Paghatag kay Jehova sang Takus sa Iya
PANUGIRON NI TIMOLEON VASILIOU
Gindakop ako bangod sang pagtudlo sing Biblia sa minuro sang Aidhonochori. Ginhukas sang mga pulis ang akon mga sapatos kag ginbakol ang dapadapa sang akon mga tiil. Samtang nagapadayon ang pagbakol, nagbinhod ang akon mga tiil kag indi ko na mabatyagan ang sakit. Antes ko ipaathag ang ginbangdan sining kapintas, nga sadto kinaandan sa Gresya, pasugira anay ako kon paano ako nangin manunudlo sing Biblia.
WALA madugay nga natawo ako sang 1921, nagsaylo ang amon pamilya sa banwa sang Rodholívos, sa naaminhan nga Gresya. Sang pamatan-on ako, magamo ang akon kabuhi. Sang 11 anyos ako, nagsugod ako sa pagpanigarilyo. Sang ulihi, nangin palahubog kag sugarol ako, kag nagakadto ako sa magansal nga mga kinasadya halos kada gab-i. May kinaadman ako sa musika, gani nag-entra ako sa lokal nga banda. Sa sulod sang mga isa ka tuig, matokar ko na ang kalabanan nga instrumento sang banda. Apang, sa amo man nga tion, palatuon ako kag maluyagon sa hustisya.
Sang maaga nga bahin sang 1940, samtang nagadabdab ang Bug-os Kalibutan nga Inaway II, gin-agda ang amon banda nga magtokar sa lubong sang isa ka bata nga babayi. Sa lulubngan, indi mapunggan ang kasubo sang nagahinibi nga mga himata kag mga abyan. Ang ila sobra nga pagkawalay paglaum nagdulot sa akon. Nagpalibog ako, ‘Ngaa nagakapatay kita? May kapin pa bala sa kabuhi sangsa aton malip-ot nga pagluntad? Diin ko masapwan ang mga sabat?’
Pila ka adlaw sang ulihi, natalupangdan ko ang isa ka kopya sang Bag-ong Testamento sa bulutangan sang mga libro sa akon balay. Ginkuha ko ini kag ginbasa. Sang nabasa ko ang mga pulong ni Jesus sa Mateo 24:7 tuhoy sa lapnag nga inaway subong bahin sang tanda sang iya presensia, nahantop ko nga ang iya mga pulong mahimo naaplikar sa aton tion. Sang masunod nga mga semana, ginbasa ko ini nga kopya sang Cristianong Griegong Kasulatan sing pila ka beses.
Nian sang Disiembre 1940, nagduaw ako sa isa ka pamilya sa kasilingan—sa isa ka balo nga babayi kag sa iya lima ka kabataan. Sa ila alibungan, sa isa ka hantal sang mga polyeto, nakita ko ang isa nga natig-uluhan sing A Desirable Government, nga ginbalhag sang Watch Tower Bible and Tract Society. Nagpabilin ako didto sa alibungan kag ginbasa ang bug-os nga polyeto. Nakumbinse ako sing bug-os gikan sa akon nabasa nga nagakabuhi gid kita sa ginatawag sang Biblia nga “katapusan nga mga adlaw” kag sa indi madugay tapuson ni Jehova nga Dios ining sistema sang mga butang kag buslan ini sing isa ka matarong nga bag-ong kalibutan.—2 Timoteo 3:1-5; 2 Pedro 3:13.
Ang nagganyat ilabi na sa akon amo ang pamatuod sang Kasulatan nga ang mga matutom magakabuhi sing dayon sa paraiso sa duta kag madula na ang pag-antos kag kamatayon sa sinang bag-ong kalibutan sa idalom sang paggahom sang Ginharian sang Dios. (Salmo 37:9-11, 29; Bugna 21:3, 4) Samtang nagabasa ako, ginpasalamatan ko ang Dios sa pangamuyo tungod sining tanan nga butang, kag ginpangabay ko sia nga ipakita sa akon kon ano ang iya mga ginapatuman. Nangin maathag sa akon nga takus si Jehova nga Dios sang akon bug-os-kalag nga debosyon.—Mateo 22:37.
