Ikaw Bala Mapinasalamaton?
Sa isa ka puluy-an sang mga misyonero sa katundan nga aprika, may nagaistar anay nga bantay nga ido nga nagahingalan kay Teddy. Kon may mag-itsa kay Teddy sing karne, ginatulon niya ini gilayon, nga wala ginapanaburan kag wala ginausang. Ginahagal sa idalom sang mainit nga adlaw, nagahulat sia sa masunod nga iitsa sa iya. Sang naubos na ang karne, nagtalikod sia kag naglakat.
Wala gid nagpakita si Teddy sing bisan diutay man lang nga pagpasalamat sa nabaton niya. Wala sing nagapaabot nga himuon niya ini. Ti, isa lamang sia ka ido.
KON tuhoy sa pagpasalamat, masami nga nagapaabot kita sing kapin pa sa aton mga isigkatawo sangsa mga sapat. Sa masami nagakapaslawan kita. Madamo nga tawo ang nagakuha sing masarangan nila sa kabuhi kag nagapangita sing dugang pa. Indi man ini makatilingala. Ang Biblia nagtagna nga sa katapusan nga mga adlaw, ang mga tawo mangin di-mapinasalamaton.—2 Timoteo 3:1, 2.
Apang, ang mga alagad sang Dios may tuhay nga espiritu. Ginapamatian nila ang laygay ni apostol Pablo, nga nagpalig-on sa mga masigkatumuluo: “Magmapinasalamaton kamo.”—Colosas 3:15.
Si Jehova Mapinasalamaton
Si Jehova nagapakita sing himpit nga huwaran sa pagpakita sing apresasyon. Talupangda kon paano niya ginatamod ang iya matutom nga mga alagad. Si Pablo, sa idalom sang pag-inspirar, nagsulat sa mga Cristiano sa Hebreo: “Ang Dios indi dimatarong nga malimot sang inyo binuhatan kag sang gugma nga ginpakita ninyo tungod sa iya ngalan, nga nag-alagad kamo sa mga balaan kag padayon nga nagaalagad.”—Hebreo 6:10.
Madamo ang halimbawa sang apresasyon ni Jehova sa iya matutom nga mga alagad. Ginpakamaayo niya si Abraham paagi sa pagpabuad sang iya literal nga kaliwat, amo nga nangin “subong [sila] sang kabituunan sang mga langit kag subong sang balas nga yara sa baybayon.” (Genesis 22:17) Bilang pag-apresyar sa katutom ni Job sa idalom ang pagtilaw, wala lamang ginpanumbalik ni Jehova ang madamo nga manggad ni Job kundi ‘gindoble pa niya ini.’ (Job 42:10) Ang pagpakig-angot ni Jehova sa mga tawo sa sulod sang mga milenyo nagapamatuod sa kamatuoran sang pinamulong: “Tuhoy kay Jehova, ang iya mga mata nagapanuloktulok sa bug-os nga duta agod ipakita ang iya kusog tungod sa ila nga ang tagipusuon himpit ayon sa iya.”—2 Cronica 16:9.
Ang apresasyon kag huyog sang Dios nga padyaan ang mga nagatinguha sa paghimo sang iya kabubut-on amo ang iya panguna nga mga kinaiya. Ang pagkilala sini importante gid sa Cristianong pagtuo. Si Pablo nagsulat: “Kon wala sing pagtuo imposible nga mapahamut-an sia sing maayo, kay sia nga nagapalapit sa Dios dapat magpati . . . nga sia ang nangin manugpadya sadtong hanuot nga nagapangita sa iya.”—Hebreo 11:6.
Kon sa baylo nagpakita si Jehova sing matigdas, mamulayon nga espiritu, tanan kita pakamalauton. Ang salmista nagpatalupangod sini sang una: “Kon ang kasaypanan amo ang imo ginatan-aw, O Jah, O Jehova, sin-o bala ang makatindog?” (Salmo 130:3) Si Jehova mainapresyahon kag indi maakigon. Ginapakahamili niya ang mga nagaalagad sa iya. Mapinasalamaton sia.
Si Jesus—Isa ka Mainapresyahon Gid nga Tawo
Ginapabanaag sing himpit ang mga kinaiya sang iya langitnon nga Amay, ginpakita ni Jesus ang pagpasalamat sa mga butang nga ginhimo sang iban sa pagtuo. Binagbinaga ang natabo anay sa templo sa Jerusalem: “Karon sang nagtulok [si Jesus] nakita niya ang mga manggaranon nga nagahulog sang ila mga dulot sa bahandian. Dayon nakita niya ang isa ka imol nga babayi nga balo nga nagahulog didto sing duha ka gamay nga sensilyo nga may diutay kaayo nga balor, kag nagsiling sia: ‘Sa pagkamatuod, nagasiling ako sa inyo, Ining imol nga babayi nga balo, walay sapayan nga imol, naghulog sing labi pa sangsa ila tanan. Kay sila tanan naghulog sing mga dulot gikan sa ila kabuganaan, apang ining babayi gikan sa iya kinawad-on naghulog sang tanan nga inugpangabuhi niya.’”—Lucas 21:1-4.
Kon tuhoy sa kuwarta, diutay lamang ini nga amot, ilabi na kon ipaanggid sa ila sang mga manggaranon. Kalabanan sang yadto didto wala gani makatalupangod sa iya. Apang, nakita ni Jesus yadto nga balo. Nahantop niya ang iya kahimtangan. Nakita sia ni Jesus kag gin-apresyar sia.
