Felipe—Isa ka Makugi nga Ebanghelisador

ANG Kasulatan nagaunod sing madamo nga rekord sang mga lalaki kag mga babayi nga may pagtuo nga takus ilugon. Binagbinaga si Felipe, isa ka Cristianong misyonero sang unang siglo. Indi sia apostol, apang gingamit sia sing maayo sa pagpalapnag sa mensahe sang Ginharian. Ang matuod, nakilala si Felipe subong “ebanghelisador.” (Binuhatan 21:8) Ngaa gintawag si Felipe sing amo sina? Kag ano ang matun-an naton gikan sa iya?

Ginpakilala si Felipe sa rekord sang Biblia pagkatapos gid lang sang Pentecostes 33 C.E. Sadto nga tion, nagakumod ang nagahambal sing Griego nga mga Judiyo batok sa nagahambal sing Hebreo nga mga Judiyo, nagasiling nga wala malakip ang ila mga balo sa adlaw-adlaw nga pagpanagtag sing pagkaon. Agod maatipan ang amo nga problema, nagtangdo ang mga apostoles sing “pito ka maayo sing kadungganan nga lalaki.” Isa si Felipe sa mga ginpili.—Binuhatan 6:1-6.

Ining pito ka lalaki mga “maayo sing kadungganan.” Ang badbad ni James Moffatt nagasiling nga sila “may maayo nga reputasyon.” Huo, sang gintangdo sila, kilala na nga daan sila subong espirituwal nga mga lalaki nga may ikasarang sa praktikal nga panghunahuna. Kaanggid man ina sa mga nagaalagad karon subong Cristianong mga manugtatap. Ina nga mga lalaki wala ginatangdo sing padasudaso. (1 Timoteo 5:22) Dapat sila may “maayo nga testimonya gikan sa mga tawo sa guwa,” kag dapat mahibaluan sang mga masigka-Cristiano nga sila makatarunganon kag maligdong sing panghunahuna.—1 Timoteo 3:2,3,7; Filipos 4:5.

Maathag nga gintatap sing maayo ni Felipe ang iya katungdanan sa Jerusalem. Apang, sang ulihi, nag-utwas ang daku nga paghingabot kag nag-alaplaag ang mga sumulunod ni Cristo. Subong sang ginhimo sang iban, nagbiya si Felipe sa siudad, apang wala matapos ang iya ministeryo. Wala magdugay, masako sia nga nagabantala sa bag-o nga teritoryo—ang Samaria.—Binuhatan 8:1-5.

Pagbukas sa Bag-o nga mga Teritoryo

Gintagna ni Jesus nga ang iya mga disipulo magabantala “sa Jerusalem kag sa bug-os nga Judea kag sa Samaria kag tubtob sa pinakamalayo nga bahin sang duta.” (Binuhatan 1:8) Paagi sa pagbantala sa Samaria, nagpakigbahin si Felipe sa katumanan sadto nga mga pulong. Ang kalabanan nga mga Judiyo nagpakanubo sa mga Samariahanon. Apang wala ginhukman ni Felipe ining mga tawo, kag ginpadyaan ang iya pagkawalay pinasulabi. Madamo gid nga mga Samariahanon ang nabawtismuhan, lakip ang isa ka salamangkero anay nga si Simon.—Binuhatan 8:6-13.

Sang ulihi, gintuytuyan si Felipe sang anghel ni Jehova pakadto sa dalan sa desyerto halin sa Jerusalem pa Gaza. Nakita didto ni Felipe ang isa ka kangga nga ginasakyan sang Etiopianhon nga opisyal nga nagabasa sing mabaskog gikan sa tagna ni Isaias. Nagdalagan si Felipe sa kilid sang kangga kag ginsugdan ang paghambalanay. Bisan pa nga ang Etiopianhon isa ka proselita nga may nahibaluan na tuhoy sa Dios kag sa Kasulatan, ginbaton niya sing mapainubuson nga kinahanglanon niya ang bulig agod mahangpan ang iya ginabasa. Gani, gin-agda niya si Felipe nga magsakay sa kangga kag magtupad sa iya. Sa tapos nga makapanaksi, nag-abot sila sa may tubig. “Ano bala ang nagasablag sa akon sa pagpabawtismo?” pamangkot sang Etiopianhon. Ginbawtismuhan sia sa gilayon ni Felipe, kag ang Etiopianhon nagpadayon sa iya dalanon nga nagakasadya. Mahimo nga ginpalapnag sining bag-o nga disipulo ang maayong balita sa iya dutang natawhan.—Binuhatan 8:26-39.

