Pag-ipit sang mga Katubotubo—Mangin sa Imo Bala Ini Kaayuhan?

Tanan kita natawo nga may handum gid nga batunon sang aton mga katubotubo. Wala sing isa nga luyag kaugtan, kag sikwayon. Sa amo, sa nanuhaytuhay nga kasangkaron, ang aton mga katubotubo nagaimpluwensia sa aton.

ANG katubotubo ginapaathag subong ang “isa nga may pareho nga tindog sa iban; . . . isa nga katapo sang pareho nga grupo sang katilingban, ilabi na suno sa edad, grado, ukon kahimtangan.” Kon amo, ang pag-ipit sang mga katubotubo amo ang puwersa nga ginatuga sa aton sang aton mga katubotubo, amo nga, nahibaluan man naton ukon wala, nagapahisuno kita sa ila paagi sang panghunahuna ukon panghulag. Ang pag-ipit sang mga katubotubo masami ginatamod nga negatibo. Apang, subong makita naton, mahimo naton ini para sa aton kaayuhan.

Impluwensia sa Tanan nga Grupo sang Pangidaron

Ang pag-ipit sang mga katubotubo indi limitado sa mga pamatan-on; nagaapektar ini sa tanan nga grupo sang pangidaron. Ang impluwensia sini ginapadayag kon masapwan naton ang aton kaugalingon nga nagapamangkot subong sang: “Ginahimo ini sang iban, ngaa abi indi ko ini mahimo?” “Ngaa dapat ako pirme mangin tuhay?” “Ano ayhan ang hunahunaon ukon ihambal sang iban?” “Ang tanan ko nga abyan naga-date kag nagapakasal, apang ako wala. May diperensia bala ako?”

Samtang ang pag-ipit nga makigbagay nagaapektar sa tanan nga grupo sang pangidaron, labi ini nga mabaskog sa tion sang pagkapamatan-on. Ang The World Book Encyclopedia nagasiling nga “ang kalabanan nga pamatan-on nagasuod gid sa ila mga katubotubo—buot silingon, sa ila mga abyan kag kakilala. Ang ginapahamut-an sang mga tin-edyer amo ang ila mga katubotubo, sa baylo sang ila mga ginikanan, kag mahimo nila bag-uhon ang ila panimuot agod matigayon ina nga kahamuot.” Ang mga tin-edyer, dugang pa sini, “nagapati nga nagatubo sila sing normal kon ginabaton kag naluyagan sila sang ila mga katubotubo.” Bangod sini, “ginakabalak-an [nila] ang mga butang nga sa banta nila nagaapektar sang ila popularidad, subong sang estilo sang ila bayo, ikasarang sa pagpanguna, kag kadalag-an sa pag-date.”

Mahimo masapwan sang mga mag-asawa nga ang ila desisyon tuhoy sa kon ano nga sahi sang balay ang baklon ukon arkilahan, ano nga sahi sang awto ang gamiton, kon bala manganak sila ukon indi, kag madamo iban pa nga butang ginaimpluwensiahan sang pag-ipit sang mga katubotubo—kon ano ang kalahamut-an sa ila komunidad, sa ila mga kaupod ukon etniko nga grupo. Ang iban nga pamilya nagakautangan pa gani agod lamang makatupong sa materyal nga paagi sa ila mga kaingod kag mga katubotubo. Huo, ang aton mga tulumuron, panghunahuna, kag mga desisyon masami nga nagapakita sang malalangon nga gahom sang pag-ipit sang mga katubotubo. Bangod sang gahom sini, maatubang bala naton ang pag-ipit sang mga katubotubo sa maayo nga paagi, agod mabuligan kita sa direksion nga luyag naton kadtuan? Sa pagkamatuod, mahimo naton ini!

Pagpanginpulos sa Maayo nga Impluwensia sang mga Katubotubo

Nahibaluan sang mga doktor kag sang iban pa nga propesyonal sa kapagros ang pagkaimportante nga palibutan ang ila mga pasyente sing positibo nga mga tawo kag sing iban pa maayo nga mga impluwensia. Ini nga palibot mahimo magpadasig sang pag-ayo. Ang mga nakumpol, halimbawa, masami nga nabuligan paagi sa malawig nga proseso sang pisikal nga rehabilitasyon kag emosyonal nga pagpaayo paagi sa maayo nga halimbawa kag pagpalig-on sang iban nga may amo man nga kahimtangan. Maathag nga ang pagbutang sang kaugalingon sa isa ka maayo nga palibot nga nagalakip sing optimistiko, positibo nga mga modelo isa ka paagi sang pagpanginpulos sa maayo nga sahi sang pag-ipit sang mga katubotubo.

