Duta—Ngaa Yari Ini Diri?
May isa ka pamangkot nga dapat mo binagbinagon: Ang aton bala matahom nga planeta gintuga sang maalam nga Manunuga nga may katuyuan para sa duta kag para sa mga tawo nga nagapuyo sa sini? Ang pagsabat sa sini nga pamangkot makabulig sa imo nga mahibaluan kon ano ang palaabuton nga nagahulat sa aton planeta.
NAKIT-AN sang madamo nga sientipiko nga nagtuon sing maid-id tuhoy sa aton uniberso kag sa aton duta ang mga pamatuod sa pagluntad sang isa ka Manunuga, nga ang Dios amo ang sa likod sini. Binagbinaga ang mga komento sang isa sa ila:
Si Propesor Paul Davies nagsulat sa The Mind of God: “Ang pagluntad sang mahim-ong, nagahilisanto nga uniberso nga nagaunod sing malig-on, organisado, masibod nga mga kahimusan nagakinahanglan sing pinasahi gid nga mga kasuguan kag mga kahimtangan.”
Pagkatapos mabinagbinag ang pila ka “natabuan lamang nga mga butang” nga natalupangdan sang mga astropisiko kag sang iban pa nga sientipiko, si Propesor Davies nagdugang: “Kon binagbinagon ini sing tingob, nagahatag ini sing makapakumbinsi nga pamatuod nga ang kabuhi subong sang nahibaluan naton nasandig sing daku sa mga kasuguan sang pisika, kag sa pila ka daw natabuan lamang nga takus nga ginpili sang kinaugali para sa kabug-aton sang nanuhaytuhay nga mga butang, kabaskugon sang puwersa, kag iban pa. . . . Nagakaigo isiling nga kon kita ang Dios, kag kita ang magpili sini nga mga butang paagi sa pagpasibusibu, masapwan naton nga ang halos tanan nga pagpasibusibu nga mahimo naton magahimo sa uniberso nga indi mapuy-an. Sa pila ka kaso subong bala nga dapat nga nagasibuay gid ang nanuhaytuhay nga mga butang agod nga ang uniberso mahimo mapuy-an. . . . Ang katunayan nga bisan ang diutay nga mga pagbag-o sa mga kasuguan ukon pag-organisar magahimo sa uniberso nga indi makit-an sang tawo importante gid.”
Ang ginapahangop sini sa madamo amo nga ang aton duta, pati ang iban pa nga bahin sang uniberso, gintuga sang may katuyuan nga Manunuga. Kon matuod ina, dapat naton hibaluon kon ngaa ginhuman niya ang duta. Dapat man naton pat-uron, kon posible, kon ano ang iya katuyuan para sa duta. May kahilabtanan sini isa ka dikinaandan nga pagsumpakilay ang nagautwas. Walay sapayan sang daku nga popularidad sang ateismo, makapakibot ang kadamuon sang mga tawo nga nagapati gihapon sa isa ka maalam nga Manunuga. Ang kalabanan nga mga simbahan sang Cristiandad pakulahaw nga nagahambal tuhoy sa labing gamhanan nga Dios kag Manunuga sang aton uniberso. Apang, malaka sa sining mga relihion ang nagahambal sing may pagsalig kag pagtuo tuhoy sa palaabuton sang duta suno sa katuyuan sang Dios.
Ano ang Ginasiling sang Biblia?
Makatarunganon nga usisaon ang isa ka tiliman-an nga lapnag nga ginabaton nga halin sa Manunuga. Ina nga tiliman-an amo ang Biblia. Ang isa sang pinakasimple kag pinakamaathag nga pinamulong sini tuhoy sa palaabuton sang aton duta masapwan sa Manugwali 1:4. Aton mabasa: “Ang isa ka kaliwatan nagaligad, kag ang isa ka kaliwatan nagaabot: apang ang duta nagapadayon.” (King James Version) Direkta nga ginapaathag sang Biblia kon ngaa gintuga ni Jehova nga Dios ang duta. Ginapakita man sini nga ginbutang niya ini sa husto nga duog sa uniberso kag sa husto nga distansia sini sa aton adlaw agod masakdag ang kabuhi nga yari sa sini. Gin-inspirar sang labing gamhanan nga Dios ang dumaan nga manalagna nga si Isaias sa pagsulat: “Amo sini ang ginsiling ni Jehova, ang Manunuga sang mga langit, Sia ang matuod nga Dios, ang Manughuman sang duta kag ang Manughimo sini, Sia ang Isa nga nagpalig-on sini, nga wala magtuga sini nga wala sing pulos, nga naghuman sini agod puy-an: ‘Ako si Jehova, kag wala na sing iban pa.’”—Isaias 45:18.
Apang kamusta naman ang ginahimo nga mga paagi sang tawo sa paglaglag sa tanan nga kabuhi sa duta? Paagi sa iya walay tupong nga kaalam, ang Dios nagsiling nga magapasilabot sia antes malaglag sang tawo ang tanan nga kabuhi sa aton planeta. Talupangda ining makapasalig nga saad sa katapusan nga tulun-an sang Biblia, ang Bugna: “Naakig ang kapungsuran, apang nag-abot ang imo kasingkal, kag ang tion sa paghukom sa mga patay, sa pagpadya sa imo mga ulipon nga mga manalagna kag sa mga balaan kag sa mga nahadlok sa imo ngalan, sa magamay kag sa dalagku, kag sa paglaglag sa mga nagalaglag sang duta.”—Bugna 11:18.