Ano ang matun-an naton gikan sa ministeryo ni Felipe nga nagdalahig sa mga Samariahanon kag sa Etiopianhon nga opisyal? Indi gid naton paghunahunaon nga ang mga indibiduwal halin sa isa ka pungsod, rasa, ukon tindog sa katilingban indi mangin interesado sa maayong balita. Sa baylo, dapat naton ibantala ang mensahe sang Ginharian sa “tanan nga sahi sang mga tawo.” (1 Corinto 9:19-23) Kon ginapagamit naton ang aton kaugalingon paagi sa pagbantala sa tanan, magamit kita ni Jehova sa hilikuton nga ‘himuon nga mga disipulo ang mga tawo sang tanan nga pungsod’ antes mag-abot ang katapusan sining malaut nga sistema.—Mateo 28:19,20.

Dugang Pa nga mga Pribilehiyo ni Felipe

Sa tapos nagbantala sa Etiopianhon nga opisyal, nagpanaksi si Felipe sa Asdod, “kag naglatas sia sa teritoryo kag nagpadayon sa pagbantala sing maayong balita sa tanan nga siudad tubtob nga nag-abot sia sa Cesarea.” (Binuhatan 8:40) Sang unang siglo, ining duha ka siudad may daku nga populasyon sang Gentil. Sa iya paglakbay pa aminhan sa Cesarea, mahimo nga nagbantala si Felipe sa kilala nga mga lugar sang mga Judiyo, subong sang Lida kag Joppa. Ayhan amo sina kon ngaa may mga disipulo sang ulihi sa sining mga lugar.—Binuhatan 9:32-43.

Katapusan nga ginsambit si Felipe mga 20 ka tuig sang ulihi. Sa hingapusan sang ikatlo nga paglakbay ni Pablo subong misyonero, nag-abot sia sa Tolemaida. “Sa masunod nga adlaw,” siling sang kaupod ni Pablo sa paglakbay nga si Lucas, “naglakat kami kag nag-abot sa Cesarea, kag nagsulod kami sa balay ni Felipe nga ebanghelisador.” Sa sining tion, si Felipe may “apat ka anak nga babayi, mga ulay, nga nagpanagna.”—Binuhatan 21:8,9.

Maathag nga nagpuyo si Felipe sa Cesarea. Apang wala madula ang iya espiritu sang pagmisyonero, kay gintawag sia ni Lucas nga “ebanghelisador.” Ini nga ekspresyon masami nagapahangop sang isa nga nagabiya sa iya puluy-an agod ibantala ang maayong balita sa wala pa mahikot nga mga lugar. Ang katunayan nga si Felipe may apat ka anak nga babayi nga nagpanagna nagapanugda nga ginsunod nila ang mga tikang sang ila makugi nga amay.

Dapat dumdumon sang modernong adlaw nga mga Cristianong ginikanan nga ang ila kabataan amo ang ila pinakaimportante nga mga disipulo. Bisan pa kinahanglan biyaan sinang mga ginikanan ang pila ka teokratikong pribilehiyo bangod sang mga katungdanan sa pamilya, kaangay ni Felipe makapabilin sila nga mga alagad sang Dios sing bug-os tagipusuon kag huwaran nga mga ginikanan.—Efeso 6:4.

Ang pagduaw ni Pablo kag sang iya mga kaupod naghatag sing kahigayunan sa pamilya ni Felipe nga ipakita ang pagkamaabiabihon. Handurawa ang pagbayluhanay sing pagpalig-on! Ayhan sa amo sini nga tion nga gintipon ni Lucas ang mga detalye sang mga hilikuton ni Felipe, nga ginlakip sang ulihi sa Binuhatan kapitulo 6 kag 8.

Gingamit ni Jehova nga Dios si Felipe sa daku nga kasangkaron sa pagpauswag sa mga intereses sang Ginharian. Bangod sang iya kakugi, ginpalapnag ni Felipe ang maayong balita sa bag-o nga mga teritoryo kag ginpasanyog ang maayo espirituwal nga kahimtangan sa iya puluy-an. Luyag man bala ninyo mag-agom sing kaanggid nga mga pribilehiyo kag pagpakamaayo? Kon amo maayo nga ilugon ninyo ang mga kinaiya nga ginpakita ni Felipe nga ebanghelisador.