Ang Gawad ni Cristo—Ang Paagi sang Dios Para sa Kaluwasan

“Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.”—JUAN 3:16.

1, 2. Ilaragway ang kahimtangan nga nagluntad sa tawhanon nga rasa.

HANDURAWA nga nagaantos ka sing balatian nga sigurado nga magakutol sang imo kabuhi kon indi ka magpaopera. Ano ang imo batyagon kon indi mo masarangan ang bili sang operasyon? Ano kon bisan ang tingob nga manggad sang imo pamilya kag mga abyan indi makabayad sa sini? Makahalanusbo gid ang may subong sini nga problema nga nagabutang sa katalagman sang kabuhi!

² Ginalaragway sini ang kahimtangan nga nagluntad anay may kaangtanan sa tawhanon nga rasa. Ang aton unang mga ginikanan, nga sanday Adan kag Eva, gintuga nga himpit. (Deuteronomio 32:4) May paglaum sila nga magkabuhi sing dayon kag magtuman sang katuyuan sang Dios: “Magmabungahon kag magbuad kag magtugob sang duta kag magpakaagalon sa sini.” (Genesis 1:28) Apang, sanday Adan kag Eva nagrebelde sa ila Manunuga. (Genesis 3:1-6) Ang ila paglalis nagdala sing kasal-anan indi lamang kanday Adan kag Eva kundi sa ila man wala pa matawo nga kaanakan. Ang matutom nga si Job nagsiling sang ulihi: “Sin-o bala ang makapatubas sing isa ka tawo nga matinlo gikan sa isa ka tawo nga dimatinlo? Wala sing isa.”—Job 14:4.

3. Paano naglapnag sa tanan nga tawo ang kamatayon?

³ Busa ang sala kaangay sang isa ka balatian nga nagtapik sa kada isa sa aton, kay ang Biblia nagasiling nga ang “tanan nagpakasala.” Ini nga kahimtangan may mga resulta nga nagabutang sa katalagman sang kabuhi. Sa pagkamatuod, “ang bayad sa sala amo ang kamatayon.” (Roma 3:23; 6:23) Wala sing isa sa aton ang makalikaw sa sini. Ang tanan nga tawo nagapakasala, gani, ang tanan nga tawo nagakapatay. Subong mga kaliwat ni Adan, natawo kita sa sini nga kahimtangan. (Salmo 51:5) “Paagi sa isa ka tawo,” sulat ni Pablo, “nagsulod ang sala sa kalibutan kag ang kamatayon paagi sa sala, kag busa ang kamatayon naglapnag sa tanan nga tawo bangod sila tanan nakasala.” (Roma 5:12) Apang wala ini nagakahulugan nga wala kita sing paglaum para sa kaluwasan.

Pagdula sa Sala kag Kamatayon

4. Ngaa indi madula sang mga tawo ang balatian kag kamatayon kon sila lamang?

⁴ Ano ang kinahanglan agod madula ang sala kag ang resulta sini, ang kamatayon? Sing maathag, ang butang nga labi pa sa mahatag sang bisan sin-o nga tawo. Ang salmista nagpanalambiton: “Ang bayad para sa tawhanon nga kabuhi mahal katama. Ang ibayad niya indi nagakaigo agod indi sia magkadto sa lulubngan, agod mabuhi sia sing dayon.” (Salmo 49:​8, 9, Today’s English Version) Matuod, mahimo naton mapalawig ang aton kabuhi sing pila ka tuig paagi sa maayo nga dieta kag bulong, apang wala sing isa sa aton ang makaayo sang aton napanubli nga makasasala nga kahimtangan. Wala sing isa sa aton ang makadula sang makapaluya nga mga epekto sang pagtigulang kag makapasag-uli sang aton lawas sa kahimpitan nga gintuyo sing orihinal sang Dios para sa sini. Si Pablo wala gid nagahambal sing sobra sang nagsulat sia nga bangod sang sala ni Adan, ang tawhanon nga tinuga “nasakop sa walay kapuslanan”​—⁠ukon subong sang pagbadbad sa sini sang The Jerusalem Bible, “wala makatigayon sang katuyuan sini.” (Roma 8:20) Apang, sing makalilipay, ang Manunuga wala nagbiya sa aton. Naghimo sia sing aman agod madula sing bug-os ang sala kag kamatayon. Paano?