Ginapahibalo sa aton ni Jehova ang iya orihinal nga katuyuan sa pagtuga sa duta, ining hiyas sa kahawaan, subong sang paglaragway sang isa ka astronaut nga nagalakbay sa palibot sang duta. Tuyo sang Dios nga himuon ini nga isa ka bug-os globo nga paraiso, malipayon nga ginapuy-an sang mga tawo—mga lalaki kag babayi—tanan nagakabuhi sa paghidait kag kahim-ong. Gintuyo niya nga amat-amat nga pun-on ang duta sang mga tawo paagi sa pagtugot sa unang mag-asawa nga magpanganak. Agod malipay ang unang tawhanon nga magtiayon, ginhimo ni Jehova ang isa ka bahin sang duta nga isa ka paraiso. Samtang padayon nga nagadamo ang tawhanon nga pamilya sa sulod sang mga tinuig kag mga siglo, ang hardin sang Eden padayon nga magasangkad tubtob nga matuman ang Genesis 1:28: “Ang Dios nagsiling sa ila: ‘Magmabungahon kag magbuad kag pun-a ang duta kag magpakaagalon sa sini.’”
Bangod nakita naton karon ang masubo nga kahimtangan sang duta kag sang mga pumuluyo sini, nagakahulugan bala ini nga napaslawan ang orihinal nga tuyo sang Dios para sa duta? Ukon ginbag-o bala niya ang iya katuyuan kag namat-od nga bangod sa pagkamalauton sang tawo, tugutan niya nga malaglag ang duta kag magsugod liwat, kon sa aton pa? Indi, makapat-od kita nga indi matuod ini. Ginasugiran kita sang Biblia nga bisan ano man ang gintuyo ni Jehova matuman ini sa ulihi, nga bisan ano man ang iya desisyon indi ini mabag-o sang bisan sin-o nga indibiduwal ukon bisan sang wala ginapaabot nga hitabo. Ginapasalig niya kita: “Amo man ang pulong nga nagaguwa sa akon baba. Indi ini magabalik sa akon nga wala sing mga resulta, kundi himuon gid sini ang akon nahamut-an, kag pat-od nga magamadinalag-on ini sa butang nga ginpadalhan ko sini.”—Isaias 55:11.
Ang Katuyuan sang Dios Naupangan, Wala Magbag-o
Bangod sang paglalis nanday Adan kag Eva kag sang pagpaguwa sa ila sa hardin sang Eden, maathag nga ang katuyuan sang Dios para sa paraiso nga duta matuman bisan wala sila. Apang, gilayon nga ginpahibalo ni Jehova nga padayon nga tumanon sang pila sang ila mga kaanakan ang iya orihinal nga sugo. Huo, nagakinahanglan ini sang tion, sing mga siglo pa gani, apang wala ginpakita kon daw ano kalawig ang tion sa pagpatuman sa orihinal nga sugo bisan kon nagpabilin nga himpit sanday Adan kag Eva. Ang matuod amo nga pagkatapos sang Milenyo nga Paggahom ni Cristo Jesus—sulusobra lamang sa isa ka libo ka tuig gikan karon—ang Paraiso nga mga kahimtangan sa Eden magasakop sa bug-os nga duta kag ang planeta nga Duta pagapuy-an sang mahidaiton kag malipayon nga mga kaanakan sang unang tawhanon nga magtiayon. Sa pagkamatuod, ang ikasarang ni Jehova subong himpit nga Manugtuyo mabindikar sa walay katubtuban!
Nian matuman ang makakulunyag nga mga tagna nga madugay na nga gin-inspirar sang Dios. Ang mga kasulatan subong sang Isaias 11:6-9 matuman na sing mahimayaon: “Ang lobo magapuyo sing makadali upod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok nga sapat magatingob; kag ang bata magatuytoy sa ila. Kag ang baka kag ang oso magahalab; ang ila mga tinday magaluko sing tingob. Kag bisan ang leon magakaon sing dagami kaangay sang baka. Kag ang bata nga nagasuso magahampang sa ibabaw sang buho sang kobra; kag ang nalutas nga bata magakuot sang iya kamot sa palanaguan sang dalitan nga man-ug. Indi sila magahimo sing bisan ano nga halit ukon magatuga sing bisan ano nga kagulub-an sa bug-os ko nga bukid nga balaan; bangod ang duta pat-od gid nga matugob sang ihibalo ni Jehova subong nga ang mga tubig nagatabon sang dagat.”
Ang mapigaw nga panglawas kag malala nga mga balatian mangin mga butang sang nagligad, kag amo man ang kamatayon. May mas maathag pa bala sangsa sining simple nga mga pinamulong nga masapwan sa katapusan nga tulun-an sang Biblia? “Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”—Bugna 21:3, 4.
Sa pagkamatuod, makasalig kita—ang aton matahom nga planeta nga Duta magapabilin sing dayon. Kabay nga makalampuwas ikaw sa katapusan sining malauton nga sistema sang mga butang, lakip ang tanan nagalaglag-sa-duta nga mga buhat sini. Ang matinlo bag-ong kalibutan sang Dios nagahilapit na. Kag madamong hinigugma ang magabangon gikan sa mga minatay paagi sa milagro sang pagkabanhaw. (Juan 5:28, 29) Huo, ang aton duta magapabilin sing dayon, kag makapabilin kita sa sini kag magakalipay sa sini.