Magkasadya kay Jehova kag Magmalipayon

ANG madinalag-on nga pagkahuman sang bisan anong mapuslanon nga proyekto isa pirme ka tion sang kasadya. Ang gradwasyon nga ginhiwat sang Marso 13, 1999, sa Watchtower Educational Center sa Patterson, ­New York, amo gid sini nga okasyon para sa 48 ka estudyante sang ika-106 nga klase sang Watchtower Bible School of Gilead.

Ang nagabukas nga komento ni Theodore Jaracz, nga katapo sang Nagadumala nga Hubon, gradwado sang ikapito nga klase sang Gilead, kag tsirman sang programa sang gradwasyon, nagpadaku sang pinamulong sang Salmo 32:​11: “Magkasadya kay Jehova kag magmalipayon, kamo nga mga matarong.” Nagapaathag kon ngaa nagakaigo para sa tanan nga magkasadya sa sini nga okasyon, sia nagsiling: “Bangod sang ginahimo ni Jehova sa mga matadlong sa tagipusuon, lakip ang aton mga estudyante sa Gilead, nga nagakasadya kita sa mga okasyon subong sini.” Walay sapayan nga ang mga estudyante naghimo sing mga plano nga makatuon sa Eskwelahan sang Gilead kag nagpanikasog sing makugi agod mangin kalipikado sa misyonero nga pag-alagad, si Jehova amo ang isa nga nagpaposible sang tanan agod matapos ini sing madinalag-on. (Hulubaton 21:5; 27:1) Amo ina, pagpadaku ni Brother Jaracz, ang rason para “magkasadya kay Jehova.”

Lakip sa mga nagtambong sa awditoryom sa Patterson amo ang mga katapo sang pamilya kag mga bisita sang mga estudyante nga nagkari gikan sa 12 ka pungsod agod saksihan ining makalilipay nga hitabo. Samtang ginahulat sang 5,198 nga nagtambong—lakip ang mga katapo sang panimalay Bethel sa Brooklyn, ­Patterson, kag Wallkill, nga ginkonektar paagi sa audio kag video—ang programa nga magasunod, maathag gid nga ang makalilipay nga espiritu nagapangibabaw.

Ginlaygayan nga Huptan ang Malipayon nga Espiritu

Sa paghinakop ni Brother Jaracz sang iya nagabukas nga komento, ginpakilala niya ang nahauna sa lima ka humalambal, nga naghanda sing makapalig-on nga mga laygay gikan sa Kasulatan indi lamang para sa mga gradwado sang Gilead kundi sa tanan man nga nagtambong.

Ang una nga nagpamulongpulong amo si William Malenfant, gradwado sang ika-34 nga klase sang ­Gilead, nga nagaalagad karon subong kabulig sa Teaching Committee sang Nagadumala nga Hubon. May kaangtanan sa iya tema nga “‘Ang Tanan nga Butang’ Indi Walay Pulos!” pasad sa Manugwali 1:​2, ginpautwas niya ang pamangkot: “Buot gid bala silingon ni Solomon nga ang tanan nga butang, sa bug-os nga kahulugan sang tinaga, walay pulos?” Ang sabat: “Indi. Ginpakita niya nga ang tanan nga hinimuan sang tawo nga wala nagasapak kon ano ang kabubut-on sang Dios, ang mga paghimud-os nga supak sa kabubut-on sang Dios—ini tanan nga butang walay pulos.” Sa kabaliskaran, ang pagsimba sa matuod nga Dios, nga si Jehova, indi walay pulos; ukon ang pagtuon man sa Pulong sang Dios, ang Biblia, kag ang pagtudlo sini sa iban. Wala ginakalimtan sang Dios ini nga mga panikasog sang iya mga alagad. (Hebreo 6:10) Sa katunayan, bisan pa mahanabo ang kalamidad sa mga ginakahamut-an sang Dios, sila “bugkuson sa binugkos sang kabuhi upod kay Jehova.” (1 Samuel 25:29) Daw ano ka makalilipay nga panghunahuna! Ang pagdumdom sini nga mga punto makabulig sa tanan nga sumilimba ni Jehova nga huptan ang malipayon nga espiritu.