Paghikot Suno sa Akon Natun-an
Kutob sadto, nag-untat ako sa pagpanigarilyo, pagpahubog, kag pagsugal. Gintipon ko ang lima ka kabataan sang balo nga babayi kag ang akon tatlo ka manghod nga lalaki kag babayi, kag ginpaathag ko sa ila ang akon natun-an sa polyeto. Wala magdugay ginpalapnag namon tanan ang diutay nga nahibaluan namon. Nakilal-an kami sa komunidad subong mga Saksi ni Jehova, bisan wala pa kami sing nakilala nga isa ka Saksi. Kutob sa umpisa, naghinguyang ako sing kapin sa isa ka gatos ka oras kada bulan sa pagsugid sa iban sang matahom nga mga butang nga akon natun-an.
Ang isa ka lokal nga pari sang Griegong Ortodokso nagkadto sa meyor agod ireklamo kami. Apang pila ka adlaw antes sini, lipod sa amon, nakita sang isa ka pamatan-on nga Saksi ang isa ka kabayo nga nadula kag gin-uli ini sa tag-iya. Bangod sina nga pagkabunayag, gintahod sang meyor ang mga Saksi, kag wala sia mamati sa pari.
Isa ka adlaw sang mga Oktubre 1941, samtang nagapanaksi ako sa tiendahan, may isa ka tawo nga naghinambit tuhoy sa isa ka Saksi ni Jehova nga nagaistar sa kaiping nga banwa. Isa sia anay ka pulis nga nagahingalan kay Christos Triantafillou. Ginduaw ko sia kag akon nahibaluan nga Saksi na sia kutob pa sang 1932. Malipayon gid ako sang ginhatagan niya ako sing madamong daan nga mga publikasyon sang Watch Tower! Nakabulig gid ini sa akon nga mag-uswag sa espirituwal.
Sang 1943, ginsimbuluhan ko ang akon dedikasyon sa Dios paagi sa bawtismo sa tubig. Nagahiwat na ako sadto sing mga pagtuon sa Biblia sa tatlo ka kaiping nga mga minuro—sa Dhravískos, sa Palaeokomi, kag sa Mavrolofos. Gingamit ko ang libro nga The Harp of God subong amon bulig sa pagtuon sa Biblia. Sang ulihi, may pribilehiyo ako nga makita ang apat ka kongregasyon sang mga Saksi ni Jehova nga natukod sa sining lugar.
Pagbantala Walay Sapayan sang mga Sablag
Sang 1944, ginhilway ang Gresya gikan sa pagpanakop sang Alemanya, kag pila ka tion sang ulihi, nabuksan ang komunikasyon upod sa sanga talatapan sang Watch Tower Society sa Atenas. Gin-agda ako sang sanga talatapan nga magbantala sa isa ka teritoryo nga halos wala pa sing isa nga nakabati sing mensahe sang Ginharian. Sang makasaylo didto, nag-obra ako sa uma sa tatlo ka bulan kag ginhinguyang ang nabilin nga bahin sang tuig sa ministeryo.
Sadto nga tuig, ginpakamaayo ako nga makita nga mabawtismuhan ang akon iloy, subong man ang balo nga babayi kag ang iya kabataan, luwas sa iya kinagot nga babayi, si Marianthi, nga nabawtismuhan sang 1943 kag nangin pinalangga ko nga asawa sang Nobiembre sadto nga tuig. Katluan ka tuig sang ulihi, sang 1974, nangin bawtismado man nga Saksi ang akon amay.
Sang maaga nga bahin sang 1945 nabaton namon ang una nga mimeographed nga kopya sang Ang Lalantawan halin sa sanga talatapan. Ang panguna nga artikulo sini natig-uluhan sing “Lakat Kamo, Himua nga Disipulo ang Tanan nga Pungsod.” (Mateo 28:19, The Emphatic Diaglott) Ginbiyaan namon sa gilayon ni Marianthi ang amon balay agod maghikot sa malayo nga mga teritoryo sa sidlangan sang Suba Strymon. Nagbuylog sa amon sang ulihi ang iban nga mga Saksi.
Masunson kami nagalakat nga nagatiniil sa pagkadto sa isa ka minuro, nga nagalakat sing kinilometro sa mga pil-as kag mga bukid. Ginhimo namon ini agod amligan ang amon mga sapatos kay kon maupod ini, wala na kami sing ibulos. Sang mga tuig kutob sang 1946 tubtob 1949, nagdabdab ang inaway sibil sa Gresya, kag makatalagam gid ang maglakbay. Kinaandan lang nga makita ang mga bangkay nga nagahamyang sa dalan.
