Malipayon nga Ginpakita ni Jehova sa Aton ang Iya Dalanon

“Nahanungod sa matuod nga Dios, ang iya dalanon himpit; ang pulong ni Jehova isa nga ginputli.”—2 SAMUEL 22:31.

1, 2. (a) Ano ang ginakinahanglan gid sang tanan nga katawhan? (b) Kay sin-o halimbawa ang maayo nga ilugon naton?

ANG tanan nga tawo nagakinahanglan gid sing panuytoy. Sa pagkamatuod, nagakinahanglan kita sing bulig nga magatuytoy sa aton sa kabuhi. Matuod, si Jehova naghatag sa aton sing kaalam kag konsiensia nga magabulig sa aton nga mahantop ang husto gikan sa sala. Apang ang aton konsiensia dapat hanason agod ini mangin isa ka masaligan nga tuytoy. (Hebreo 5:14) Kag ang aton hunahuna nagakinahanglan sing husto nga impormasyon—subong man sing paghanas nga matulutimbang ina nga impormasyon—agod makahimo kita sing maayong mga desisyon. (Hulubaton 2:​1-5) Bisan pa amo sina, bangod sang mga pagkawalay kapat-uran sang kabuhi, ang aton mga desisyon mahimo nga indi mangin subong sang luyag naton. (Manugwali 9:11) Sa aton kaugalingon, wala kita sing masaligan nga paagi sa paghibalo kon ano ang yara sa palaabuton.

² Tungod sini kag sa madamo pa nga rason, si manalagna Jeremias nagsulat: “Nahibaluan ko, O Jehova, nga ang dalanon sang tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang.” (Jeremias 10:23) Si Jesucristo, ang pinakabantog nga tawo nga nagkabuhi, nagbaton sing panuytoy. Sia nagsiling: “Ang Anak indi makahimo sing bisan ano sa iya kaugalingon, kundi lamang ang nakita niya nga ginahimo sang Amay. Kay ang bisan ano nga ginahimo sinang Isa, ini ginahimo man sang Anak sa amo nga bagay.” (Juan 5:19) Daw ano ka maalamon, nian, nga ilugon si Jesus kag pangayuon ang bulig ni Jehova sa pagtuytoy sang aton mga tikang! Si Hari David nag-amba: “Nahanungod sa matuod nga Dios, ang iya dalanon himpit; ang pulong ni Jehova isa nga ginputli. Taming sia sa tanan nga nagadangop sa iya.” (2 Samuel 22:31) Kon tinguhaan naton nga maglakat sa dalanon ni Jehova sa baylo nga sundon ang aton mismo kaalam, may yara kita himpit nga panuytoy. Ang pagsikway sa dalanon sang Dios nagadul-ong sa kapahamakan.

Ginapakita ni Jehova ang Dalanon

3. Paano gintuytuyan ni Jehova sanday Adan kag Eva, nagatan-ay sa ila sing anong mga paglaum?

³ Binagbinaga ang halimbawa nanday Adan kag Eva. Bisan pa wala sila anay sing sala, nagkinahanglan sila sing panuytoy. Wala ginpabay-an ni Jehova si Adan sa pagplano sang tanan nga butang para sa iya kaugalingon sa matahom nga katamnan sang Eden. Sa baylo, ginhatagan sia sang Dios sing buluhaton. Una, dapat hatagan sing ngalan ni Adan ang kasapatan. Nian, ginhatagan ni Jehova sanday Adan kag Eva sing mga tulumuron nga magapadayon sa malawig nga tion. Gamhan nila ang duta, pun-on ini sang ila mga anak, kag atipanon ang kasapatan sa duta. (Genesis 1:28) Isa ini ka daku nga hilikuton, apang ang katapusan nga resulta mangin amo ang bug-os kalibutan nga paraiso nga puno sing himpit tawhanon nga rasa nga nagakabuhi sing nahiusa upod sa kasapatan. Daw ano ka makalilipay nga paglaum! Dugang pa, samtang sanday Adan kag Eva nagalakat sing matutom sa dalanon ni Jehova, may yara sila komunikasyon sa iya. (Ipaanggid ang Genesis 3:8.) Daw ano ka makalilipay nga pribilehiyo—ang may dalayon, personal nga kaangtanan sa Manunuga!

4. Paano ginpakita nanday Adan kag Eva ang kakulang sing pagsalig kag pagkamainunungon, kag ano ang malaglagon nga mga resulta?

