Paano Mabag-o ni Jesus ang Imo Kabuhi?
SI Jesucristo isa ka Daku nga Manunudlo nga nagkabuhi sa Palestina sang halos 2,000 ka tuig nga nagligad. Diutay lamang ang nahibaluan tuhoy sa iya pagkabata. Apang, napamatud-an nga sang mga 30 anyos ang iya edad, ginsugdan niya ang iya ministeryo sa “pagpanaksi sa kamatuoran.” (Juan 18:37; Lucas 3:21-23) Ang apat ka disipulo nga nagsulat sang kasaysayan sang iya kabuhi nagpatalupangod labi na sa tatlo kag tunga ka tuig nga nagsunod.
Sa tion sang iya ministeryo, naghatag si Jesus sing isa ka sugo sa iya mga disipulo nga mahimo mangin bulong kontra sa madamo nga balatian sang kalibutan. Ano yadto? Si Jesus nagsiling: “Ako nagahatag sa inyo sing bag-ong sugo, nga higugmaon ninyo ang isa kag isa; subong nga ako naghigugma sa inyo, nga higugmaon man ninyo ang isa kag isa.” (Juan 13:34) Huo, ang solusyon sa madamo nga problema sang katawhan amo ang gugma. Sa isa pa ka okasyon, sang ginpamangkot si Jesus kon ano nga kasuguan ang labing daku, sia nagsabat: “‘Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang labing daku kag nahauna nga sugo. Ang ikaduha, kaangay sini, amo, ‘Higugmaa ang imo isigkatawo subong sa imo kaugalingon.’”—Mateo 22:37-40.
Ginpakita ni Jesus sa aton paagi sa mga pulong kag mga buhat kon paano higugmaon ang Dios kag ang mga isigkatawo. Binagbinagon naton ang pila ka halimbawa kag tan-awon kon ano ang aton matun-an sa iya.
Ang Iya mga Panudlo
Sa isa sang bantog gid nga mga sermon sa maragtas, ginsilingan ni Jesucristo ang iya mga sumulunod: “Wala sing bisan sin-o ang mahimo nga makaalagad sa duha ka agalon; kay magadumot sia sa isa kag magahigugma sa isa pa, ukon magaunong sia sa isa kag magatamay sa isa pa. Indi kamo mahimo nga makaalagad sa Dios kag sa Manggad.” (Mateo 6:24) Ang panudlo bala ni Jesus tuhoy sa pag-una sa Dios sa aton kabuhi praktikal gihapon karon, bisan pa madamo kaayo nga tawo ang nagapati nga ginalubad sang kuwarta ang tanan nga problema? Matuod, kinahanglan naton ang kuwarta agod mabuhi. (Manugwali 7:12) Apang, kon tugutan naton nga mangin agalon naton ang “Manggad,” “ang gugma sa kuwarta” magakontrol sa aton, sa amo nagadominar sang aton bug-os nga kabuhi. (1 Timoteo 6:9,10) Madamo sang nahulog sa sini nga siod ang nadulaan sang ila pamilya, sang ila maayong lawas, kag bisan gani sang ila mismo kabuhi.
Sa pihak nga bahin, ang pagdangop sa Dios subong aton Agalon nagahatag sing kahulugan sa kabuhi. Subong Manunuga, sia ang Ginhalinan sang kabuhi, kag sa amo, sia lamang ang takus naton simbahon. (Salmo 36:9; Bugna 4:11) Ang mga nakatuon tuhoy sa iya mga kinaiya kag nagahigugma sa iya napahulag sa pagtuman sa iya mga kasuguan. (Manugwali 12:13; 1 Juan 5:3) Makabenepisyo kita mismo sa paghimo sini.—Isaias 48:17.
