Pagkabuhi Suno sa Pagtuo sa mga Saad sang Dios

“Ako ang Balaan nga Isa kag wala sing iban pa nga Dios, kag wala na gid sing kaangay sa akon; ang Isa nga nagapahayag sang katapusan kutob sa ginsuguran, kag kutob sa dumaan nga mga tion sing mga butang nga wala pa mahimo.”—ISAIAS 46:9,10.

1, 2. Ano ang pila ka magkatuhay nga mga pagtamod nahanungod sa pagpasilabot sang Dios sa mga nagakatabo sa duta?

DAW ano ka daku ang pagpasilabot sang Dios sa mga nagakatabo sa duta? Nanuhaytuhay ang mga opinyon. Ang isa ka pagtamod amo nga wala gid sia nagapasilabot. Sa tapos matuga ang tawo, wala sia sing interes ukon wala sia sing ikasarang sa pagpanghikot para sa aton. Sa sini nga pagtamod, ang Dios kaangay sang isa ka amay nga nagpasakay sang iya anak nga lalaki sa isa ka bag-o nga bisikleta, ginbalanse ini, kag gintulod ini agod makabisikleta ang iya anak nga lalaki sa dalan. Pagkatapos sini, naglakat ang amay. Ang bata nagaisahanon na lamang; mahimo sia matumba, ukon indi. Kon ano man ang matabo, indi na ini kontrolado sang amay.

² Ang isa pa ka pagtamod amo nga ang Dios aktibo nga nagadirihir sang tagsa ka bahin sang aton pagkabuhi kag nga sia talangkod nga nagapasilabot sa tagsa ka butang nga nagakatabo sa iya tanan nga tinuga. Apang, kon amo sini, magahinakop ang iban nga ginapahanabo sang Dios indi lamang ang maayo nga mga butang kundi ang krimen man kag trahedya nga nagapaantos sa katawhan. Ang paghibalo sang kamatuoran tuhoy sa mga pagpakig-angot sang Dios magabulig sa aton sa paghibalo kon ano ang paabuton sa iya. Magapabakod man ini sang aton pagtuo sa pila ka katumanan sang iya mga saad.—Hebreo 11:1.

3. (a) Paano naton nahibaluan nga si Jehova isa ka Dios sang katuyuan? (b) Ngaa ginapatuhuyan si Jehova nga ‘nagaporma’ kag ‘nagadihon’ sang iya katuyuan?

³ Ang importante sa pamangkot nga kon bala nagapasilabot ang Dios sa mga ginahimo sang tawo amo ang kamatuoran nga si Jehova isa ka Dios sang katuyuan. Maathag ini sa iya ngalan mismo. Ang “Jehova” nagakahulugan sing “Ginapahabo Niya nga Mangin Amo.” Paagi sa progresibo nga pagpanghikot, ginahimo ni Jehova ang iya kaugalingon nga mangin Manugtuman sang tanan niya nga saad. Busa, ginapatuhuyan si Jehova nga ‘nagaporma,’ ukon nagadihon, sang iya katuyuan tuhoy sa palaabuton nga mga hitabo ukon mga buhat. (2 Hari 19:25; Isaias 46:11) Ining mga termino naghalin sa Hebreong tinaga nga ya·tsarʹ, nga may kaangtanan sa tinaga nga nagakahulugan sing “maninihon.” (Jeremias 18:4) Subong nga madihon sang isa ka lantip nga maninihon ang isa ka inumok nga daga nga mangin isa ka matahom nga plorera, sarang madihon, ukon mamaniobra ni Jehova ang mga butang agod tumanon ang iya kabubut-on.—Efeso 1:11.