⁴ Gindilian ni Jehova ang nahaunang mag-asawa sa pagkaon sing kahoy sang ihibalo sang maayo kag malain sa Eden, kag naghatag ini sa ila sing gilayon nga kahigayunan nga ipakita ang ila pagkamatinumanon—ang ila handum nga maglakat sa dalanon ni Jehova. (Genesis 2:17) Apang, sa gilayon yadto nga pagkamatinumanon gintilawan. Sang nagkari si Satanas nga may malimbungon nga mga pulong, sanday Adan kag Eva dapat magpakita sing pagkamainunungon kay Jehova kag magsalig sa Iya mga saad kon luyag nila magpabilin nga matinumanon. Sing makapasubo, kulang sila sing pagkamainunungon kag pagsalig. Sang gintan-ayan ni Satanas si Eva sing kahilwayan kag sayop nga ginsumbong si Jehova sing pagbutig, nadaya sia kag naglalis sa Dios. Si Adan nagpakasala man upod sa iya. (Genesis 3:​1-6; 1 Timoteo 2:14) Ang resulta nga kadulaan daku gid. Ang paglakat sa dalanon ni Jehova naghatag kuntani sa ila sing daku gid nga kalipay samtang ginatuman nila sing progresibo ang iya kabubut-on. Sa baylo, ang ila kabuhi napun-an sing kasubo kag kasakit tubtob napatay sila.​—⁠Genesis 3:16-19; 5:1-5.

5. Ano gid ang katuyuan ni Jehova, kag paano niya ginabuligan ang matutom nga mga tawo nga makita ang katumanan sini?

⁵ Walay sapayan sina, wala ginbag-o ni Jehova ang iya katuyuan nga sa pila ka adlaw ang duta mangin isa ka paraiso nga puluy-an para sa himpit, wala sing kasal-anan nga katawhan. (Salmo 37:​11, 29) Kag pirme sia nagahatag sing himpit nga tuytoy sa mga nagalakat sa iya dalanon kag nagalaum nga makita ang katumanan sina nga saad. Para sa aton nga may mga dulunggan nga nagapamati, ang tingog ni Jehova yara sa likod naton, nga nagasiling: “Amo ini ang dalan. Lakat sa sini, kamo nga katawhan.”​—Isaias 30:21.

Ang Pila Naglakat sa Dalanon ni Jehova

6. Sin-o ang duha ka tawo sang una nga panahon nga naglakat sa dalanon ni Jehova, kag ano ang mga resulta?

⁶ Suno sa rekord sang Biblia, diutay lamang sang mga anak nanday Adan kag Eva ang naglakat sa dalanon ni Jehova. Si Abel amo ang una sa ila. Bisan pa nakaagom sia sing hilaw nga kamatayon, napatay sia nga nahamut-an ni Jehova kag busa may pat-od nga paglaum nga makigbahin sa “pagkabanhaw sang . . . mga matarong” sa gintalana nga tion sang Dios. (Binuhatan 24:15) Makita niya ang katapusan nga katumanan sang daku nga katuyuan ni Jehova para sa duta kag sa katawhan. (Hebreo 11:4) Ang isa pa nga naglakat sa dalanon ni Jehova amo si Enoc, nga ang tagna tuhoy sa katapusan sining sistema sang mga butang gintipigan sa tulun-an sang Judas. (Judas 14, 15) Si Enoc wala man magkabuhi suno sa iya posible nga kalawigon. (Genesis 5:21-24) Apang, “may pamatuod sia nga napahamut-an niya sing maayo ang Dios.” (Hebreo 11:5) Sang mapatay sia, kaangay ni Abel, may pat-od sia nga paglaum nga mabanhaw, kag malakip sia sa mga makakita nga matuman ang mga katuyuan ni Jehova.

