Pag-apresyar sa “Mga Dulot nga mga Tawo”
“Tahaa ninyo ang mga nagapangabudlay sing lakas sa tunga ninyo kag . . . hatagi sila sing labi pa sa dikinaandan nga patugsiling sa gugma bangod sang ila hilikuton.’—1 TESALONICA 5:12,13.
1. Suno sa Binuhatan 20:35, ano ang gahom sang paghatag? Iilustrar.
“MAS daku ang kalipay sa paghatag sangsa pagbaton.” (Binuhatan 20:35) Madumduman mo bala ang katapusan nga tion nga naeksperiensiahan mo ang pagkamaminatud-on sining mga pulong ni Jesus? Ayhan isa yadto ka regalo nga ginhatag mo sa isa ka tawo nga ginapalangga mo gid. Ginpili mo ini sing maayo, kay luyag mo gid nga mangin isa ini ka butang nga pakamahalon sang isa nga imo ginahigugma. Ang kahamuot nga nasanaaw sa nawong sang isa nga imo ginahigugma—nagpahalipay gid sa imo tagipusuon! Kon nagakaigo ang motibo, ang paghatag isa ka ekspresyon sang gugma, kag ang pagpabutyag sing gugma may gahom sa paghatag sa aton sing kalipay.
2, 3. (a) Ngaa masiling nga wala na sing magmalipayon pa kay Jehova, kag paano ang ginaaman nga “mga dulot nga mga tawo” makapasadya sa iya tagipusuon? (b) Ano ang indi naton luyag himuon sa isa ka dulot halin sa Dios?
2 Sin-o, kon amo, ang magmalipayon pa kay Jehova, ang Manughatag sang “tagsa ka maayong dulot”? (Santiago 1:17; 1 Timoteo 1:11) Ang tagsa ka dulot nga iya ginahatag ginapahulag sang gugma. (1 Juan 4:8) Matuod gid ini sa dulot nga ginhatag sang Dios sa kongregasyon paagi kay Cristo—ang “mga dulot nga mga tawo.” (Efeso 4:8) Ang gin-aman nga mga gulang agod mag-atipan sa panong isa ka ekspresyon sang tudok nga gugma sang Dios para sa iya katawhan. Ini nga mga lalaki ginpili sing mahalungon—dapat nila malab-ot ang Makasulatanhon nga mga kalipikasyon. (1 Timoteo 3:1-7; Tito 1:5-9) Nahibaluan nila nga dapat nila “pakig-angutan ang panong sing mapinalanggaon,” agod may rason ang mga karnero nga magpasalamat bangod sining mahigugmaon nga mga manugbantay. (Binuhatan 20:29; Salmo 100:3) Kon makita ni Jehova nga puno sing pagpasalamat ang tagipusuon sang iya mga karnero, pat-od nga nagakalipay ang iya mismo tagipusuon!—Hulubaton 27:11.
3 Pat-od nga indi naton luyag nga pakadiutayon ang balor sang isa ka dulot halin sa Dios; indi man naton luyag nga mangin dimainapresyahon sa iya mga dulot. Sa amo, duha ka pamangkot ang nagautwas: Paano dapat tamdon sang mga gulang ang ila papel sa kongregasyon? Kag paano mapakita sang nabilin sa panong nga ginaapresyar nila ang “mga dulot nga mga tawo”?
‘Mga Masigkamanugpangabudlay Ninyo Kami’
4, 5. (a) Sa ano ginpaanggid ni Pablo ang kongregasyon, kag ngaa isa ini ka nagakaigo nga ilustrasyon? (b) Ano ang ginapakita sang ilustrasyon ni Pablo subong amo ang nagakadapat nga pagtamod naton kag pagpakig-angot sa isa kag isa?