Ini nga prinsipio matuod man sa Cristianong kongregasyon, kay ang positibo nga impluwensia sang mga katubotubo amo ang isa sang mga rason kon ngaa ginsugo ni Jehova ang iya katawhan nga tayuyon nga magtipon sing tingob. Ginapalig-on kita sang Dios nga ‘pukawon ang isa kag isa sa gugma kag sa maayong mga buhat kag magpalig-unay sa isa kag isa.’ (Hebreo 10:24,25) Importante gid ini nga pagpalig-on bangod sang madamo makapaluya kag makahalalit nga pag-ipit sa kalibutan karon. Bangod sining mga pag-ipit, ang mga Cristiano dapat ‘manikasog sing lakas’ agod makapabilin nga malig-on sa espirituwal. (Lucas 13:24) Sa amo, kinahanglan kag ginapasalamatan naton ang mahigugmaon nga suporta sang mga masigkatumuluo. Dugang pa, mahimo ginabatas sang pila ang ‘mga tunok sa unod,’ ayhan balatian ukon kasablagan. (2 Corinto 12:7) Ang iban mahimo nagapanikasog nga malandas ang malain nga mga pamatasan ukon kapung-aw, ukon mahimo nga ginabudlayan sila sa pagtigayon sang mga kinahanglanon sa kabuhi. Busa, maalamon nga makig-upod kita sa mga tawo nga nagapabilin nga suod kay Jehova nga Dios kag nagakalipay sa pag-alagad sa iya. Ini nga mga katubotubo magapapagsik sa aton kag nagabulig sa aton nga ‘makabatas tubtob sa katapusan.’—Mateo 24:13.

Gani, paagi sa pagpili sing nagakaigo nga mga katubotubo, makontrol naton ang ila impluwensia sa aton. Dugang pa, ang maayo nga espirituwal nga pagkaon kag ang praktikal nga panuytoy nga ginahatag sa Cristianong mga miting nagapabakod sa personal nga pagpalig-on nga ginabaton naton gikan sa aton mga katubotubo.

Sa pagkamatuod, ang pagtambong sa Cristianong mga miting indi pirme mahapos. Ang iban mahimo nga may diutay lamang ukon wala sing suporta gikan sa ila tiayon, ang iban mahimo nga may kabataan nga ginabuligan sa paghanda, kag para sa iban pa mahimo nga problema ang transportasyon. Apang hunahunaa: Kon indi mo pagtugutan nga upangan ikaw sining mga sablag, nian ang imo huwaran mahimo magpapagsik sa iban nga ayhan nagaatubang man sing amo nga mga kahimtangan. Buot silingon, ikaw kag ang iban nga kaangay sa imo nagahatag indi lamang sing isa ka maayo nga halimbawa kundi sing isa man ka maayo nga porma sang impluwensia sang katubotubo—kag wala ini sing bisan ano nga pagpamilit.

Sa katunayan, ginpalig-on ni apostol Pablo, nga nakaeksperiensia mismo sing madamo nga kabudlayan kag mga balagbag, ang mga Cristiano nga ilugon ang iya huwaran kag ang ila sang iban pa nga hamtong nga mga Cristiano. Sia nagsiling: “Nahiusa nga mag-ilog kamo sa akon, mga kauturan, kag bantayi ninyo ang mga nagalakat sa paagi nga nahisanto sa huwaran ninyo sa amon.” (Filipos 3:17; 4:9) Ang mga Cristiano sang una sa Tesalonica nagsunod sa huwaran ni Pablo. Tuhoy sa ila, si Pablo nagsulat: “Kamo nangin manug-ilog sa amon kag sa Ginuo, kay ginbaton ninyo ang pulong sa idalom sang dakung kapipit-an nga may kalipay sa balaan nga espiritu, sa bagay nga nangin huwaran kamo sa tanan nga tumuluo sa Macedonia kag sa Acaya.” (1 Tesalonica 1:6,7) Ang aton positibo nga panimuot kag huwaran may amo man nga epekto sa mga kaupdanan naton.

