Ano Karon ang Ginapatuman ni Jehova sa Aton?

“Ang tingog gikan sa panganod [nagsiling]: ‘Ini ang akon Anak, nga hinigugma, nga sa iya nahamuot ako; pamati kamo sa iya.’”—MATEO 17:5.

1. San-o gintuman sang Kasuguan ang katuyuan sini?

SI Jehova naghatag sa pungsod sang Israel sing Kasuguan, lakip ang madamo nga bahin sini. Nahanungod sini, si apostol Pablo nagsulat: “Legal nga mga tulumanon ini may kaangtanan sa unod kag ginpatuman tubtob sa gintalana nga tion agod matadlong ang mga butang.” (Hebreo 9:10) Sang gintuytuyan sang Kasuguan ang nagkalabilin sang mga Israelinhon nga batunon si Jesus subong ang Mesias, ukon Cristo, gintuman sini ang katuyuan sini. Sa amo, si Pablo nagsiling: “Si Cristo amo ang katapusan sang Kasuguan.”—Roma 10:4; Galacia 3:19-25; 4:4,5.

2. Sin-o ang napaidalom sa Kasuguan, kag san-o sila ginhilway gikan sa sini?

² Nagakahulugan bala ini nga ang Kasuguan wala na karon ginapatuman sa aton? Matuod, ang kalabanan nga katawhan wala gid mapaidalom sa Kasuguan, suno sa ginpaathag sang salmista: “Ginasugid [ni Jehova] ang iya pulong kay Jacob, ang iya mga regulasyon kag ang iya hudisyal nga mga desisyon sa Israel. Wala sia maghisayo sing subong sa bisan ano nga pungsod; kag tuhoy sa iya hudisyal nga mga desisyon, wala sila makahibalo sini.” (Salmo 147:19, 20) Sang gintukod sang Dios ang bag-ong katipan pasad sa halad ni Jesus, bisan ang pungsod sang Israel indi na obligado sa pagtuman sa Kasuguan. (Galacia 3:13; Efeso 2:15; Colosas 2:13, 14, 16) Kon amo, kon ang Kasuguan wala na ginapatuman, ano karon ang ginapatuman ni Jehova sa mga luyag mag-alagad sa iya?

Kon Ano ang Ginapatuman ni Jehova

3, 4. (a) Ano gid bala ang ginapatuman ni Jehova sa aton karon? (b) Ngaa dapat naton sundon sing maayo ang mga tikang ni Jesus?

³ Sadtong katapusan nga tuig sang ministeryo ni Jesus, ang iya mga apostoles nga sanday Pedro, Santiago, kag Juan nag-upod sa iya sa mataas nga bukid, ayhan sa putukputukan sang Bukid Hermon. Nakita nila didto ang matagnaon nga palanan-awon tuhoy kay Jesus nga may halangdon nga himaya kag nabatian ang tingog mismo sang Dios nga nagsiling: “Ini ang akon Anak, nga hinigugma, nga sa iya nahamuot ako; pamati kamo sa iya.” (Mateo 17:1-5) Amo gid sini ang ginapatuman ni Jehova sa aton—ang magpamati sa iya Anak kag magsunod sa iya halimbawa kag mga panudlo. (Mateo 16:24) Busa, si apostol Pedro nagsulat: “Si Cristo nag-antos tungod sa inyo, nga nagabilin sa inyo sing huwaran agod nga pagsundon ninyo sing maayo ang iya mga tikang.”—1 Pedro 2:21.

⁴ Ngaa dapat naton sundon sing maayo ang mga tikang ni Jesus? Bangod paagi sa pag-ilog sa iya, ginailog naton si Jehova nga Dios. Kilala sing maayo ni Jesus ang Amay, kay binilyon ka tuig nga kaupod niya sia sa langit antes sia magkari sa duta. (Hulubaton 8:22-31; Juan 8:23; 17:5; Colosas 1:15-17) Samtang sa duta, mainunungon nga gintiglawas ni Jesus ang iya Amay. Sia nagpaathag: “Suno sa gintudlo sa akon sang Amay ginapamulong ko ining mga butang.” Sa katunayan, gin-ilog gid sing maayo ni Jesus si Jehova amo nga nakasiling sia: “Sia nga nakakita sa akon nakakita man sa Amay.”—Juan 8:28; 14:9.