4 Gintugyanan ni Jehova ang “mga dulot nga mga tawo” sing isa ka kadakuon sang awtoridad sa sulod sang kongregasyon. Sa pagkamatuod, indi luyag sang mga gulang nga gamiton sa sayop nga paagi ang ila awtoridad, apang nahibaluan nila nga madali lang ini himuon bangod dihimpit sila. Gani, paano nila dapat tamdon ang ila kaugalingon may kaangtanan sa nabilin sa panong? Binagbinaga ang ilustrasyon nga gingamit ni apostol Pablo. Sa tapos mapaathag kon ngaa ginaaman ang “mga dulot nga mga tawo,” si Pablo nagsulat: “Paagi sa gugma magtubo kita sa tanan nga butang padulong sa iya nga amo ang ulo, si Cristo. Gikan sa iya ang bug-os nga lawas, bangod naangot sing sibu kag nagabuligay paagi sa tagsa ka lutalutahan nga nagahatag sang kon ano ang kinahanglanon, suno sa hilikuton sang tagsa ka bahin, nagapatubo sa lawas agod nga maglig-on ini sa gugma.” (Efeso 4:15, 16) Gani ginapaanggid ni Pablo ang kongregasyon, lakip ang mga gulang kag iban nga mga katapo, sa lawas sang tawo. Ngaa isa ini ka nagakaigo nga ilustrasyon?
5 Ang lawas sang tawo ginahuman sang madamo nanuhaytuhay nga mga bahin apang may isa lamang ka ulo. Apang, wala sing bahin sang lawas—maskulo man, nerbio, ukon ugat—ang wala sing pulos. Ang tagsa ka bahin mapuslanon kag nagaamot para sa kapagros kag katahom sang kabug-usan. Sing kaanggid, ang kongregasyon ginahuman sang madamo nanuhaytuhay nga mga katapo, apang ang tagsa ka katapo—bata man ukon tigulang, mabakod man ukon maluya—makaamot sing isa ka butang para sa kabug-usan nga espirituwal nga kapagros kag katahom sang kongregasyon. (1 Corinto 12:14-26) Wala sing isa ang dapat magbatyag nga wala sia sing kabilinggan. Sa pihak nga bahin naman, wala sing isa ang dapat magbatyag nga superyor sia, kay kita tanan—mga manugbantay man ukon mga karnero—bahin sang isa ka lawas, apang may isa lamang ka ulo, si Cristo. Sa amo, ginalaragway ni Pablo ang isa ka makalilipay nga laragway sang gugma, pag-atipan, kag pagtahod nga dapat naton ipakita sa isa kag isa. Ang pagkilala sa sini nagabulig sa mga gulang sa paghupot sing mapainubuson, balanse nga pagtamod sa ila papel sa sulod sang kongregasyon.
6. Bisan pa may awtoridad subong apostol, paano si Pablo nagpakita sing mapainubuson nga espiritu?
6 Ining “mga dulot nga mga tawo” wala nagatinguha nga kontrolon ang kabuhi ukon pagtuo sang ila mga masigkasumilimba. Si Pablo, bisan pa may awtoridad subong apostol, mapainubuson nga nagsiling sa mga taga-Corinto: “Indi nga mga agalon kami sang inyo pagtuo, kundi mga masigkamanugpangabudlay kami para sa inyo kalipay, kay paagi sa inyo pagtuo nagatindog kamo.” (2 Corinto 1:24) Wala ginhandum ni Pablo nga kontrolon ang pagtuo kag pagkabuhi sang iya kauturan. Sa pagkamatuod, nakita niya nga indi ini kinahanglanon, kay nagpabutyag sia sing pagsalig nga sila matutom na nga daan nga mga lalaki kag mga babayi nga yara sa sulod sang organisasyon ni Jehova bangod luyag nila himuon kon ano ang husto. Busa, sa paghambal tuhoy sa iya kaugalingon kag sa iya kaupod sa paglakbay nga si Timoteo, daw subong bala nga amo sini ang ginsiling ni Pablo: ‘Hilikuton namon nga magpangabudlay upod sa inyo sa pag-alagad sa Dios nga may kalipay.’ (2 Corinto 1:1) Daw ano ka mapainubuson nga espiritu!