Likawi ang Negatibo nga mga Impluwensia

Kon luyag naton likawan ang indi maayo nga pag-ipit sang mga katubotubo, dapat naton pamatukan ang impluwensia sang ‘mga nagalakat suno sa unod.’ (Roma 8:4,5; 1 Juan 2:15-17) Kay kon indi, ipahilayo kita sang makahalalit nga pag-ipit sang mga katubotubo gikan kay Jehova kag sa iya maalamon nga laygay. Ang Hulubaton 13:20 nagasiling: “Sia nga nagalakat upod sa maalam nga mga tawo magaalam, apang sia nga nagapakig-angot sa mga buangbuang magaantos.” May mahunahuna bala kamo nga isa nga nag-antos bangod sang indi maayo nga pag-ipit sang mga katubotubo? Halimbawa, ang pila ka Cristiano nangin materyalistiko, imoral, ukon nag-abuso sa droga kag alkohol bangod sang impluwensia sang ila mga katubotubo.

Bisan sa sulod sang Cristianong kongregasyon, mahimo kita maimpluwensiahan sang indi maayo nga pag-ipit sang mga katubotubo kon ginapili naton nga suod nga mga kaupod ang mga maluya sa espirituwal. (1 Corinto 15:33; 2 Tesalonica 3:14) Masami nga wala sila sing huyog nga hambalan ang espirituwal nga mga butang; mahimo pa gani nila yagutaon ang mga naluyag nga hambalan ini. Kon ginapili naton sila subong aton suod nga mga kaupod, mahimo nga mapilitan kita nga mangin kaangay nila bangod sang pag-ipit sang mga katubotubo, kag sa indi madugay masapwan naton nga ginapabanaag naton ang ila panghunahuna kag panimuot. Mahimo pa gani kita magsugod sa paghunahuna sing negatibo sa mga matutom sa ila pagtuo kag sa mga nagatinguha sa pag-uswag sa espirituwal.—1 Timoteo 4:15.

Maalamon gid ang magpalambo sing pagpakig-abyan sa mga nagatinguha nga pahamut-an si Jehova, nga nagakalipay sa espirituwal nga mga butang! Ini nga mga kaupod magabulig sa aton nga mapabanaag “ang kaalam nga gikan sa hitaas.” Ini “una sa tanan putli, nian mahidaiton, makatarunganon, handa sa pagtuman, puno sing kaluoy kag maayong mga bunga, . . . indi salimpapaw.” (Santiago 3:17) Wala ini nagakahulugan nga ang mahunahunaon sa espirituwal nga mga tawo wala na nagapakighambal tuhoy sa bisan anong butang luwas lamang sa espirituwal nga mga butang. Kabaliskaran gid ini! Hunahunaa lamang ang nanuhaytuhay nga makawiwili nga mga topiko nga ginabinagbinag sa mga publikasyon sang Watch Tower subong sang Magmata! nga magasin. Wala gid sing katapusan ang maayo nga mga topiko nga mahambalan, kag paagi sa pagpakita sing interes sa masangkad nga mga topiko, ginapabanaag naton ang gugma sa kabuhi kag sa mga binuhatan ni Jehova.

Subong nga ang isa ka maayo nga humalampang sa tennis nagapauswag sang iya ikasarang paagi sa paghampang upod sa iban nga maayo nga mga humalampang, ang maayo nga kaupdanan nagapauswag sa aton sa hunahuna, sa emosyon, kag sa espirituwal. Sa pihak nga bahin, ang malain nga kaupdanan makadul-ong sa aton sa dalanon sang pagkasalimpapaw paagi sa pagpalig-on sa aton nga magkabuhi sing doble-kara. Daw ano kaayo ang pagtigayon sing matinlo nga konsiensia upod ang pagtahod sa kaugalingon!

Ang Pila nga Nakabenepisyo

Nasapwan sang kalabanan nga tawo nga ang pagtuon sa mga doktrina sang Biblia kag sa moral kag espirituwal nga mga talaksan sini indi gid man mabudlay. Apang, ang mabudlay amo ang pag-aplikar sining mga butang. Subong sang ginapakita sang masunod nga mga halimbawa, ang maayo nga impluwensia sang katubotubo makabulig sa aton nga alagaron si Jehova sing bug-os-kalag.

Ang isa ka Saksi nga yara sa bug-os tion nga ministeryo upod sa iya asawa nagsiling nga ang huwaran sang iya mga katubotubo nag-apektar sang iya mga tulumuron sa kabuhi. Samtang nagadaku sia, dapat niya landason ang indi maayo nga mga impluwensia. Apang ginpili niya subong iya mga abyan ang mga nagapalig-on sa iya nga mangin tayuyon sa ministeryo kag sa pagtambong sa Cristianong mga miting. Ang pagsuod sa sining kaupdanan nagbulig sa iya sa banas sang espirituwal nga pagkahamtong.