5. Sa anong kasuguan napaidalom ang mga Cristiano, kag san-o ginpatuman yadto nga kasuguan?

⁵ Ano ang nalakip sa pagpamati kay Jesus kag sa pag-ilog sa iya? Nagakahulugan bala ini nga napaidalom kita sa isa ka kasuguan? Si Pablo nagsulat: “Ako mismo wala sa idalom sang kasuguan.” Ginapatuhuyan niya ang “daan nga katipan,” ang Kasuguan nga katipan nga ginhimo upod sa Israel. Ginbaton ni Pablo nga yara sia “sa idalom sang kasuguan ni Cristo.” (1 Corinto 9:20, 21; 2 Corinto 3:14) Sang matapos ang daan nga Kasuguan nga katipan, ginpatuman ang “bag-ong katipan” upod ang “kasuguan ni Cristo” nga obligado nga sundon sang tanan nga alagad ni Jehova karon.—Lucas 22:20; Galacia 6:2; Hebreo 8:7-13.

6. Paano malaragway ang “kasuguan ni Cristo,” kag paano naton ini ginatuman?

⁶ Wala ginpasulat ni Jehova ang “kasuguan ni Cristo” sa porma sang isa ka hubon sang kasuguan, nagaorganisar sini sa lainlain nga mga kategoriya, subong sang ginhimo anay sa daan nga Kasuguan nga katipan. Ining bag-ong kasuguan para sa mga sumulunod ni Cristo wala maglakip sing masangkad nga listahan sang detalyado nga mga regulasyon. Apang, sa iya Pulong, ginhuptan ni Jehova ang apat ka komprehensibo nga rekord sang kabuhi kag mga panudlo sang iya Anak. Dugang pa, gin-inspirar sang Dios ang pila sang unang mga sumulunod ni Jesus sa pag-aman sing nasulat nga mga instruksion may kaangtanan sa personal nga paggawi, mga hilikuton sa kongregasyon, paggawi sa sulod sang pamilya, kag iban pa nga mga butang. (1 Corinto 6:18; 14:26-35; Efeso 5:21-33; Hebreo 10:24, 25) Kon ginapahisuno naton ang aton kabuhi sa halimbawa kag mga panudlo ni Jesucristo kag ginapamatian ang laygay sang inspirado nga unang-siglo nga mga manunulat sang Biblia, ginatuman naton ang “kasuguan ni Cristo.” Ginapatuman ini karon ni Jehova sa iya mga alagad.

Ang Pagkaimportante Sang Gugma

7. Paano ginpadaku ni Jesus ang kahulugan sang iya kasuguan sadtong katapusan nga Paskwa upod sa iya mga apostoles?

⁷ Samtang ang gugma importante sa idalom sang Kasuguan, ini mismo ang sentro, ukon labing importante nga bahin, sang kasuguan ni Cristo. Ini nga katunayan ginpadaku ni Jesus sang nakigsapol sia sa iya mga apostoles sa pagsaulog sang Paskwa sang 33 C.E. Suno sa sumaryo ni apostol Juan sa kon ano ang natabo sadto nga gab-i, ang tinagipusuon nga mga pulong ni Jesus naglakip sing 28 ka pagpatuhoy sa gugma. Gin padaku sini sa iya mga apostoles ang kahulugan, ukon pagkaimportante, sang iya kasuguan. Sing talalupangdon, ginsugdan ni Juan ang iya pagsaysay sa mga hitabo sadtong halandumon nga gab-i paagi sa pagsiling: “Bangod nakahibalo sia antes sang piesta sang paskwa nga nag-abot na ang iya takna nga magtaliwan sa sining kalibutan pakadto sa Amay, si Jesus, nga naghigugma sang mga iya nga yari sa kalibutan, naghigugma sa ila tubtob sa katapusan.”—Juan 13:1.

8. (a) Ano ang nagapakita nga may dalayon nga pagbinais sa tunga sang mga apostoles? (b) Paano gintudluan ni Jesus ang iya mga apostoles sing isa ka leksion sang pagkamapainubuson?