Si John Barr, nga katapo sang Nagadumala nga Hubon, nagpalig-on sa manuggradwar nga klase paagi sa iya pamulongpulong nga “Magkalipay sa Inyo Misyonero nga Asaynment.” Ginpakita niya nga ang misyonero nga pag-alagad isa ka butang nga malapit gid pirme sa tagipusuon ni Jehova nga Dios. “Isa ini ka butang nga bahin gid sang pagpahayag ni Jehova sing gugma sa kalibutan. Ginpadala niya ang iya bugtong nga Anak sa sining duta. Si Jesus amo ang labing bantog nga misyonero, ang nagapanguna nga misyonero.” Walay sapayan nga mapamalandungan sang mga gradwado ang mga pagbag-o nga ginhimo ni Jesus agod magmadinalag-on sa iya asaynment sa duta, ang mga benepisyo sang misyonero nga pag-alagad ni Jesus matigayon gihapon sang tanan nga magahimulos sa sini. Ini bangod, subong sang ginpakita ni Brother Barr, nalipay si Jesus sa paghimo sa hilikuton sang Dios, kag palangga man niya ang mga anak sang katawhan. (Hulubaton 8:30,31) Ginlaygayan ni Brother Barr ang mga gradwado nga magpabilin sa ila mga asaynment, indi lamang subong isa ka pagbatas, kundi bangod nalipay sila nga himuon ini. “Magsalig kay Jehova; indi niya kamo pagpaslawon,” pangabay niya sa klase.—Salmo 55:22.

“Nagalakat sa Ngalan ni Jehova sa Walay Katubtuban” amo ang tema nga napili sang masunod nga humalambal, nga si Lloyd Barry, isa pa ka katapo sang Nagadumala nga Hubon. Nag-alagad anay subong misyonero sa kapin sa 25 ka tuig sa Japan pagkagradwar sa ika-11 nga klase sang ­Gilead, si Brother Barry nagsaysay sing pila ka eksperiensia sang mga misyonero sang una kag ginlaragway niya ang mga hangkat nga gin-atubang nila. Ano ang iya praktikal nga laygay para sa manuggradwar nga klase? “Labaw sa tanan, hupti ang inyo espirituwalidad. Subong man, tun-i ang hambal kag kultura. Hupti ang inyo pagkamasinadyahon. Kag magpabilin sa hilikuton; indi malapyo ukon mag-untat.” Ginsilingan ni Brother Barry ang mga gradwado nga sa ila mga asaynment sa luwas sang pungsod, masumalang nila ang madamo nga tawo nga nagalakat sa ngalan sang nanarisari nga mga dios kag mga diosdios, kag ginpahanumdom niya sila sang pinamulong ni Miqueas: “Ang tanan nga katawhan, sa ila bahin, magalakat ang tagsa sa ngalan sang ila dios; apang kita, sa aton bahin, magalakat sa ngalan ni Jehova nga aton Dios tubtob sa tion nga walay latid, tubtob sa walay katubtuban.” (Miqueas 4:5) Ang halimbawa sang mga misyonero anay isa gid ka makusog nga pangpahulag para sa tanan nga alagad sang Dios nga magpadayon sa paglakat sa ngalan ni Jehova kag sa pag-alagad sa iya sing matutom.

