May Isa nga Nagaulikid Gid

INAPAKITA sang linibo ka tawo nga nagaulikid gid sila. Wala nila ginailog ang matig-a-sing-balatyagon, makagod nga pagtamod amo nga wala lang sa ila bungog ang mga problema sang iban. Sa baylo, ginahimo nila ang tanan nila nga masarangan—kon kaisa ginabutang pa gani sa katalagman ang ila kabuhi—agod mapahaganhagan ang pag-antos. Daku gid ini nga hilikuton, isa nga ginapabudlay sang gamhanan nga mga puwersa nga indi nila kontrolado.

Ang mga kabangdanan subong sang kakagod, padugi sa politika, mga inaway, kag kinaugali nga mga kalamidad, mahimo magpaslaw bisan “sang labing maayo kag determinado nga mga panikasog sa pagdula sang gutom,” siling sang isa ka nagahatag-bulig nga mamumugon. Ang pagdula sa gutom isa lamang sang madamo nga problema nga ginatatap sang mainulikdon nga mga tawo. Ginapanikasugan man nila nga malandas ang mga butang subong sang balatian, kaimulon, inhustisya, kag daku nga pag-antos bangod sang inaway. Apang nagamadinalag-on bala sila?

Ang puno nga ehekutibo sang isa ka ahensia sa pagbulig nagsiling nga ang mga nagahimo sining “maayo kag determinado nga mga panikasog” sa pagpahaganhagan sa gutom kag pag-antos kaangay sa maawaon nga Samaritano nga ginalaragway sa ilustrasyon ni Jesucristo. (Lucas 10:29-37) Apang bisan ano man ang ila nga himuon, siling niya, ang mga biktima padayon nga nagadamo. Gani namangkot sia: “Ano ang dapat nga himuon sang maayo nga Samaritano kon nagalakbay sia sa amo gihapon nga ruta kada adlaw sa sulod sang pila ka tuig kag makakita sang isa pa ka biktima sang mga kawatan sa higad sang dalan kada semana?”

Mahapos magpadaug sa ginalaragway nga ‘makamamatay nga pagbalatian sang manug-atipan (donor fatigue)’ kag mangampo na lamang nga nalugaw-an. Dalayawon nga ang mga nagaulikid wala nagapangampo. (Galacia 6:9, 10) Halimbawa, gindayaw sang isa ka tawo nga nagsulat sa Jewish Telegraph sang Britanya ang mga Saksi ni Jehova, nga sadtong panahon sang Nazi Alemanya “nagbulig sa linibo ka Judiyo agod makalampuwas sa daku nga pag-antos sa Auschwitz.” “Sang maiwat ang pagkaon,” siling sang nagsulat, “ginpaambit nila ang ila tinapay sa amon [Judiyong] kauturan nga lalaki kag babayi!” Padayon nga ginhimo sang mga Saksi ang masarangan nila paagi sa mga butang nga yara sa ila.

Apang, ang katunayan amo nga wala sing bisan ano nga pagpaambitay sing tinapay ang bug-os nga makadula sa pag-antos sang tawo. Wala ini nagakahulugan nga ginapakadiutay ang ginahimo sang mainawaon nga mga tawo. Ang bisan ano nga buhat nga nagabuhin sing nagakaigo sa pag-antos maayo. Sa bisan paano, medyo napahaganhagan sang mga Saksi ang pag-antos sang masigkabilanggo, kag ang Nazismo napukan sang ulihi. Apang, ang sistema sang kalibutan nga ginatunaan sining pagpamigos yara gihapon, kag madamo gihapon ang di-mainulikdon nga tawo. Sa pagkamatuod, “may kaliwatan nga ang ila mga ngipon mga espada kag ang ila mga bag-ang mga sundang nga inugdudo, agod halunhunon ang mga nasit-an gikan sa duta kag ang mga imol gikan sa katawhan.” (Hulubaton 30:14) Ayhan nagapalibog kamo kon ngaa amo sini ang kahimtangan.

Ngaa May Kaimulon kag Pagpigos?

Si Jesucristo nagsiling anay: “Pirme ninyo kaupod ang mga imol, kag bisan san-o nga luyag ninyo pirme kamo makahimo sing maayo sa ila.” (Marcos 14:7) Buot silingon bala ni Jesus nga ang kaimulon kag pagpigos indi na madula? Kaangay sang iban nga tawo, nagpati bala sia nga ining pag-antos bahin sang plano sang Dios agod hatagan ang mainawaon nga mga tawo sing kahigayunan nga ipakita kon daw ano kadaku ang ila pag-ulikid? Indi! Wala si Jesus nagpati sa sina. Ginapahangop lamang niya nga ang kaimulon mangin bahin sang kabuhi tubtob nagaluntad ining sistema sang mga butang. Apang nahibal-an man ini ni Jesus: Ining mga kahimtangan sa duta indi ang orihinal nga katuyuan sang iya langitnon nga Amay.