⁸ Ginhigugma ni Jesus ang iya mga apostoles, bisan pa nagtinguha sia nga daw wala sing kadalag-an nga buligan sila nga madaug ang ila daku nga paghandum sing gahom kag posisyon. Mga binulan antes sila mag-abot sa Jerusalem, ‘nagbaisay sila kon sin-o ang labing daku.’ Kag antes gid lang sila mag-abot sa siudad sa pagsaulog sang Paskwa, ang binais tuhoy sa posisyon nag-utwas liwat. (Marcos 9:33-37; 10:35-45) Kon ano ang natabo wala madugay pagkatapos nga nagsulod ang mga apostoles sa naibabaw nga hulot agod makigbahin sa ila katapusan nga Paskwa sing magkaupod nagapakita nga isa ini ka dalayon nga problema. Wala sadto sang naghimulos sa higayon nga maghimo sing kinabatasan, maabiabihon nga paghinaw sa mga tiil sang iban. Agod tudluan sila sing leksion sa pagkamapainubuson, si Jesus mismo ang naghinaw sang ila mga tiil.—Juan 13:2-15; 1 Timoteo 5:9,10.

9. Paano gin-atubang ni Jesus ang kahimtangan nga natabo pagkatapos sang katapusan nga Paskwa?

⁹ Walay sapayan sadto nga leksion, pagkatapos masaulog ang Paskwa kag ginsugdan ni Jesus ang Memoryal sang iya nagahilapit nga kamatayon, talupangda kon ano liwat ang natabo. Ang rekord sang Ebanghelyo ni Lucas nagasiling: “Nag-utwas man ang kasuayon sa tunga nila sa kon sin-o sa ila ang makabig nga labing daku.” Sa baylo nga maakig sa mga apostoles kag sabdungon sila, maluluy-on nga ginlaygayan sila ni Jesus tuhoy sa kinahanglanon nga mangin tuhay gikan sa gutom-sa-gahom nga mga gumalahom sang kalibutan. (Lucas 22:24-27) Nian naghatag sia sang mahimo matawag nga sadsaran sang kasuguan ni Cristo, nga nagasiling: “Nagahatag ako sa inyo sing bag-ong sugo, nga higugmaon ninyo ang isa kag isa; subong nga ako naghigugma sa inyo, nga higugmaon man ninyo ang isa kag isa.”—Juan 13:34.

10. Ano nga sugo ang ginhatag ni Jesus sa iya mga disipulo, kag ano ang nalakip sa sini?

¹⁰ Sang ulihi sadto nga gab-i ginpakita ni Jesus kon tubtob diin himuon ang tulad-Cristo nga gugma. Sia nagsiling: “Ini amo ang akon sugo, nga maghigugmaanay kamo subong nga ako naghigugma sa inyo. Wala sing bisan sin-o nga may gugma nga daku pa sini, nga ihatag sang isa ang iya kalag tungod sa iya mga abyan.” (Juan 15:12, 13) Nagsiling bala si Jesus nga ang iya mga sumulunod dapat handa nga manginmatay tungod sa mga masigkatumuluo kon ginakinahanglan ini sang higayon? Amo ina ang paghangop ni Juan, nga nakasaksi sini nga okasyon, kay nagsulat sia sang ulihi: “Sa sini nakilala naton ang gugma, bangod ginsungka sinang isa [si Jesucristo] ang iya kalag tungod sa aton; kag obligado kita nga isungka ang aton mga kalag tungod sa aton mga kauturan.”—1 Juan 3:16.

11. (a) Paano naton ginatuman ang kasuguan ni Cristo? (b) Ano nga halimbawa ang ginhatag ni Jesus?

¹¹ Gani, nian, wala naton ginatuman ang kasuguan ni Cristo paagi lamang sa pagtudlo sa iban tuhoy sa iya. Dapat man kita magkabuhi kag maggawi kaangay ni Jesus. Matuod, naggamit si Jesus sing matahom, pinili-sing-maayo nga mga pulong sa iya mga diskurso. Apang, nagtudlo man sia paagi sa halimbawa. Bisan pa nga si Jesucristo isa ka gamhanan nga espiritu nga tinuga sa langit, ginhimuslan niya ang higayon nga himuon ang mga intereses sang iya Amay sa duta kag ipakita kon paano kita dapat magkabuhi. Sia mapainubuson, malulo, kag mapatugsilingon, nagabulig sa mga nabug-atan kag napigos. (Mateo 11:28-30; 20:28; Filipos 2:5-8; 1 Juan 3:8) Kag ginlaygayan ni Jesus ang iya mga sumulunod nga maghigugmaanay, subong nga sia naghigugma sa ila.

