinaplas nga mga Cristiano?

⁹ Madamo sang Hebreong mga Cristiano sang unang siglo ang “makugi [gihapon] sa [Mosaikong] Kasuguan.” (Binuhatan 21:20) Gani, nagakaigo lamang nga ginpahanumdom sila ni Pablo: “[Si Jesus] amo ang manugpatunga sang bag-ong katipan, agod nga, bangod ang kamatayon natabo sa pagtubos sa ila gikan sa mga paglapas sa idalom sang nahaunang katipan, ang mga gintawag makabaton sang saad nga panublion nga dayon.” (Hebreo 9:15) Ang bag-ong katipan naghilway sa Hebreong mga Cristiano gikan sa daan nga katipan, nga nagpadayag sang ila pagkamakasasala. Bangod sa bag-ong katipan, mahimo nila mabaton “ang saad nga [langitnon nga] panublion nga dayon.”

10. Ano ang ginapasalamatan sang mga hinaplas kag sang iban nga mga karnero sa Dios?

¹⁰ “Ang tagsatagsa” nga “nagapakita sing pagtuo sa Anak” magabenepisyo gikan sa halad nga gawad. (Juan 3:​16, 36) Si Pablo nagsiling: “Si Cristo nga nahalad sing makaisa sa pagdala sang mga sala sang madamo; kag magapahayag sa ikaduha nga walay kalabtanan sa sala kag sa mga makugihon nga nagahulat sa iya para sa ila kaluwasan.” (Hebreo 9:28) Sa karon, ang mga makugihon nga nagahulat kay Jesus nagalakip sang buhi pa nga hinaplas nga mga Cristiano sang Israel sang Dios kag sa minilyon nga nagahuman sa dakung kadam-an, nga may yara man walay katapusan nga palanublion. Ang duha ka klase lunsay nagapasalamat sa Dios bangod sa bag-ong katipan kag bangod sa nagahatag-kabuhi nga mga pagpakamaayo nga may kaangtanan sa sini, lakip ang daku pa nga Adlaw sang Katumbasan kag ang pag-alagad sang Mataas nga Saserdote, si Jesus, sa langitnon nga Labing Balaan.

Masako sa Sagrado nga Pag-alagad

11. Bangod natinluan ang konsiensia paagi sa halad ni Jesus, ano ang malipayon nga ginahimo sang mga hinaplas kag sang iban nga mga karnero?

¹¹ Sa iya sulat sa mga Hebreo, ginpadaku ni Pablo ang labaw nga balor sang halad ni Jesus sa bag-ong katipan nga kahimusan kon ipaanggid sa mga halad para sa sala sa idalom sang daan nga katipan. (Hebreo 9:​13-15) Ang mas maayo nga halad ni Jesus “makatinlo sang aton konsiensia gikan sa patay nga mga buhat agod makahatag kita sing sagrado nga pag-alagad sa buhi nga Dios.” Para sa Hebreong mga Cristiano, ang “patay nga mga buhat” naglakip sang “mga paglapas sa idalom sang nahaunang katipan.” Para sa mga Cristiano karon, nagalakip ini sang mga sala nga nahimo sang una nga ginhinulsulan na kag napatawad na sang Dios. (1 Corinto 6:​9-11) Bangod natinluan na ang ila konsiensia, ang hinaplas nga mga Cristiano nagahatag sing “sagrado nga pag-alagad sa buhi nga Dios.” Kag amo man ang dakung kadam-an. Bangod natinluan na ang ila konsiensia paagi sa “dugo sang Kordero,” yara sila sa dakung espirituwal nga templo sang Dios, nga “nagahatag sa iya sing sagrado nga pag-alagad sa adlaw kag gab-i.”​—⁠Bugna 7:​14, 15.

12. Paano naton ginapakita nga kita may “bug-os nga kalig-unan sang pagtuo”?

¹² Dugang pa, si Pablo nagsiling: “Magpalapit kita nga may bunayag nga tagipusuon sa bug-os nga kalig-unan sang pagtuo, nga nawisikan ang aton tagipusuon gikan sa malaut nga konsiensia kag ang aton lawas napaliguan sang matinlo nga tubig.” (Hebreo 10:22) Paano naton mapakita nga kita may “bug-os nga kalig-unan sang pagtuo”? Ginpalig-on ni Pablo ang Hebreong mga Cristiano: “Huptan naton sing malig-on ang dayag nga pagpahayag sang aton [langitnon] nga paglaum nga indi mationg, kay matutom sia nga nagsaad. Kag binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon sing tingob, subong sang kinabatasan sang iban, kundi nagapalig-unay sa isa kag isa, kag labi na gid samtang ginatan-aw ninyo nga nagapalapit ang adlaw.” (Hebreo 10:⁠23-25) Kon buhi ang aton pagtuo, indi man naton ‘pagpabay-an ang aton pagtilipon.’ Malipay kita nga pukawon ang aton kauturan kag pukawon man kita nila sa gugma kag sa maayong mga buhat kag mapalig-on para sa importante nga hilikuton sang dayag nga pagpahayag sang aton paglaum, dutan-on man ini ukon langitnon.​—⁠Juan 13:⁠35.

