Pagpangita sing Paraiso

PANUGIRON NI PASCAL STISI

Managob na ang kagab-ihon, kag wala na sing tawo ang mga kalye sa banwa sang Béziers, sa nabagatnan nga Pransia. Sang makita namon sang akon abyan ang bag-o napinturahan nga pader sang isa ka balaligyaan sing libro sa relihion, ginsulat namon sa sini sa dalagku itom nga mga letra ang mga pinamulong sang Aleman nga pilosopo nga si Nietzsche: ‘Ang mga dios patay. Mabuhay si Superman!’ Apang, ngaa ginhimo ko ini?

NATAWO ako sa Pransia sang 1951 sa Katoliko nga pamilya nga may Italyano nga kaliwat. Sang bata pa ako, nagabakasyon kami sa bagatnan sang Italya. Ang tagsa ka minuro didto may imahen ni Birhen Maria. Nagalakat upod sa akon lolo, ginsundan ko ining dalagku nabayuan nga mga estatwa sa malawig nga prosesyon sa kabukiran—apang wala gid magpati sa sini. Natapos ko ang akon una nga edukasyon sa isa ka relihioso nga eskwelahan nga ginapalakat sang mga Jesuita. Apang, wala ako sing madumduman nga nakabati ako sing butang nga nagpalambo gid sang akon pagtuo sa Dios.

Sang nag-eskwela lamang ako sa isa ka unibersidad sa Mont­pel­lier agod magtuon sing medisina nga nahunahuna ko ang tuhoy sa katuyuan sang kabuhi. Nahalitan ang akon amay sa tion sang inaway kag pirme may mga doktor sa tupad sang iya hiligdaan. Indi bala mas maayo nga untaton ang inaway sa baylo nga maghinguyang sing daku nga tion kag panikasog sa pagbulong sa mga tawo gikan sa kahalitan sini? Apang, ang Inaway sa Vietnam nagadabdab. Para sa akon ang lamang lohiko nga paagi sa pagbulong sa kanser sa baga, halimbawa, amo ang pagdula sa panguna nga ginatunaan sini—ang tabako. Kag kamusta naman ang mga balatian nga resulta sang malnutrisyon sa imol nga mga pungsod kag yadtong resulta sang sobra nga pagkaon sa manggaranon nga mga pungsod? Indi bala mas maayo nga dulaon ang mga ginatunaan sini sa baylo nga panikasugan nga remedyuhan ang makahalanusbo nga mga resulta? Ngaa may daku gid nga pag-antos sa duta? Nabatyagan ko nga may daku gid nga diperensia sa sining malaglagon nga kahimtangan sang katilingban, kag ginabasol ko ang mga gobierno sa sini.

Ang akon paborito nga libro ginsulat sang isa ka anarkista, kag ginasulat ko sa mga pader ang mga dinalan sini. Sing amat-amat, nangin anarkista man ako, nga wala sing pagtuo ukon wala sing talaksan sa moralidad, kag wala nagakinahanglan sa Dios ukon agalon. Para sa akon, ang Dios kag ang relihion mga imbento lamang sang mga manggaranon kag mga gamhanan agod magamhan nila kag mahingalitan kita tanan. Daw nagasiling sila sing, ‘Magpangabudlay kamo sing lakas para sa amon sa duta, kag ang inyo padya mangin daku sa paraiso sa langit.’ Apang ang panahon sang mga dios natapos na. Kinahanglan masugiran ang mga tawo. Ang mga graffito (sinulatan ukon drowing sa mga pader ukon dingding) amo ang isa ka paagi sa pagsugid sa ila.

Subong resulta, nangin ikaduha na lang ang akon pag-eskwela. Sadtong tion nag-eskwela ako sing geograpiya kag ekolohiya sa isa pa ka unibersidad sa Montpellier diin nagapangibabaw ang pagrebelde. Samtang labi ko nga ginatun-an ang ekolohiya, labi ako nga naugot nga makita ang paghigko sa aton matahom nga planeta.