4. Paano ginhanda sang Dios ang duta agod puy-an sang tawo?

⁴ Halimbawa, gintuyo sang Dios nga ang duta mangin isa ka matahom gid nga duog nga puy-an sang himpit kag matinumanon nga mga tawo. (Isaias 45:18) Madugay pa antes gintuga niya ang una nga lalaki kag babayi, naghimo si Jehova sing mahigugmaon nga paghanda para sa ila. Ginalaragway sang nagabukas nga mga kapitulo sang tulun-an sang Genesis kon paano ginpaluntad ni Jehova ang adlaw kag gab-i, ang duta kag ang dagat. Masunod gintuga niya ang mga talamnunon kag ang kasapatan. Ining paghanda sa duta agod mapuy-an sang tawo nagdalahig sing linibo ka tuig. Ang proyekto madinalag-on nga natapos. Ang una nga lalaki kag babayi nagsugod sa pagkabuhi sa Eden, isa ka kalahamut-an nga paraiso nga nasangkapan sing kumpleto agod malipay sila sa kabuhi. (Genesis 1:31) Sa amo, si Jehova talangkod nga nagpasilabot sa mga nagakatabo sa duta, kag progresibo nga ginadihon niya ang iya mga binuhatan para sa iya halangdon nga katuyuan. Nagbag-o bala ang iya pagpasilabot sang magdaku ang pamilya sang tawo?

Ginlimitehan ni Jehova ang Iya mga Pagpakig-angot sa mga Tawo

5, 6. Ngaa ginalimitehan sang Dios ang iya mga pagpakig-angot sa mga tawo?

⁵ Bisan pa may gahom sia nga himuon ini, wala ginadirihir kag ginakontrol ni Jehova ang tagsa ka butang nga ginahimo sang tawo. May mga rason ini. Ang isa amo nga ang mga tawo gintuga sa dagway sang Dios, may hilway nga pagbuot, bangod hilway sila sa pagdesisyon. Wala kita ginapilit ni Jehova sa paghimo sang iya ginapangabay; ukon daw idoido niya kita. (Deuteronomio 30:19, 20; Josue 24:15) Bisan pa ginaobligar niya kita nga manabat sa aton himuon, mahigugmaon nga ginhatagan kita sang Dios sing daku nga kahilwayan sa pagdesisyon kon paano kita magkabuhi.—Roma 14:12; Hebreo 4:13.

⁶ Ang isa pa ka rason kon ngaa wala ginadirihir sang Dios ang tanan nga butang nga nagakatabo may kaangtanan sa hulusayon nga ginpautwas ni Satanas sa Eden. Ginhangkat ni Satanas ang pagkasoberano sang Dios. Gintanyag niya kay Eva ang butang nga daw isa ka kahigayunan para sa kahilwayan—isa ka tanyag nga ginbaton niya kag sang ulihi sang iya bana nga si Adan. (Genesis 3:1-6) Subong reaksion, gintugutan sang Dios ang mga tawo nga gamhan ang ila kaugalingon sa sulod sang isa ka hut-ong sang tion agod pamatud-an kon bala husto ang panghangkat ni Satanas. Bangod sini, ang malain nga mga butang nga ginahimo karon sang mga tawo indi mabasol sa Dios. Si Moises nagsulat tuhoy sa rebelyuso nga mga tawo: “Nagpanghikot sila sing malaglagon sa ila bahin; indi sila mga anak [sang Dios], sila ang may depekto.”—Deuteronomio 32:5.

7. Ano ang katuyuan ni Jehova para sa duta kag para sa katawhan?

⁷ Apang, samtang ginatugutan ang hilway nga pagdesisyon kag ang mga pag-eksperimento sa independiente nga paggahom, indi nangin panindugan ni Jehova nga indi gid magpasilabot sa mga nagakatabo sa duta, nga wala nagahatag sa aton sing paglaum nga tumanon niya ang iya mga saad. Bisan pa nagrebelde si Adan kag si Eva sa pagkasoberano sang Dios, wala ginbag-o ni Jehova ang iya mahigugmaon nga katuyuan para sa duta kag para sa katawhan. Pat-od nga himuon niya ang duta nga mangin paraiso nga ginapuy-an sang himpit, matinumanon, kag malipayon nga katawhan. (Lucas 23:42, 43) Ginalaragway sang rekord sa Biblia kutob sa Genesis tubtob sa Bugna kon paano si Jehova progresibo nga nagapanghikot sa pagtuman sina nga katuyuan.

