Karon Amo ang Adlaw sang Kaluwasan!

“Yari karon! Karon amo ang tion nga labi pa nga nahamut-an. Yari karon! Karon amo ang adlaw sang kaluwasan.”​—⁠2 CORINTO 6:⁠2.

1. Ano ang kinahanglanon para sa isa ka nahamut-an nga panindugan sa atubangan sang Dios kag ni Cristo?

SI Jehova nagtalana sing adlaw sang paghukom para sa katawhan. (Binuhatan 17:31) Agod mangin adlaw ini sang kaluwasan para sa aton, kinahanglan nga nahamut-an ang aton panindugan sa atubangan niya kag sang iya tinangdo nga Hukom, si Jesucristo. (Juan 5:​22) Ini nga panindugan nagakinahanglan sing paggawi nga nahisanto sa Pulong sang Dios kag sing pagtuo nga nagapahulag sa aton sa pagbulig sa iban nga mangin matuod nga mga disipulo ni Jesus.

2. Ngaa ang kalibutan sang katawhan nahamulag sa Dios?

² Bangod sang napanubli nga sala, ang kalibutan sang katawhan nahamulag sa Dios. (Roma 5:​12; Efeso 4:​17, 18) Busa, ang aton ginabantalaan maluwas lamang kon magpasag-uli sila sa iya. Gin-athag ini ni apostol Pablo sang magsulat sia sa mga Cristiano sa Corinto. Usisaon naton ang 2 Corinto 5:​10⁠–​6:​10 agod tan-awon naton kon ano ang ginsiling ni Pablo nahanungod sa paghukom, pagpasag-uli sa Dios, kag sa kaluwasan.

“Padayon nga Ginabuyok Namon ang mga Tawo”

3. Paano ‘padayon nga ginbuyok [ni Pablo] ang mga tawo,’ kag ngaa dapat naton himuon ini karon?

³ Gin-angot ni Pablo ang paghukom sa pagbantala sang magsulat sia: “Kita tanan dapat ipadayag sa atubangan sang lingkuran nga hukmanan ni Cristo, agod mabaton sang tagsatagsa ang iya padya para sa mga butang nga ginhimo paagi sa lawas, suno sa mga butang nga iya ginbuhat, kon bala maayo ini ukon malain. Busa, bangod nahibaluan namon ang kahadlok sa Ginuo, padayon nga ginabuyok namon ang mga tawo.” (2 Corinto 5:⁠10, 11) Ang apostol ‘padayon nga nagbuyok sa mga tawo’ paagi sa pagbantala sing maayong balita. Kamusta naman kita? Sanglit malapit na ang katapusan sining malaut nga sistema sang mga butang, dapat naton himuon ang aton labing masarangan nga buyukon ang iban sa paghimo sing mga tikang nga kinahanglanon agod matigayon ang paborable nga paghukom ni Jesus kag ang kahamuot sang Ginahalinan sang kaluwasan, si Jehova nga Dios.

4, 5. (a) Ngaa indi kita dapat magpabugal nahanungod sa aton mga nahimuan sa pag-alagad kay Jehova? (b) Paano si Pablo nagpabugal “para sa Dios”?

⁴ Apang, kon ginpakamaayo sang Dios ang aton ministeryo, indi kita dapat magpabugal. Sa Corinto ang iban naghabok sa pagpabugal sa ila kaugalingon ukon sa iban nga mga tawo, sa amo nabahinbahin ang kongregasyon. (1 Corinto 1:​10-13; 3:​3, 4) Nagapatuhoy sa sining kahimtangan, si Pablo nagsulat: “Wala namon ginarekomendar liwat ang amon kaugalingon sa inyo, kundi nagahatag sa inyo sing pangganyat nga magpabugal may kaangtanan sa amon, agod nga may isabat kamo sa mga nagapabugal bangod sa naguwa nga panagway apang indi bangod sa tagipusuon. Kay kon kami buangbuang, ini para sa Dios; kon kami may maligdong nga painuino, ini para sa inyo.” (2 Corinto 5:⁠12, 13) Ang mga matinaastaason indi interesado sa paghiusa kag sa espirituwal nga kaayuhan sang kongregasyon. Luyag nila ipabugal ang ila naguwa nga mga panagway sa baylo nga buligan ang ila mga masigkatumuluo nga magpalambo sing maayo nga tagipusuon sa atubangan sang Dios. Busa, ginsabdong ni Pablo ang kongregasyon kag nagsiling sang ulihi: “Sia nga nagapabugal, ipabugal niya si Jehova.”​—⁠2 Corinto 10:⁠17.