Kada tuig sa tion sang bakasyon sa tig-ilinit, nagaangkas ako sa mga salakyan, nga nagabiyahe sing linibo ka kilometro sa bug-os nga Europa. Samtang nagalakbay kag nagapakighambal sa ginatos ka drayber, nakita ko mismo ang kalautan kag kaduluntan sa katilingban sang tawo. Isa ka bes, samtang nagapangita sing paraiso, nakakita ako sing pila ka matahom kaayo nga mga baybay sa matahom nga isla sang Crete kag nakita ko nga puno ini sang langis. Nasubuan gid ako. May yara pa ayhan nabilin nga bahin sang paraiso sa duta?

Balik sa Kaumhan

Ginasakdag sang mga ekologo sa Pransia ang pagbalik sa kaumhan subong solusyon sa mga problema sang katilingban. Luyag ko mag-obra paagi sa akon mga kamot. Gani nagbakal ako sing isa ka daan, human sa bato nga balay sa magamay nga minuro sa kunsaran sang Kabukiran Cévennes sa nabagatnan nga Pransia. Ginsulatan ko ang ganhaan sing “Paraiso Karon,” ang hulubaton sang Amerikano nga mga hippie. Ang Aleman nga dalagita nga nagaagi sa amon lugar nangin akon ginapuyopuyo nga asawa. Indi gid ako magpasugot nga kaslon sang meyor, nga isa ka tiglawas sang gobierno. Kag kaslon sa simbahan? Kalimti ina!

Sa kalabanan nga tion, nagalakat kami nga nagatiniil, kag may malaba ako nga buhok kag gumon nga burangos. Ang pagpananom sing mga bungang-kahoy kag mga utanon nagpahalipay sa akon. Sa tig-ilinit ang langit bughaw kag nagahuni ang mga cicada. Ang kabulakan sang mga kahoy-kahoy mahumot kaayo, kag ang mga bunga sang mga tanom sa Mediteraneo nga gintanom namon—mga ubas kag mga igos—tuman kaduga! Daw nasalapuan na namon ang amon bahin nga lugar sa paraiso.

Napukaw ang Pagpati sa Dios

Sa unibersidad, nagtuon ako sing cellular biology, embryology, kag anatomy, kag nagdayaw gid ako sa pagkasibod kag pagsinantuanay sining tanan nga mekanismo. Karon nga mahimo ko na pamalandungan kag mapanilagan mismo ang mga tinuga adlaw-adlaw, nagdayaw gid ako sa katahom kag ikasarang sini. Sa adlaw-adlaw ang tulun-an sang pagpanuga may ginasugid sa akon. Isa ka adlaw samtang nagalakatlakat ako sing malawig sa kabungyuran kag sa tapos makapamalandong sing tudok tuhoy sa kabuhi, naghinakop ako nga may yara gid isa ka Manunuga. Namat-od ako sing tinagipusuon nga magpati sa Dios. Antes sini, nakabatyag ako nga daw may kulang sa akon tagipusuon, nga isa ka makatulublag nga kasubo. Sang adlaw nga nagpati ako sa Dios, nagsiling ako sa akon kaugalingon, ‘Pascal, indi ka na gid mag-isahanon liwat.’ Tumalagsahon gid yadto nga balatyagon.

Wala magdugay pagkatapos sadto, nag-anak kami sang akon ginapuyopuyo sing isa ka bata nga babayi—si Amandine. Palangga ko gid sia. Karon nga nagapati na ako sa Dios, ginsugdan ko nga tahuron ang pila ka kasuguan sa moral nga akon nahibal-an. Gin-untatan ko ang pagpangawat kag pagbinutig, kag wala magdugay narealisar ko nga nakabulig ini sa akon nga malikawan ang madamo nga problema sa mga yara sa akon palibot. Huo, may mga problema kami, kag ang akon paraiso indi gid subong sang ginalauman ko. Ang mga kasilingan ko nga nagapananom sing ginahimo alak nga mga tanom nagagamit sing mga pamatay-insekto kag pamatay-hilamon nga mga kemikal nga nagadagta man sang akon mga pananom. Ang pamangkot ko tuhoy sa ginatunaan sang kalautan wala pa masabat. Dugang pa, bisan madamo ako sing nabasa tuhoy sa kabuhi sang pamilya, wala ini makatapna sa mainit nga pagbaisay namon sang akon ginapuyopuyo. Pila lamang ang amon abyan, kag indi sila matuod nga mga abyan; ginasugyot pa gani sang iban ang akon ginapuyopuyo nga luiban ako. May yara gid maayo pa nga paraiso.