Nagahikot ang Dios sa Pagtuman sang Iya Kabubut-on

8. Ano ang nadalahig anay sa pagdala sa mga Israelinhon sa Ginsaad nga Duta?

⁸ Paagi sa iya mga pagpakig-angot sa pungsod sang Israel, ginpakita sang Dios nga tumanon niya ang iya katuyuan. Halimbawa, ginpasalig ni Jehova si Moises nga luwason Niya ang mga Israelinhon gikan sa Egipto kag dalhon sila sa Ginsaad nga Duta, isa ka duta diin nagailig ang gatas kag dugos. (Exodo 3:8) Isa ini ka importante gid kag makapasalig nga saad. Magadalahig ini sing paghilway sa mga Israelinhon​—upod sa ila mga kaupod nga may kadamuon nga mga tatlo ka milyon—gikan sa isa ka gamhanan nga pungsod nga nagapamatok gid sa ila paghalin. (Exodo 3:19) Ang duta nga pagadalhan sa ila ginapuy-an sang gamhanan nga mga pungsod nga magapamatok gid sa ila pag-abot. (Deuteronomio 7:1) Sa ulot amo ang isa ka kahanayakan diin magakinahanglan ang mga Israelinhon sing pagkaon kag tubig. Isa ini ka kahimtangan nga nagtugot kay Jehova sa pagpasundayag sang iya supremo nga gahom kag pagka-Dios.—Levitico 25:38.

9, 10. (a) Ngaa makapamatuod sadto si Josue nga ang mga saad sang Dios masaligan? (b) Daw ano ka importante nga dapat kita magsalig sa ikasarang sang Dios sa pagpadya sa mga matutom sa iya?

⁹ Ginpaguwa sang Dios ang mga Israelinhon gikan sa Egipto paagi sa paagisod nga pagpakita sing gamhanan nga mga buhat. Una, nagpadala sia sing napulo ka makahalapay nga kalalat-an sa pungsod sang Egipto. Masunod, ginpihak niya ang Dagat nga Mapula, sa amo nakatabok ang mga Israelinhon samtang nalaglag ang nagalagas nga hangaway sang Egipto. (Salmo 78:12, 13, 43-51) Pagkatapos sini, gin-atipan niya ang mga Israelinhon sa sulod sang 40 ka tuig sa kahanayakan, ginpakaon sila sing manna, gin-amanan sing tubig, kag gintipigan pa gani nga ang ila mga panapton wala maggabok kag ang ila mga tiil wala magbanog. (Deuteronomio 8:3,4) Sa tapos nakasulod ang mga Israelinhon sa Ginsaad nga Duta, ginpadaug sila ni Jehova batok sa ila mga kaaway. Si Josue, nga nagpakita sing mabakod nga pagtuo sa mga saad ni Jehova, nakasaksi sining tanan nga butang. Sa amo, masinaligon nga nakasiling sia sa tigulang nga mga lalaki sang iya adlaw: “Nakahibalo gid kamo sa bug-os ninyo nga tagipusuon kag sa bug-os ninyo nga kalag nga wala sing isa ka tinaga sa tanan nga maayong tinaga nga ginpamulong ni Jehova nga inyo Dios sa inyo ang napaslawan. Ang tanan natuman sa inyo.”—Josue 23:14.

¹⁰ Kaangay ni Josue sang una, ang mga Cristiano karon nagasalig sing bug-os nga ang Dios handa kag may ikasarang sa paghikot para sa mga nagaalagad sa iya. Ini nga pagpati isa ka kinahanglanon nga bahin sang aton pagtuo. Si apostol Pablo nagsulat: “Kon wala sing pagtuo imposible nga mapahamut-an sia sing maayo, kay sia nga nagapalapit sa Dios dapat magpati nga amo sia . . . ang nangin manugpadya sadtong hanuot nga nagapangita sa iya.”—Hebreo 11:6.