Ang masunod sa programa amo ang instruktor sa Gilead nga si Lawrence Bowen. Ang tema sang iya presentasyon nagpautwas sing pamangkot, “Mangin Ano Kamo?” Ginpakita niya nga ang kadalag-an sa pag-alagad sa Dios nagasandig sa pagtuo kag pagsalig kay Jehova. Ang bug-os nga pagsalig kay Jehova naghatag kay Hari Asa sing daku nga kadalag-an kontra sa kaaway nga hangaway nga may isa ka milyon ka tinawo. Apang ginpahanumdom sia ni manalagna Azarias tuhoy sa pagkakinahanglanon sang padayon nga pagsalig sa Dios: “Si Jehova magaupod sa inyo tubtob pamatud-an ninyo nga kaupod ninyo sia.” (2 Cronica 14:9-12; 15:1,2) Sanglit ang ngalan sang Dios, nga Jehova, nagapaalinton sing panghunahuna nga sia mangin kon ano ang kinahanglanon agod matuman ang iya katuyuan—nagakahulugan man ina nga mangin isa ka Manug-aman, Manug-amlig, ukon Manuglaglag pa gani—ang mga misyonero nga nagasalig kay Jehova kag nagapanghikot nahisuno sa iya katuyuan magamadinalag-on sa ila mga asaynment. (Exodo 3:14) “Indi ninyo pagkalimti,” hinakop ni Brother Bowen, “nga tubtob ginahimo ninyo ang katuyuan ni Jehova nga inyo katuyuan, buligan niya kamo nga mangin kon ano ang kinahanglanon agod matuman ang inyo asaynment.”

Ang katapusan nga humalambal sa sini nga bahin sang programa amo si Wallace Liverance, misyonero anay kag registrar karon sang eskwelahan. Ang iya diskurso, nga natig-uluhan “Hupti ang Pulong Sang Dios nga Buhi kag Nagapanghikot sa Inyo,” nagpatalupangod sang wala nagakapaslawan nga mensahe, ukon saad, sang Dios nga pirme nagaabante tubtob sa katumanan. (Hebreo 4:12) Ginaimpluwensiahan sini ang kabuhi sadtong nagapaimpluwensia sa sini. (1 Tesalonica 2:13) Paano ina nga pulong mahuptan nga buhi kag nagapanghikot sa aton kabuhi? Paagi sa maukod nga pagtuon sa Biblia. Ginpahanumdom ni Brother Liverance ang mga gradwado tuhoy sa mga paagi sang pagtuon sa Biblia nga natun-an sa Gilead nga naglakip sang pagbasa kag pagtuon sa kahulugan kag aplikasyon sang Pulong sang Dios. Ginbalikwat niya ang pinamulong ni Albert Schroeder, isa ka katapo sang Nagadumala nga Hubon nga nag-alagad subong tsirman sang komite nga nagtukod sang Eskwelahan sang Gilead sang nagligad nga kapin sa 50 ka tuig: “Paagi sa paggamit sa konteksto, matigayon sang isa ang bug-os, sibu, espirituwal nga puwersa nga ginapaposible sang Dios nga matigayon sa iya Pulong.” Ini nga paagi sang pagtuon sa Biblia nagahupot sa Pulong sang Dios nga buhi kag nagapanghikot.

Makalilipay nga mga Eksperiensia kag mga Interbyu

Pagkatapos sang mga pamulongpulong, ang mga tumalambong nakabati sing pila ka makalilipay nga mga eksperiensia gikan sa mga estudyante. Sa idalom sang pagdumala ni Mark Noumair, misyonero anay kag instruktor karon sa Gilead, ginsaysay kag ginpasundayag sang isa ka grupo sang mga estudyante kon paano sila nanikasog nga makapanaksi sa lainlain nga mga kahimtangan. Ang iban nakasugod kag nakadumala sing mga pagtuon sa Biblia upod sa mga tawo sa teritoryo paagi sa pagpanilag sa ila mga kahimtangan kag mga ekspresyon kag paagi sa pagpakita sing personal nga interes. Sa amo ang mga estudyante ‘naghatag sing dalayon nga igtalupangod sa ila kaugalingon kag sa ila panudlo’ kag interesado gid sa pagbulig sa iban nga makatigayon sing kaluwasan.—1 Timoteo 4:16.