Ang “Dayon nga Katipan”

13, 14. Sa anong mga paagi dayon ang bag-ong katipan?

¹³ Ano ang matabo kon mabaton na sang pinakaulihi sa 144,000 ang ila langitnon nga paglaum? Wala na bala sing epekto ang bag-ong katipan? Sa amo nga tion, wala na sing nabilin sa duta nga katapo sang Israel sang Dios. Ang tanan nga umalambit sa katipan kaupod na ni Jesus “sa ginharian sang [iya] Amay.” (Mateo 26:29) Apang dumdumon naton ang ginsiling ni Pablo sa iya sulat sa mga Hebreo: “Ang Dios sang paghidait . . . nagbanhaw sang daku nga manugbantay sang mga karnero paagi sa dugo sang isa ka dayon nga katipan.” (Hebreo 13:​20; Isaias 55:3) Sa anong kahulugan dayon ang bag-ong katipan?

¹⁴ Una, indi kaangay sang Kasuguan nga katipan, indi gid ini pag-islan. Ikaduha, ang mga resulta sang pagpanghikot sini permanente, subong sang pagkahari ni Jesus. (Ipaanggid ang Lucas 1:​33 sa 1 Corinto 15:​27, 28.) Ang langitnon nga Ginharian may dayon nga duog sa mga katuyuan ni Jehova. (Bugna 22:5) Kag ikatlo, ang iban nga mga karnero padayon nga magabenepisyo gikan sa bag-ong katipan nga kahimusan. Sa tion sang Isa ka Libo ka Tuig nga Paghari ni Cristo, ang matutom nga mga tawo padayon nga “magahatag [kay Jehova] sing sagrado nga pag-alagad sa adlaw kag gab-i sa iya templo” subong sang ila ginahimo karon. Indi pag-ukaton ni Jehova ang ila nagligad nga mga sala nga napatawad na pasad sa iya ni Jesus “dugo sang katipan.” Padayon nga mahuptan nila ang isa ka matarong nga tindog subong mga abyan ni Jehova, kag ang iya kasuguan masulat gihapon sa ila tagipusuon.

15. Ilaragway ang kaangtanan ni Jehova sa iya dutan-on nga mga sumilimba sa bag-ong kalibutan.

¹⁵ Makasiling bala si Jehova sa amo nga tion tuhoy sining tawhanon nga mga alagad: ‘Ako ang Dios nila, kag sila ang akon katawhan’? Huo. “Magapuyo sia kaupod nila, kag sila mangin iya katawhan. Kag ang Dios gid magaupod sa ila.” (Bugna 21:3) Sila mangin “kampo sang mga balaan,” dutan-on nga mga tiglawas sang “hinigugma nga siudad,” ang langitnon nga nobya ni Jesucristo. (Bugna 14:​1; 20:​9; 21:2) Ini tanan mangin posible bangod sang ila pagtuo sa ginpaagay ni Jesus nga “dugo sang katipan” kag sang ila pagpasakop sa langitnon nga mga hari kag mga saserdote, nga sang sa duta sila amo ang Israel sang Dios.​—⁠Bugna 5:⁠10.

16. (a) Anong mga posibilidad ang nagahulat sa mga banhawon sa duta? (b) Anong mga pagpakamaayo ang magaabot sa katapusan sang isa ka libo ka tuig?

¹⁶ Kamusta naman ang mga patay nga banhawon sa duta? (Juan 5:​28, 29) Sila man pagaagdahon nga “pakamaayuhon ang ila kaugalingon” paagi kay Jesus, ang Binhi ni Abraham. (Genesis 22:18) Sila man dapat maghigugma sa ngalan ni Jehova, nagaalagad sa iya, nagadulot sing kalahamut-an nga mga halad, kag nagahatag sing sagrado nga pag-alagad sa iya balay sang pangamuyo. Ang mga tawo nga magahimo sini magasulod sa kapahuwayan sang Dios. (Isaias 56:​6, 7) Sa katapusan sang isa ka libo ka tuig, ang tanan nga matutom nga mga tawo mangin himpit na paagi sa pag-alagad ni Jesucristo kag sang iya 144,000 ka kaupod nga mga saserdote. Sila mangin matarong, indi lamang ginpahayag nga matarong subong mga abyan sang Dios. Sila “mabuhi,” bug-os nga nahilway sa sala kag kamatayon nga napanubli gikan kay Adan. (Bugna 20:​5; 22:2) Daw ano nga pagpakamaayo ina! Gikan sa aton pagtamod karon, daw subong bala nga ang saserdotenhon nga hilikuton ni Jesus kag sang 144,000 matapos na sa amo nga tion. Ang mga pagpakamaayo sang daku pa nga Adlaw sang Katumbasan nahatag na sing bug-os sa amo nga tion, kay natuman na ang katuyuan sini. Dugang pa, ‘itugyan [ni Jesus] ang ginharian sa iya Dios kag Amay.’ (1 Corinto 15:24) May katapusan nga pagtilaw nga matabo sa katawhan, kag nian si Satanas kag ang iya mga demonyo pagalaglagon sing dayon.​—⁠Bugna 20:​7, 10.

