“Palig-una ang Inyo Tagipusuon”
“Nagakinahanglan kamo sing pagbatas, agod nga, pagkatapos ninyo mahimo ang kabubut-on sang Dios, mabaton ninyo ang katumanan sang saad.”—HEBREO 10:36.
1, 2. (a) Ano ang natabo sa pila ka Cristiano sang una nga siglo? (b) Ngaa madali magluya ang pagtuo?
SA TANAN nga manunulat sang Biblia, wala na sing iban pa nga nagsambit sang pagtuo sing mas masunson sangsa kay apostol Pablo. Kag masunson nga ginpatuhuyan niya ang mga tawo nga ang ila pagtuo nagluya ukon nadula. Halimbawa, si Himeneo kag si Alejandro “nalunod tuhoy sa ila pagtuo.” (1 Timoteo 1:19, 20) Ginbiyaan ni Demas si Pablo bangod “ginhigugma niya ang sistema sang mga butang karon.” (2 Timoteo 4:10) Ang iban, bangod sang ila di-cristiano, iresponsable nga mga buhat ‘nagpanghiwala sang pagtuo.’ Ang iban ginlimbungan sang butig nga kaalam kag “nagsipak sa pagtuo.”—1 Timoteo 5:8; 6:20, 21.
2 Ngaa napaslawan yadtong hinaplas nga mga Cristiano sa sining mga paagi? Ti, “ang pagtuo amo ang masaligan nga pagpaabot sang mga butang nga ginalauman, ang maathag nga pagpasundayag sang mga katunayan bisan nga dimakita.” (Hebreo 11:1) Nagapakita kita sing pagtuo sa butang nga indi naton makita. Indi naton kinahanglan ini para sa mga butang nga makita naton. Mas mahapos pangabudlayan ang kitaon nga manggad sangsa espirituwal nga manggad nga indi makita. (Mateo 19:21, 22) Madamo nga kitaon nga mga butang—subong sang ‘kailigbon sang unod kag kailigbon sang mga mata’—ang makagalanyat gid sa aton dihimpit nga unod kag makapaluya sang aton pagtuo.—1 Juan 2:16.
3. Ano nga sahi sang pagtuo ang dapat palambuon sang isa ka Cristiano?
3 Apang, siling ni Pablo, “sia nga nagapalapit sa Dios dapat magpati nga amo sia kag nga sia ang nangin manugpadya sadtong hanuot nga nagapangita sa iya.” Si Moises may subong sini nga pagtuo. ‘Gintan-aw [niya] sing maayo ang balos nga padya’ kag ‘nagpabilin nga mabakod subong nga nagatan-aw sa Isa nga di-makita.’ (Hebreo 11:6, 24, 26, 27) Kinahanglan sang isa ka Cristiano ini nga sahi sang pagtuo. Subong ginpatalupangod sa nagligad nga artikulo, si Abraham isa ka maayong huwaran sa sining bahin.
Ang Huwaran nga Pagtuo ni Abraham
4. Paano ang dalanon sang kabuhi ni Abraham naapektuhan sang iya pagtuo?
4 Si Abraham didto sa Ur sang mabaton niya ang saad sang Dios nga sia mangin amay sang isa ka binhi nga mangin pagpakamaayo sa tanan nga katawhan sang tanan nga kapungsuran. (Genesis 12:1-3; Binuhatan 7:2, 3) Pasad sa sini nga saad, si Abraham nagtuman kay Jehova, nagsaylo una sa Haran kag dayon sa Canaan. Didto, nanaad si Jehova nga ihatag ang duta sa binhi ni Abraham. (Genesis 12:7; Nehemias 9:7, 8) Apang, ang kalabanan sang ginsaad ni Jehova matuman pa sa tapos mapatay si Abraham. Halimbawa, si Abraham mismo wala gid makapanag-iya sang bisan ano nga bahin sang Canaan—luwas sa lungib sang Macpela, nga iya ginbakal subong lulubngan. (Genesis 23:1-20) Walay sapayan sini, nagtuo sia sa pulong ni Jehova. Labaw sa tanan, gintuuhan niya ang isa ka palaabuton nga “siudad nga may matuod nga mga sadsaran, ang manunukod kag manugbuhat sini nga siudad amo ang Dios.” (Hebreo 11:10) Ginpabaskog sia sini nga pagtuo sa iya bug-os nga kabuhi.