Sa baylo nga maluyahan sing buot bangod sang mga kabudlayan, nagpadayon kami sa pag-alagad sing makugi. Madamong beses nga nabatyagan ko ang ginbatyag sang salmista nga nagsulat: “Bisan nagalatas ako sa nalupyakan sang landong sang kamatayon, wala ako sing kahadlukan nga malaut, kay ikaw kaupod nakon; ang imo bilugon kag ang imo sungkod amo ang nagalipay sa akon.” (Salmo 23:4) Sini nga tion masunson nga wala kami nagapauli sing sinemana, kag kon kaisa naghinguyang ako sing kapin sa 250 ka oras sa isa ka bulan sa ministeryo.
Ang Amon Ministeryo sa Aidhonochori
Ang isa sa mga minuro nga amon ginduaw sang 1946 amo ang Aidhonochori, nga nahamtang sa ibabaw sang bukid. Didto nakilala namon ang isa ka tawo nga nagsiling sa amon nga may duha ka lalaki sa minuro nga luyag makabati sang mensahe sang Biblia. Apang, bangod nahadlok ang tawo sa iya mga kaingod, indi niya luyag nga idul-ong kami sa ila. Natultulan gid man namon ang ila puluy-an kag gin-amuma kami sing maayo. Sa katunayan, pagligad sang pila lamang ka minuto, napuno sing tawo ang salas! Mga himata nila sila ukon suod nga mga abyan. Nakibot gid ako nga makita sila nga nagalingkod kag nagapamati sing maayo sa amon. Nahibaluan namon sang ulihi nga madugay na gali sila nga nagahulat sing malangkagon nga makapakig-angot sa mga Saksi ni Jehova, apang sang panahon sang pagpanakop sang mga Aleman, wala sing Saksi sa ila lugar. Ano ang nagpukaw sang ila interes?
Ang duha ka ulo sang pamilya nangin prominente sa lokal nga partido Komunista, kag nagtudlo sila sing mga ideya sang Komunista sa mga tawo. Apang sang ulihi nabasa nila ang isa ka kopya sang libro nga Government, nga ginbalhag sang Watch Tower Society. Subong resulta sang ila pagbasa sini, nakumbinse sila nga ang lamang nga paglaum para sa himpit kag matarong nga panguluhan amo ang Ginharian sang Dios.
Nakigsugilanon kami sa sining mga lalaki kag sa ila mga abyan tubtob sa tungang-gab-i. Naayawan gid sila sa pasad-sa-Biblia nga mga sabat sa ila mga pamangkot. Apang, wala madugay pagkatapos sadto, ang mga Komunista sa minuro nagbuko sa pagpatay sa akon bangod ginkabig nila ako nga responsable sa pagkumbertir sa ila anay mga lider. Huo gali, lakip sa nagtambong sadtong una nga gab-i amo ang tawo nga nagsugid sa akon tuhoy sa mga interesado sa minuro. Sang ulihi nag-uswag sia sa ihibalo sa Biblia, nagpabawtismo, kag sang ulihi nangin Cristianong gulang.
Mapintas nga Paghingabot
Wala madugay pagkatapos makigkita sa sining mga Komunista anay, duha ka pulis ang nagsulod sa balay diin nagahiwat kami sing miting. Gindakop nila ang apat sa amon nga natayaan sing pusil kag gindala sa estasyon sang pulis. Didto gin-akigan kami sang tenyente sang pulis, nga may suod nga koneksion sa klero sang Griegong Ortodokso. Sang ulihi, namangkot sia, “Ti, ano ang pagahimuon ko sa inyo?”
“Bakulon ta sila!” singgit sing dungan sang iban nga mga pulis nga nagatindog sa likod namon.
Nagob na sadto ang kagab-ihon. Ginkandaduhan kami sang mga pulis sa basement kag nagkadto sila sa taberna sa pihak nga hulot. Sang nahubog na sila, nagbalik sila kag gindala ako sa ibabaw.
Sang nakita ko ang ila kahimtangan, nahantop ko nga mahimo nila ako patyon sa bisan ano nga tion. Gani nangamuyo ako sa Dios nga hatagan ako sing kusog sa pagbatas sa bisan ano man nga mahimo ko antuson. Nagkuha sila sang mga bilugon nga kahoy kag, subong sang gin-asoy ko sa pamuno, ginbakol nila ako sa dapadapa sang akon mga tiil. Pagkatapos sadto ginbakol nila ang bug-os ko nga lawas, kag dayon ginhaboy nila ako balik sa basement. Masunod gindala nila ang isa pa ka biktima kag ginbakol sia.