7. Ano ang nahangpan sang mapainubuson nga mga gulang tuhoy sa ila papel sa kongregasyon, kag ano ang pagsalig nila sa ila mga masigkamanugpangabudlay?
7 Pareho man ang hilikuton sang “mga dulot nga mga tawo” karon. Sila ‘mga masigkamanugpangabudlay para sa aton kalipay.’ Nahangpan sang mapainubuson nga mga gulang nga indi sila ang magdesisyon kon sig-ano ang masarangan nga himuon sang iban sa pag-alagad sa Dios. Nahibaluan nila nga bisan pa mahimo nila palig-unon ang iban nga pasangkaron ukon pauswagon ang ila ministeryo, ang pag-alagad sa Dios dapat maghalin sa isa ka kinabubut-on nga tagipusuon. (Ipaanggid ang 2 Corinto 9:7.) Nagasalig sila nga kon malipayon ang ila mga masigkamanugpangabudlay, himuon nila ang tanan nga masarangan nila. Sa amo, ginahandum nila sing tinagipusuon nga buligan ang ila kauturan sa ‘pag-alagad kay Jehova nga may kasadya.’—Salmo 100:2.
Pagbulig sa Tanan sa Pag-alagad nga May Kalipay
8. Ano ang pila ka paagi nga makabulig ang mga gulang sa ila kauturan sa pag-alagad kay Jehova nga may kalipay?
8 Mga gulang, paano ninyo mabuligan ang inyo kauturan sa pag-alagad nga may kalipay? Mapalig-on ninyo sila paagi sa huwaran. (1 Pedro 5:3) Ipakita ang inyo kakugi kag kalipay sa ministeryo, kag mahimo nga mapalig-on man ang iban nga ilugon ang inyo huwaran. Hatagi sing komendasyon ang iban bangod sang ila bug-os kalag nga mga panikasog. (Efeso 4:29) Ang mainit kag matuod nga komendasyon nagabulig sa iban sa pagbatyag nga mapuslanon sila kag ginakinahanglan. Nagapalig-on ini sa mga karnero sa paghandum nga himuon ang ila labing masarangan sa pag-alagad sa Dios. Likawi ang indi nagakaigo nga mga pagpaanggid. (Galacia 6:4) Ini nga mga pagpaanggid nagapaluya lamang sa baylo nga palig-unon ang iban sa pag-uswag. Luwas pa, ang mga karnero ni Jehova mga indibiduwal—nga may magkatuhay nga mga kahimtangan kag mga ikasarang. Kaangay ni Pablo, magpakita sing pagsalig sa inyo kauturan. Ang gugma ‘nagapati sa tanan nga butang,’ gani dapat kita magpati nga ginahigugma sang aton kauturan ang Dios kag nagahandum nga pahamut-an sia. (1 Corinto 13:7) Kon ‘ginapadunggan ninyo ang iban,’ ginapalig-on ninyo sila nga ipakita ang ila labing maayo nga mahimo. (Roma 12:10) Saligi nga kon mapalig-on kag mapapagsik ang mga karnero, ang kalabanan sa ila magahimo sang tanan nga masarangan nila sa pag-alagad sa Dios, kag makasapo sila sing kalipay sa sini nga pag-alagad.—Mateo 11:28-30.