5, 6. Sa anong paagi ang pagtuo ni Abraham gintilawan may kaangtanan sa saad ni Jehova?
5 Talalupangdon ini labi na sa saad nga ang binhi ni Abraham mangin isa ka daku nga pungsod. Agod matabo ini, kinahanglan nga may anak si Abraham, kag madugay nga ginhulat niya ini. Wala kita makahibalo kon pila ang iya edad sang una niya mabatian ang saad sang Dios, apang sang ginhimo niya ang malawig nga paglakbay pakadto sa Haran, wala pa sia ginhatagan ni Jehova sing anak. (Genesis 11:30) Nagdugaydugay sia sa Haran agod ‘makatipon sing mga pagkabutang kag makaangkon sing mga kalag,’ kag sang magsaylo sia sa Canaan, 75 anyos sia kag si Sara 65 anyos. Sa gihapon, wala pa sila sing anak. (Genesis 12:4, 5) Sang manug-otsenta na si Sara, naghinakop sia nga tigulang na sia agod mahatagan pa si Abraham sing anak. Busa, bilang pagsunod sa isa ka kinabatasan sadto, ginhatag niya ang iya ulipon nga babayi nga si Hagar kay Abraham, kag nag-anak sia sa iya sing anak nga lalaki. Apang indi ini ang ginsaad nga anak. Si Hagar kag ang iya anak, si Ismael, ginpalakat sang ulihi. Apang, sang magpakiluoy si Abraham para sa ila, nanaad si Jehova nga pakamaayuhon niya si Ismael.—Genesis 16:1-4, 10; 17:15, 16, 18-20; 21:8-21.
6 Sa sibu nga tion sang Dios—malawig nga tion sa tapos nila mabatian ang saad sa una nga tion—si Abraham nga nagapang-idaron sing 100 ka tuig kag si Sara nga 90 ka tuig nag-anak sing lalaki, si Isaac. Pat-od nga makatilingala gid yadto! Para sa sining tigulang na nga mag-asawa, daw kaangay ini sang pagkabanhaw sang ang ila ‘patay na’ nga mga lawas nagbun-ag sing bag-o nga kabuhi. (Roma 4:19-21) Ang paghulat madugay, apang sang matuman gid man ang saad sang ulihi, ang paghulat takus.
7. Paano ang pagtuo naangot sa pagbatas?
7 Ang huwaran ni Abraham nagapahanumdom sa aton nga ang pagtuo indi dapat sa malip-ot lamang nga tion. Gin-angot ni Pablo ang pagtuo sa pagbatas sang magsulat sia: “Nagakinahanglan kamo sing pagbatas, agod nga, pagkatapos ninyo mahimo ang kabubut-on sang Dios, mabaton ninyo ang katumanan sang saad. . . . Indi kita ang sahi nga nagaisol padulong sa kalaglagan, kundi ang sahi nga may pagtuo padulong sa pagtipig sa kalag.” (Hebreo 10:36-39) Madamo ang madugay na nga nagahulat sa katumanan sang saad. Ang iban naghulat sa ila bug-os nga kabuhi. Ang ila mabakod nga pagtuo nagpabaskog sa ila. Kag, kaangay ni Abraham, mabaton nila ang padya sa sibu nga tion ni Jehova.—Habacuc 2:3.