⁵ Wala bala si Pablo magpabugal? Mahimo nga amo ang ginahunahuna sang iban bangod nagsiling sia nga sia isa ka apostol. Apang nagpabugal sia “para sa Dios.” Ginpabugal niya ang iya mga ikasarang kag mga nahimuan subong apostol, agod nga ang mga taga-Corinto indi magtalikod kay Jehova. Ginhimo ini ni Pablo agod ipasag-uli sila sa Dios bangod ginadala sila sang butig nga mga apostoles sa sayop nga direksion. (2 Corinto 11:​16-21; 12:​11, 12, 19-21; 13:10) Apang, wala pirme magtinguha si Pablo nga padayawon ang iban sa iya mga nahimuan.​—⁠Hulubaton 21:⁠4.

Ginatiklod Ka Bala sang Gugma ni Cristo?

6. Ano dapat ang epekto sa aton sang gugma ni Cristo?

⁶ Subong isa ka matuod nga apostol, gintudluan ni Pablo ang iban tuhoy sa halad nga gawad ni Jesus. Nagpahulag ini kay Pablo, kay sia nagsulat: “Ang gugma ni Cristo nagatiklod sa amon, bangod amo ini ang amon ginhukom, nga ang isa ka tawo napatay para sa tanan; gani, nian, ang tanan napatay; kag napatay sia para sa tanan agod nga ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.” (2 Corinto 5:⁠14, 15) Daw ano nga gugma ang ginpakita ni Jesus sa paghatag sang iya kabuhi para sa aton! Sa pagkamatuod dapat ini mangin isa ka nagatiklod nga puwersa sa aton kabuhi. Ang pagkamapinasalamaton kay Jesus bangod ginhatag niya ang iya kabuhi para sa aton dapat magpahulag sa aton nga mangin makugi sa pagbantala sing maayong balita sang kaluwasan nga ginaaman ni Jehova paagi sa iya hinigugma nga Anak. (Juan 3:​16; ipaanggid ang Salmo 96:⁠2.) Ginatiklod ka bala sang “gugma ni Cristo” nga magmakugi sa pagbantala sing Ginharian kag paghimo sing disipulo nga hilikuton?​—⁠Mateo 28:​19, 20.

7. Ano ang buot silingon sang ‘indi pagkilalahon ang tawo suno sa unod’?

⁷ Paagi sa paggamit sang ila kabuhi sa isa ka paagi nga nagapakita sing pagkamapinasalamaton sa ginhimo ni Cristo para sa ila, ang mga hinaplas ‘wala na nagakabuhi para sa ila kaugalingon, kundi para sa iya.’ “Busa,” siling ni Pablo, “kutob karon wala na kami nagakilala sa tawo suno sa unod. Bisan pa nakilala namon si Cristo suno sa unod, wala na gid kami karon nagakilala sa iya sing subong.” (2 Corinto 5:⁠16) Indi dapat pagtamdon sang mga Cristiano ang mga tawo sa undanon nga paagi, ayhan ginapaboran ang mga Judiyo sangsa mga Gentil ukon ang mga manggaranon sangsa mga imol. Ang mga hinaplas ‘wala nagakilala sa tawo suno sa unod,’ kay ang importante amo ang ila espirituwal nga kaangtanan sa ila mga masigkatumuluo. Indi lamang ang mga tawo nga nakakita kay Jesus sang yari sia sa duta ang ‘nagakilala kay Cristo suno sa unod.’ Bisan pa kon ang iban nga nagalaum sa Mesias nagkilala anay kay Cristo suno sa unod, indi na dapat subong sini ang ila pagkilala sa iya. Ginhatag niya ang iya lawas subong isa ka gawad kag ginbanhaw subong isa ka nagahatag sing kabuhi nga espiritu. Ang iban nga ginbanhaw padulong sa langitnon nga kabuhi nagbiya sang ila undanon nga lawas nga wala gid makakita kay Jesucristo sa unod.​—⁠1 Corinto 15:​45, 50; 2 Corinto 5:​1-5.

