Kon Bugana ang Kaalwan
KON may kahigayunan ikaw sa paghatag sing regalo sa isa ka hari, ano ang imo ihatag sa iya? Ano abi kon sia amo ang pinakamanggaranon kag pinakamaalam nga gumalahom sa kalibutan? Makahunahuna ka bala sing bisan ano nga regalo nga makapahamuot sa iya? Mga tatlo ka libo ka tuig sang una, ang reyna sang Sheba naghunahuna sini nga mga pakiana samtang nagahanda sa pagduaw sa subong sina nga gumalahom—si Hari Solomon sang Israel.
Ang iya regalo, siling sa aton sang Biblia, naglakip sing 120 ka talanton nga bulawan “kag tuman kabugana nga lana sang balsamo kag mga bato nga bilidhon.” Sa karon nga bili, ang bulawan lamang nagabili sing mga $40,000,000. Ang lana sang balsamo, isa ka mahumot kag bulong nga lana, ginalakip sa bulawan subong malahalon nga pagkabutang. Samtang wala ginasugid sang Biblia kon daw ano kadamo nga lana ang ginhatag sang reyna kay Solomon, nagasiling ini sa aton nga ang iya regalo nagpabilin nga indi matupungan.—1 Hari 10:10.
Ang reyna sang Sheba pat-od nga manggaranon kag maalwan nga babayi. Dugang pa, ang iya kaalwan ginbalusan. “Si Hari Solomon,” siling sang Biblia, “naghatag sa reyna sang Sheba sang tanan niya nga luyag nga iya ginpangayo, magluwas sa balor nga gindala niya sa hari.” (2 Cronica 9:12) Matuod, mahimo nga ugali na sang mga hari nga magbayluhanay sing mga regalo; apang, ang Biblia espesipiko nga naghinambit sang “kaalwan” ni Solomon. (1 Hari 10:13) Si Solomon mismo nagsulat: “Ang maalwan nga kalag patambukon, kag ang isa nga nagabunyag sing bugana sa iban bunyagan man sing bugana.”—Hulubaton 11:25.
Sa pagkamatuod, ang reyna sang Sheba nagsakripisyo man sing daku nga tion kag panikasog sa pagduaw kay Solomon. Mahimo nga ang Sheba yara sa duog sang Republika sang Yemen karon; busa ang reyna kag ang iya katay sang mga kamelyo naglakbay sing kapin sa 1,600 ka kilometro pa Jerusalem. Subong sang ginsiling ni Jesus, “naghalin sia sa kaukbungan sang duta.” Ngaa ang reyna sang Sheba nagpangabudlay gid? Nagkari sia agod “mamati sa kaalam ni Solomon.”—Lucas 11:31.
Ang 1 Hari 10:1,2 nagasiling nga ang reyna sang Sheba “nagkadto sa pagtilaw [kay Solomon] sang makalilibog nga mga pamangkot. . . . Nagsugid [sia] sang tanan nga yara sa iya tagipusuon.” Paano nagsabat si Solomon? “Si Solomon nagsugid man sang tanan nga mga butang nga may labot sa iya. Wala sing butang nga natago gikan sa hari nga wala niya ginsugid sa iya.”—1 Hari 10:3.
Natingala sa iya nabatian kag nakita, mapainubuson nga nagsabat ang reyna: “Malipayon ang imo mga alagad nga nagatindog sa imo atubangan, nga nagapamati sang imo kaalam!” (1 Hari 10:4-8) Wala niya ginsiling nga malipayon ang mga alagad ni Solomon bangod ginpalibutan sila sang kahamungaya—bisan pa nga amo matuod. Sa baylo, ang mga alagad ni Solomon ginpakamaayo bangod makapamati sila pirme sa hatag-Dios nga kaalam ni Solomon. Daw ano kaayo nga halimbawa ang reyna sang Sheba sa katawhan ni Jehova karon, nga nagabenepisyo mismo sa kaalam sang Manunuga kag sang iya Anak, si Jesucristo!
Talalupangdon man ang masunod nga komento sang reyna kay Solomon: “Kabay nga si Jehova nga imo Dios pagapakamaayuhon.” (1 Hari 10:9) Sing maathag, nakita niya ang kamot ni Jehova sa kaalam kag kabuganaan ni Solomon. Nahisuno ini sa kon ano ang ginsaad anay ni Jehova sa Israel. ‘Ang pagtuman sa akon mga kasuguan,’ siling niya, “kaalam sa inyo bahin kag paghangop sa inyo bahin sa atubangan sang mga mata sang katawhan nga makabati sining tanan nga mga kasuguan, kag magasiling gid sila, ‘Ining daku nga pungsod pat-od nga maalam kag mahinangpanon nga katawhan.’”—Deuteronomio 4:5-7.