Pagpamati sa Dios
8. Paano kita nagapamati sa Dios karon, kag ngaa magapabakod ina sang aton pagtuo?
8 Sa dimagkubos apat ka butang ang nagpabakod sang pagtuo ni Abraham, kag amo man ini nga mga butang ang makabulig sa aton. Una, ginpasundayag niya ang iya ‘pagpati nga ang Dios amo sia’ paagi sa pagpamati sang maghambal si Jehova. Sa amo, tuhay sia sa mga Judiyo sang adlaw ni Jeremias, nga nagtuo kay Jehova apang wala magtuo sa iya mga pulong. (Jeremias 44:15-19) Sa karon, si Jehova nagapakighambal sa aton paagi sa mga pahina sang Biblia, ang iya inspirado nga Pulong, nga siling ni Pedro subong sang “suga nga nagasiga sa madulom nga duog . . . sa inyo mga tagipusuon.” (2 Pedro 1:19) Kon ginabasa naton sing maayo ang Biblia, “ginasagod [kita] sang mga pulong sang pagtuo.” (1 Timoteo 4:6; Roma 10:17) Dugang pa, sa sining katapusan nga mga adlaw, “ang matutom kag mainandamon nga ulipon” nagaaman sing espirituwal nga “pagkaon sa nagakaigo nga tion,” sing panuytoy sa pag-aplikar sang mga prinsipio sang Biblia kag sing paghangop sa tagna sang Biblia. (Mateo 24:45-47) Ang pagpamati kay Jehova sa sining mga paagi kinahanglanon gid agod mahuptan nga mabakod ang aton pagtuo.
9. Ano ang mangin resulta kon nagapati gid kita sa Cristianong paglaum?
9 Ang pagtuo ni Abraham suod nga naangot sa iya paglaum. “Pasad sa paglaum may pagtuo sia, nga sia mangin amay sang madamo nga pungsod.” (Roma 4:18) Amo ini ang ikaduha nga butang nga makabulig sa aton. Indi gid naton pagkalimtan nga si Jehova amo “ang manugpadya sang mga hanuot nga nagapangita sa iya.” Si apostol Pablo nagsiling: “Nagapangabudlay kita sing lakas kag nagapanikasog, bangod ginpahamtang naton ang aton paglaum sa buhi nga Dios.” (1 Timoteo 4:10) Kon nagatuo gid kita sa Cristianong paglaum, ang aton bug-os kabuhi nga dalanon magapasundayag sang aton pagtuo, subong sang ginhimo ni Abraham.
Pagpakighambal sa Dios
10. Ano nga sahi sang pangamuyo ang magapabakod sang aton pagtuo?
10 Si Abraham nagpakighambal sa Dios, kag amo ini ang ikatlo nga butang nga nagpabakod sang iya pagtuo. Sa karon, makapakighambal man kita kay Jehova, nga ginagamit ang dulot nga pangamuyo paagi kay Jesucristo. (Juan 14:6; Efeso 6:18) Sa tapos masugid ang parabola nga nagapadaku sang kinahanglanon nga mangamuyo sing masunson, si Jesus namangkot: “Kon mag-abot ang Anak sang tawo, makakita gid bala sia sing pagtuo sa duta?” (Lucas 18:8) Ang makapalig-on sing pagtuo nga pangamuyo wala ginahimo sing padali ukon awtomatiko. Tudok ini sa balatyagon. Halimbawa, ang tinagipusuon nga pangamuyo kinahanglanon gid kon dapat kita maghimo sing importante nga mga desisyon ukon kon ginahul-an kita.—Lucas 6:12, 13; 22:41-44.
11. (a) Paano napabakod si Abraham sang ginbuksan niya ang iya tagipusuon sa Dios? (b) Ano ang matun-an naton gikan sa eksperiensia ni Abraham?
11 Sang nagatigulang na si Abraham kag wala pa gihapon mahatag sa iya ni Jehova ang ginsaad nga binhi, ginpautwas niya sa Dios ang iya kabalaka. Ginpasalig sia ni Jehova. Ang resulta? Si Abraham ‘nagtuo kay Jehova; kag gin-isip niya ini sa iya subong pagkamatarong.’ Nian, naghatag si Jehova sing palatandaan sa pagpalig-on sang iya makapasalig nga mga pulong. (Genesis 15:1-18) Kon buksan naton ang aton tagipusuon kay Jehova sa pangamuyo, batunon ang mga pasalig ni Jehova sa iya Pulong, ang Biblia, kag tumanon sia nga may bug-os nga pagtuo, nian pabakuron man ni Jehova ang aton pagtuo.—Mateo 21:22; Judas 20, 21.