5. Paano ginapakita sang Kasuguan nga ginhatag sa Israel ang hanuot nga pagtahod sa katarungan?

⁵ Si Jehova “nagahigugma sang pagkamatarong kag katarungan.” (Salmo 33:5) Ang Kasuguan nga ginhatag niya sa Israel nagapakita sing hanuot nga pagtahod sa pagkabalanse kag sa wala sing ginadampigan nga katarungan. Halimbawa, sa sulod sining hubon sang mga kasuguan, aton mabasa nga ‘dapat ihatag ang kabuhi sa kabuhi.’ Sa iban nga hambal, kon ang isa ka Israelinhon nakapatay, ang iya mismo kabuhi dapat ihatag bilang bayad sa isa nga gin-utas niya. (Exodo 21:23; Numeros 32:21) Busa ang timbangan sang katarungan sang Dios nangin balanse.​—⁠Ipaanggid ang Exodo 21:30.

6. (a) Sa anong kahulugan matawag si Adan nga isa ka manugpatay? (b) Ano nga sahi sang kabuhi ang nadula ni Adan, kag ano nga sahi sang halad ang ginkinahanglan agod mabalanse ang timbangan sang katarungan?

⁶ Sang nagpakasala si Adan, sia nangin manugpatay. Sa anong kahulugan? Sa bagay nga ginliton niya ang iya makasasala nga kahimtangan—kag busa ang kamatayon—sa iya tanan nga kaliwatan. Bangod sang paglalis ni Adan nga sa sini gid nga higayon, ang aton lawas nagluya, padayon nga nagpadulong sa lulubngan. (Salmo 90:10) Ang sala ni Adan may mas mabug-at pa nga kahulugan. Dumduma, ang nadula ni Adan para sa iya kaugalingon kag sa iya kaanakan indi lamang isa ka ordinaryo nga pagkabuhi sing mga 70 ukon 80 ka tuig. Nadula niya ang himpit nga kabuhi​—sa pagkamatuod, ang kabuhi nga walay katapusan. Gani kon ‘dapat ihatag ang kabuhi sa kabuhi,’ ano nga sahi sang kabuhi ang ihatag agod may katarungan sa sining bahin? Sing makatarunganon, ini amo ang himpit tawhanon nga kabuhi—ang kabuhi nga, kaangay sang kay Adan, posible nga makapatubas sing himpit tawhanon nga anak. Kon ginadulot subong isa ka halad, ang himpit tawhanon nga kabuhi indi lamang makabalanse sang timbangan sang katarungan kundi magapaposible man nga madula sing bug-os ang sala kag ang resulta sini, ang kamatayon.

Pagtabon sa Bili sang Sala

7. Ilaragway ang kahulugan sang tinaga nga “gawad.”

⁷ Ang bili nga ginkinahanglan sa paggawad sa aton gikan sa sala ginapatuhuyan sa Biblia subong “gawad.” (Salmo 49:7) Sa Ingles ang termino nga ransom (gawad sa Hiligaynon) mahimo nagapatuhoy sa bayad nga ginapangayo sang kidnapper subong baylo sa isa nga iya ginkidnap. Sa pagkamatuod, ang gawad nga ginhatag ni Jehova wala nagahilabot sa bisan ano nga pagpangidnap. Ang ideya tuhoy sa pagbayad sing bili amo gihapon. Sa katunayan, ang berbo nga porma sang Hebreong tinaga nga ginbadbad nga “gawad” literal nga nagakahulugan sing “pagtabon.” Sa pagtumbas sa sala, ang gawad dapat nga igoigo gid sa dapat nga tabunan sini​—⁠ang himpit tawhanon nga kabuhi ni Adan.

8. (a) Ilaragway ang prinsipio sang pagbakal liwat. (b) Paano ang prinsipio sang pagbakal liwat may kaangtanan sa aton subong mga makasasala?