7. Paano ginpakita ni Noe kag sang iya pamilya ang pagkamainunungon kay Jehova kag ang pagsalig sa iya?

⁷ Samtang ang kalibutan antes sang Anaw naglugdang sa kalautan, ang pagkamatinumanon kay Jehova nangin labi kag labi nga isa ka pagtilaw sang pagkamainunungon. Sang malapit na malaglag yadto nga kalibutan, isa lamang ka diutay nga grupo ang nasapwan nga nagalakat sa dalanon ni Jehova. Si Noe kag ang iya pamilya namati sa Dios kag nagsalig sa ginsiling niya. Gintuman nila sing matutom ang ginpahimo sa ila kag wala sila masulay sang malaut nga mga buhat sang kalibutan sadto nga adlaw. (Genesis 6:5-7, 13-16; Hebreo 11:7; 2 Pedro 2:5) Nagapasalamat kita tungod sang ila pagkamainunungon kag pagkamatinumanon nga may pagsalig. Bangod sini, nakalampuwas sila sa Anaw kag nangin mga katigulangan naton.​—Genesis 6:22; 1 Pedro 3:20.

8. Para sa pungsod sang Israel, ano ang nadalahig sa paglakat sa dalanon sang Dios?

⁸ Sang ulihi, si Jehova nakigkatipan upod sa mga kaliwatan sang matutom nga si Jacob, kag sila nangin pinasahi nga pungsod niya. (Exodo 19:​5, 6) Si Jehova naghatag sing panuytoy sa iya katipan nga katawhan paagi sa nasulat nga Kasuguan, sa pagkasaserdote, kag sa padayon nga matagnaon nga panuytoy. Apang nagadepende sa mga Israelinhon ang pagsunod sa sadto nga panuytoy. Ginsugo ni Jehova ang iya manalagna nga magsiling sa mga Israelinhon: “Yari karon, ginabutang ko sa atubangan ninyo sini nga adlaw ang pagpakamaayo kag pagpakamalaut: ang pagpakamaayo, kon magpamati kamo sa mga sugo ni Jehova nga inyo Dios nga ginsugo ko sa inyo sini nga adlaw; kag ang pagpakamalaut, kon indi kamo magpamati sang mga sugo ni Jehova nga inyo Dios kag maglipas kamo sa dalanon nga ginasugo ko sa inyo sini nga adlaw, sa pagsunod sa iban nga mga dios nga wala ninyo makilal-i.”—Deuteronomio 11:26-28.

Kon Ngaa Gintalikdan sang Iban ang Dalanon ni Jehova

9, 10. Bangod sang anong kahimtangan nga ang mga Israelinhon kinahanglan nga magsalig kay Jehova kag magpalambo sing pagkamainunungon sa iya?

⁹ Kaangay ni Adan kag ni Eva, ang mga Israelinhon dapat magsalig kay Jehova kag magmainunungon sa iya agod magpabilin sila nga matinumanon. Ang Israel isa ka diutay nga pungsod nga ginalibutan sang makiawayon nga mga kaingod. Sa bagatnan-katundan amo ang Egipto kag Etiopia. Sa aminhan-sidlangan amo ang Siria kag Asiria. Sa malapit amo ang Filistia, Amon, Moab, kag Edom. Sa lainlain nga tion, sila tanan nangin mga kaaway sang Israel. Dugang pa, sila tanan nagbuhat sing butig nga relihion, nga kilala sa pagsimba sa mga diosdios, astrolohiya, kag sa pila ka hitabo sa malaw-ay kaayo nga seksuwal nga mga rito kag mapintas nga paghalad sang mga kabataan. Ang mga kaingod sang Israel naglaum nga hatagan sila sing dalagku nga mga pamilya, mauyahon nga mga ani, kag kadalag-an sa inaway sang ila mga dios.

¹⁰ Ang Israel lamang ang nagasimba sa isa ka Dios, si Jehova. Nanaad sia nga pakamaayuhon niya sila sing dalagku nga mga pamilya, bugana nga mga ani, kag kalig-unan batok sa ila mga kaaway kon tumanon nila ang iya mga sugo. (Deuteronomio 28:1-14) Sing makapasubo, napaslawan sa pagtuman sini ang madamo sa Israel. Sa mga naglakat sa dalanon ni Jehova, nag-antos ang madamo bangod sang ila pagkamainunungon. Ang iban ginsakit pa gani, ginyaguta, ginlapdusan, ginbilanggo, ginbato, kag ginpatay sang mga masigka-Israelinhon. (Binuhatan 7:51,52; Hebreo 11:35-38) Daw ano gid yadto nga pagtilaw para sa mga matutom! Apang, ngaa tuman kadamo ang nagpahilayo sa dalanon ni Jehova? Ang duha ka halimbawa gikan sa maragtas sang Israel magabulig sa aton nga makita ang ila sayop nga panghunahuna.