12, 13. (a) Paano ginpakamaayo si Abraham sang ginsunod niya ang pagtuytoy ni Jehova? (b) Ano nga sahi sang mga eksperiensia ang magapabakod sang aton pagtuo?
12 Ang ikap-at nga butang nga nagpabakod sang pagtuo ni Abraham amo ang pagsakdag nga ginhatag sa iya ni Jehova sang ginsunod niya ang pagtuytoy sang Dios. Sang maglakat si Abraham agod luwason si Lot gikan sa nagbihag nga mga hari, ginhatag ni Jehova sa iya ang kadalag-an. (Genesis 14:16, 20) Samtang nagapuyo si Abraham kaangay sang isa ka temporaryo nga pumuluyo sa duta nga panublion sang iya binhi, ginpakamaayo sia ni Jehova sa materyal. (Ipaanggid ang Genesis 14:21-23.) Gintuytuyan ni Jehova ang panikasog sang iya tulugyanan agod makakita sing nagakaigo nga asawa para kay Isaac. (Genesis 24:10-27) Huo, “ginpakamaayo ni Jehova si Abraham sa tanan nga butang.” (Genesis 24:1) Subong resulta, mabakod gid ang iya pagtuo kag suod gid ang iya kaangtanan kay Jehova nga Dios amo nga gintawag sia ni Jehova nga “akon abyan.”—Isaias 41:8; Santiago 2:23.
13 Makahupot bala kita karon sing subong sini kabakod nga pagtuo? Huo. Kon, kaangay ni Abraham, ibutang naton sa pagtilaw si Jehova paagi sa pagtuman sa iya mga sugo, pakamaayuhon man niya kita, kag magapabakod ina sang aton pagtuo. Halimbawa, ang pagpasiplat sa 1998 nga Report sang Pag-alagad nagapakita nga madamo ang ginpakamaayo sa isa ka dalayawon nga paagi sang gintuman nila ang iya sugo nga ibantala ang maayong balita.—Marcos 13:10.
Isa ka Rekord sang Pagtuo Karon
14. Paano ginpakamaayo ni Jehova ang kampanya sa Kingdom News Num. 35?
14 Sadto sang Oktubre 1997, tumalagsahon gid ang kadalag-an sang bug-os kalibutan nga kampanya sa Kingdom News Num. 35, bangod sa kakugi kag kapagsik sang minilyon ka indibiduwal nga mga Saksi. Ang isa ka halimbawa sini amo ang natabo sa Ghana. Halos 2.5 milyones ka kopya ang napanagtag sa apat ka lenguahe, kag halos 2,000 ka pagtuon sa Biblia ang ginpangabay subong resulta. Sa Cyprus, natalupangdan sang duha ka Saksi nga nagapanagtag sing Kingdom News nga ginasundan sila sang isa ka pari. Wala magdugay, gintanyagan nila sia sing isa ka kopya sang Kingdom News. Nakabaton na sia sing isa ka kopya kag nagsiling: “Nahamuot gid ako sa mensahe sini amo nga luyag ko manginbulahan sa mga tawo nga naghanda sini.” Sa Denmark, 1.5 milyones ka kopya sang Kingdom News ang napanagtag nga may maayong mga resulta. Didto, ang isa ka babayi nga nagatrabaho sa public relations nagsiling: “Ang tract may mensahe para sa tanan. Mahapos ini hangpon, kag nagapahulag ini sa imo, nagahatag sa imo sing handum nga maghibalo sing dugang pa. Nasakam gid sini ang iya tuyo!”
15. Ano nga mga eksperiensia ang nagapakita nga ginpakamaayo ni Jehova ang panikasog nga lab-uton ang mga tawo bisan diin?