Makita sang Dios ang Palaabuton

11. Ano ang mga rason kon ngaa matuman sang Dios ang iya mga saad?

¹¹ Tubtob sa sini nga punto, nakita naton nga samtang ginatugutan sang Dios ang hilway nga pagbuot kag independiente nga paggahom sang tawo, may gahom sia kag kabubut-on sa paghikot agod tumanon ang iya katuyuan. Apang, may isa pa ka rason nga nagapasalig sang pat-od nga katumanan sang mga saad sang Dios. Makita ni Jehova ang palaabuton. (Isaias 42:9) Paagi sa iya manalagna, ang Dios nagsiling: “Dumduma ang nahauna nga mga butang sang dumaan, nga ako ang Balaan nga Isa kag wala sing iban pa nga Dios, kag wala na gid sing kaangay sa akon; ang Isa nga nagapahayag sang katapusan kutob sa ginsuguran, kag kutob sa dumaan nga mga tion sing mga butang nga wala pa mahimo; ang Isa nga nagasiling, ‘Ang akon tinutuyo magapadayon, kag himuon ko ang tanan ko nga luyag.’” (Isaias 46:9,10) Nahibaluan sang isa ka eksperiensiado nga mangunguma kon san-o kag diin itanom ang binhi, apang indi niya gihapon mapat-od kon ano ang mahanabo. Apang, ang “Hari nga dayon” may sibu nga ihibalo sa paghibalo sing abanse kon san-o kag diin sia dapat maghikot sa pagtuman sang iya katuyuan.—1 Timoteo 1:17.

12. Sa anong paagi ginpakita ni Jehova nga may abanse sia nga ihibalo sang mga adlaw ni Noe?

¹² Binagbinaga kon paano ginpakita sang Dios ang iya abanse nga ihibalo sang mga adlaw ni Noe. Bangod sang lapnag nga kalautan nga nagpuno sang duta, namat-od ang Dios nga laglagon ang dimatinumanon nga katawhan. Nagtalana sia sing tion kon san-o niya ini himuon, 120 ka tuig sa wala pa. (Genesis 6:3) Sa pagtalana sining espisipiko nga tion, ginbinagbinag ni Jehova indi lamang ang paglaglag sa mga malauton, butang nga sarang niya mahimo sa bisan anong tion. Ang talaksan sang tion ni Jehova nagtalana man sing tion para sa kaluwasan sang mga matarong. (Ipaanggid ang Genesis 5:29.) Sa iya kaalam, nahibaluan na nga daan sang Dios kon san-o ipahimo ang hilikuton nga magadul-ong sa sina nga katapusan. Naghatag sia sing detalyado nga impormasyon kay Noe. Si Noe magatukod sing isa ka arka “sa pagluwas sa iya panimalay,” kag ang mga malauton pagalaglagon paagi sa bug-os kalibutan nga anaw.—Hebreo 11:7; Genesis 6:13, 14, 18, 19.

Isa ka Daku Gid nga Tulukuron

13, 14. Ngaa ang pagtukod sing arka isa ka makahalangkat nga tulumanon?

¹³ Binagbinaga ini nga tulumanon gikan sa pagtamod ni Noe. Bangod si Noe isa ka tawo sang Dios, nahibaluan niya nga si Jehova may ikasarang sa paglaglag sa mga didiosnon. Apang, antes ina matabo, may butang nga hilimuon—isa ka hilikuton nga nagkinahanglan sing pagtuo. Ang pagtukod sing arka mangin isa ka daku gid nga proyekto. Espesipiko nga ginsugid sang Dios ang mga takus sini. Ang arka mangin mas malaba sangsa pila ka latagon nga halampangan karon kag mangin subong kataas sa lima sing panalgan nga tinukod. (Genesis 6:15) Ang mga manunukod wala sing eksperiensia kag pila lamang. Wala sila sing moderno nga mga gamit kag kasangkapan nga matigayon karon. Dugang pa, sanglit wala sia sing ikasarang ni Jehova sa paghibalo sang palaabuton, wala si Noe sing paagi sa paghibalo kon ano nga mga kahimtangan ang magaabot sa pagligad sang tinuig nga mahimo magabulig ukon magaupang sa pagpatindog nga proyekto. Mahimo gid nga madamo nga pamangkot ang ginbinagbinag ni Noe. Paano tipunon ang mga materyales nga kinahanglanon? Paano niya tipunon ang mga sapat? Ano nga mga pagkaon ang kinahanglanon kag sig-ano? San-o gid maabot ang gintagna nga Anaw?