Ang Malain nga Halimbawa ni Ahaz

11, 12. (a) Sang ginpahog sang Siria, ano ang ginpangindian nga himuon ni Ahaz? (b) Anong duha ka ginhalinan ang ginlauman ni Ahaz nga makahatag sing kalig-unan?

¹¹ Si Ahaz naggahom sa nabagatnan nga ginharian sang Juda sang ikawalo nga siglo B.C.E. Ang iya paggahom indi mahidaiton. Sang isa ka okasyon, ang Siria kag ang naaminhan nga ginharian sang Israel nahiusa nga nakig-away batok sa iya, kag “ang iya tagipusuon kag ang tagipusuon sang iya katawhan nagkurog.” (Isaias 7:1,2) Apang, sang nagtan-ay si Jehova sing suporta kag gin-agda si Ahaz nga tilawan sia, si Ahaz talangkod nga nangindi! (Isaias 7:10-12) Subong resulta, ang Juda nalutos sa inaway kag madamo ang napatay.—2 Cronica 28:1-8.

¹² Samtang si Ahaz nangindi nga tilawan si Jehova, nangayo sia sing bulig sa hari sang Asiria. Apang, ang Juda nalutos gihapon sa mga kamot sang iya mga kaingod. Sang ang Asiria nakig-away man batok kay Ahaz kag “nagsakit sa iya,” “naghalad [ang hari] sa mga dios sang Damasco nga nagsamad sa iya, kag nagsiling sia: ‘Bangod nga ang mga dios sang mga Siria nagbulig sa ila, busa magahalad ako sa ila, agod nga buligan nila ako.’”—2 Cronica 28:20,23.

13. Ano ang ginpakita ni Ahaz paagi sa pagliso sa mga dios sang Siria?

¹³ Sang ulihi pa nga tion, si Jehova nagsiling sa Israel: “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga laktan mo. O kon mamati ka lamang sa akon mga sugo! Nian ang imo paghidait mangin subong kuntani sang suba, kag ang imo pagkamatarong mangin subong sang mga balod sang dagat.” (Isaias 48:17,18) Sa pagliso sa mga dios sang Siria, ginpakita ni Ahaz kon daw ano kalayo na sia gikan sa ‘paglakat sa dalanon nga dapat niya laktan.’ Nadaya gid sia sang panghunahuna sang mga pungsod, nga naglaum nga matigayon ang kalig-unan sa ila butig nga mga tuburan sa baylo nga kay Jehova.

14. Ngaa wala sing balibad si Ahaz sang nagliso sia sa butig nga mga dios?

¹⁴ Ang mga dios sang mga pungsod, lakip ang iya sang Siria, madugay na ginpakita nga “walay pulos nga mga dios.” (Isaias 2:8) Sing una pa, sang nagagahom si Hari David, ang kalabawon ni Jehova sa mga dios sang Siria maathag nga nakita sang ang mga Sirianhon nangin mga alagad ni David. (1 Cronica 18:5,6) Si Jehova lamang, “ang Dios sang mga dios kag ang Ginuo sang mga ginuo, ang Dios nga daku, gamhanan kag makakulugmat,” ang makahatag sing matuod nga kalig-unan. (Deuteronomio 10:17) Apang, gintalikdan ni Ahaz si Jehova kag naglaum nga matigayon ang kalig-unan sa mga dios sang mga pungsod. Ang resulta malaglagon para sa Juda.​—2 Cronica 28:24,25.