8. Paano ang mga indibiduwal ‘mahiusa kay Cristo’?

⁸ Nagapatuhoy gihapon sa mga hinaplas, si Pablo nagdugang: “Kon ang bisan sin-o nahiusa kay Cristo, bag-o sia nga tinuga; ang daan nga mga butang nagtaliwan, yari karon! ang bag-o nga mga butang nagaluntad.” (2 Corinto 5:⁠17) Ang ‘paghiusa kay Cristo’ nagakahulugan nga mangin isa upod sa iya. (Juan 17:21) Ini nga kahimtangan natigayon sang isa ka tawo sang ginbuyok sia ni Jehova sa iya Anak kag ginpanganak ini nga tawo paagi sa balaan nga espiritu. Subong isa ka ginpanganak sang espiritu nga anak sang Dios, sia nangin isa ka ‘bag-o nga tinuga’ nga may paglaum nga magaambit upod kay Cristo sa langitnon nga Ginharian. (Juan 3:​3-8; 6:​44; Galacia 4:​6, 7) Ining hinaplas nga mga Cristiano ginhatagan sing halangdon nga pribilehiyo sang pag-alagad.

“Magpasag-uli Kamo sa Dios”

9. Ano ang ginhimo sang Dios agod mangin posible ang pagpasag-uli sa iya?

⁹ Nahamut-an gid ni Jehova ang ‘bag-o nga tinuga’! Si Pablo nagsiling: “Ang tanan nga butang gikan sa Dios, nga nagpasag-uli sa aton sa iya kaugalingon paagi kay Cristo kag naghatag sa aton sing ministeryo sang pagpasag-uli, nga amo, nga ang Dios paagi kay Cristo nagapasag-uli sang kalibutan sa iya kaugalingon, nga wala nagaisip sa ila sang ila mga paglapas, kag gintugyan niya ang pulong sang pagpasag-uli sa amon.” (2 Corinto 5:⁠18, 19) Ang katawhan nahamulag sa Dios kutob sang nakasala si Adan. Apang si Jehova mahigugmaon nga naghulag agod buksan ang dalan sang pagpasag-uli paagi sa halad ni Jesus.​—⁠Roma 5:​6-12.

10. Kay sin-o gintugyan ni Jehova ang ministeryo sang pagpasag-uli, kag ano ang ginhimo nila sa pagtuman sini?

¹⁰ Gintugyan ni Jehova ang ministeryo sang pagpasag-uli sa mga hinaplas, amo nga si Pablo nakasiling: “Gani mga embahador kami nga salili para kay Cristo, nga daw subong bala nga ang Dios nagapakiluoy paagi sa amon. Subong mga salili para kay Cristo nagapakiluoy kami: ‘Magpasag-uli kamo sa Dios.’ ” (2 Corinto 5:20) Sang dumaan nga mga tion, ang mga embahador ginapadala lamang kon may matabo nga pagbangigay agod tan-awon kon mahimo pa malikawan ang pag-inaway. (Lucas 14:​31, 32) Bangod ang makasasala nga kalibutan sang katawhan nahamulag sa Dios, ginpadala niya ang iya hinaplas nga mga embahador agod pahibaluon ang mga tawo sang iya mga kondisyon para sa pagpasag-uli. Subong mga salili para kay Cristo, ang mga hinaplas nagapakiluoy: “Magpasag-uli kamo sa Dios.” Ining pakiluoy isa ka maluluy-on nga pagpalig-on nga tinguhaan ang pagpakighidait sa Dios kag batunon ang kaluwasan nga iya ginatanyag paagi kay Cristo.

11. Paagi sa pagtuo sa gawad, sin-o sa ulihi ang makatigayon sing matarong nga panindugan sa atubangan sang Dios?

¹¹ Ang tanan nga tawo nga nagatuo sa gawad mahimo makapasag-uli sa Dios. (Juan 3:36) Si Pablo nagsiling: “Ang isa [Jesus] nga wala makakilala sing sala ginhimo niya [Jehova] nga mangin sala para sa aton, agod nga kita mangin pagkamatarong sang Dios paagi sa iya.” (2 Corinto 5:⁠21) Ang himpit nga tawo nga si Jesus amo ang dulot sa sala para sa tanan nga anak ni Adan nga ginaluwas gikan sa pinanubli nga pagkamakasasala. Sila mangin “pagkamatarong sang Dios” paagi kay Jesus. Ining pagkamatarong, ukon matarong nga panindugan sa atubangan sang Dios, una nga matigayon sang 144,000 nga kaupod nga mga manunubli ni Cristo. Sa tion sang iya Isa ka Libo ka Tuig nga Paghari, ang matarong nga panindugan subong himpit nga mga tawo matigayon sang dutan-on nga mga anak sang Dayon nga Amay, si Jesucristo. Bayawon niya sila sa isa ka matarong nga panindugan sa kahimpitan agod nga mangin matutom sila sa Dios kag makabaton sing dulot nga kabuhi nga walay katapusan.​—⁠Isaias 9:​6; Bugna 14:​1; 20:​4-6, 11-15.