Ang Sabat sa Akon mga Pangamuyo

Sa akon kaugalingon nga paagi, pirme gid ako nagapangamuyo sa Dios nga ubayan niya ako sa kabuhi. Isa ka Domingo sang aga, ginduaw kami sang isa ka mainabyanon nga babayi nga si Irène Lopez kag sang iya bata pa nga anak nga lalaki. Isa sia sang mga Saksi ni Jehova. Namati ako sa iya ginsiling kag nagpasugot nga duawon ako liwat. Duha ka lalaki ang nagduaw sa akon. Sa amon nga ginhambalan, nadumduman ko ang duha ka butang—Paraiso kag Ginharian sang Dios. Ginhuptan ko gid yadto nga panghunahuna sa akon tagipusuon, kag sa pagligad sang mga binulan, nahangpan ko nga sa pila ka adlaw dapat ko ipahisuno ang akon kabuhi sa mga talaksan sang Dios kon luyag ko matigayon ang matinlo nga konsiensia kag matuod nga kalipay.

Agod mapahisuno ang amon kabuhi sa Pulong sang Dios, ang akon ginapuyopuyo daw nagpasugot sang primero nga magpakasal sa akon. Apang nakapakig-upod sia sa mga tawo nga nagayubit sa Dios kag sa iya kasuguan. Sang pagpauli ko isa ka gab-i sang tigpamulak, nakibot gid ako. Wala sing tawo ang amon balay. Ang akon ginapuyopuyo naglakat dala ang amon tatlo ka tuig nga anak nga babayi. Inadlaw nga ginhulat ko ang ila pagbalik—apang wala sila magbalik. Sa baylo nga basulon ang Dios, nangamuyo ako sa iya nga buligan ako.

Wala magdugay pagkatapos sadto, ginkuha ko ang Biblia, nagpungko sa idalom sang akon igos, kag nagbasa. Sa katunayan, ginbasa ko ini sing maid-id. Bisan pa nakabasa ako sang tanan nga sahi sang libro sang mga psychoanalyst kag mga sikologo, wala pa gid ako makabasa sining sahi sang kaalam. Inspirado gid sang Dios ini nga libro. Ang panudlo ni Jesus kag ang iya paghangop sa kinaugali sang tawo nagpahayanghag sa akon. Nalugpayan ako sang mga Salmo kag nagdayaw sa praktikal nga kaalam sang Hulubaton. Narealisar ko gilayon nga samtang ang pagtuon sa mga tinuga maayo gid sa pagpasuod sa isa sa Dios, makasugid lamang ini sang “mga higad sang iya mga dalanon.”—Job 26:14.

Ginbilinan man ako sang mga Saksi sing mga libro nga Ang Kamatuoran nga Nagadul-ong sa Kabuhi nga Dayon kag Making Your Family Life Happy.a Ang pagbasa sini nagpamuklat sa akon. Ang Kamatuoran nga libro nakabulig sa akon nga mahangpan kon ngaa ang tawo nagaatubang sing lapnag nga polusyon, inaway, nagadugang nga kasingki, kag sing katalagman sa nuklear nga kalaglagan. Kag subong nga ang pula nga kalangitan nga nakita ko gikan sa akon hardin nagapatimaan sing maayo nga panahon sa masunod nga adlaw, ining mga hitabo nagapamatuod nga ang Ginharian sang Dios malapit na kaayo. Tuhoy sa Family Life nga libro, handum ko gid nga mapakita ini sa akon ginapuyopuyo kag sugiran sia nga mahimo kami mangin malipayon paagi sa pag-aplikar sing mga laygay sang Biblia. Apang indi na ini posible.