¹⁴ Nian yara pa ang kahimtangan sa katilingban. Ang kalautan nadugangan pa. Ang gamhanan nga mga Nefilim—ang mestiso nga mga anak sang malaut nga mga anghel kag sang mga babayi—nagpuno sang duta sing kasingki. (Genesis 6:1-4, 13) Dugang pa, ang pagtukod sing arka indi mangin isa ka proyekto nga mahinago. Matingala ang mga tawo kon ano ang ginahimo ni Noe, kag sugiran niya sila. (2 Pedro 2:5) Magaugyon bala sila? Indi gid! Mga pila ka tuig antes sini, ginbantala sang matutom nga si Enoc ang kalaglagan sang mga malauton. Ginkaugtan gid ang iya mensahe amo kon ngaa “ginkuha sia” sang Dios, ukon ginpalip-ot ang iya kabuhi, ayhan agod indi sia mapatay sang Iya mga kaaway. (Genesis 5:24; Hebreo 11:5; Judas 14, 15) Indi lamang si Noe magbantala sing mensahe nga indi man pagbatunon kundi magatukod pa sia sing arka. Samtang ginatukod yadto nga arka, mangin isa ini ka daku nga pahanumdom sang katutom ni Noe walay sapayan sang iya malaut nga mga kontemporaryo!

15. Ngaa nagsalig si Noe nga matuman niya ang iya tulumanon?

¹⁵ Nahibaluan ni Noe nga ang proyekto ginasakdag kag ginapakamaayo sang Labing Gamhanan nga Dios. Indi bala nga si Jehova mismo ang naghatag sang hilikuton? Ginpasalig ni Jehova si Noe nga sia kag ang iya pamilya magasulod sa isa ka nahuman nga arka kag pagaluwason sa tugob-globo nga Anaw. Ginpadaku pa gani sang Dios ang pagkasigurado sini paagi sa isa ka pormal nga kasugtanan. (Genesis 6:18, 19) Mahimo gid nga narealisar ni Noe nga nahibaluan na nga daan kag natimbangtimbang ni Jehova ang tanan nga madalahig antes ihatag ang tulumanon. Dugang pa, nahibaluan ni Noe nga si Jehova may gahom sa pagpasilabot agod buligan sia kon kinahanglanon. Gani ang pagtuo ni Noe nagpahulag sa iya sa paghikot. Kaangay sang iya kaliwat nga si Abraham, si Noe “nakumbinsi sing bug-os nga ang ginsaad [sang Dios] sarang man niya himuon.”—Roma 4:21.

16. Samtang nagapadayon ang pagtukod sing arka, paano napabakod ang pagtuo ni Noe?

¹⁶ Samtang nagaligad ang tinuig kag nagakorte na ang arka, napabakod ang pagtuo ni Noe. Nalubad ang mga problema may kaangtanan sa pagtukod kag pag-organisar. Nalandas ang mga pagtilaw. Wala sing pagpamatok nga makapadulog sa hilikuton. Naeksperiensiahan sang pamilya ni Noe ang suporta kag proteksion ni Jehova. Samtang nagapadayon si Noe, ‘ang natilawan nga kinaiya sang iya pagtuo naghikot sing pagbatas.’ (Santiago 1:2-4) Sang ulihi, nahuman ang arka, nag-abot ang Anaw, kag si Noe kag ang iya pamilya naluwas. Naeksperiensiahan ni Noe ang katumanan sang mga saad sang Dios, subong sang naeksperiensiahan man ni Josue sang ulihi. Ang pagtuo ni Noe ginpadyaan.

Ginasakdag ni Jehova ang Hilikuton

17. Sa anong mga paagi ang aton tion kasubong sang mga adlaw ni Noe?

¹⁷ Gintagna ni Jesus nga ang aton adlaw mangin kasubong sang mga adlaw ni Noe. Namat-od liwat ang Dios nga laglagon ang mga malauton kag nagtalana sia sing tion para sa sini. (Mateo 24:36-39) Naghimo man sia sing mga paghanda para sa kaluwasan sang mga matarong. Samtang si Noe magatukod sing arka, ang mga alagad sang Dios karon magabantala sang mga katuyuan ni Jehova, itudlo ang iya Pulong, kag maghimo sing mga disipulo.—Mateo 28:19.