Ang mga Judiyo nga Kaupod ni Jeremias sa Egipto

15. Sa anong paagi ang mga Judiyo sa Egipto sang adlaw ni Jeremias nagpakasala?

¹⁵ Bangod sang sobra nga pagkadimainunungon sang iya katawhan, sang 607 B.C.E., gintugutan ni Jehova nga laglagon sang mga taga-Babilonia ang Jerusalem kag ang templo sini. Ang kalabanan gintapok sa Babilonia. Apang, ang iban nabilin, lakip sa ila amo si manalagna Jeremias. Sang ginpatay si Gobernador Gedalias, ining grupo nagpalagyo pakadto sa Egipto kag gindala si Jeremias upod sa ila. (2 Hari 25:22-26; Jeremias 43:5-7) Didto, naghalad sila sa butig nga mga dios. Ginsaway ni Jeremias ang dimatutom nga mga Judiyo, apang matig-a ang ila ulo. Nagdumili sila sa pagliso kay Jehova kag namilit nga padayon sila nga magsunog sing incienso sa “reyna sang mga langit.” Ngaa? Bangod amo ini ang ila ginhimo kag sang ila mga katigulangan sa ‘mga siudad sang Juda kag sa mga dalan sang Jerusalem, sang may bugana sila nga kalan-on kag maayo, kag wala sila sing nakita nga bisan ano nga kapahamakan.’ (Jeremias 44:​16, 17) Ang mga Judiyo nangatarungan man: “Kutob nga nag-untat kami sa pagsunog sing incienso sa ‘reyna sang mga langit’ kag sa pag-ula sing mga halad nga ilimnon sa iya nakulangan kami sang tanan nga butang, kag ginpapas kami sang espada kag tiggulutom.”—Jeremias 44:18.

16. Ngaa ang mga Judiyo sa Egipto nagsayop gid sa ila pangatarungan?

¹⁶ Daw ano kakitid nga memorya! Ano ang mga katunayan? Ang mga Judiyo naghalad sa pagkamatuod sa butig nga mga dios sa duta nga ginhatag ni Jehova sa ila. Sang pila ka tion, subong sang panahon ni Ahaz, nag-antos sila bangod sina nga apostasya. Apang, si Jehova “makuli sa pagpangakig” sa iya katipan nga katawhan. (Exodo 34:6; Salmo 86:15) Ginpadala niya ang iya mga manalagna agod laygayan sila nga maghinulsol. Kon kaisa, sang ang hari matutom, ginpakamaayo sia ni Jehova, kag ang katawhan nakabenepisyo gikan sa sadto nga pagpakamaayo, bisan pa nga ang kalabanan sa ila indi matutom. (2 Cronica 20:29-33; 27:1-6) Nagsayop gid yadtong mga Judiyo sa Egipto sa pagpangangkon nga ang bisan ano man nga kabuganaan nga naagom nila anay sa ila duta nga natawhan naghalin sa ila butig nga mga dios!

17. Ngaa nadula sang Juda ang duta kag templo sini?

¹⁷ Antes sang 607 B.C.E, ginlaygayan ni Jehova ang mga taga-Juda: “Tumana ang akon tingog, kag ako mangin inyo Dios, kag kamo mangin akon katawhan; kag lakat kamo sa bug-os nga dalanon nga ginasugo ko sa inyo, agod nga magmaayo sa inyo.” (Jeremias 7:23) Nadula sang mga Judiyo ang ila templo kag ang ila duta bangod gid sang indi nila paglakat ‘sa tanan nga dalanon nga ginasugo ni Jehova sa ila.’ Pat-uron naton nga malikawan inang makatalagam nga kasaypanan.

Ginapakamaayo ni Jehova ang mga Nagalakat sa Iya Dalanon

18. Ano ang dapat himuon sang mga nagalakat sa dalanon ni Jehova?

¹⁸ Sa karon, subong sang nagligad, ang paglakat sa dalanon ni Jehova nagakinahanglan sing pagkamainunungon—sing determinasyon nga sia lamang ang alagaron. Nagakinahanglan ini sing pagsalig—sing bug-os nga pagtuo nga ang mga saad ni Jehova masaligan kag magamatuod. Ang paglakat sa dalanon ni Jehova nagakinahanglan sing pagkamatinumanon—sing pagsunod sa iya mga kasuguan nga wala nagasipak kag sing pagtuman sa iya mataas nga mga talaksan. “Si Jehova matarong; nagahigugma sia sang pagkamatarong.”​—Salmo 11:7.