9. Ano nga pagtamod sa mga masigkagulang ang magabulig sa tagsa ka gulang sa pag-alagad nga may kalipay?
9 Ang mapainubuson nga pagtamod sa imo kaugalingon subong isa ka ‘masigkamanugpangabudlay’ magabulig sa imo sa pag-alagad nga may kalipay kag sa pag-apresyar sa tumalagsahon nga mga dulot sang imo mga masigkagulang. Ang tagsa ka gulang may iya kaugalingon nga mga kinaadman kag mga ikasarang nga iya magamit para sa kaayuhan sang kongregasyon. (1 Pedro 4:10) Ang isa mahimo nga may dulot sa pagpanudlo. Ang isa pa mahimo nga isa ka epektibo nga organisador. Kag ang isa pa gid mahimo nga madali gid palapitan bangod mainabyanon sia kag mainawaon. Ang kamatuoran amo, wala sing gulang ang may tanan nga dulot sa pareho nga kadakuon. Ginahimo bala sang isa ka partikular nga dulot—ibutang ta, dulot sa pagpanudlo—ang isa ka gulang nga superyor sa iban? Wala gid! (1 Corinto 4:7) Sa pihak nga bahin, indi dapat hisaan ang dulot sang isa ukon magbatyag nga disangkol kon ang isa ka gulang ginkomendasyunan sang iban bangod sang iya ikasarang. Dumduma, ikaw mismo may mga dulot man nga nakita ni Jehova sa imo. Kag mabuligan niya ikaw sa pagpalambo sining mga dulot kag gamiton ini para sa kaayuhan sang imo kauturan.—Filipos 4:13.
‘Mangin Matinumanon kag Mangin Mapinasakupon’
10. Ngaa nagakaigo lamang nga magpabutyag kita sing apresasyon para sa “mga dulot nga mga tawo”?
10 Kon makabaton kita sing isa ka regalo, nagakaigo lamang nga magpabutyag kita sing apresasyon sa sini. “Ipakita ang inyo kaugalingon nga mapinasalamaton,” siling sang Colosas 3:15. Kamusta, naman, ang “mga dulot nga mga tawo,” ang hamili nga regalo nga ginhatag sa aton ni Jehova? Sa pagkamatuod, ginapasalamatan naton una sa tanan si Jehova, ang maalwan nga Manughatag sing Regalo. Apang kamusta naman ang “mga dulot nga mga tawo” mismo? Paano naton mapakita nga ginaapresyar naton sila?
11. (a) Paano kita makapakita sing apresasyon para sa “mga dulot nga mga tawo”? (b) Ano ang kahulugan sang mga ekspresyon nga “mangin matinumanon” kag “mangin mapinasakupon”?
11 Mapasundayag naton ang aton apresasyon sa “mga dulot nga mga tawo” paagi sa maabtik nga pagsunod sa ila napasad-sa-Biblia nga mga laygay kag mga desisyon. Ang Biblia nagalaygay sa aton: “Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag nga subong nga magahatag sila sing husay; agod nga himuon nila ini nga may kalipay kag indi nga may pagbakho, kay mangin makahalalit ini sa inyo.” (Hebreo 13:17) Talupangda nga dapat kita indi lamang “mangin matinumanon” kundi “mangin mapinasakupon” man sa mga nagapanguna. Ang Griegong tinaga para sa “mangin mapinasakupon” literal nga nagakahulugan sing “magpaidalom sa.” Subong komento sa mga ekspresyon nga “mangin matinumanon” kag “mangin mapinasakupon,” ang iskolar sa Biblia nga si R.C.H. Lenski nagasiling: “Ang isa nagatuman kon nagaugyon sia sa ginapahimo sa iya, nakumbinsi sa pagkatadlong kag pagkamapuslanon sini; ang isa nagapaidalom . . . kon tuhay ang iya opinyon.” Kon nahangpan naton kag nagaugyon kita sa ginasiling sang mga nagapanguna, mahimo nga madali kita magtuman. Apang ano kon wala naton nahangpan ang rason sang isa ka partikular nga desisyon?
12. Ngaa dapat kita mangin mapinasakupon, ukon mapainumuron, bisan pa kon wala naton nahangpan sing bug-os ang rason sa isa ka partikular nga desisyon?