18, 19. Paano naton nahibaluan nga ang pagbantala sing maayong balita ginasakdag ni Jehova?

¹⁸ Kon si Jehova indi upod kay Noe sa pagsakdag kag sa pagpabaskog sa iya, pat-od nga wala matukod ang arka. (Ipaanggid ang Salmo 127:1.) Sing kaanggid, kon wala ang pagsakdag ni Jehova, pat-od nga ang matuod nga Cristianismo indi magpadayon, kag indi gid mag-uswag. Ginkilala ini sang unang siglo ni Gamaliel, isa ka ginataha nga Fariseo kag manunudlo sang Kasuguan. Sang luyag sang Judiyong Sanhedrin nga papason ang mga apostoles, ginpaandaman niya yadto nga korte: “Indi ninyo paghilabti ining mga tawo, kundi pabayai sila; (kay kon ining katuyuan ukon ining buhat naghalin sa mga tawo, mapukan ini; apang kon naghalin ini sa Dios, indi ninyo sila mapukan.)”—Binuhatan 5:38,39.

¹⁹ Ang kadalag-an sang pagbantala nga hilikuton, sang unang siglo kag sa karon, nagapamatuod nga indi ini isa ka hilikuton gikan sa tawo, kundi sa Dios. Binagbinagon sang masunod nga artikulo ang pila sang makakulunyag nga mga kahimtangan kag mga pag-uswag nga nakabulig sa paghimo sining hilikuton nga madinalag-on gid sa daku nga kasangkaron.

Indi Gid Mag-untat!

20. Sin-o ang nagasakdag sa aton samtang ginabantala naton ang maayong balita?

²⁰ Bisan pa nagakabuhi kita sa “makahalanguyos nga mga tion nga mabudlay pakigbagayan,” mapat-od naton nga kontrolado gid ni Jehova ang kahimtangan. Ginasakdag niya kag ginabuligan ang iya katawhan samtang nagapanghikot sila agod tapuson ang pagbantala sing maayong balita antes mag-abot ang gintalana nga tion sang Dios sa pagtapos sining malaut nga sistema sang mga butang. (2 Timoteo 3:1; Mateo 24:14) Ginaagda kita ni Jehova nga mangin “mga masigkamanugpangabudlay” niya. (1 Corinto 3:9) Ginapasalig man kita nga si Cristo Jesus kaupod naton sa sining hilikuton kag nga makasalig kita sa pagsakdag kag pagtuytoy sang mga anghel.—Mateo 28:20; Bugna 14:6.

21. Sa anong pagpati indi gid kita dapat mag-untat?

²¹ Bangod si Noe kag ang iya pamilya nagpakita sing pagtuo sa mga saad ni Jehova, naluwas sila sa anaw. Ang mga nagapakita sing amo man nga pagtuo karon pagaluwason sa nagapakari nga “dakung kapipit-an.” (Bugna 7:14) Nagakabuhi kita sa tion nga makakulunyag gid. Importante nga mga hitabo ang magaabot! Sa indi madugay, magahikot ang Dios agod paluntaron ang mahimayaon nga bag-ong mga langit kag bag-ong duta diin magapuyo ang pagkamatarong. (2 Pedro 3:13) Indi gid, indi gid mag-untat sa inyo pagpati nga bisan ano ang ihambal sang Dios, mahimo man niya ini.—Roma 4:21.

Mga Punto nga Dapat Dumdumon

◻ Ngaa wala ginakontrol ni Jehova ang tanan nga detalye sa ginahimo sang tawo?

◻ Paano ang ikasarang ni Jehova sa pagtuman sang iya katuyuan dayag gid sa iya mga pagpakig-angot sa Israel?

◻ Paano ang ikasarang ni Jehova nga makita ang palaabuton ginpasundayag sang adlaw ni Noe?

◻ Ano nga pagsalig ang mahimo mapakita naton sa mga saad sang Dios?