Nahiusa sa Labing Maayo nga Dalanon sang Kabuhi

Kon ang populasyon sang kalibutan padayon nga magdamo, sa dili madugay may anom na ka bilyon ka tawo sa duta. Bisan nga ang tanan naghalin sa isa lamang ka katigulangan, ang kalabanan daw wala nagabaton nga sila mga miembro sang isa ka bug-os kalibutan nga pamilya nga may salabton sa isa ka maalam kag mahigugmaon nga Manunuga. Ang dipaghiusa kag binangig sa tunga sang mga pungsod, rasa, kag kultura isa sang makita nga pamatuod sa sining masubo nga mga hitabo.

BANGOD sang karon nga mga kahimtangan sa kalibutan, ang bug-os kalibutan nga paghiusa daw isa ka tulumuron nga indi matuman. Ang The Columbia History of the World nagsiling: “Tuhoy sa labing importante nga pamangkot kon paano magkabuhi sing tingob, ang moderno nga kalibutan wala sing bisan isa ka bag-o nga ideya nga matanyag, wala gid.”

Apang, ang pagpahiusa sa pumuluyo sang duta wala nagakinahanglan sing isa ka bag-o nga ideya. Ang dalanon padulong sa paghiusa ginpahamtang sa Balaan nga Kasulatan. Nasentro ini sa pagsimba sa Isa nga nagtuga sang duta kag sang tanan nga kabuhi sa sini. Ang matuod nga paghiusa sang panghunahuna, katuyuan, kag dalanon sang kabuhi nagaluntad na sa tunga sang katawhan sang Dios. Nagadamo sing kapin sa lima ka milyon kag tunga sa 233 ka kadutaan, nahiusa sila sa ila pagpati nga ang dalanon sang Dios sa kabuhi amo ang labing maayo nga dalanon. Kaangay sang salmista, sila nagapangamuyo: “Tudlui ako, O Jehova, tuhoy sa imo dalanon. Magalakat ako sa imo kamatuoran. Bug-usa ang akon tagipusuon sa pagkahadlok sa imo ngalan.”​—⁠Salmo 86:⁠11.

Ining paghiusa sang katawhan sa matuod nga pagsimba madugay na nga gintagna ni manalagna Isaias. Sia nagsulat: “Mahanabo sa ulihing bahin sang mga adlaw nga ang bukid sang balay ni Jehova tukuron sing malig-on sa putukputukan sang kabukiran, kag pakataason sa ibabaw sang kabakuluran; kag magadugok sa sini ang tanan nga pungsod. Kag madamong tawo ang pat-od nga magalakat kag magasiling: ‘Kari kamo nga katawhan, kag magataklad kita sa bukid ni Jehova, sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.’”​—⁠Isaias 2:​2, 3.

Ang paghiusa sang mga Saksi ni Jehova pinasahi. Sa kapin sa 87,000 ka kongregasyon sa bug-os nga kalibutan, nagakaon sila sing pareho espirituwal nga pagkaon sa ila mga miting kada semana. (Mateo 24:​45-47) Apang, kutob sa tungatunga sang 1998 tubtob sa temprano nga bahin sang 1999, ginpakita sang mga Saksi ang ila paghiusa sa iban nga paagi​—⁠paagi sa pagtipon sa ila tatlo-ka-adlaw nga “Dalanon Sang Dios sa Kabuhi” nga mga Kombension sa bug-os nga kalibutan. Sa 13 ka pungsod, ini nga mga pagtinipon ginalakipan sing madamo nga mga delegado gikan sa nagkalainlain nga mga kadutaan kag ginatawag nga internasyonal nga mga kombension. Ang iban ginatawag subong distrito nga mga kombension. Apang ining tanan nga kombension may pareho nga mga programa sang maayong espirituwal nga mga butang.

Daw ano katahom nga makita ang malipayon, napanaptan sing maayo nga mga delegado nga nagadugok sa mga awditoryom kag mga istadyum agod tudluan ni Jehova! Amo sini ang ginpabutyag sang isa ka delegado sa internasyonal nga kombension nga ginhiwat sa Michigan, E.U.A. Sia nagsiling: “Makalilipay makita ang aton mga kauturan gikan sa tanan nga bahin sang kalibutan​—⁠sa Czech Re­pub­lic, Barbados, Niger­ia, Hun­ga­ry, En­gland, Hol­land, Ethi­o­pia, Ken­ya, kag sa madamo iban pa nga kadutaan​—⁠nga nagahaksanay! Makalilipay makita ang mga kauturan nga nagapuyo sing tingob sa paghiusa, nga nagahibi sa kalipay bangod sang ila gugma sa isa kag isa kag sa ila dakung Dios, si Jehova.” Binagbinagon sang masunod nga artikulo ang programa sang kombension nga gintambungan sang minilyon sa bug-os nga duta.

[Picture Credit Line sa pahina 3]

Mountain High Maps® Copyright © 1997 Digital Wisdom, Inc.