15 Sang 1998 ginhimo ang panikasog nga bantalaan ang mga tawo indi lamang sa ila mga puluy-an kundi bisan diin. Sa Côte d’Ivoire ang misyonero nga mag-asawa nagduaw sa 322 ka barko sa mga pantalan. Nakapahamtang sila sing 247 ka libro, 2,284 ka magasin, 500 ka brosyur, kag ginatos ka tract, subong man sing mga video nga matan-aw sang mga marinero samtang sa dagat sila. Sa Canada, ginkadtuan sang isa ka Saksi ang isa ka talyer sang salakyan. Nagpakita sing interes ang tag-iya, kag nagtener didto ang utod nga lalaki sing apat ka oras kag tunga, apang ang tion nga ginhinguyang sa pagpanaksi may kabilugan nga mga isa ka oras lamang sa ulot sang mga kustomer. Sang ulihi, ang pagtuon gintalana sa alas 10:00 s.g. Apang, kon kaisa, tungang-gab-i na ini kon sugdan kag nagalawig tubtob sa alas dos sang kaagahon. Isa gid ka hangkat ang pagtuon, apang maayo ang nangin resulta. Namat-od ang lalaki nga sirhan ang iya talyer kon Domingo agod makatambong sa mga miting. Wala madugay, sia kag ang iya pamilya nagahimo sing maayo nga pag-uswag.
16. Ano nga mga eksperiensia ang nagapakita nga ang brosyur nga Ginapatuman kag ang libro nga Ihibalo epektibo nga mga instrumento sa pagbantala kag pagpanudlo nga hilikuton?
16 Ang brosyur nga Ano ang Ginapatuman sang Dios sa Aton? kag ang libro nga Ang Ihibalo nga Nagadul-ong sa Kabuhi nga Walay Katapusan epektibo gihapon nga mga instrumento sa pagbantala kag pagpanudlo nga hilikuton. Sa Italya, ginbaton sang madre nga nagahulat sing bus ang isa ka kopya sang Kingdom News. Pagkadason nga adlaw, ginpalapitan sia liwat kag ginbaton niya ang brosyur nga Ginapatuman. Kada adlaw pagkatapos sadto, ginadumalahan sia sing 10- pa 15-minutos nga pagtuon sa Biblia sa dululugan sang bus. Pagligad sang isa ka bulan kag tunga, namat-od sia nga maghalin sa kombento kag magpauli sa Guatemala agod padayunon ang iya pagtuon. Sa Malawi naakig ang palasimba nga si Lobina sang ang iya mga anak nga babayi nagsugod sa pagtuon sing Biblia upod sa mga Saksi ni Jehova. Walay sapayan sini, ginapaambit sang mga anak sa ila iloy ang kamatuoran sa Biblia kon may kahigayunan sila. Sang Hunyo 1997, nasiplatan ni Lobina ang libro nga Ihibalo kag napukaw ang iya interes sa ekspresyon nga “Ihibalo nga Nagadul-ong.” Pagka-Hulyo, nagsugot sia nga magtuon sa Biblia. Pagka-Agosto nagtambong sia sa distrito nga kombension kag masusi nga namati sa bug-os nga programa. Pagkatapos sadto nga bulan, naghalin sia sa simbahan nga iya ginasimbahan kag nangin kalipikado subong isa ka di-bawtismado nga manugbantala. Ginbawtismuhan sia sang Nobiembre 1997.
17, 18. Paano ang mga video sang Sosiedad nangin mapuslanon sa pagbulig sa mga indibiduwal nga “makita” ang espirituwal nga mga butang?