⁸ Nahisanto ini sa prinsipio nga masapwan sa Mosaikong Kasuguan​—⁠ang prinsipio sang pagbakal liwat. Kon ang isa ka Israelinhon nag-imol kag ginbaligya niya ang iya kaugalingon sa pagkaulipon sa indi Israelinhon, sarang sia mabakal liwat (ukon, magawad) sang isa ka himata paagi sa pagbayad sing bili nga ginakabig nga pareho sing balor sa ulipon. (Levitico 25:47-49) Ang Biblia nagasiling nga subong dihimpit nga mga tawo kita “mga ulipon sa sala.” (Roma 6:​6; 7:​14, 25) Ano ang kinahanglan agod mabakal liwat kita? Subong sang nakita na naton, ang pagkadula sang himpit tawhanon nga kabuhi nagakinahanglan sing pagbayad sang himpit tawhanon nga kabuhi—indi magsobra, indi magnubo.

9. Paano naghimo sing aman si Jehova agod matabunan ang sala?

⁹ Sa pagkamatuod, kita nga mga tawo nabun-ag nga dihimpit. Wala sing isa sa aton ang makatupong kay Adan; wala sing isa sa aton ang makabayad sang bili sang gawad nga ginakinahanglan sang katarungan. Subong sang ginsambit sa umpisa, daw subong bala nga may yara kita balatian nga nagabutang sa katalagman sang kabuhi kag indi kita makasarang sa pagbayad sang operasyon nga makaayo sini. Sa subong sini nga sitwasyon, indi bala kita magapasalamat kon may isa nga magapatunga para sa aton kag magabayad sang gastos? Amo gid sini ang ginhimo ni Jehova! Naghimo sia sing aman agod magawad kita gikan sa sala, sing dayon. Huo, handa sia nga ihatag sa aton ang indi gid naton masarangan kon kita lamang. Paano? “Ang dulot nga ginahatag sang Dios,” sulat ni Pablo, “amo ang kabuhi nga walay katapusan paagi kay Cristo Jesus nga aton Ginuo.” (Roma 6:23) Ginalaragway ni Juan si Jesus subong “ang Kordero sang Dios nga nagakuha sang sala sang kalibutan.” (Juan 1:29) Tan-awon naton kon paano gingamit ni Jehova ang iya hinigugma nga Anak sa pagbayad sang bili sang gawad.

“Katumbas nga Gawad”

10. Paano ang mga tagna may kaangtanan sa “binhi” nasentro kanday Jose kag Maria?

¹⁰ Pagkatapos mismo sang pagrebelde sa Eden, ginpahibalo ni Jehova ang iya katuyuan sa pagpatubas sing “binhi,” ukon anak, nga magagawad sang katawhan gikan sa sala. (Genesis 3:15) Sa kalalangan sang mga serye sang mga pagpahayag sang Dios, ginpakilala ni Jehova ang kaliwat sang pamilya nga magapatubas sini nga binhi. Sang ulihi, ining mga pagpahayag ginsentro kanday Jose kag Maria, ang nakagon nga mag-asawa nga nagapuyo sa Palestina. Sa isa ka damgo, ginsugiran si Jose nga si Maria nagmabdos paagi sa balaan nga espiritu. Ang anghel nagsiling: “Magaanak sia sing lalaki, kag tawgon mo ang iya ngalan nga Jesus, kay luwason niya ang iya katawhan gikan sa ila mga sala.”—Mateo 1:20,21.

11. (a) Paano si Jehova naghimo sing kahimusan agod ang iya Anak mabun-ag subong isa ka himpit nga tawo? (b) Ngaa naaman ni Jesus ang “katumbas nga gawad”?

¹¹ Indi ini ordinaryo lamang nga pagmabdos, kay si Jesus nagkabuhi na anay sa langit antes sia nangin tawo. (Hulubaton 8:22-31; Colosas 1:15) Ang iya kabuhi ginliton paagi sa milagruso nga gahom ni Jehova sa taguangkan ni Maria, nga nagpaposible para mabun-ag ining hinigugma nga Anak sang Dios subong isa ka tawo. (Juan 1:1-3, 14; Filipos 2:6,7) Gintuytuyan ni Jehova ang mga hitabo agod indi madagtaan si Jesus sang sala ni Adan. Sa kabaliskaran, si Jesus nabun-ag nga himpit. Busa, ginpanag-iyahan niya ang kon ano ang nadula ni Adan—ang himpit tawhanon nga kabuhi. Sa katapusan, isa ka tawo nga makatabon sa bili sang sala! Kag amo gid sina ang ginhimo ni Jesus sang Nisan 14, 33 C.E. Sa sadtong maragtason nga adlaw, si Jesus nagpasugot nga patyon sang mga nagpamatok sa iya, busa nag-aman sing “katumbas nga gawad.”—1 Timoteo 2:6.