12. Ngaa masiling naton nga wala ginapakadiutay sang kasuguan ni Cristo ang kinahanglanon nga higugmaon si Jehova?

¹² Ano ang bahin sang gugma kay Jehova—ang labing daku nga sugo sang Kasuguan—sa kasuguan ni Cristo? (Mateo 22:37, 38; Galacia 6:2) Ikaduha nga bahin? Indi gid! Ang gugma kay Jehova kag ang gugma sa aton mga masigka-Cristiano indi mabulag. Indi gid mahigugma sang isa si Jehova kon indi man niya paghigugmaon ang iya utod, kay si apostol Juan nagsulat: “Kon ang bisan sin-o magasiling: ‘Ginahigugma ko ang Dios,’ apang ginadumtan ang iya utod, butigon sia. Kay sia nga wala nagahigugma sang iya utod, nga makita niya, indi makahigugma sa Dios, nga indi niya makita.”—1 Juan 4:20; ipaanggid ang 1 Juan 3:17,18.

13. Ano ang epekto sang pagkamatinumanon sang mga disipulo sa bag-ong sugo ni Jesus?

¹³ Sang ginhatag ni Jesus sa iya mga disipulo ang bag-ong sugo nga maghigugmaanay sila subong nga sia naghigugma sa ila, ginlaragway niya ang mahimo nga epekto sini. “Sa sini ang tanan makahibalo nga kamo mga disipulo ko,” siling niya, “kon maghigugmaanay kamo.” (Juan 13:35) Suno kay Tertullian, nga nagkabuhi kapin sa isa ka gatos ka tuig sa tapos napatay si Jesus, ang utudnon nga gugma sang unang mga Cristiano may amo gid sina nga epekto. Ginbalikwat ni Tertullian ang mga indi Cristiano nga nagsiling tuhoy sa mga sumulunod ni Cristo: ‘Tan-awa kon paano sila nagahigugmaanay kag kon paano nga handa gani sila nga manginmatay tungod sa isa kag isa.’ Mahimo naton pamangkuton ang aton kaugalingon: ‘Nagapakita bala ako sing subong sini nga gugma sa mga masigka-Cristiano amo nga nagapamatuod ini nga isa ako sang mga disipulo ni Jesus?’

Kon Paano Naton Mapamatud-an ang Aton Gugma

14, 15. Ano ang mahimo nga nagapabudlay sang pagtuman sa kasuguan ni Cristo, apang ano ang makabulig sa aton nga tumanon ini?

¹⁴ Ang mga alagad ni Jehova kinahanglan magpadayag sing tulad-Cristo nga gugma. Apang nabudlayan bala kamo nga higugmaon ang mga masigka-Cristiano nga nagapakita sing mahamkunon nga mga kinaiya? Ti, subong sang nakita na naton, bisan ang mga apostoles nagbaisay kag nagtinguha nga pauswagon ang ila kaugalingon nga mga kaayuhan. (Mateo 20:​20-24) Ang mga taga-Galacia nagkamugay man. Sa tapos mapaathag nga ang gugma sa isigkatawo nagtuman sang Kasuguan, si Pablo nagpaandam sa ila: “Apang, kon padayon kamo nga magkinagtanay kag maghalunhunay, mag-andam kamo nga wala kamo nagalaglag sa isa kag isa.” Sa tapos mapaanggid ang mga buhat sang unod sa mga bunga sang espiritu sang Dios, gindugang ni Pablo ang laygay: “Indi kita magmangin bugalon, nga nagasulsol sang pagpaindisanay, nga nagahinisaay.” Pagkatapos sina ang apostol naglaygay: “Padayon ninyo nga dalhon ang mga lulan sang isa kag isa, kag sa amo tumana ninyo ang kasuguan ni Cristo.”—Galacia 5:14–6:2.