Pag-uswag sa Espirituwal

Luyag ko makahibalo sing dugang pa, gani ginpangabay ko si Robert nga isa ka Saksi, nga duawon ako. Nakibot gid sia sang ginsilingan ko sia nga luyag ko magpabawtismo, gani ginsugdan ang pagtuon sa Biblia. Ginsugdan ko gilayon ang pagsugid sa iban tuhoy sa akon natun-an kag nagpanagtag sing mga publikasyon nga natigayon ko sa Kingdom Hall.

Agod may palangabuhian, nag-eskwela ako sing masoneria nga kurso. Bangod nahibaluan ko ang kaayuhan nga mahimo sang Pulong sang Dios sa isa ka tawo, ginhimuslan ko ang tanan nga kahigayunan nga makabantala sing di-pormal sa akon mga kabutho kag mga manunudlo. Isa ka gab-i nasugilanon ko si ­Serge sa pasilyo. May ginauyatan sia nga pila ka magasin. “Nakita ko nga mahuyugon ka magbasa,” siling ko sa iya. “Huo, apang natak-an ako sa sini.” “Luyag mo bala sing isa nga maayo gid basahon?” pamangkot ko sa iya. Maayo gid ang amon paghinun-anon tuhoy sa Ginharian sang Dios, nga sa tapos sini ginbaton niya ang pila ka literatura sa Biblia. Pagkasunod nga semana, nag-upod sia sa akon sa Kingdom Hall, kag nasugdan ang isa ka pagtuon sa Biblia.

Isa ka adlaw ginpamangkot ko si Robert kon mahimo ako makabantala sa pamalaybalay. Nagkadto sia sa iya aparador kag nangita sing panapton para sa akon. Pagkasunod nga Domingo, ginhimo ko ang akon una nga ministeryo upod sa iya. Sang ulihi, sang Marso 7, 1981, dayag ko nga ginsimbuluhan ang akon dedikasyon kay Jehova nga Dios paagi sa bawtismo.

Bulig Samtang Ginasit-an

Samtang sa amo nga tion nahisayran ko kon diin nagapuyo si Amandine kag ang iya iloy sa iban nga pungsod. Apang, ang iya iloy—sing legal, suno sa kasuguan sang pungsod nga iya ginapuy-an—nagdumili sa akon nga makita ang akon anak. Nahanusbo gid ako. Nagpamana ang iloy ni Amandine, kag labi pa gid ang akon kasubo sang mabaton ko ang opisyal nga pahibalo sa akon nga gin-adoptar sang iya bana ang akon anak—nga wala gid ang akon pagpasugot. Wala na ako sing kinamatarong sa akon anak. Walay sapayan sang legal nga mga aksion, wala ako makatigayon sing mga kinamatarong sa pagduaw. Ang pamatyag ko daw nagapas-an ako sing 50 ka kilo, bangod sang akon kasakit.

Apang ang Pulong ni Jehova nagsakdag sa akon sa pila ka paagi. Isa ka adlaw sang nasubuan gid ako, ginsulitsulit ko ang pinamulong sang Hulubaton 24:10: “Naluyahan ka bala sa adlaw sang kapiutan? Ang imo kusog magadiutay.” Ini nga bersikulo nagbulig sa akon nga indi mapukan. Sa isa pa ka higayon, sa tapos mapaslawan nga makita ang akon anak, nagguwa ako sa ministeryo kag gin-uyatan sing hugot gid ang uluyatan sang akon bag nga ginasudlan sing mga libro. Sa sadtong mabudlay nga mga tion, naeksperiensiahan ko ang kamatuoran sang Salmo 126:6, nga nagasiling: “Ang isa nga nagaguwa, bisan nagahibi, nga nagadala sing isa ka suludlan nga puno sing binhi, magabalik nga may kalipay, nga nagadala sang iya mga linaylay.” Ang isa ka importante nga leksion nga akon natun-an amo nga kon may daku ka nga mga problema, kag kon nahimo mo na ang tanan nga masarangan mo agod lubaron ini, dapat mo ini ibutang sa imo likuran kag magpadayon nga may determinasyon sa pag-alagad kay Jehova. Amo lamang ini ang paagi agod mahuptan mo ang imo kalipay.