Sa Sermon sa Bukid, gintudluan man ni Jesus ang iya mga disipulo kon paano magpakita sing gugma sa mga isigkatawo. Sia nagsiling: “Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” (Mateo 7:12) Ang tinaga nga “mga tawo” nga gingamit diri ni Jesus nagalakip bisan sa mga kaaway sang isa. Sa amo gihapon nga sermon, sia nagsiling: “Padayon nga higugmaa ang inyo mga kaaway kag ipangamuyo ang mga nagahingabot sa inyo.” (Mateo 5:43,44) Indi bala malubad sini nga gugma ang madamo nga problema nga ginaatubang naton karon? Amo sini ang panghunahuna sang Hindu nga lider nga si Mohandas Gandhi. Ginkutlo sia nga nagasiling: “Kon mag-ugyunay [kita] sa mga panudlo nga ginpamulong ni Cristo sa sining Sermon sa Bukid, malubad naton ang mga problema . . . sang bug-os nga kalibutan.” Ang mga panudlo ni Jesus tuhoy sa gugma, kon iaplikar, makapaayo sang madamo nga balatian sang katawhan.
Ang Iya mga Binuhatan
Wala lamang magtudlo si Jesus sing madamo nga kamatuoran tuhoy sa kon paano ipakita ang gugma kundi ginbuhat man niya ang iya gintudlo. Halimbawa, gin-una niya ang mga kaayuhan sang iban sangsa iya kaugalingon. Sang isa ka adlaw, masako gid si Jesus kag ang iya mga disipulo sa pagbulig sa mga tawo amo nga wala gani sila sing tion sa pagkaon. Nakita ni Jesus nga kinahanglan magpahuway sing diutay ang iya mga disipulo, kag gindala niya sila sa isa ka baw-ing nga duog. Apang sang pag-abot nila didto, nakita nila ang isa ka daku nga kadam-an nga nagahulat sa ila. Ano ang himuon mo kon makita mo ang isa ka kadam-an nga nagapaabot sa imo nga magtrabaho samtang ginabatyag mo nga kinahanglan mo nga magpahuwayhuway? Bueno, “naluoy [si Jesus] sa ila” kag “nagsugod sa pagtudlo sa ila sing madamong butang.” (Marcos 6:34) Ining pagkabalaka sa iban nagpahulag pirme kay Jesus nga buligan sila.
Wala lamang gintudluan ni Jesus ang mga tawo. Naghatag man sia sing praktikal nga bulig. Halimbawa, sa isa ka okasyon ginpakaon niya ang kapin sa 5,000 ka tawo nga nagpamati sa iya tubtob sa hapon. Wala magdugay pagkatapos sadto, ginpakaon niya ang isa pa ka daku nga kadam-an—sa sining tion kapin sa 4,000—nga nagpamati sa iya sa sulod sang tatlo ka adlaw kag nawad-an sing kalan-on. Sa nauna nga okasyon, naggamit sia sing lima ka bilog nga tinapay kag duha ka isda, kag sa naulihi, pito ka bilog nga tinapay kag pila ka magamay nga isda. (Mateo 14:14-22; 15:32-38) Mga milagro? Huo, naghimo sia sing mga milagro sadto.
Gin-ayo man ni Jesus ang madamo nga balatianon. Gin-ayo niya ang mga bulag, mga piang, mga aruon, kag ang mga bungol. Ginbanhaw pa gani niya ang mga patay! (Lucas 7:22; Juan 11:30-45) Isa ka bes nakitluoy sa iya ang isa ka aruon: “Kon luyag mo lang, matinluan mo ako.” Ano ang reaksion ni Jesus? “Sa sina naluoy sia, kag gin-untay niya ang iya kamot kag gintandog sia, kag nagsiling sa iya: ‘Luyag ko. Magmatinlo ka.’” (Marcos 1:40,41) Paagi sa sining mga milagro, ginpakita ni Jesus ang iya gugma sa mga nagaantos.
Ginabudlayan ka bala magpati sa mga milagro ni Jesus? Ang iban ginabudlayan. Apang, dumduma nga ginhimo ni Jesus ang iya mga milagro sa publiko. Bisan gani ang mga nagapamatok sa iya, nga nagtinguha sa pagpangita sing sayop sa iya sa tanan nga higayon, indi makapanghiwala nga naghimo sia sing mga milagro. (Juan 9:1-34) Dugang pa, ang iya mga milagro may katuyuan. Nakabulig ini sa mga tawo agod makilala sia subong ang Isa nga ginpadala sang Dios.—Juan 6:14.