Ang Balor Sang Himpit Tawhanon nga Kabuhi

12. (a) Ilaragway ang daku nga kinatuhayan sa ulot sang kamatayon ni Jesus kag sang iya ni Adan. (b) Paano si Jesus nangin “Dayon nga Amay” sa matinumanon nga katawhan?

¹² May kinatuhayan sa ulot sang kamatayon ni Jesus kag sang iya ni Adan​—ang kinatuhayan nga nagapadaku sang balor sang gawad. Ang kamatayon ni Adan nagakabagay, kay hungod sia nga naglalis sa iya Manunuga. (Genesis 2:16, 17) Sa kabaliskaran, ang kamatayon ni Jesus indi gid nagakabagay, kay “wala sia sing nahimo nga sala.” (1 Pedro 2:22) Gani sang napatay si Jesus, ginpanag-iyahan niya ang butang nga may daku nga balor nga wala mapanag-iyahan ni Adan sang napatay sia—ang kinamatarong sa himpit tawhanon nga kabuhi. Busa, ang kamatayon ni Jesus may mahalaron nga balor. Sang nagkayab sa langit subong espiritu nga persona, ginpresentar niya ang balor sang iya halad kay Jehova. (Hebreo 9:24) Paagi sa paghimo sini, ginbakal ni Jesus ang makasasala nga katawhan kag nangin ang ila bag-ong Amay, isa ka tal-us para kay Adan. (1 Corinto 15:45) May maayo gid nga rason nga si Jesus ginatawag nga “Dayon nga Amay.” (Isaias 9:6) Hunahunaa ang kahulugan sini! Si Adan, ang makasasala nga amay, nagpalapnag sing kamatayon sa iya tanan nga kaliwat. Si Jesus, ang himpit nga Amay, nagagamit sang balor sang iya halad sa paghatag sing kabuhi nga dayon sa matinumanon nga katawhan.

13. (a) Iilustrar kon paano nadula ni Jesus ang utang ni Adan. (b) Ngaa ang halad ni Jesus wala nagatabon sa sala sang aton unang mga ginikanan?

¹³ Apang, paano ang kamatayon sang isa lamang ka tawo makatabon sa sala sang madamo? (Mateo 20:28) Sa isa ka artikulo mga pila ka tuig na nga nakaligad, gin-ilustrar namon ang gawad sa sining paagi: “Handurawa ang isa ka daku nga pabrika nga may ginatos ka empleyado. Nabangkarote ang negosyo bangod sang pagkadibunayag sang manedyer sang pabrika; ang pabrika nagsira. Ginatos ang nadulaan karon sing obra kag indi makabayad sang ila balayran. Ang ila mga tiayon, kabataan, kag, huo, mga manugpautang nag-antos tanan bangod sang kagarukan sining isa ka tawo! Nian nag-abot ang isa ka maalwan nga manggaranon nga nagbayad sang utang sang kompanya kag ginbuksan liwat ang pabrika. Nian, bangod sang pagbayad sadto nga utang, ang madamong empleyado, ang ila mga pamilya, kag ang mga manugpautang napaumpawan. Apang nakigbahin bala ang orihinal nga manedyer sa bag-ong kabuganaan? Wala, nabilanggo sia kag busa permanente nga nadulaan sing obra! Sa kaanggid, ang pagdula sa sala ni Adan nagahatag sing mga kaayuhan sa minilyon sang iya kaliwatan​—⁠apang indi kay Adan.”

14, 15. Ngaa si Adan kag si Eva matawag nga hungod nga mga makasasala, kag paano ang aton kahimtangan tuhay sa ila?