Paglab-ot sa Mas Maayo nga Butang

Sang nakita ang akon pagbag-o, nagtanyag ang akon pinalangga nga mga ginikanan nga buligan ako nga makapadayon sa akon pagtuon sa unibersidad. Ginpasalamatan ko sila, apang may tuhay na ako nga mga tulumuron. Ang kamatuoran naghilway sa akon gikan sa tawhanon nga pilosopiya, mistisismo, kag astrologo. May matuod na ako nga mga abyan nga indi gid magpatyanay sa inaway. Kag sa katapusan nasabat gid man ang akon mga pamangkot kon ngaa may daku gid nga pag-antos sa duta. Bilang pagpasalamat luyag ko alagaron ang Dios sa bug-os ko nga kusog. Ginhugod ni Jesus ang iya kaugalingon sing bug-os sa iya ministeryo, kag luyag ko ilugon ang iya huwaran.

Sang 1983, gin-untatan ko ang akon masoneria nga negosyo agod mangin bug-os tion nga ministro. Bilang sabat sa akon pangamuyo, nakakita ako sing part-time nga trabaho sa isa ka parke agod masakdag ang akon kaugalingon. Daw ano nga kalipay nga nakaeskwela ako sa eskwelahan para sa mga payunir upod kay Serge, ang pamatan-on nga lalaki nga ginpanaksihan ko sa eskwelahan sang masoneria! Pagkatapos sang tatlo ka tuig subong regular payunir, naghandum ako nga makahimo sing kapin pa sa pag-alagad kay Jehova. Sa amo, sang 1986, gintangdo ako nga mangin espesyal payunir sa matahom nga banwa sang Provins, malapit sa Paris. Sa masami, pag-abot ko sa balay kon gab-i, nagaluhod ako sa pagpangamuyo agod pasalamatan si Jehova sa makalilipay nga adlaw nga ginhinguyang ko sa pagpakighambal sa iban tuhoy sa iya. Sa katunayan, ang akon duha ka labing daku nga kalipay sa kabuhi amo ang pagpakighambal sa Dios kag paghambal tuhoy sa Dios.

Ang isa pa ka daku nga kalipay para sa akon amo ang bawtismo sang akon 68-anyos nga iloy nga nagapuyo sa Cébazan, isa ka gamay nga minuro sa nabagatnan sang Pransia. Sang ang akon iloy nagsugod sa pagbasa sing Biblia, ginpadalhan ko sia sing mga suskripsion sa Ang Lalantawan kag Magmata! Makatarunganon sia nga tawo, kag sa gilayon nakilala niya ang kamatuoran sang iya ginabasa.

Bethel—Isa ka Talalupangdon Espirituwal nga Paraiso

Sang namat-od ang Watch Tower Society nga buhinan ang kadamuon sang espesyal payunir, nag-aplay ako sa Ministerial Training School kag sa Bethel, ang sanga-talatapan sang mga Saksi ni Jehova sa Pransia. Luyag ko nga itugyan kay Jehova ang pagpamat-od kon paano ako makaalagad sa iya sing labing maayo. Pagligad sang pila ka bulan, sang Disiembre 1989, gin-agda ako sa Bethel sa Louviers, naaminhan-nakatundan nga Pransia. Maayo gid ang nangin resulta, kay bangod sang nahamtangan sini nakabulig pa ako sa akon manghod nga lalaki kag bayaw nga babayi sa pag-atipan sa akon mga ginikanan sang nagmasakit sila sing malubha. Ayhan wala ko ini mahimo kon nagmisyonero ako nga linibo ka kilometros ang kalayuon.