12 Diri sini nga mahimo dapat kita mangin mapinasakupon, ukon mapainumuron. Ngaa? Una, dapat kita magsalig nga ining kalipikado sa espirituwal nga mga lalaki interesado gid sa aton labing maayo nga kaayuhan. Kay man, nahibaluan gid nila nga dapat sila maghatag sing husay kay Jehova sa mga karnero nga ginpaatipan sa ila. (Santiago 3:1) Dugang pa, dapat naton dumdumon nga mahimo wala naton nahibal-an ang tanan kompidensial nga mga kamatuoran nga nagdul-ong sa ila sa paghimo sing isa ka desisyon.—Hulubaton 18:13.
13. Ano ang makabulig sa aton agod mangin mapinasakupon kon tuhoy sa hudisyal nga mga desisyon sang mga gulang?
13 Kamusta naman ang pagkamapinasakupon tuhoy sa hudisyal nga mga desisyon? Matuod, mahimo nga indi ini mahapos, labi na kon ginhimo ang desisyon nga sikwayon (disfellowship) ang isa nga aton ginahigugma—isa ka paryente ukon isa ka suod nga abyan. Diri liwat, labing maayo gid nga magpaumod sa paghukom sang “mga dulot nga mga tawo.” Yara sila sa posisyon nga mangin kapin ka makatarunganon sangsa aton, kag mahimo nga nahibaluan nila ang kapin nga mga katunayan. Sa masami, nagasakit ang buot sining mga utod sa sini nga mga desisyon; ang ‘paghukom para kay Jehova’ isa ka serioso nga salabton. (2 Cronica 19:6) Nagapanikasog gid sila nga mangin maluluy-on, kay ginatandaan nila nga ang Dios “handa magpatawad.” (Salmo 86:5) Apang dapat man nila huptan ang kongregasyon nga matinlo, kag ginasugo sang Biblia nga sikwayon ang dimahinulsulon nga mga nakasala. (1 Corinto 5:11-13) Sa madamo nga kaso ginabaton mismo sang nakasala ang desisyon. Mahimo nga ang disiplina amo gid ang ginakinahanglan niya agod makamaradmad sia. Kon kita, nga iya mga hinigugma, mapinasakupon kon tuhoy sa desisyon, mahimo nga mabuligan naton sia nga makabenepisyo gikan sa disiplina.—Hebreo 12:11.
“Hatagi Sila sing Labi Pa sa Dikinaandan nga Patugsiling”
14, 15. (a) Suno sa 1 Tesalonica 5:12, 13, ngaa takus sang aton patugsiling ang mga gulang? (b) Ngaa sarang masiling nga ang mga gulang ‘nagapangabudlay sing lakas sa tunga naton’?
14 Mapakita man naton ang aton apresasyon sa “mga dulot nga mga tawo” paagi sa paghatag sa ila sing patugsiling. Sang magsulat sa kongregasyon sa Tesalonica, ginlaygayan ni Pablo ang mga katapo sini: “Tahaa ninyo ang mga nagapangabudlay sing lakas sa tunga ninyo kag nagadumala sa inyo sa Ginuo kag nagalaygay sa inyo; kag . . . hatagi sila sing labi pa sa dikinaandan nga patugsiling sa gugma bangod sang ila hilikuton.” (1 Tesalonica 5:12, 13) “Nagapangabudlay sing lakas”—wala bala sini ginalaragway ang mahugod nga mga gulang nga dimakagod nga nagahatag sang ila kaugalingon para sa aton? Binagbinaga, sa makadali, ang mabug-at nga lulan nga ginadala sining mahal nga mga utod.