17. Bangod sang kalipay nga nagahulat sa aton, determinado ang tagsatagsa sa aton nga himuon ang ano?

¹⁷ Ano ang mangin papel sang “dayon nga katipan” sa makakulunyag nga dag-on nga magasugod sa amo nga tion? Indi kita dapat magkomento sa sini. Tuman na ang napahayag ni Jehova tubtob sa karon. Ginahugakom kita sini sing kapunaw. Hunahunaa lamang​—⁠kabuhi nga walay katapusan subong bahin sang “bag-ong mga langit kag bag-ong duta”! (2 Pedro 3:13) Kabay nga wala sing bisan ano nga magpaluya sang aton handum nga mapanubli ina nga saad. Ang pagtindog nga malig-on mahimo nga indi mahapos. Si Pablo nagsiling: “Nagakinahanglan kamo sing pagbatas, agod nga, pagkatapos ninyo mahimo ang kabubut-on sang Dios, mabaton ninyo ang katumanan sang saad.” (Hebreo 10:⁠36) Apang, dumduma nga ang bisan anong problema nga dapat landason, ang bisan anong pagpamatok nga dapat atubangon, wala sing kabilinggan kon ipaanggid sa kalipay nga nagahulat sa aton. (2 Corinto 4:17) Busa, kabay nga wala sing bisan sin-o sa aton ang mangin “sahi nga nagaisol padulong sa kalaglagan.” Sa baylo, kabay nga pamatud-an naton ang aton kaugalingon subong “ang sahi nga may pagtuo padulong sa pagtipig nga buhi sa kalag.” (Hebreo 10:39) Kabay nga kita tanan magsalig sing bug-os kay Jehova, ang Dios sang mga katipan, para sa dayon nga pagpakamaayo sa tagsatagsa sa aton.

[Mga footnote]

Nahangpan Mo Bala?

◻ Luwas sa hinaplas nga mga Cristiano, sin-o ang ginapakamaayo paagi sa Binhi ni Abraham?

◻ Sa pagpakamaayo sang bag-ong katipan, paano ang iban nga mga karnero kaangay sang mga proselita sa idalom sang daan nga katipan?

◻ Paano ginapakamaayo ang iban nga mga karnero paagi sa kahimusan sang daku pa nga Adlaw sang Katumbasan?

◻ Ngaa gintawag ni Pablo nga “dayon nga katipan” ang bag-ong katipan?

[Kahon sa pahina 21]

Sagrado nga Pag-alagad sa Templo

Ang dakung kadam-an nagasimba upod sa hinaplas nga mga Cristiano sa dutan-on nga luwang sang dakung espirituwal nga templo ni Jehova. (Bugna 7:​14, 15; 11:2) Wala sing rason sa paghinakop nga yara sila sa napain nga Luwang para sa mga Gentil. Sang si Jesus yari sa duta, may yara isa ka Luwang para sa mga Gentil sa templo. Apang, sa gin-inspirar sang Dios nga mga plano sang templo ni Solomon kag ni Ezequiel, wala sing Luwang para sa mga Gentil. Sa templo ni Solomon, may isa ka naguwa nga luwang diin ang mga Israelinhon kag mga proselita, mga lalaki kag mga babayi, tingob nga nagsimba. Amo ini ang matagnaon nga sulundan sang dutan-on nga luwang sang espirituwal nga templo, diin nakita ni Juan ang dakung kadam-an nga nagahatag sing sagrado nga pag-alagad.

Apang, ang mga saserdote kag mga Levinhon lamang ang makasulod sa nasulod nga luwang, diin nahamtang ang dakung halaran; ang mga saserdote lamang ang makasulod sa Balaan; kag ang mataas nga saserdote lamang ang makasulod sa Labing Balaan. Ang nasulod nga luwang kag ang Balaan ginahangop nga nagalaragway sa tumalagsahon nga kahimtangan sa espirituwal sang hinaplas nga mga Cristiano sa duta. Kag ang Labing Balaan nagalaragway sa langit mismo, diin batunon sang hinaplas nga mga Cristiano ang dimamalatyon nga kabuhi upod sa ila langitnon nga Mataas nga Saserdote.​—⁠Hebreo 10:​19, 20.

[Retrato sa pahina 23]

Bangod sang kalipay nga nagahulat sa aton, huptan naton ang “pagtuo padulong sa pagtipig nga buhi sa kalag”