Madamong praktikal nga mga panugda ang ginhatag, kag ang kalipay sang misyonero nga pag-alagad ginpakita man sang pila ka eksperiensiado nga mga kauturan nga nakabaton sing paghanas sa eskwelahan para sa mga katapo sang komite sang sanga nga ginhiwat sa Watchtower Educational Center. Sanday Brother Samuel Herd kag Robert Johnson nga katapo sang ulong-talatapan nag-interbyu sing mapagsik sa mga tiglawas sang sanga talatapan sang Sosiedad sa Bolivia, Zimbabwe, Nicaragua, Central ­African Republic, Dominican Republic, Papua New Guinea, kag Cameroon.

Pagkatapos sang mga eksperiensia kag mga interbyu, si Gerrit Lösch, gradwado sang ika-41 nga klase sang Gilead kag katapo karon sang Nagadumala nga Hubon, naghatag sing katapusan nga pamulongpulong sa makapahunahuna nga tema nga “Ikaw Bala Isa ka ‘Kalahamut-an nga Tawo’?” Ginpahanumdom anay ni Brother Lösch ang mga manuggradwar nga si Jesus, ang himpit nga Anak sang Dios, wala ginkabig nga kalahamut-an sang mga tawo, kundi “gintamay sia kag ginlikawan sang mga tawo.” (Isaias 53:3) Gani indi makapakibot nga sa karon sa madamo nga bahin sang kalibutan, ang mga misyonero ginatamod subong persona non grata, personal nga indi kalahamut-an ukon wala ginaabiabi. Sa pihak nga bahin, sa iya malawig nga tinuig nga pag-alagad sa Babilonia, paagi sa isa ka anghel si Daniel makatlo nga gintawag sang Manunuga nga “nahamut-an sing daku.” (Daniel 9:​23; 10:11, 19) Ano ang nagbulig kay Daniel nga mangin amo sina? Wala gid niya ginkompromiso ang mga prinsipio sang Biblia sang nagapasibu sa kultura sa Babilonia; bunayag sia sa tanan nga paagi, wala gid gingamit ang iya posisyon para sa personal nga kaayuhan; kag isa sia ka maukod nga estudyante sang Pulong sang Dios. (Daniel 1:8, 9; 6:4; 9:2) Nangamuyo man sia sing tayuyon kay Jehova kag pirme handa sa paghimaya sa Dios sa iya mga hinimuan. (Daniel 2:20) Paagi sa pagsunod sa halimbawa ni Daniel, ang mga alagad sang Dios sarang mapamatud-an nga kalahamut-an, indi gid man sa kalibutan, kundi kay Jehova nga Dios.

Sa paghinakop sang makapapagsik sa espirituwal nga programa, ginbasa sang tsirman ang pila sa mga telegrama kag mga mensahe nga naghalin sa bug-os nga kalibutan. Nian, ang tagsa sang 24 ka mag-asawa nagbaton sang ila mga diploma, kag ginpahibalo ang pungsod kon diin sila ipadala. Sa katapusan, ginbasa sang tiglawas sang klase ang isa ka sulat para sa Nagadumala nga Hubon kag sa panimalay Bethel, nga nagapabutyag sang pagpasalamat sang klase tungod sa paghanas kag sa paghanda nga nabaton nila sa nagligad nga lima ka bulan.

Sang matapos ang programa, “ang pagkasadya nga may pagpasalamat pa gani” mabatian sa tunga sang nagpalauli nga kadam-an.—Nehemias 12:27.

[Kahon sa pahina 27]

Estadistika Sang Klase

Kadamuon sang pungsod nga gintiglawas: 10

Kadamuon sang pungsod nga ginpadalhan: 19

Kadamuon sang estudyante: 48

Kadamuon sang mag-asawa: 24

Promedyo nga edad: 33

Promedyo nga tinuig sa kamatuoran: 16

Promedyo nga tinuig sa bug-os tion nga ministeryo: 13

[Laragway sa pahina 25]

Ika-106 nga Naggradwar nga Klase Sang Watchtower Bible School of Gilead

Sa listahan sa ubos, ang mga idas nanumeruhan halin sa atubang pa likod, kag ang mga ngalan nalista halin sa wala pa tuo sa tagsa ka idas.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.