15 Sa madamo nga kaso, de-pamilya sila nga mga lalaki nga dapat magtrabaho agod may iaman para sa ila mga pamilya. (1 Timoteo 5:8) Kon ang gulang may mga anak, kinahanglan sining mga kabataan ang tion kag igtalupangod sang ila amay. Ayhan dapat niya buligan sila sa ila mga hilimuon para sa ila pag-eskwela, kag mag-iskedyul man sing pila ka tion upod sa ila agod magamit nila ang ila kapagsik sang pagkapamatan-on sa mapuslanon nga mga paglingawlingaw. (Manugwali 3:1,4) Labing importante, ginaatipan niya ang espirituwal nga mga kinahanglanon sang iya pamilya, regular nga nagadumala sang pagtuon sa Biblia subong pamilya, nagapangabudlay upod sa ila sa pag-alagad sa latagon, kag ginadala sila sa Cristianong mga miting. (Deuteronomio 6:4-7; Efeso 6:4) Indi naton dapat kalipatan nga wala labot sa sining mga salabton nga kinaandan para sa madamo sa aton, may dugang pa nga mga katungdanan ang mga gulang: paghanda para sa mga bahin sa miting, mga pagduaw subong manugbantay, pag-atipan sa espirituwal nga kaayuhan sang kongregasyon kag, kon kinahanglan, pag-uyat sing hudisyal nga mga kaso. Ang iban may ekstra nga salabton may kaangtanan sa sirkito nga mga asambleya, distrito nga mga kombension, pagpatindog sing Kingdom Hall, kag sa Hospital Liaison Committees. Sa pagkamatuod, ini nga mga utod “nagapangabudlay sing lakas”!
16. Ilaragway ang mga paagi nga makapakita kita sing patugsiling para sa mga gulang.
16 Paano naton sila mapakitaan sing patugsiling? Subong sang ginasiling sang isa ka hulubaton sa Biblia: “Ang pulong sa nagakaigo nga tion O daw ano kaayo!” (Hulubaton 15:23; 25:11) Gani mapakita sa ila sang mga pulong sang sinsero nga apresasyon kag pagpalig-on nga wala naton ginapasapayanan ang ila pagpangabudlay sing lakas. Subong man, dapat kita mangin rasonable sa aton ginapaabot sa ila. Sa isa ka bahin, indi kita dapat mangalag-ag sa pagpalapit sa ila agod mangayo sing bulig. Ayhan may mga tion nga ‘ang aton tagipusuon masakit sing tama’ kag nagakinahanglan kita sing Makasulatanhon nga pagpalig-on, tuytoy, ukon laygay gikan sa ila nga “kalipikado sa pagtudlo” sang Pulong sang Dios. (Salmo 55:4; 1 Timoteo 3:2) Sa amo man nga tion, dapat naton dumdumon nga ang isa ka gulang indi makahatag sa aton sing daku nga tion, kay indi niya dapat patumbayaan ang mga kinahanglanon sang iya kaugalingon nga pamilya ukon sang iban pa sa kongregasyon. Subong pagpakita sing “pagkamahinuklugon” sa sining mapisan nga mga utod, indi naton luyag mangin dirasonable sa aton mga ginapaabot gikan sa ila. (1 Pedro 3:8) Sa baylo, mangin mainapresyahon kita sa bisan anong tion kag igtalupangod nga mahatag nila sa aton sing makatarunganon.—Filipos 4:5.
17, 18. Ano nga mga sakripisyo ang ginahimo sang madamo nga asawa nga ang ila bana mga gulang, kag paano naton mapakita nga wala naton ginapasapayanan ining matutom nga mga utod nga babayi?
17 Kamusta naman ang mga asawa sang mga gulang? Indi bala takus man sila sang aton patugsiling? Kay man, ginapaambit nila ang ila mga bana sa kongregasyon. Masami nga nagakinahanglan ini sing mga sakripisyo sa ila bahin. Kon kaisa, ang mga inoras sang kagab-ihon nga dapat kuntani ihinguyang sang mga gulang upod sa ila mga pamilya dimalikawan nga ginahinguyang nila sa pag-atipan sang mga butang sang kongregasyon. Sa madamo nga kongregasyon kinabubut-on nga ginahimo sang matutom nga Cristianong mga babayi ini nga mga sakripisyo agod maatipan sang ila bana ang mga karnero ni Jehova.—Ipaanggid ang 2 Corinto 12:15.