17 Ang mga video sang Sosiedad nakabulig sa madamo nga “makakita” sing espirituwal nga mga butang. Sa Mauritius, ang isa ka lalaki naghalin sa simbahan nga iya ginasimbahan bangod sang natabo nga pagbinahinbahin. Ginpakita sa iya sang isa ka misyonero ang paghiusa sang mga Saksi ni Jehova, paagi sa video nga United by Divine Teaching. Nahamuot, ang lalaki nagsiling: “Kamo nga mga Saksi ni Jehova yara na sa Paraiso!” Nagsugot sia nga magtuon a Biblia. Ginpakita sang isa ka utod nga babayi sa Japan sa iya di-tumuluo nga bana ang video nga Jehovah’s Witnesses—The Organization Behind the Name, kag napahulag sia nga batunon ang isa ka regular nga pagtuon sa Biblia. Sa tapos matan-aw ang United by Divine Teaching, luyag na niya nga mangin isa sang mga Saksi ni Jehova. Ang tatlo-ka-bahin nga mga serye nga natig-uluhan The Bible—A Book of Fact and Prophecy nakabulig sa iya sa pag-aplikar sang mga prinsipio sang Biblia sa iya kabuhi. Bilang katapusan, ginpakita sa iya sang Jehovah’s Witnesses Stand Firm Against Nazi Assault nga ginapabakod ni Jehova ang Iya katawhan batok sa mga pagsalakay ni Satanas. Ini nga tawo ginbawtismuhan sang Oktubre 1997.
18 Pila lamang ini sang madamo nga eksperiensia nga natabo sang nagligad nga tuig sang pag-alagad. Ginapakita sini nga ang mga Saksi ni Jehova may aktibo nga pagtuo kag nga ginapabakod ni Jehova ina nga pagtuo paagi sa pagpakamaayo sang ila hilikuton.—Santiago 2:17.
Palambua ang Pagtuo Karon
19. (a) Paano nga mas maayo ang aton kahimtangan sangsa kay Abraham? (b) Pila ang nagtipon sang nagligad nga tuig agod saulugon ang mahalaron nga kamatayon ni Jesus? (c) Ano nga mga pungsod ang may talalupangdon nga tumalambong sa Memoryal sang nagligad nga tuig? (Tan-awa ang tsart sa pahina 12 tubtob 15.)
19 Sa madamo nga paagi mas maayo karon ang aton kahimtangan sangsa kay Abraham. Nahibaluan naton nga gintuman ni Jehova ang tanan nga ginsaad niya kay Abraham. Napanubli matuod sang mga anak ni Abraham ang Canaan, kag nangin isa sila ka daku nga pungsod. (1 Hari 4:20; Hebreo 11:12) Dugang pa, mga 1,971 ka tuig sang maghalin si Abraham sa Haran, ang iya kaliwat, si Jesus, ginbawtismuhan sa tubig ni Juan Bautista kag dayon sa balaan nga espiritu ni Jehova mismo agod mangin Mesias, ang Binhi ni Abraham sa bug-os, espirituwal nga kahulugan. (Mateo 3:16, 17; Galacia 3:16) Sang Nisan 14, 33 C.E., gindulot ni Jesus ang iya kabuhi subong isa ka gawad para sa mga magatuo sa iya. (Mateo 20:28; Juan 3:16) Minilyon karon ang mahimo magpakamaayo sang ila kaugalingon paagi sa iya. Sang nagligad nga tuig, 13,896,312 ang nagtipon sang Nisan 14 agod saulugon ining dalayawon nga buhat sang gugma. Daw ano ini nga pagbindikar kay Jehova, ang Daku nga Manugtuman sang mga saad!
20, 21. (a) Paano ang mga tawo gikan sa tanan nga kapungsuran nagpakamaayo sang ila kaugalingon paagi sa Binhi ni Abraham sang una nga siglo, kag paano nila ginapakamaayo ang ila kaugalingon karon? (b) Ano ang malauman sang madamo pa agod pakamaayuhon nila ang ila kaugalingon paagi sa Binhi ni Abraham?
20 Sang una nga siglo, madamo gikan sa tanan nga kapungsuran—sugod sa undanon nga Israel—ang nagpakita sing pagtuo sa sini nga Binhi ni Abraham kag nangin hinaplas nga mga anak sang Dios, mga katapo sang isa ka bag-o, espirituwal nga “Israel sang Dios.” (Galacia 3:26-29; 6:16; Binuhatan 3:25, 26) Ginapasalig sila sa isa ka dimamalatyon nga kabuhi subong mga espiritu sa kalangitan subong kaupod nga mga manuggahom sa Ginharian sang Dios. Ang pakamaayuhon sa sini nga paagi 144,000 lamang, kag diutay na lang sila ang nabilin. (Bugna 5:9, 10; 7:4) Sang nagligad nga tuig, 8,756 ang nagpamatuod sa ila pagpati nga lakip sila sa sining kadamuon paagi sa pag-ambit sa mga emblema sa tion sang pagsaulog sing Memoryal.