Sa paghimo sing mga milagro wala si Jesus nagtinguha nga hatagan sing atension ang iya kaugalingon. Sa baylo, ginhimaya niya ang Dios, ang Ginhalinan sang iya gahom. Isa ka bes sa Capernaum, didto sia sa isa ka balay nga puno sing tawo. Luyag sang isa ka paralitiko nga ayuhon sia apang indi sia makasulod. Gani gintunton sia sang iya mga abyan nga nagahigda sa teheras paagi sa atop. Sang nakita ang ila pagtuo, gin-ayo ni Jesus ang paralitiko. Subong resulta, ang mga tawo “naghimaya sa Dios” kag nagsiling: “Wala pa gid kami makakita sing kaangay sini.” (Marcos 2:1-4, 11,12) Ang mga milagro ni Jesus naghatag sing kadayawan kay Jehova, nga iya Dios, kag nagbulig sa mga nagkinahanglan.
Apang, ang milagruso nga pagpang-ayo sa mga masakiton indi ang panguna nga bahin sang ministeryo ni Jesus. Ang isa nga nagsulat sang kasaysayan sang kabuhi ni Jesus nagpaathag: “Ginsulat ini agod magtuo kamo nga si Jesus amo ang Cristo nga Anak sang Dios, kag nga, bangod sa pagtuo, mahimo kamo makatigayon sing kabuhi paagi sa iya ngalan.” (Juan 20:31) Huo, nagkari si Jesus sa duta agod ang nagatuo nga mga tawo mahimo makatigayon sing kabuhi.
Ang Iya Halad
‘Si Jesus nagkari sa duta?’ ayhan ipamangkot mo. ‘Diin sia naghalin?’ Si Jesus mismo nagsiling: “Nagkari ako gikan sa langit, indi sa paghimo sang akon kabubut-on, kundi sang kabubut-on sang nagpadala sa akon.” (Juan 6:38) Nagkabuhi na sia antes nangin tawo subong ang bugtong nga Anak sang Dios. Ano nian ang kabubut-on sang Isa nga nagpadala sa iya sa duta? “Ginhigugma gid sang Dios ang kalibutan sa bagay nga ginhatag niya ang iya bugtong nga Anak,” siling ni Juan, isa sang mga manunulat sang Ebanghelyo, “agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Paano ini nangin posible?
Ginapahayag sang Biblia kon ngaa indi malikawan sang katawhan ang kamatayon. Ang unang tawhanon nga mag-asawa nakabaton sing kabuhi gikan sa Dios nga may paglaum nga mabuhi sing dayon. Apang, ginpili nila nga magrebelde sa ila Manunuga. (Genesis 3:1-19) Bangod sini nga buhat, ang una nga sala sang tawo, napanubli sang kaanakan nanday Adan kag Eva ang wala maluyagan nga palanublion nga kamatayon. (Roma 5:12) Agod mahatagan ang katawhan sing matuod nga kabuhi, dapat dulaon ang sala kag kamatayon.
Wala sing sientipiko nga makadula sang kamatayon paagi sa pila ka sahi sang genetic engineering. Apang, ang Manunuga sang katawhan may paagi sa pagdala sang matinumanon nga mga tawo sa kahimpitan agod mabuhi sila sing dayon. Sa Biblia ini nga aman ginatawag nga gawad. Ginbaligya sang unang tawhanon nga mag-asawa ang ila kaugalingon kag ang ila kaanakan sa pagkaulipon sa sala kag kamatayon. Ginbaylo nila ang kabuhi subong himpit nga mga tawo nga matinumanon sa Dios sa kabuhi nga hilway sa Dios, sa amo nagahimo sang ila mga desisyon sa kon ano ang husto kag sayop. Agod mabakal liwat ang himpit tawhanon nga kabuhi, isa ka bili ang dapat ibayad nga katumbas sa himpit tawhanon nga kabuhi nga gindula sang aton una nga mga ginikanan. Bangod nakapanubli sing dikahimpitan, ang mga tawo indi kalipikado sa paghatag sining bili. —Salmo 49:7.
