Sa Katapusan—Hustisya Para sa Tanan

“Tinguhaan namon nga pamatian ang bag-o nga mga pamaagi . . . ang tingog sang mga nahalitan, ang tingog sang mga nagakabalaka, ang tingog sang mga nadulaan sing paglaum nga mapamatian. . . . Ang nabilin amo ang paghimo sa kon ano ang nasulat na sa kasuguan: sa katapusan ang pagpat-od nga subong nga ang tanan natawo nga may alalangay nga dignidad sa atubangan sang Dios, ang tanan natawo nga may alalangay nga dignidad sa atubangan sang tawo.”​—⁠Pamulongpulong sang presidente sang Estados Unidos, si Richard Milhous Nixon, sa iya inagurasyon sang Enero 20, 1969.

KON ang mga hari, presidente, kag primer ministro nagapungko sa palangakuan, may huyog sila sa paghambal tuhoy sa hustisya. Nalakip sa sini si Richard Nixon, presidente anay sang Estados Unidos. Apang ang iya matanlas nga mga pulong nadulaan sing kahulugan kon tamdon sing bunayag sa bahin sang maragtas. Bisan pa nangako sia nga ‘ipatuman ang kasuguan,’ nasapwan sang ulihi si Nixon nga nakasala sing paglapas sa kasuguan kag napilitan nga maghalin sa iya palangakuan. Tatlo ka dekada sang ulihi, ang ‘tingog sang mga nasaklaw, nabalaka, kag nadulaan sing paglaum’ padayon nga nagareklamo agod mabatian.

Ang pagpamati sa sining mga tingog kag paghatag sing atension sa ila mga hinakit indi mahapos, subong natukiban sang madamo nga lider nga may maayo nga katuyuan. Napamatud-an nga ang ‘hustisya para sa tanan’ mabudlay gid lab-uton nga tulumuron. Apang, madamo nga siglo na ang nagligad, may ginsaad nga dapat naton talupangdon​—⁠isa ka pinasahi nga saad tuhoy sa hustisya.

Paagi sa iya manalagna nga si Isaias, ginpasalig sang Dios ang Iya katawhan nga padalhan niya sila sing isa ka “alagad” nga sia mismo ang magapili. “Ginbutang ko ang akon espiritu sa iya,” siling ni Jehova sa ila. “Ang katarungan ipahayag niya sa mga pungsod.” (Isaias 42:​1-3) Wala sing tawhanon nga manuggahom ang mangahas sa paghimo sinang masangkad nga pagpahayag, isa nga nagakahulugan sing dayon nga hustisya sa tanan nga pungsod. Masaligan bala ini nga saad? Matuman ayhan ining tumalagsahon nga buhat?

Isa ka Saad nga Aton Masaligan

Ang isa ka saad masaligan lamang subong sang isa nga nagasaad sini. Sa sining kaso, wala na sing liwan pa kundi ang Labing Gamhanan nga Dios ang nagpahayag nga ang iya “alagad” magapaluntad sing katarungan sa bug-os nga kalibutan. Indi kaangay sa mga politiko, wala ginapakadiutay ni Jehova ang pagsaad. ‘Imposible para sa iya ang pagbutig,’ pasalig sa aton sang Biblia. (Hebreo 6:18) “Ang gintuyo ko nga himuon matuman,” madagmit nga pahayag sang Dios.​—⁠Isaias 14:​24, Today’s English Version.

Ang aton pagsalig sa sinang saad ginapalig-on man paagi sa rekord sang pinili sang Dios nga “alagad,” si Jesucristo. Sia nga magapaluntad sing katarungan dapat nagahigugma sa katarungan kag nagakabuhi suno sa katarungan. Si Jesus nagbilin sing walay dagta nga rekord subong tawo nga ‘naghigugma sa pagkamatarong kag nagdumot sa pagkamalinapason.’ (Hebreo 1:⁠9) Ang iya ginsiling, ang iya pagkabuhi, kag bisan ang iya pagkapatay, tanan nagapamatuod nga isa gid sia ka matarong nga tawo. Sa tion sang kamatayon ni Jesus, ang isa ka Romano nga opisyal nga soldado, nga maathag nga nakasaksi sa kasaba kag pagpatay kay Jesus, napahulag sa pagsiling: “Matuod gid nga matarong ini nga tawo.”​—⁠Lucas 23:⁠47.