“Ang Tion nga Labi Pa nga Nahamut-an”

12. Anong importante nga ministeryo ang ginahimo sang mga embahador kag mga mensahero ni Jehova?

¹² Agod maluwas, dapat kita maghikot nahisanto sa mga pulong ni Pablo: “Nagapangabudlay kaupod niya [Jehova], nagapakiluoy man kami nga dili ninyo pagbatunon ang dibagay nga kaayo sang Dios kag mawasi ang katuyuan sini. Kay nagasiling sia: ‘Sa tion nga nahamut-an ginpamatian ko ikaw, kag sa adlaw sang kaluwasan gintabangan ko ikaw.’ Yari karon! Karon amo ang tion nga labi pa nga nahamut-an. Yari karon! Karon amo ang adlaw sang kaluwasan.” (2 Corinto 6:⁠1, 2) Ang hinaplas nga mga embahador ni Jehova kag ang iya mga mensahero, ang “iban nga mga karnero,” wala nagabaton sang dibagay nga kaayo sang ila langitnon nga Amay kag dayon ginawasi ang katuyuan sini. (Juan 10:16) Paagi sa ila matadlong nga paggawi kag makugi nga ministeryo sa sining “tion nga nahamut-an,” ginatinguhaan nila nga kahamut-an sang Dios kag ginapahibalo ang mga pumuluyo sang duta nga karon na “ang adlaw sang kaluwasan.”

13. Ano ang ginasiling sang Isaias 49:8, kag paano ini una nga natuman?

¹³ Ginbalikwat ni Pablo ang Isaias 49:​8, nga mabasa: “Amo ini ang ginsiling ni Jehova: ‘Sa tion sang maayong kabubut-on ginsabat ko ikaw, kag sa adlaw sang kaluwasan gintabangan ko ikaw; kag gin-amligan ko ikaw agod nga mahatag ko ikaw subong isa ka katipan para sa katawhan, agod papuy-an liwat ang duta, agod panag-iyahan liwat ang nahapay nga mga panublion.’ ” Ini nga tagna una nga natuman sang ang katawhan sang Israel ginhilway gikan sa pagkabihag sa Babilonia kag sang ulihi nagbalik sa ila nahapay nga dutang natawhan.​—⁠Isaias 49:​3, 9.

14. Paano natuman ang Isaias 49:8 sa bahin ni Jesus?

¹⁴ Bilang dugang pa nga katumanan sang tagna ni Isaias, ginhatag ni Jehova ang iya “alagad” nga si Jesus subong ‘kapawa sang mga pungsod, agod nga ang pagluwas [sang Dios] mangin tubtob sa ukbong sang duta.” (Isaias 49:⁠6, 8; ipaanggid ang Isaias 42:​1-4, 6, 7; Mateo 12:​18-21.) Ang “tion sang maayong kabubut-on,” ukon ang “tion nga nahamut-an,” maathag nga naaplikar kay Jesus sang yari sia sa duta. Nangamuyo sia, kag ‘ginsabat’ sia sang Dios. Nangin isa yadto ka “adlaw sang kaluwasan” para kay Jesus bangod naghupot sia sing bug-os nga integridad kag sa amo “nangin dalan sia para sa walay katapusan nga kaluwasan sang tanan nga nagatuman sa iya.”​—⁠Hebreo 5:⁠7, 9; Juan 12:​27, 28.

15. Kutob san-o nagpanikasog ang espirituwal nga mga Israelinhon nga mangin takus sa dibagay nga kaayo sang Dios, kag ano ang ila tulumuron?

¹⁵ Ginaaplikar ni Pablo ang Isaias 49:8 sa hinaplas nga mga Cristiano, nagapakiluoy sa ila nga ‘indi pagwasihon ang katuyuan sang dibagay nga kaayo sang Dios’ paagi sa indi pagtinguha sa iya maayong kabubut-on sa “tion nga nahamut-an” kag sa “adlaw sang kaluwasan” nga iya ginaaman. Si Pablo nagdugang: “Yari karon! Karon amo ang tion nga labi pa nga nahamut-an. Yari karon! Karon amo ang adlaw sang kaluwasan.” (2 Corinto 6:⁠2) Kutob sang Pentecostes 33 C.⁠E., nagpanikasog ang espirituwal nga mga Israelinhon nga mangin takus sila sa dibagay nga kaayo sang Dios agod nga ang “tion nga nahamut-an” mangin “adlaw sang kaluwasan” para sa ila.