Gani nagpasilabot si Jehova nga Dios sa pagbulig. Ginliton niya ang himpit nga kabuhi sang iya bugtong nga Anak sa taguangkan sang isa ka ulay, nga nagbun-ag kay Jesus. Sang nagligad nga mga dekada, ayhan ginasikway mo ang ideya tuhoy sa pagkabun-ag sa ulay. Apang, sa karon, ang mga sientipiko naka-clone sing mga mamalya kag nakasaylo sing mga gene halin sa isa ka sapat pakadto sa isa pa. Sin-o, nian, ang makatarunganon nga makaduhaduha sa ikasarang sang Manunuga sa indi paggamit sing kinaandan nga proseso sang pagpanganak?
Bangod sang pagluntad sang himpit tawhanon nga kabuhi, matigayon na ang bili sa pagtubos sa katawhan gikan sa sala kag kamatayon. Apang, ang lapsag nga natawo sa duta nga si Jesus dapat magdaku nga mangin “manugbulong” nga makahatag sing “bulong” sa pag-ayo sa mga balatian sang katawhan. Ginhimo niya ini paagi sa pagkabuhi nga himpit kag wala sing sala. Wala lamang nakita ni Jesus ang kalisang sang katawhan sa idalom sang sala kundi nakaeksperiensia sia sing pisikal nga mga limitasyon subong isa ka tawo. Bangod sini nangin labi pa sia ka maawaon nga manugbulong. (Hebreo 4:15) Ang milagruso nga mga pagpang-ayo nga ginhimo niya sang nagkabuhi sia sa duta nagpamatuod nga sia may handum kag gahom sa pag-ayo sa mga masakiton.—Mateo 4:23.
Pagkatapos sang tatlo ka tuig kag tunga nga ministeryo diri sa duta, ginpatay si Jesus sang iya mga kaaway. Ginpakita niya nga ang isa ka himpit nga tawo mahimo magmatinumanon sa Manunuga walay sapayan sang mabudlay kaayo nga mga pagtilaw. (1 Pedro 2:22) Ang iya ginhalad nga himpit tawhanon nga kabuhi nangin gawad nga bili, nga makatubos sa katawhan gikan sa sala kag kamatayon. Si Jesucristo nagsiling: “Wala sing bisan sin-o nga may gugma nga daku pa sini, nga ihatag sang isa ang iya kalag tungod sa iya mga abyan.” (Juan 15:13) Sang ikatlo nga adlaw sa tapos sang iya kamatayon, ginbanhaw si Jesus sa espiritu nga kabuhi, kag pila ka semana sang ulihi nagkayab sia sa langit agod ipresentar ang bili sang gawad kay Jehova nga Dios. (1 Corinto 15:3,4; Hebreo 9:11-14) Sa paghimo sini, gin-aplikar ni Jesus ang balor sang iya halad nga gawad sa mga nagasunod sa iya.
Luyag mo bala makabenepisyo gikan sa sining paagi sang pag-ayo sa espirituwal, emosyonal, kag pisikal nga mga balatian? Ang paghimo sini nagakinahanglan sing pagtuo kay Jesucristo. Ngaa indi ka mismo magkadto sa Manugbulong? Mahimo mo ini paagi sa pagtuon tuhoy kay Jesucristo kag sa iya papel sa pagluwas sa matutom nga katawhan. Ang mga Saksi ni Jehova malipay sa pagbulig sa imo.
[Laragway sa pahina 5]
Si Jesus may handum kag gahom sa pag-ayo sa mga masakiton
[Laragway sa pahina 7]
Paano ang kamatayon ni Jesus nakaapektar sa imo?