Luwas nga nagkabuhi sia sing matarong, ginpamatukan ni Jesus ang inhustisya nga lapnag gid sang iya adlaw. Ginhimo niya ini, indi paagi sa subersion ukon rebolusyon, kundi paagi sa pagtudlo sing matuod nga katarungan sa tanan nga mamati. Ang iya Sermon sa Bukid isa ka lantip nga pagpaathag kon paano himuon ang matuod nga katarungan kag pagkamatarong.​—⁠Mateo, kapitulo 5-7.

Gin-aplikar ni Jesus ang iya ginbantala. Wala niya pagtamaya ang makaluluoy nga mga aruon, ang “mga kubos” sa Judiyo nga katilingban. Sa baylo, nagpakighambal sia sa ila, nagtandog sa ila, kag gin-ayo pa gani sila. (Marcos 1:​40-​42) Ang tanan nga tawo nga iya masugata, lakip ang mga imol kag ang nalisdan, importante sa iya. (Mateo 9:​36) “Kari sa akon, kamo tanan nga ginabudlayan kag ginabug-atan, kag papahuwayon ko kamo,” siling niya sa ila.​—⁠Mateo 11:⁠28.

Labaw sa tanan, wala gintugutan ni Jesus nga palainon ukon paakigon sia sang inhustisya sa iya palibot. Wala niya ginbalusan sing malaut ang malaut. (1 Pedro 2:​22, 23) Bisan sa tuman nga kasakit, nagpangamuyo sia sa iya langitnon nga Amay para sa mga soldado mismo nga naglansang sa iya. “Amay, patawara sila,” pangabay niya, “kay wala sila makahibalo sang ila ginahimo.” (Lucas 23:34) Pat-od gid nga ‘ginpaathag [ni Jesus] sa mga pungsod kon ano ang katarungan.’ (Mateo 12:18) May mas daku pa bala kita nga pamatuod nga luyag sang Dios paluntaron ang isa ka matarong nga kalibutan sangsa buhi nga huwaran sang iya kaugalingon nga Anak?

Ang Inhustisya Sarang Malandas

Ang buhi nga pamatuod nga ang inhustisya sarang malandas makita man karon sa kalibutan. Subong mga indibiduwal, kag subong organisasyon, ginatinguhaan sang mga Saksi ni Jehova nga daugon ang pagtamitami, pagkamaynadampigan, rasismo, kag kasingki. Binagbinaga ang masunod nga halimbawa.

Nagapati si Pedroa nga ang subersibo nga buhat amo lamang ang makapaluntad sing hustisya sa Basque Country, ang iya ginapuy-an nga rehiyon sa Espanya. Sa sining katuyuan nangin katapo sia sang terorista nga organisasyon nga naghanas sa iya sing tulad-militar nga paghanas sa Pransia. Sang matapos na ang iya paghanas, ginsugo sia nga magporma sing terorista nga grupo kag palukpon ang kuwartel sang mga pulis. Ginahanda na sang iya grupo ang mga inugpalupok sang gindakop sia sang mga pulis. Nabilanggo sia sing 18 ka bulan, apang bisan yara sia sa sulod sang bilangguan ginpadayon niya ang iya hilikuton sa politika, nagapakigbahin sa mga hunger strike kag isa ka bes ginpilasan ang iya mga butkon.

Pagdumdom ni Pedro nagapakig-away sia para sa hustisya. Dayon nakilala niya si Jehova kag ang iya mga katuyuan. Samtang yara sa bilangguan si Pedro, nagtuon sing Biblia ang iya asawa upod sa mga Saksi ni Jehova, kag sang nakaguwa sia, gin-agda sia sang iya asawa nga magtambong sa isa sang ila mga miting. Naluyagan gid niya ang okasyon amo nga nagpangabay sia sing isa ka pagtuon sa Biblia, isa ka pagtuon nga nagpabag-o sing daku sang iya panimuot kag dalanon sang pagkabuhi. Sang ulihi, sang 1989, ginbawtismuhan si Pedro kag ang iya asawa.