Ang isa pa ka Saksi nagsulat: “Pagkatapos sang amon kasal sang akon asawa, nagsaylo kami sa isa ka kongregasyon diin ang isa ka mag-asawa nga katubotubo namon mga regular payunir. Ang ila huwaran nakabulig sa amon sa pagsulod sa bug-os tion nga ministeryo. Nian nangabudlay man kami nga pabakuron ang espiritu sang pagpayunir sa kongregasyon. Subong resulta, madamo ang nagbuylog sa amon subong mga payunir.”

Ang pagpakig-upod sa mga may teokratikong mga tulumuron makapahapos sang pagtuman kay Jehova. Isa pa ini ka mapuslanon nga epekto sang maayo nga impluwensia sang mga katubotubo. Ang isa ka Saksi nga nagsugod sa bug-os tion nga ministeryo sang pamatan-on pa sia kag sang ulihi nangin nagalakbay nga manugtatap nagaalagad na karon sa isa sang mga sanga talatapan sang Watch Tower Society. Sia nagsulat: “Ang pila sang akon pinakauna kag naluyagan gid nga mga handumanan sang bata pa ako amo ang pagduaw sang bug-os tion nga mga alagad sa amon puluy-an. May yara pirme lugar para sa isa pa ka pulungkuan sa amon ginakan-an nga lamesa. Ginhatagan ako sang isa ka manugtatap sa sirkito sing isa ka bag para sa pagpanaksi sang dies anyos ako. Ginapakabahandi ko yadto nga bag tubtob karon.”

Nagadumdom sang iya tinuig sang pagkapamatan-on, ini nga Saksi nagdugang: “Madamo sang pamatan-on nga lalaki sa kongregasyon ang luyag makigbahin sa mga hilikuton sang kongregasyon, kag ang ila huwaran nagpalig-on sa iban sa amon nga handumon man ini.” Ang maayo nga mga katubotubo nagbulig sa sining pamatan-on, kaangay sa isa ka tugdo, nga magtubo nga isa ka maayo, tulad-kahoy nga Cristiano. Mga ginikanan, ginaagda bala ninyo sa inyo puluy-an ang mga tawo nga mahimo may positibo, makapabakod nga impluwensia sa inyo kabataan?—Malaquias 3:16.

Sa pagkamatuod, indi tanan sa aton ang mahimo makapakigbahin sa bug-os tion nga ministeryo kaangay sang mga indibiduwal nga ginsambit bag-o lang. Apang kita tanan makatuon nga higugmaon si Jehova ‘sa bug-os naton nga tagipusuon, kalag, kag hunahuna.’ (Mateo 22:37) Daku ang mabulig sang aton pagpili sa mga katubotubo sa pagpalambo naton sina nga gugma kag, sa amo, sa aton ginalauman nga kabuhi nga walay katapusan.

Ang salmista naghatag sing simple apang epektibo nga pormula para sa matuod nga kadalag-an sa kabuhi: “Malipayon ang tawo nga wala nagalakat sa laygay sang mga malauton, kag sa dalanon sang mga makasasala wala nagatindog, kag sa lingkuranan sang mga mayubiton wala nagalingkod. Kundi ang iya kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag gab-i. Kag mangin kaangay sia sang kahoy nga natanom sa ubay sang mga kasulgan sang tubig, nga nagapamunga sa iya panag-on kag ang iya dahon indi malaya, kag ang bisan ano nga ginahimo niya magamadinalag-on.”—Salmo 1:1-3.

Daw ano katahom nga pasalig! Bisan pa dihimpit kita kag nagasayop, ang aton kabuhi mangin madinalag-on kon tugutan naton si Jehova nga magtuytoy sa aton kag kon panginpuslan gid naton ang ginhatag sang Dios nga maayo nga impluwensia sang mga katubotubo—ang aton “bug-os nga paghiliutod sa kalibutan.”—1 Pedro 5:9.

[Laragway sa pahina 24]

Ang kongregasyon nagatanyag sing maayo nga porma sang impluwensia sang mga katubotubo

[Laragway sa pahina 25]

Mga ginikanan, palig-una ang inyo kabataan nga makig-upod sa makapalig-on nga mga katubotubo