Madamong beses nga ginduaw ako sang akon iloy sa Beth­el. Bisan pa isa ka pagsakripisyo sa iya nga mapahilayo sa akon, pirme niya ako ginasilingan: “Magpabilin ka sa Bethel, Anak. Malipayon ako nga ginaalagad mo si Jehova sa sining paagi.” Sing makapasubo, ang akon duha ka ginikanan napatay na. Nagalaum gid ako nga makita sila sa isa ka duta nga mangin literal nga paraiso!

Nagapati gid ako nga kon may balay nga takus tawgon nga “Paraiso Karon,” amo ini ang Bethel—ang “Balay sang Dios”—kay ang matuod nga paraiso, labaw sa tanan, espirituwal, kag ang espirituwalidad nagapangibabaw sa Bethel. May kahigayunan kami nga mapalambo ang mga bunga sang espiritu. (Galacia 5:22,23) Ang bugana espirituwal nga pagkaon nga ginabaton namon sa adlaw-adlaw nga paghinun-anon sa teksto sang Biblia kag ang pagtinuon sang pamilya sa Ang Lalantawan nagabulig sa pagpalig-on sa akon sa pag-alagad sa ­Bethel. Dugang pa, bangod sang pagpakig-upod sa mahunahunaon-sa-espirituwal nga mga kauturan nga nagaalagad kay Jehova sing matutom sa sulod sang mga dekada, ang Bethel isa ka tumalagsahon nga duog sa pagtubo sa espirituwal. Walay sapayan nga nahamulag ako sa akon anak nga babayi sa sulod na sang 17 ka tuig, nakasalapo ako sing madamo nga makugi nga pamatan-on sa Bethel, nga ginakabig ko nga mga anak, kag nagakalipay ako sa ila espirituwal nga pag-uswag. Sa sulod sang nagligad nga walo ka tuig, may yara ako pito ka nanuhaytuhay nga asaynment. Bisan pa ining mga pagbag-o indi pirme mahapos, ini nga paghanas mapuslanon sa ulihi.

Nagtanom ako anay sing isa ka sahi sang balatong nga nagapamunga sing ginatos. Sing kaanggid, naeksperiensiahan ko nga kon magsab-ug ka sing malain, magaani ka sing isa ka gatos ka pilo nga mas malain pa—kag indi lang isa ka pag-ani. Ang eksperiensia isa ka eskwelahan nga ang mga leksion mahal kaayo. Mas gustuhon ko nga kuntani wala ako makaeskwela sa amo nga eskwelahan kundi, sa baylo, ginpadaku sa mga dalanon ni Jehova. Daw ano nga pribilehiyo sa mga pamatan-on nga napadaku sang Cristianong mga ginikanan! Wala sing duhaduha, mas maayo nga magsab-ug sing maayo sa pag-alagad kay Jehova kag mag-ani sing isa ka gatos ka pilo nga dugang nga paghidait kag kaayawan.—Galacia 6:7,8.

Sang payunir pa ako, nagalabay ako kon kaisa sa balaligyaan sing libro sa relihion nga ang pader sini ginsulatan namon anay sang hulubaton sang anarkista. Nakasulod pa gani ako kag nakighambal sa tag-iya tuhoy sa Dios nga buhi kag sang iya katuyuan. Huo, ang Dios buhi! Dugang pa, si Jehova, ang lamang matuod nga Dios, isa ka matutom nga Amay, nga wala gid nagabiya sa iya mga anak. (Bugna 15:4) Kabay nga dugang pa nga kadam-an gikan sa tanan nga kapungsuran ang makasalapo sing espirituwal nga paraiso karon—kag sing napasag-uli nga paraiso sa palaabuton—paagi sa pag-alagad kag pagdayaw sa Dios nga buhi, si Jehova!

[Footnote]

[Mga laragway sa pahina 26]

Napahulag sang mga kalatingalahan sang mga tinuga, namat-od ako sa akon tagipusuon nga magpati sa Dios.

(Tuo) Nagaalagad sa Bethel karon