21 Halos tanan sang mga Saksi ni Jehova karon katapo sang “dakung kadam-an” nga gintagna sa Bugna 7:9-17. Bangod ginapakamaayo nila ang ila kaugalingon paagi kay Jesus, ginalauman nila ang dayon nga kabuhi sa isa ka paraiso nga duta. (Bugna 21:3-5) Ang 5,888,650 nga nagpakigbahin sa pagbantala nga hilikuton sang 1998 ebidensia nga ining kadam-an “daku” matuod. Makakulunyag labi na nga ang Rusya kag ang Ukraine nagreport sing kapin sa 100,000 ka manugbantala sa nahauna nga tion. Talalupangdon man ang report gikan sa Estados Unidos—1,040,283 ka manugbantala sang Agosto! Tatlo lamang ini sa 19 ka pungsod nga nagreport sing kapin sa 100,000 ka manugbantala sang nagligad nga tuig.
Paglaum nga Malapit Na Matuman
22, 23. (a) Ngaa dapat naton palig-unon ang aton tagipusuon karon? (b) Paano naton mapamatud-an nga kaangay kita ni Abraham, indi subong sang mga wala sing pagtuo nga ginsambit ni Pablo?
22 Ang mga nagtambong sa Memoryal ginpahanumdom kon daw ano na kalapit kita sa katumanan sang mga saad ni Jehova. Sang 1914, si Jesus ginpalingkod subong Hari sa langitnon nga Ginharian sang Dios, bilang panugod sang iya presensia nga may gahom sa Ginharian. (Mateo 24:3; Bugna 11:15) Huo, ang Binhi ni Abraham nagagahom karon sa langit! Si Santiago nagsiling sa mga Cristiano sang iya adlaw: “Magpailob man kamo; palig-una ang inyo tagipusuon, kay ang presensia sang Ginuo malapit na.” (Santiago 5:8) Ti, ina nga presensia nagsugod na karon! Dugang pa ini nga rason nga palig-unon naton ang aton tagipusuon!
23 Kabay nga ang pagsalig naton sa mga saad sang Dios tayuyon nga pabaskugon sang regular nga pagtuon sa Biblia kag tudok sa balatyagon nga pangamuyo. Kabay nga indi naton pag-untatan nga maagom ang pagpakamaayo ni Jehova samtang ginatuman naton ang iya Pulong. Nian, mangin kaangay kita ni Abraham, indi subong sang mga tawo nga ang ila pagtuo nagluya kag napatay, nga ginsambit ni Pablo. Wala sing bisan ano ang makapahamulag sa aton gikan sa aton labing balaan nga pagtuo. (Judas 20) Ginapangamuyo namon nga mangin matuod ini sa tanan nga alagad ni Jehova sa tion sang 1999 nga tuig sang pag-alagad kag tubtob sa dayon nga palaabuton.
Nahibaluan Mo Bala?
◻ Paano kita makapamati sa Dios karon?
◻ Ano ang mga benepisyo sang tudok sa balatyagon nga pangamuyo sa Dios?
◻ Kon sundon naton sing matinumanon ang pagtuytoy ni Jehova, paano mapalig-on ang aton pagtuo?
◻ Ano nga mga bahin sang tuigan nga report (pahina 12 tubtob 15) ang natalupangdan mo nga tumalagsahon?
[Tsart sa pahina 12-15]
1998 NGA REPORT SANG PAG-ALAGAD SANG MGA SAKSI NI JEHOVA SA BUG-OS NGA KALIBUTAN
(Tan-awa ang bound volume)
[Retrato sa pahina 16]
Kon mamati kita sa Pulong ni Jehova, ang aton pagsalig sa iya mga saad mapabaskog
[Retrato sa pahina 18]
Nagabakod ang aton pagtuo kon nagapakigbahin kita sa ministeryo