Naupangan ang Isa ka Pagpangawat sa Katundan nga Aprika
Panugiron ni Eunice Ebuh
“Ginplano sang armado nga mga kawatan ang ila pagsalakay sa adlaw nga masami ginahiwat namon ang Pagtinuon Sang Kongregasyon sa Libro sa amon puluy-an. Ginabuksan namon sing daku ang amon gawang para sa mga kauturan kag mga interesado. Mahimo nga nahibaluan sang mga kawatan ang amon kinabatasan kag ang oras sang pagtinipon. Nahibaluan gid namon nga may ginkawat sila nga awto sa iban nga duog kag nag-angan-angan sa amon gawang sang adlaw kag tion sang pagtinuon sa libro.
“Natabuan nga sang semana nga nagkari sila amo man ang semana sang pagduaw sang manugtatap sa sirkito. Sa baylo nga magtipon sa amon balay, nagtipon kami sa Kingdom Hall. Sang matapos na ang pagtinipon, nagmiting ang mga gulang. Masami nga nagauna kami pauli sang kabataan, apang ang akon bana, nga isa ka gulang, nagpahulat sa amon. Nagsiling sia nga indi sia magdugay. Gani naghulat kami.
“Masunod natukiban namon nga ang awto indi mag-andar. Wala ini makay-o sang akon bana kag sang manugtatap sa sirkito. Wala man ini makay-o sang gintawag namon nga mekaniko.
“Naglakat pauli ang kabataan. Sang ulihi, nagpauli man ako. Nag-abot ako sang mga alas dies. Ako kag ang kabataan man wala magsulod sa compound nga nagasakay sa awto, nga kon amo ang natabo kinahanglan kuntani nga buksan ang daku nga ganhaan.
“Sang pagsulod ko sa akon hulot-tulugan, nakabati ako sing lupok sang pusil, nga tuman ka tunog. Nahangawa ako kon ano ang nagakatabo. Gintinguhaan ko nga teleponohan ang mga pulis, apang utod ang linya. Nagdalidali ako panaug kag ginkandaduhan ang ganhaan nga asero sa atubangan, kag dalidali nga ginkandaduhan ang ganhaan sa tunga. Ginpatay ko ang mga suga. Hinadlukan ang akon kabataan, gani ginsingganan ko sila nga magkalma. Nangamuyo kami sing tingob para sa pag-amlig ni Jehova. Samtang, ang akon bana didto pa sa Kingdom Hall nga nagatinguha nga mapaandar ang awto.
“Naglaaw ako sa bintana kag nakita ko ang isa ka tawo nga nagahamyangon sa kalye sa guwa sang gawang. Daw nakahalin na ang mga kawatan, gani ginsakay ko ang pilason nga tawo sa akon awto kag gindala sia sa ospital. Peligruso yadto, apang kinahanglan may himuon ako. Apang, sing makapasubo, napatay sia pagkasunod nga adlaw.
“Walay sapayan sadto nga trahedya, grabe pa gid kuntani ang natabo. Bangod sang pagduaw sang manugtatap sa sirkito wala kami sing pagtinuon sa libro sa amon balay. Bangod sang pagkaguba sang awto wala kami makasakay pauli subong isa ka pamilya. Ang akon bana, nga pat-od nga ginsalakay kuntani sang mga kawatan, gab-i na kaayo nakapauli. Ini kag ang iban pa nga butang nangin bentaha sa amon sadto nga gab-i.
“Si Jehova amo ang amon pamakod kag ang amon dalangpan. Subong ini sa ginsiling sang kasulatan: ‘Kon indi si Jehova mismo magbantay sang siudad, wala sing pulos ang pagpulaw sang manugbantay.’”—Salmo 127:1.