18 Paano naton mapakita nga wala naton ginapasapayanan ining matutom nga Cristianong mga utod nga babayi? Sa pagkamatuod indi paagi sa dirasonable nga pagkuha naton sang tion kag igtalupangod sang ila bana. Apang indi man naton pagkalipatan ang gahom sang simple nga mga pulong sang pag-apresyar. Ang Hulubaton 16:24 nagasiling: “Ang matahom nga mga pulong subong sang uludlan sang dugos, matam-is sa kalag kag ikaayo sa mga tul-an.” Binagbinaga ang isa ka eksperiensia. Pagkatapos sang isa ka Cristianong miting, nagpalapit ang isa ka mag-asawa sa isa ka gulang kag nangabay nga makighambal sa iya tuhoy sa ila tin-edyer nga anak nga lalaki. Samtang nagapakighambal ang gulang sa mag-asawa, mapailubon nga naghulat ang asawa. Pagkatapos sadto, nagpalapit ang iloy sa asawa sang gulang kag nagsiling: “Luyag ko pasalamatan ikaw sa tion nga ginhinguyang sang imo bana sa pagbulig sa akon pamilya.” Yadtong simple, matam-is nga mga pulong sang pag-apresyar nagtandog gid sa tagipusuon sadtong asawa sang gulang.
19. (a) Ang mga gulang, subong isa ka grupo, matutom nga nagatuman sang ano nga mga tulumuron? (b) Ano dapat ang determinado kita tanan nga himuon naton?
19 Ang pag-aman sing mga gulang agod mag-atipan sa mga karnero isa sang ‘maayong mga dulot’ ni Jehova. (Santiago 1:17) Indi, ini nga mga tawo indi himpit; kaangay naton tanan, nagasayop sila. (1 Hari 8:46) Apang, subong isa ka grupo, ang mga gulang sa mga kongregasyon sa bug-os nga kalibutan matutom nga nagatuman sang mga tulumuron nga ginahunahuna ni Jehova para sa ila—nga amo, ang pagpasibu, pagpalig-on, pagpahiusa, kag pag-amlig sa panong. Kabay nga mamat-od ang tagsa ka gulang nga padayunon ang pag-atipan sa mga karnero ni Jehova sing mapinalanggaon, paagi sa amo ginapamatud-an ang iya kaugalingon nga isa ka dulot, ukon pagpakamaayo, sa iya kauturan. Kag mangin determinado kita tanan nga magpakita sang aton apresasyon para sa “mga dulot nga mga tawo” paagi sa pagtuman kag pagpasakop sa ila kag paagi sa pagpakita sa ila sing patugsiling bangod sang ila lakas nga pagpangabudlay. Nagapasalamat gid kita nga si Jehova mahigugmaon nga nag-aman sing mga lalaki nga daw subong bala nga nagasiling sa iya mga karnero: ‘Hilikuton namon nga buligan kamo sa pag-alagad sa Dios nga may kalipay’!
Paano Mo Dapat Sabton?
◻ Ngaa nagakaigo nga mapaanggid ang kongregasyon sa isa ka lawas?
◻ Paano ang mga gulang makabulig sa ila kauturan sa pag-alagad kay Jehova nga may kalipay?
◻ Ngaa dapat kita indi lamang mangin matinumanon kundi mapinasakupon man sa mga nagapanguna?
◻ Sa anong mga paagi makapakita kita sing patugsiling sa mga gulang?
[Laragway sa pahina 16]
Mga gulang, hatagi sing komendasyon ang iban bangod sang ila bug-os kalag nga mga panikasog
[Laragway sa pahina 17]
Paagi sa ila makugi nga huwaran sa ministeryo, makabulig ang mga gulang sa mga katapo sang pamilya kag sa iban pa sa pag-alagad nga may kalipay
[Mga laragway sa pahina 18]
Dapat naton apresyahon ang aton mapisan nga mga gulang!