19. Anong mga dios ang ginasimba sang madamo sa karon, kag ano ang mga resulta?

¹⁹ Si Ahaz naglaum nga matigayon ang kalig-unan sa mga dios sang Siria. Ang mga Israelinhon didto sa Egipto naglaum nga ang “reyna sang mga langit,” ang dios nga ginasimba sing lapnag sa dumaan nga Natung-an nga Sidlangan, magahatag sa ila sing materyal nga kabuganaan. Sa karon, madamong dios ang indi literal nga mga idolo. Si Jesus nagpaandam batok sa pag-alagad sa mga “Manggad” sa baylo ni Jehova. (Mateo 6:24) Si apostol Pablo nagpamulong tuhoy sa “pagkamahamkunon, nga amo ang idolatriya.” (Colosas 3:5) Nagpamulong man sia tuhoy sa sadtong ang ila “dios amo ang ila tiyan.” (Filipos 3:19) Huo, ang kuwarta kag materyal nga mga butang amo ang lakip sa pangunang mga dios nga ginasimba karon. Sa katunayan, ang kalabanan—lakip ang madamo nga may relihioso nga ginatapuan—‘nagbutang sang ila paglaum sa dimasaligan nga mga manggad.’ (1 Timoteo 6:17) Madamo ang nagahimakas sa pag-alagad sa sining mga dios, kag ang pila nagaani sing mga padya—nagapuyo sa pinakamaayo nga mga puluy-an, nagapanag-iya sing malahalon nga mga butang, kag nagakaon sing manamit nga kalan-on. Apang, indi tanan nagaagom sing amo sina nga kabuganaan. Kag natukiban sang ulihi bisan sang mga nagaagom sini nga ining mga butang indi gali makaalayaw. Indi ini masaligan, umalagi lamang, kag wala nagapaayaw sang espirituwal nga mga kinahanglanon.​—Mateo 5:3.

20. Anong pagkabalanse ang dapat naton huptan?

²⁰ Matuod, dapat kita mangin praktikal samtang nagakabuhi kita sa katapusan nga mga adlaw sining sistema sang mga butang. Dapat kita maghimo sing makatarunganon nga mga tikang nga amanan ang aton mga pamilya sa materyal nga mga paagi. Apang kon hatagan naton sing mas daku nga balor ang mataas nga talaksan sang pangabuhi, ang paghingamo sing kuwarta, ukon ang kaanggid nga mga butang sangsa alagaron ang Dios, mahulog kita sa isa ka sahi sang idolatriya kag wala na nagalakat sa dalanon ni Jehova. (1 Timoteo 6:9,10) Apang, ano abi kon makasumalang kita sing problema sa panglawas, sa pinansial, ukon sing iban pa? Indi naton pag-ilugon ang mga Judiyo sa Egipto nga ginbasol ang ila mga problema sa pag-alagad sa Dios. Sa baylo, tilawan naton si Jehova subong sang wala ginhimo ni Ahaz. Mainunungon nga magpangayo sing panuytoy kay Jehova nga Dios. Masinaligon nga iaplikar ang iya panuytoy, kag mangamuyo sing kusog kag kaalam nga maatubang ang tanan nga kahimtangan. Nian, masinaligon nga maghulat sing pagpakamaayo ni Jehova.

21. Anong mga pagpakamaayo ang magaabot sa mga nagalakat sa dalanon ni Jehova?

²¹ Tuhoy sa maragtas sang Israel, ginpakamaayo sing bugana ni Jehova ang mga naglakat sa iya dalanon. Si Hari David nag-amba: “O Jehova, tuytuyi ako sa imo pagkamatarong bangod sang akon mga kaaway.” (Salmo 5:8) Ginhatagan sia ni Jehova sing mga kadalag-an sa inaway batok sa kaingod nga mga pungsod nga namahog sang ulihi kay Ahaz. Sa idalom ni Solomon, ginpakamaayo ang Israel sing kalinong kag kabuganaan nga ginkahidlawan sang ulihi sang mga Judiyo sa Egipto. Ginhatagan pa gani ni Jehova ang anak ni Ahaz nga si Ezequias sing kadalag-an batok sa gamhanan nga Asiria. (Isaias 59:1) Huo, ang kamot ni Jehova indi malip-ot para sa iya mga mainunungon, nga wala magtindog sa “dalanon sang mga makasasala” kundi ang ila kalipay yara sa kasuguan sang Dios. (Salmo 1:1,2) Matuod gihapon ini. Apang, paano kita karon makapat-od nga nagalakat kita sa dalanon ni Jehova? Hinun-anunan ini sa masunod nga artikulo.

Madumduman Mo Bala?

◻ Anong mga kinaiya ang kinahanglanon agod maglakat kita sa dalanon ni Jehova?

◻ Ngaa ang panghunahuna ni Ahaz sayop?

◻ Ano ang sayop sa pangatarungan sang mga Judiyo sa Egipto?

◻ Paano naton mapabakod ang aton determinasyon nga maglakat sa dalanon ni Jehova?

[Laragway sa pahina 13]

Si Ahaz nagsalig sa mga dios sang Siria sa baylo nga kay Jehova