¹⁵ Paagi sa pagsugo nga tumanon ang kasuguan ni Cristo, mabudlay gid bala ang ginapatuman ni Jehova sa aton? Bisan pa nga mahimo mabudlay nga magmalulo sa mga tawo nga, kon sa aton pa, nagkagat sa aton kag nagpilas sang aton balatyagon, obligado kita nga ‘mangin mga manug-ilog sang Dios, subong nga mga anak nga hinigugma, kag padayon nga maglakat sa gugma.’ (Efeso 5:1,2) Dapat naton padayon nga tan-awon ang halimbawa sang Dios, nga ‘nagarekomendar sang iya mismo nga gugma sa aton amo nga, sang mga makasasala pa kita, si Cristo napatay tungod sa aton.’ (Roma 5:8) Paagi sa pagbulig sa iban, lakip na ang mga nagatratar sa aton sing malain, maagom naton ang kaayawan nga mahibaluan nga ginailog naton ang Dios kag matinumanon kita sa kasuguan ni Cristo.

16. Paano naton mapamatud-an ang aton gugma sa Dios kag kay Cristo?

¹⁶ Dapat naton dumdumon nga ginapamatud-an naton ang aton gugma paagi sa aton ginahimo, indi lamang paagi sa aton ginahambal. Bisan si Jesus nakakita anay sing isa ka bahin sang kabubut-on sang Dios nga mabudlay batunon bangod sang tanan nga nadalahig sa sini. “Amay, kon luyag mo, kuhaa ining tagayan sa akon,” pangamuyo ni Jesus. Apang maabtik sia nga nagdugang: “Apang, matuman kuntani, indi ang akon kabubut-on, kundi ang imo.” (Lucas 22:42) Walay sapayan sang tanan nga gin-antos ni Jesus, ginhimo niya ang kabubut-on sang Dios. (Hebreo 5:7,8) Ang pagkamatinumanon isa ka pamatuod sang aton gugma kag nagapakita nga ginabaton naton ang dalanon sang Dios subong ang labing maayo. “Amo ini ang kahulugan sang gugma sang Dios,” siling sang Biblia, “nga sundon naton ang iya mga sugo.” (1 Juan 5:3) Kag si Jesus nagsiling sa iya mga apostoles: “Kon ginahigugma ninyo ako, tumanon ninyo ang akon mga sugo.”—Juan 14:15.

17. Anong pinasahi nga sugo ang ginhatag ni Jesus sa iya mga sumulunod, kag paano naton nahibaluan nga naaplikar ini sa aton karon?

¹⁷ Luwas sa pagsugo sa iya mga disipulo nga maghigugmaanay sila, anong pinasahi nga sugo ang ginhatag ni Cristo sa ila? Ginsugo niya nga himuon nila ang pagbantala nga hilikuton nga sa sini ginhanas niya sila. Si Pedro nagsiling: “Ginsugo niya kami sa pagbantala sa mga tawo kag sa paghatag sing maid-id nga panaksi.” (Binuhatan 10:42) Si Jesus espesipiko nga nagsugo: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20; Binuhatan 1:8) Ginpakita ni Jesus nga ini nga instruksion dapat man karon sundon sang iya mga sumulunod sa “tion sang katapusan,” kay sia nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (Daniel 12:4; Mateo 24:14) Sa pagkamatuod, kabubut-on sang Dios nga magbantala kita. Apang, ang iban mahimo maghunahuna nga ang pagpatuman sang Dios sini nga hilikuton sa aton mabudlay gid. Apang mabudlay gid bala?

Kon Ngaa Daw Mabudlay Ini

18. Ano ang dapat naton dumdumon kon nagaantos kita tungod sa paghimo sang ginapatuman ni Jehova?

¹⁸ Subong sang nakita na naton, ginsugo ni Jehova ang katawhan nga sundon ang lainlain nga mga tulumanon sa bug-os nga maragtas. Kag subong nga ang ginsugo sa ila nagakalainlain, nagakalainlain man ang mga pagtilaw nga ila naagihan. Ang pinalangga nga Anak sang Dios nakaagom sing pinakamabudlay nga mga pagtilaw, nga sang ulihi ginpatay sa pinakamapintas nga paagi bangod sang paghimo niya sang ginapatuman sang Dios. Apang kon mag-antos kita tungod sa pagsunod sa sugo ni Jehova sa aton, dapat naton dumdumon nga indi sia ang ginabangdan sang aton mga pagtilaw. (Juan 15:18-20; Santiago 1:​13-15) Ang pagrebelde ni Satanas nagpasulod sang sala, pag-antos, kag kamatayon, kag sia ang nagtuga sing mga sirkunstansia nga masunson nagapabudlay gid sa aton nga tumanon kon ano ang ginasugo ni Jehova sa iya mga alagad.—Job 1:6-19; 2:1-8.