‘Nagarekomendar sang Aton Kaugalingon Subong mga Ministro sang Dios’

16. Sa idalom sang anong mabudlay nga mga kahimtangan ginrekomendar ni Pablo ang iya kaugalingon subong ministro sang Dios?

¹⁶ Ang iban nga nagpakig-upod sa kongregasyon sang Corinto wala magpamatuod nga takus sa dibagay nga kaayo sang Dios. Ginpasipalahan nila si Pablo paagi sa pagtinguha nga gub-on ang iya awtoridad bilang apostol, bisan pa naglikaw sia nga ‘maghatag sing bisan ano nga kasandaran.’ Ginrekomendar gid niya ang iya kaugalingon subong ministro sang Dios “paagi . . . sa pagbatas sing madamo, sa mga kapipit-an, sa mga kinahanglanon, sa mga kabudlayan, sa mga lapdos, sa mga pagbilanggo, sa mga kagubot, sa mga pagpangabudlay, sa mga pagpulaw, sa mga tion nga wala sing pagkaon.” (2 Corinto 6:⁠3-5) Sang ulihi, nangatarungan si Pablo nga kon ang iya mga kaaway mga ministro, sia “labi nga talalupangdon” bangod nag-antos sia sing kapin nga mga pagkabilanggo, mga lapdos, mga katalagman, kag mga kabudlayan.​—⁠2 Corinto 11:​23-27.

17. (a) Paagi sa pagpakita sing anong mga kinaiya marekomendar naton ang aton kaugalingon subong mga ministro sang Dios? (b) Ano ang “mga hinganib sang pagkamatarong”?

¹⁷ Kaangay ni Pablo kag sang iya mga kaupod, marekomendar naton ang aton kaugalingon subong mga ministro sang Dios. Paano? “Paagi sa kaputli,” ukon kaulay, kag paagi sa pagpanghikot nahisanto sa sibu nga ihibalo sang Biblia. Marekomendar naton ang aton kaugalingon “paagi sa pagkamainantuson,” mapailubon nga ginabatas ang sayop ukon pagtinguha nga paakigon kita, kag “paagi sa kaayo” samtang nagahimo kita sing mabuligon nga mga butang para sa iban. Dugang pa, marekomendar naton ang aton kaugalingon subong mga ministro sang Dios paagi sa pagbaton sing tuytoy gikan sa iya espiritu, nagapakita sing “gugma nga wala sing pagkasalimpapaw,” nagahambal sing matuod, kag nagasandig sa iya para sa gahom agod mapadayon naton ang aton ministeryo. Makawiwili nga ginpamatud-an man ni Pablo ang iya pagkaministro “paagi sa mga hinganib sang pagkamatarong sa tuo kag sa wala.” Sa dumaan nga pagpakig-away, ang tuo nga kamot amo masami ang nagauyat sing espada samtang ang wala nga kamot amo ang nagauyat sing taming. Sa espirituwal nga pagpakig-away batok sa butig nga mga manunudlo, wala maggamit si Pablo sing mga hinganib sang makasasala nga unod​—⁠paglimbong, pagtiplang, pagdaya. (2 Corinto 6:​6, 7; 11:​12-14; Hulubaton 3:32) Gingamit niya ang matarong nga “mga hinganib,” ukon mga paagi, sa pagsakdag sa matuod nga pagsimba. Gani amo man dapat ang himuon naton.

18. Kon mga ministro kita sang Dios, paano kita dapat maggawi?

¹⁸ Kon mga ministro kita sang Dios, magagawi kita kaangay ni Pablo kag sang iya mga masigkamanugpangabudlay. Magapanghikot kita kaangay sang mga Cristiano ginatahod man ukon wala. Indi kita mag-untat sa pagbantala bisan ginapakalain kita, apang indi man kita magpahambog kon ginadayaw kita. Magahambal kita sing kamatuoran kag mahimo nga kilalahon bangod sang diosnon nga mga buhat. Kon yara kita sa katalagman bangod sang pagsalakay sang mga kaaway, magasalig kita kay Jehova. Kag batunon naton sing mapinasalamaton ang disiplina.​—⁠2 Corinto 6:​8, 9.