Sa amo man nga tion, gingamit ko ang kahigayunan nga ihanda ang duha pa ka pamatan-on nga Saksi sa pag-atubang sa pagtilaw. Apang sa baylo ginbalik ako sang pulis sa ibabaw. Gin-uba nila ang akon panapton, kag ang lima sa ila nagbakol sa akon sa sulod sang mga isa ka oras, nga nagtapaktapak sang ila mga botas sa akon ulo. Nian ginhulog nila ako sa hagdanan, diin nadulaan ako sing pangalibutan sa sulod sang mga 12 ka oras.
Sang ginpaguwa kami sang ulihi, ginpadayon kami sang isa ka pamilya sa minuro sa isa ka gab-i kag gin-atipan kami. Sang masunod nga adlaw, naglakat kami pauli. Tuman sa amon ka lapyo kag kaluya bangod sang pagbakol amo nga ang paglakbay, nga kinaandan lang nga nagalawig sing duha ka oras nga paglakat, nangin walo ka oras. Grabe ang akon pagpalamanog bangod sang pagbakol sa bagay nga daw wala ako makilala ni Marianthi.
Pag-uswag Walay Sapayan sang Pagpamatok
Sang 1949, samtang nagapadayon gihapon ang inaway sibil, nagsaylo kami sa Tesalonica. Gintangdo ako nga mag-alagad subong kabulig nga alagad sang kongregasyon sa isa sang apat ka kongregasyon sa siudad. Pagligad sang isa ka tuig nag-uswag ang kongregasyon tubtob nga nakatukod kami sing isa pa, kag gintangdo ako subong alagad sang kongregasyon, ukon nagadumala nga manugtatap. Isa ka tuig sang ulihi ang bag-o nga kongregasyon halos nagdoble sa kadamuon, kag isa pa ka kongregasyon ang natukod!
Naakig ang mga manugpamatok sa pag-uswag sang mga Saksi ni Jehova sa Tesalonica. Isa ka adlaw sang 1952 sang nagpauli ako halin sa trabaho, nasapwan ko nga sunog na ang amon balay. Haluson nakalampuwas si Marianthi. Sa miting sadto nga gab-i, dapat namon ipaathag kon ngaa mahigko ang amon mga bayo—nadula namon ang tanan nga butang. Ang amon Cristianong mga kauturan mahinuklugon kag masinakdagon gid.
Sang 1961, gintangdo ako sa paglakbay nga hilikuton, nga nagaduaw sang lainlain nga mga kongregasyon kada semana agod pabakuron ang mga kauturan sa espirituwal. Sa masunod nga 27 ka tuig, ginduaw namon ni Marianthi ang mga sirkito kag mga distrito sa Macedonia, Thrace, kag Thessaly. Bisan pa halos nabulag ang akon pinalangga nga Marianthi kutob sang 1948, maisugon sia nga nag-alagad kaupod ko, nagbatas sang madamo nga pagtilaw sa pagtuo. Sia man gindakop, ginbista, kag ginbilanggo sing madamong beses. Nian nagluya ang iya panglawas, kag napatay sia sang 1988 pagkatapos sang malawig nga pagpakig-away sa kanser.
Sadto man nga tuig, gintangdo ako nga mag-alagad subong espesyal payunir sa Tesalonica. Sa karon, pagkatapos sang 56 ka tuig nga pag-alagad kay Jehova, makapangabudlay gihapon ako sing lakas kag makapakigbahin sa tanan nga bahin sang ministeryo. Kon kaisa, nagahiwat ako sing tubtob sa 20 ka pagtuon sa Biblia upod sa mga interesado kada semana.
Nahangpan ko nga yari gid kita sa panugod sang daku nga programa sang pagpanudlo nga magapadayon sa bag-ong kalibutan ni Jehova kag magapadayon sa isa ka libo ka tuig. Apang, ginabatyag ko nga indi ini ang tion nga maghinay kita, magpabuyanbuyan, ukon maghinguyang sang aton tion sa pagpaayaw sa aton undanon nga mga handum. Nagapasalamat ako sa Dios sa pagbulig sa akon nga matuman ang akon pangako sang umpisa pa bangod takus gid si Jehova sang aton bug-os-kalag nga debosyon kag pag-alagad.
[Laragway sa pahina 24]
Nagapamulongpulong samtang ginadumilian ang amon pagbantala nga hilikuton
[Laragway sa pahina 25]
Upod sa akon asawa, si Marianthi