Gintuga ni Jehova nga Dios ang duta nga mangin paraiso, indi isa ka duog nga ginasalot sang kaimulon, inhustisya, kag pagpigos. Ginpakita niya ang iya daku nga pag-ulikid sa tawhanon nga pamilya paagi sa matahom nga mga aman nga labi nga magapahalipay sang kabuhi. Ti, binagbinaga lamang ang ngalan mismo sang hardin nga ginpuy-an sang aton unang mga ginikanan, sanday Adan kag Eva! Gintawag ini nga Eden, buot silingon “Kalipay.” (Genesis 2:8,9) Wala ginlimitehan ni Jehova ang mga tawo sing panguna lamang nga kinahanglanon agod mabuhi sa mamingaw, mapiguson nga palibot. Sa hingapusan sang iya pagpanuga, gintan-aw ni Jehova ang iya gintuga kag nagsiling nga ini “tama gid kaayo.”—Genesis 1:31.

Kon amo, ngaa ang kaimulon, pagpamigos, kag ang iban pa nga ginatunaan sang pag-antos lapnag karon sa bug-os nga duta? Ang malaut nga sistema sang mga butang karon nagaluntad bangod ginpili sang aton orihinal nga mga ginikanan nga magrebelde sa Dios. (Genesis 3:1-5) Nagpautwas ini sang pamangkot nga kon bala makatarunganon nga magsugo ang Dios nga tumanon sia sang iya mga tinuga. Gani ginhatagan ni Jehova ang kaanakan ni Adan sing limitado nga tion sang pagkaindependiente. Nagaulikid gihapon ang Dios sa nagakatabo sa tawhanon nga pamilya. Naghimo sia sing aman sa pagdula sa tanan nga halit nga ginbunga sang pagrebelde sa iya. Kag sa indi madugay, dulaon ni Jehova ang kaimulon kag pagpamigos—sa katunayan, ang tanan nga pag-antos.—Efeso 1:8-10.

Isa ka Problema nga Indi Malubad Sang Tawo

Sa mga siniglo kutob sang pagtuga sa tawo, labi pa nga nagpahilayo ang katawhan gikan sa mga talaksan ni Jehova. (Deuteronomio 32:4,5) Bangod sang padayon nila nga pagsikway sa mga kasuguan kag mga prinsipio sang Dios, ang mga tawo nag-ilinaway, kag ang “tawo nagagahom sa tawo sa iya kasamaran.” (Manugwali 8:9) Ang tanan nga panikasog nga paluntaron ang isa ka matarong gid nga katilingban, nga wala sing bisan anong butang nga nagasalot sa nagaantos nga katawhan, ginaupangan sang kakagod sang mga maluyag nga himuon ang mga butang suno sa ila paagi sa baylo nga magpasakop sa pagkasoberano sang Dios.

May isa pa ka problema—isa nga mahimo pasapayanan sang madamo subong wala pulos lamang nga disparatis. Ang manugsugyot sang pagrebelde batok sa Dios padayon nga nagasugyot sa mga tawo sa kalainan kag kakagod. Sia amo si Satanas nga Yawa, kag gintawag sia ni Jesucristo nga “ang manuggahom sang kalibutan.” (Juan 12:31; 14:30; 2 Corinto 4:4; 1 Juan 5:19) Sa bugna nga ginhatag kay apostol Juan, nakilala si Satanas subong ang panguna nga ginahalinan sang kailo—ang isa nga may panguna nga salabton sa ‘pagpatalang sa bug-os napuy-an nga duta.’—Bugna 12:9-12.

Walay sapayan kon daw ano man ang pag-ulikid sang iban nga tawo sa ila mga isigkatawo, indi gid nila madula si Satanas nga Yawa ukon mabag-o ining sistema nga nagapadamo sang mga biktima. Ano, nian, ang kinahanglan agod malubad ang mga problema sang katawhan? Ang solusyon indi lamang ang isa nga nagaulikid. Kinahanglan ang isa nga may kabubut-on kag gahom sa pagdula kay Satanas kag sa iya bug-os di-matarong nga sistema.