19. Paano ‘mapamanggaranon ang madamo’ sa espirituwal?

¹⁹ Sa paghinakop sang iya pagpaathag tuhoy sa ministeryo sang pagpasag-uli, ginlaragway ni Pablo ang iya kaugalingon kag ang iya mga kaupod “subong nga masinulub-on apang pirme nga nagakalipay, subong nga imol apang nagapamanggad sa madamo, subong nga walay bisan ano apang nagapanag-iya sing tanan nga butang.” (2 Corinto 6:⁠10) Bisan pa yadtong mga ministro may rason nga magkasubo bangod sang ila mga pag-antos, may kalipay sila sa ila tagipusuon. Imol sila sa materyal, apang ‘ginpamanggaranon [nila] ang madamo’ sa espirituwal. Sa katunayan, ‘nagapanag-iya [sila] sing tanan nga butang’ bangod ang ila pagtuo naghatag sa ila sing espirituwal nga kamanggaran​—⁠sing paglaum nga mangin langitnon nga mga anak sang Dios. Kag sila may bugana kag malipayon nga pagkabuhi subong Cristianong mga ministro. (Binuhatan 20:35) Kaangay nila, aton man ‘mapamanggaranon ang madamo’ paagi sa pagpakigbahin sa ministeryo sang pagpasag-uli karon​—⁠sa adlaw sang kaluwasan karon!

Magsalig sa Pagluwas ni Jehova

20. (a) Ano ang ginahandum gid ni Pablo, kag ngaa indi dapat mag-uyang sing tion? (b) Ano ang nagatanda sang adlaw sang kaluwasan nga aton karon ginakabuhian?

²⁰ Sang ginsulat ni Pablo ang iya ikaduha nga sulat para sa mga taga-Corinto sang mga 55 C.⁠E., mga 15 ka tuig na lamang ang nabilin para sa Judiyong sistema sang mga butang. Handum gid sang apostol nga mapasag-uli sa Dios ang mga Judiyo kag mga Gentil paagi kay Cristo. Isa yadto ka adlaw sang kaluwasan, kag wala sing tion nga dapat uyangan. Kita man karon yara sa kaanggid nga katapusan sang isa ka sistema sang mga butang kutob sang 1914. Ang pagbantala sing Ginharian nga ginahimo karon sa bug-os nga kalibutan nagatanda sini subong adlaw sang kaluwasan.

21. (a) Anong tuigan nga teksto ang napilian para sa 1999? (b) Ano dapat ang ginahimo naton sa adlaw sang kaluwasan karon?

²¹ Ang katawhan sang tanan nga pungsod dapat makabati sang aman sang Dios para sa kaluwasan paagi kay Jesucristo. Indi dapat magpalantang. Si Pablo nagsulat: “Yari karon! Karon amo ang adlaw sang kaluwasan.” Ini nga mga pulong sang 2 Corinto 6:2 amo ang tuigan nga teksto sang mga Saksi ni Jehova sa 1999. Daw ano ini ka nagakaigo, kay nagaatubang kita sing butang nga labaw pa sa kalaglagan sang Jerusalem kag sang templo sini! Malapit na ang katapusan sining bug-os nga sistema sang mga butang, nga magadalahig sa tanan sa duta. Karon na​—⁠indi buwas​—⁠ang tion sa paghulag. Kon nagapati kita nga ang pagluwas iya ni Jehova, kon ginahigugma naton sia, kag kon ginapabaloran naton ang dayon nga kabuhi, indi naton pagwasihon ang katuyuan sang dibagay nga kaayo sang Dios. Upod ang tinagipusuon nga handum nga padunggan si Jehova, pamatud-an naton sa pulong kag sa buhat nga serioso gid kita sa pagtuaw: “Yari karon! Karon amo ang adlaw sang kaluwasan.”

Paano Mo Sabton?

◻ Ngaa importante gid nga magpasag-uli sa Dios?

◻ Sin-o ang mga embahador kag mga mensahero nga nagahimo sang ministeryo sa pagpasag-uli?

◻ Paano naton marekomendar ang aton kaugalingon subong mga ministro sang Dios?

◻ Ano ang kahulugan sa imo sang tuigan nga teksto sang mga Saksi ni Jehova sa 1999?

[Mga retrato sa pahina 17]

Kaangay ni Pablo, makugi ka bala nga nagabantala kag nagabulig sa iban agod makapasag-uli sa Dios?

Estados Unidos

Pransia

Cote d’Ivoire

[Retrato sa pahina 18]

Sa adlaw sang kaluwasan karon, lakip ka bala sa kadam-an nga nagapasag-uli kay Jehova nga Dios?