19. Ngaa isa ka pribilehiyo nga himuon ang ginapatuman sang Dios sa aton paagi sa iya Anak?

¹⁹ Paagi sa iya Anak, si Jehova nagsugo nga sa sining tion sang katapusan, ang Iya mga alagad magabantala sa bug-os nga duta nga ang lamang nga solusyon sa tanan nga pag-antos sang tawo amo ang paggahom sang Ginharian. Dulaon sining panguluhan sang Dios ang tanan nga problema sa duta—inaway, krimen, kaimulon, katigulangon, balatian, kamatayon. Paluntaron man sang Ginharian ang matahom nga paraiso sa duta, nga sa sini bisan ang mga patay banhawon. (Mateo 6:9,10; Lucas 23:43; Binuhatan 24:15; Bugna 21:3,4) Isa gid ka pribilehiyo nga ibantala ang maayong balita tuhoy sini nga mga butang! Sing maathag, nian, wala sing problema sa kon ano ang ginasugo ni Jehova sa aton nga himuon. Makasumalang kita sing pagpamatok, apang si Satanas nga Yawa kag ang iya kalibutan amo ang mabasol sa sini.

20. Paano naton atubangon ang bisan ano nga hangkat nga ginahatag sang Yawa?

²⁰ Paano naton maatubang sing madinalag-on ang bisan ano nga hangkat nga ginahatag ni Satanas? Paagi sa pagdumdom sining mga pulong: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.” (Hulubaton 27:11) Si Jesus naghatag kay Jehova sing sabat sa pagyaguta ni Satanas paagi sa pagbilin sing kapat-uran sang langitnon nga kabuhi nga himuon ang kabubut-on sang iya Amay sa duta. (Isaias 53:12; Hebreo 10:7) Subong isa ka tawo, ginbatas ni Jesus ang tanan nga pagtilaw nga ginhatag sa iya, bisan ang kamatayon sa usok nga pag-antos. Kon sundon naton sia subong aton Huwaran, mabatas man naton ang mga pag-antos kag mahimo ang ginapatuman ni Jehova sa aton.—Hebreo 12:1-3.

21. Ano ang imo balatyagon sa gugma nga ginpakita ni Jehova kag sang iya Anak?

²¹ Daw ano ka daku nga gugma ang ginpakita sang Dios kag sang iya Anak sa aton! Bangod sang halad ni Jesus, ang matinumanon nga katawhan may paglaum nga magkabuhi sing dayon sa Paraiso. Gani indi naton pagtugutan ang bisan ano nga butang sa pagbalabag sa aton paglaum. Sa baylo, personal naton nga dumdumon ang ginhimo ni Jesus, kaangay ni Pablo, nga nagsiling: “Ang Anak sang Dios . . . naghigugma sa akon kag nagtugyan sang iya kaugalingon tungod sa akon.” (Galacia 2:20) Kag kabay nga ipakita naton ang tinagipusuon nga pagpasalamat sa aton mahigugmaon nga Dios, nga si Jehova, nga wala gid nagapatuman sing mabudlay sa aton.

Paano Kamo Magasabat?

◻ Ano ang ginapatuman ni Jehova sa aton karon?

◻ Sa iya katapusan nga gab-i upod sa iya mga apostoles, paano ginpadaku ni Jesus ang pagkaimportante sang gugma?

◻ Paano naton mapamatud-an nga ginahigugma naton ang Dios?

◻ Ngaa isa ka pribilehiyo nga himuon ang ginapatuman ni Jehova sa aton?

[Laragway sa pahina 23]

Anong leksion ang gintudlo ni Jesus sang ginhinawan niya ang mga tiil sang iya mga apostoles?

[Laragway sa pahina 25]

Walay sapayan sang pagpamatok, ang pagbantala sing maayong balita isa ka makalilipay nga pribilehiyo