¹⁴ Makatarunganon ini. Dumduma, sanday Adan kag Eva hungod nga mga makasasala. Ginpakamaayo nila nga lalison ang Dios. Sa kabaliskaran, natawo kita sa sala. Wala kita sing mapilian. Bisan ano man ka lakas ang aton pagtinguha, indi kita bug-os nga makalikaw sa pagpakasala. (1 Juan 1:8) Kon kaisa, mahimo kita magabatyag kaangay kay Pablo, nga nagsulat: “Kon luyag ko maghimo sing husto, ang malain yari sa akon. Nagakalipay gid ako sa kasuguan sang Dios suno sa akon pagkatawo sa sulod, apang nakita ko sa akon mga bahin ang isa pa ka kasuguan nga nagapakig-away batok sa kasuguan sang akon hunahuna kag nagadala sa akon nga bihag sa kasuguan sang sala nga yari sa akon mga bahin. Miserable nga tawo ako!”​—Roma 7:21-24.

¹⁵ Apang, bangod sang gawad, may paglaum kita! Si Jesus amo ang binhi nga paagi sa iya, suno sa ginsaad sang Dios, “ang tanan nga pungsod sang duta pat-od nga magapakamaayo sang ila kaugalingon.” (Genesis 22:​18; Roma 8:20) Ang halad ni Jesus nagabukas sang dalan padulong sa makalilipay nga mga kahigayunan para sa mga nagatuo sa iya. Binagbinagon naton ang pila sini.

Pagbenepisyo Gikan sa Gawad ni Cristo

16. Walay sapayan sang aton makasasala nga kahimtangan, anong mga benepisyo ang maagom naton karon bangod sang gawad ni Jesus?

¹⁶ Ang manunulat sang Biblia nga si Santiago nagabaton nga “kita tanan nagakasandad sa madamong beses.” (Santiago 3:2) Apang, bangod sang gawad ni Cristo, ang aton mga sala mahimo mapatawad. Si Juan nagasulat: “Kon ang bisan sin-o makahimo sing sala, may mananabang kita upod sa Amay, si Jesucristo, isa nga matarong. Kag sia ang nagatumbas nga halad para sa aton mga sala.” (1 Juan 2:1,2) Sa pagkamatuod, indi naton dapat tamdon sing pasapayan ang sala. (Judas 4; ipaanggid ang 1 Corinto 9:27.) Apang, kon kita makasala, mapautwas naton kay Jehova ang aton tagipusuon, nagasalig nga sia “handa nga magpatawad.” (Salmo 86:5; 130:3,4; Isaias 1:​18; 55:7; Binuhatan 3:19) Busa ang gawad nagabulig sa aton nga makaalagad sa Dios nga may matinlo nga konsiensia kag nagapaposible nga makapalapit kita sa iya sa pangamuyo paagi sa ngalan ni Jesucristo.​—⁠Juan 14:13, 14; Hebreo 9:14.

17. Bangod sang gawad, anong palaabuton nga mga pagpakamaayo ang posible?

¹⁷ Ang gawad ni Cristo nagabukas sang dalan para matuman ang katuyuan sang Dios—nga ang matinumanon nga katawhan magakabuhi sing dayon sa Paraiso sa duta. (Salmo 37:29) Si Pablo nagsulat: “Bisan daw ano man kadamo ang saad sang Dios, nangin Huo ini paagi sa iya [Jesus].” (2 Corinto 1:20) Huo, ang kamatayon “naggahom subong hari.” (Roma 5:17) Ang gawad nagahatag sing sadsaran para madula sang Dios ining “katapusan nga kaaway.” (1 Corinto 15:26; Bugna 21:4) Ang gawad ni Jesus mahimo gani makabulig sa mga napatay. “Ang oras magaabot,” siling ni Jesus, “nga ang tanan nga yara sa handumanan nga lulubngan makabati sang iya [Jesus] tingog kag magaguwa.”—Juan 5:28, 29; 1 Corinto 15:20-22.