“Ginapasalamatan ko si Jehova nga wala gid ako sing napatay sadtong mga tuig nga isa ako ka terorista,” siling ni Pedro. “Karon ginagamit ko ang espada sang espiritu sang Dios, ang Biblia, sa paghatag sa mga tawo sing mensahe tuhoy sa matuod nga paghidait kag hustisya​—⁠ang maayong balita tuhoy sa Ginharian sang Dios.” Kasan-o lang, ginduaw ni Pedro, nga isa na karon ka gulang sang mga Saksi ni Jehova, ang kuwartel mismo nga gintuyo niya nga wasakon. Sa sining tion nagkadto sia agod ibantala ang mensahe sang paghidait sa mga pamilya nga nagapuyo didto.

Ang mga Saksi ni Jehova nagahimo sining mga pagbag-o bangod nagahandum sila sing isa ka matarong nga kalibutan. (2 Pedro 3:​13) Bisan pa nagasalig sila sing bug-os sa saad sang Dios sa pagpahanabo sini, narealisar nila nga katungdanan man nila ang pagkabuhi suno sa hustisya. Maathag nga ginapakita sang Biblia sa aton nga ginapaabot sang Dios nga himuon naton ang aton bahin.

Pagsab-ug sing mga Binhi sang Pagkamatarong

Matuod, kon nagaatubang sa inhustisya, daw masinggit kita: “Diin ang Dios sang katarungan?” Amo sina ang tuaw sang mga Judiyo sadtong adlaw ni Malaquias. (Malaquias 2:17) Ginhunahuna bala sang Dios nga nagakaigo ang ila pagreklamo? Sa kabaliskaran, “nagpalapyo” ini sa iya bangod, lakip sa iban pa nga butang, sila mismo nagluib sa ila mga asawa nga nagtigulang na, nagabulag sa ila sa diutay nga mga kabangdanan. Si Jehova nagpahayag sang iya kabalaka sa ‘mga asawa sang ila pagkapamatan-on, nga ginluiban nila, bisan pa sila ang kaupod nila kag ang asawa sang ila katipan.’​—⁠Malaquias 2:⁠14.

Makareklamo bala kita sing nagakaigo tuhoy sa inhustisya kon kita mismo nagabuhat sing dimatarong? Sa pihak nga bahin, kon ginailog naton si Jesus paagi sa pagdula sa pagtamitami kag rasismo sa aton tagipusuon, paagi sa pagkawalay nadampigan kag pagkamahigugmaon sa tanan, kag paagi sa indi pagbalos sing malaut sa malaut, ginapakita naton nga ginahigugma gid naton ang hustisya.

Agod makaani kita sing hustisya, ginapalig-on kita sang Biblia nga ‘magsab-ug sing binhi sang pagkamatarong.’ (Oseas 10:12) Walay sapayan kon daw ano man ini kadiutay, ang tagsa ka personal nga kadalag-an batok sa inhustisya importante. Subong sang ginsulat ni Martin Luther King, Jr., sa iya Letter From Birmingham Jail, “ang inhustisya sa bisan diin makatalagam sa hustisya bisan diin man.” Ang mga ‘nagapangita sing pagkamatarong’ amo ang mga tawo nga ginapili sang Dios nga manubli sang iya matarong nga bag-ong kalibutan nga magaabot sa indi madugay.​—⁠Sofonias 2:⁠3.

Indi naton matukod ang aton ginalauman nga hustisya sa mahuyang nga sadsaran sang tawhanon nga mga saad, apang masaligan naton ang pulong sang aton mahigugmaon nga Manunuga. Amo kon ngaa ginsilingan ni Jesus ang iya mga sumulunod nga padayon nga ipangamuyo ang pag-abot sang Ginharian sang Dios. (Mateo 6:​9, 10) Si Jesus, ang gintangdo nga Hari sinang Ginharian, ‘magaluwas sa imol nga nagapangayo sing bulig, subong man ang nagaantos kag ang bisan sin-o nga wala sing manugtabang. Magakaawa sia sa kubos kag imol, kag luwason niya ang mga kalag sang mga imol.’​—⁠Salmo 72:​12, 13.

Maathag nga ang inhustisya indi permanente. Ang paggahom ni Cristo sa bug-os nga duta magadula sa inhustisya sing dayon, subong sang ginapasalig sa aton sang Dios paagi sa iya manalagna nga si Jeremias: “Magaabot ang tion nga tumanon ko ang akon ginsaad . . . Sa sadto nga tion pilion ko subong hari ang isa ka matarong nga kaliwat ni David. Ina nga hari magahimo sing husto kag matarong sa bug-os nga duta.”​—⁠Jeremias 33:14, 15, TEV.

[Footnote]