Ang isa pa ka hitabo nagdalahig sa isa ka manggaranon nga babayi nga si Maria. Samtang nagasandiay si Jesus sa tion sang pagkaon, ginbubuan niya sing malahalon nga pahumot nga lana ang mga tiil kag ulo ni Jesus. Ginpakalain sang iban ang iya ginhimo, nagpangatarungan nga ginbaligya na lang kuntani ang lana kag gingamit ang kuwarta sa pagbulig sa mga imol. Ano ang reaksion ni Jesus? Sia nagsiling: “Pabay-i ninyo sia. Ngaa bala ginatublag ninyo sia? Nakahimo sia sing maayo nga buhat sa akon. Sa pagkamatuod nagasiling ako sa inyo, Bisan diin man iwali ining maayong balita sa bug-os nga kalibutan, ang ginhimo sining babayi hambalon man sa handumanan niya.”—Marcos 14:3-6, 9; Juan 12:3.
Wala si Jesus nangilin nga ang malahalon nga lana wala gingamit sa iban nga paagi. Gin-apresyar niya ang maalwan nga pagpakita sang gugma kag pagtuo ni Maria. Ang hitabo ginrekord sa Biblia subong handumanan sang iya maayo nga buhat. Ining mga rekord kag ang iban pa nagapakita nga si Jesus anay isa ka mainapresyahon gid nga tawo.
Kon isa ikaw ka alagad sang Dios, mapat-od mo gid nga ginaapresyar ni Jehova nga Dios kag ni Jesucristo ang imo mga panikasog sa pagsakdag sa matuod nga pagsimba. Ini nga ihibalo nagapasuod sa aton sa ila kag nagapahulag sa aton nga ilugon sila paagi sa aton pagkamapinasalamaton.
Ang Mamulayon nga Espiritu ni Satanas
Binagbinagon naton karon ang isa nga indi mapinasalamaton—si Satanas nga Yawa. Bangod si Satanas wala sing apresasyon, nanguna sia sa malaglagon nga pagrebelde sa Dios.
Sang napalambo ni Satanas ang mamulayon nga espiritu sang pagkadikontento, ginsab-ug ini niya sa iban. Binagbinaga ang natabo sa hardin sang Eden. Gintuga ni Jehova ang unang lalaki kag babayi, ginbutang sila sa paraiso nga hardin, kag ginsilingan sila: “Gikan sa tagsa ka kahoy sa katamnan mahimo ka makakaon nga may kaayawan.” May isa lamang nga ginadilian. Ang Dios nagsiling: “Tuhoy sa kahoy sang ihibalo sang maayo kag malaut indi ka magkaon gikan sini, kay sa adlaw nga magkaon ka gikan sini mapatay ka nga totoo.”—Genesis 2:16, 17.
Apang, sang ulihi, ginhangkat ni Satanas ang pagkamasaligan ni Jehova. Sa pila ka kasangkaron, luyag niya nga mangin dimapinasalamaton si Eva kay Jehova agod mapahulag sia [si Eva] nga magrebelde sa iya [kay Jehova], subong sang pagrebelde ni Satanas. “Nagsiling gid bala ang Dios nga indi kamo magkaon gikan sa tagsa ka kahoy sang katamnan?” pamangkot ni Satanas. (Genesis 3:1) Maathag nga ginapahangop nga ang Dios may ginadingot nga hamili nga butang kay Eva, isa ka butang nga magapamuklat sang iya mga mata kag mangin kaangay sia sa Dios mismo. Sa baylo nga magpasalamat sa madamo nga pagpakamaayo nga ginhatag ni Jehova sa iya, ginhandum ni Eva ang ginadilian nga butang.—Genesis 3:5, 6.
Ang malaglagon nga mga resulta bantog gid. Bisan pa ginhingalanan sia nga Eva “bangod mangin iloy sia sang tanan nga nagakabuhi,” sa tuhay nga kahulugan nangin iloy sia sang tanan nga nagakapatay. Napanubli sang tanan nga tawo gikan kay Adan ang sala nga nagabunga sing kamatayon.—Genesis 3:20; Roma 5:12.
Iluga ang Dios kag si Cristo
Binagbinaga ang kinatuhayan sa ulot ni Satanas kag ni Jesus. Ginlaragway si Satanas subong “manugsumbong sang aton mga kauturan, nga nagasumbong sa ila sa atubangan sang aton Dios sa adlaw kag gab-i.” (Bugna 12:10) “Sarang man maluwas [ni Jesus] sing bug-os ang mga nagadangop sa Dios paagi sa iya, bangod pirme sia nagakabuhi sa pagpangabay para sa ila.”—Hebreo 7:25.
Ginasumbong ni Satanas ang mga alagad sang Dios. Si Jesus nagaapresyar sa ila kag nagapangabay para sa ila. Subong mga manug-ilog ni Cristo, dapat tinguhaan sang mga Cristiano nga tan-awon ang maayo sa isa kag isa, nga nagaapresyar kag nagapabalor sa isa kag isa. Sa paghimo sini, ginapakita nila nga nagapasalamat sila sa isa nga nagpahamtang sing supremo nga huwaran sa apresasyon, si Jehova nga Dios.—1 Corinto 11:1.
[Laragway sa pahina 17]
Nagpakita si Jesus sing apresasyon sa maayo nga ginhimo ni Maria