18. Ano ang makahalanusbo nga epekto sang sala sa mga tawo, kag paano ini bag-uhon sa bag-ong kalibutan sang Dios?

¹⁸ Hunahunaa kon daw ano ka makalilipay nga maagom ang kabuhi subong sa kon ano gid ini—hilway sa mga kabalaka nga nagapabug-at sa aton karon! Bangod sa sala, wala kita nagahisanto sa Dios kag sa aton kaugalingon man nga hunahuna, tagipusuon, kag lawas. Apang, ang Biblia nagasaad nga sa bag-ong kalibutan sang Dios, “wala sing pumuluyo nga magasiling: ‘Nagamasakit ako.’” Huo, ang pisikal kag emosyonal nga mga balatian indi na magapaantos sa katawhan. Ngaa? Si Isaias nagasabat: “Ang katawhan nga nagapuyo sa duta amo sila ang napatawad sa ila sala.”—Isaias 33:24.

Ang Gawad—Isa ka Pagpakita Sing Gugma

19. Paano kita dapat magahulag subong indibiduwal sa gawad ni Cristo?

¹⁹ Ang gugma ang nagpahulag kay Jehova nga ipadala ang iya hinigugma nga Anak. (Roma 5:8; 1 Juan 4:9) Ang gugma man ang nagpahulag kay Jesus nga ‘tilawan ang kamatayon para sa tagsa ka tawo.’ (Hebreo 2:9; Juan 15:13) May maayo gid nga rason nga si Pablo nagsulat: “Ang gugma ni Cristo nagatiklod sa aton . . . Napatay sia para sa tanan agod nga ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.” (2 Corinto 5:14,15) Kon ginaapresyar naton ang ginhimo ni Jesus sa aton, magahulag kita. Ti, ang gawad ang nagsalbar sa aton sa kamatayon! Pat-od gid nga indi naton luyag nga ipakita paagi sa aton mga buhat nga ginakabig naton ang halad ni Jesus subong may ordinaryo lamang nga balor.—Hebreo 10:29.

20. Ano ang pila ka paagi nga matuman naton ang “pulong” ni Jesus?

²⁰ Paano naton mapakita ang tinagipusuon nga pag-apresyar sa gawad? Antes lamang sia gindakop, si Jesus nagsiling: “Kon ang bisan sin-o nagahigugma sa akon, tumanon niya ang akon pulong.” (Juan 14:23) Ang “pulong” ni Jesus nagalakip sang iya sugo nga makigbahin kita sing makugi sa pagtuman sa sugo: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila.” (Mateo 28:19) Sa pagtuman kay Jesus, dapat man naton ipakita ang gugma sa aton espirituwal nga mga kauturan.—Juan 13:34,35.

21. Ngaa dapat kita magtambong sa selebrasyon sang Memoryal sa Abril 1?

²¹ Ang isa sang pinakamaayo nga paagi nga mapakita naton ang apresasyon sa gawad amo ang pagtambong sa Memoryal sang kamatayon ni Cristo, nga hiwaton sini nga tuig sa Abril 1.a Bahin man ini sang “pulong” ni Jesus, kay sang ginsugdan niya ini nga selebrasyon, si Jesus nagsugo sa iya mga sumulunod: “Padayon ninyo nga himua ini sa handumanan nakon.” (Lucas 22:19) Paagi sa pagtambong naton sa sining labing importante nga okasyon kag paagi sa aton hanuot nga pagpamati sa tanan nga ginsugo ni Cristo, mapakita naton ang aton mabakod nga pagtuo nga ang gawad ni Jesus amo ang paagi sang Dios para sa kaluwasan. Sa pagkamatuod, “wala sing kaluwasan sa bisan kay sin-o nga iban.”—Binuhatan 4:12.

[Footnote]

Madumduman Mo Bala?

◻ Ngaa indi matumbasan sang mga tawo ang ila makasasala nga kahimtangan?

◻ Sa anong paagi si Jesus “katumbas nga gawad”?

◻ Paano gingamit ni Jesus ang iya kinamatarong sa himpit tawhanon nga kabuhi para sa aton kaayuhan?

◻ Anong mga pagpakamaayo ang magaabot sa katawhan bangod sang gawad ni Cristo?

[Laragway sa pahina 15]

Ang himpit nga tawo lamang—ang katumbas ni Adan—ang makabalanse sang timbangan sang katarungan

[Laragway sa pahina 16]

Sanglit si Jesus may kinamatarong sa himpit tawhanon nga kabuhi, ang iya kamatayon may mahalaron nga balor