“Paghimuon ang Imo Kabubut-on . . . sa Duta”

Ginasaad sang Dios nga laglagon niya ining malaut nga sistema sang mga butang. Kabubut-on niya kag may gahom sia nga kinahanglan sa paghimo sini. (Salmo 147:5,6; Isaias 40:25-31) Sa matagnaon nga tulun-an sang Daniel sa Biblia, ini gintagna: “Ang Dios sang langit magapatindog sing ginharian nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan nga ginharian, kag magapadayon ini tubtob sa walay katubtuban”—huo, sing dayon. (Daniel 2:44) Ginahunahuna ni Jesucristo ining dayon kag maayo nga langitnon nga panguluhan sang gintudluan niya ang iya mga disipulo sa pagpangabay sa Dios sa pangamuyo: “Magkari ang imo ginharian. Paghimuon ang imo kabubut-on, kon paano sa langit, subong man sa duta.”—Mateo 6:9,10.

Sabton ni Jehova ining mga pangamuyo bangod nagaulikid gid sia sa tawhanon nga pamilya. Suno sa matagnaon nga pinamulong sang Salmo 72, ginhatagan sang Dios sing awtoridad ang iya Anak, si Jesucristo, nga hatagan sing dayon nga paumpaw ang mga imol, ang mga nasit-an, kag ang mga ginapigos nga nagasuportar sa pagginahom ni Jesus. Sa amo, ang gin-inspirar nga salmista nag-amba: “Magahukom sia [ang Mesianiko nga Hari sang Dios] sang mga nasit-an sang katawhan, luwason niya ang mga anak nga lalaki sang imol, kag dugmukon niya ang madaya. . . . Luwason niya ang imol nga nagapangayo sing bulig, subong man ang nasit-an kag ang bisan sin-o nga wala sing manugtabang. Magakaawa sia sa kubos kag imol, kag luwason niya ang mga kalag sang mga imol. Tubson niya ang ila kalag gikan sa pagpigos kag kasingki, kag ang ila dugo mangin bilidhon sa iya itululok.”—Salmo 72:4,12-14.

Sa isa ka palanan-awon may kaangtanan sa aton adlaw, nakita ni apostol Juan ang “bag-ong langit kag ang bag-ong duta,” isa ka bag-o gid nga sistema sang mga butang nga gintukod sang Dios. Daw ano nga pagpakamaayo sa nagaantos nga katawhan! Nagatagna sang himuon ni Jehova, si Juan nagsulat: “Nabatian ko ang mabaskog nga tingog gikan sa trono nga nagasiling: ‘Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.’ Kag ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: ‘Isulat ini, kay ining mga pulong matutom kag matuod.’”—Bugna 21:1-5.

Huo, makapati gid kita sa sining pinamulong, kay ini matutom kag matuod. Sa indi madugay magapanghikot si Jehova agod dulaon sa duta ang kaimulon, gutom, pagpigos, balatian, kag tanan nga inhustisya. Subong sang masunson nga ginapatalupangod sini nga magasin gikan sa Kasulatan, ginapakita sang madamo nga ebidensia nga nagakabuhi kita sa tion nga ining mga saad matuman. Ang ginsaad sang Dios nga bag-ong kalibutan malapit na! (2 Pedro 3:13) Sa indi madugay, ‘lamunon [ni Jehova] ang kamatayon sing dayon’ kag ‘pahiran ang mga luha sa tanan nga nawong.’—Isaias 25:8.

Samtang wala pa ini matabo, malipay kita nga bisan karon may mga tawo nga nagaulikid gid. Ang daku pa nga kabangdanan sang pagkasadya amo nga si Jehova nga Dios mismo nagaulikid gid. Sa indi madugay dulaon niya ang tanan nga pagpigos kag pag-antos.

Masaligan gid ninyo sing bug-os ang mga saad ni Jehova. Ginsaligan gid ini sang iya alagad nga si Josue. Upod ang bug-os nga pagsalig, ginsilingan niya ang dumaan nga katawhan sang Dios: “Nakahibalo gid kamo sa bug-os ninyo nga tagipusuon kag sa bug-os ninyo nga kalag nga wala sing isa ka tinaga sa tanan nga maayong tinaga nga ginpamulong ni Jehova nga inyo Dios sa inyo ang napaslawan. Ang tanan natuman sa inyo. Wala sing isa ka tinaga sini ang napaslawan.” (Josue 23:14) Busa, samtang yari pa ang karon nga sistema sang mga butang, indi kamo magpadaug sa mga pagtilaw nga mahimo ninyo atubangon. Itugyan ang tanan ninyo nga kabalaka kay Jehova, kay nagaulikid gid sia sa inyo.—1 Pedro 5:7.

[Mga laragway sa pahina 7]

Sa ginsaad sang Dios nga bag-ong kalibutan, wala na sing kaimulon, pagpigos, balatian, kag inhustisya sa duta