Pagpalapit sa Manughatag sing Kaalam
Sa moderno nga tion, minilyon ang nagsulod man sa organisasyon ni Jehova bangod nahantop nila nga “ang Israel sang Dios maalam kag mahinangpanon nga katawhan,” indi sing kinaugali, kundi bangod may himpit nga mga kasuguan kag mga prinsipio sang Dios nga nagatuytoy sa ila. (Galacia 6:16) Ginapakita sang kadamuon sang nabawtismuhan sining ulihi nga tinuig nga ginatos ka libo sang bag-o nga disipulo kada tuig ang nagsiling, kon sa aton pa, sa espirituwal nga Israel: “Magaupod kami sa inyo, kay nabatian namon nga ang Dios nagaupod sa inyo.” (Zacarias 8:23) Makibot gid ining mga bag-uhan kon makita nila ang sinalusalo sang espirituwal nga pagkaon nga gin-aman ni Jehova sa atubangan sang iya mga alagad! Wala pa gid nila makita ang kaangay sini sa ila anay mga relihion.—Isaias 25:6.
Paghatag sa Pinakadaku nga Manughatag
Bangod nakabaton sing madamo gid, ang mga mainapresyahon kinaandan na nga magahunahuna kon ano ang ila ihatag bilang balos sa labing daku nga Hari kag Manughatag, si Jehova nga Dios. Ginapakita sang Biblia nga ang labing maayo nga regalo nga mahatag naton kay Jehova amo ang “halad sang pagdayaw.” (Hebreo 13:15) Ngaa? Bangod ini nga halad direkta nga may kaangtanan sa pagluwas sa kabuhi, isa ka butang nga importante gid kay Jehova sa sining tion sang katapusan. (Ezequiel 18:23) Dugang pa, ang paghatag sang isa sang iya kusog kag tion sa pagbulig sa nagabalatian, napung-awan, kag sa iban pa isa ka kalahamut-an nga halad.—1 Tesalonica 5:14; Hebreo 13:16; Santiago 1:27.
Ang pinansial nga mga amot importante. Nagabulig ini sa pagbalhag sing mga Biblia, pasad-sa-Biblia nga literatura, kag sa pagtigayon sing mga duog nga matipunan sang mga Cristiano. (Hebreo 10:24,25) Ang mga amot nagaaman man sing mga pundo sa pagbulig sa mga biktima sang mga inaway kag kinaugali nga mga kalamidad.
Sa pagtuytoy sa aton tuhoy sa paghatag, ang Pulong sang Dios nagapahamtang sing pila ka maayo nga mga prinsipio. Halimbawa, nagatudlo ini nga ang mga Cristiano magahatag, indi sang pat-od nga kantidad, kundi sang kon ano ang masarangan nila, nga nagahimo sini sing kinabubut-on, upod ang malipayon nga tagipusuon. (2 Corinto 9:7) Ang pila makahatag sing daku; ang iban naman, kaangay sang imol nga balo nga babayi sang panahon ni Jesus, makahatag lamang sing diutay. (Lucas 21:2-4) Indi bala talalupangdon nga si Jehova—ang Tag-iya sang bug-os nga uniberso—nagapabalor sang maayo gid sing katuyuan nga regalo kag halad nga ginhimo sa iya ngalan?—Hebreo 6:10.
Agod makahatag sila sing malipayon, padayon nga ginapahibalo ang mga katawhan ni Jehova sang nagkalainlain nga mga kinahanglanon kag epektibo nga mga paagi nga mapun-an ina nga mga kinahanglanon. Subong resulta, ang balaan nga espiritu ni Jehova nagapahulag sa kinabubut-on nga mga tagipusuon nga mag-amot. Ginsunod sang dumaan nga Israel ini nga pamaagi sa pagpatindog sing tabernakulo kag, sang ulihi, sing templo. (Exodo 25:2; 35:5,21, 29; 36:5-7; 39:32; 1 Cronica 29:1-19) Sang unang siglo C.E., ini man nga pamaagi nagpaposible sa mga Cristiano nga makatipon sing pundo nga kinahanglanon nila sa pagdala sing maayong balita sang Ginharian sa mga pungsod kag sa pagsakdag sa mga kauturan sa Israel sa tion sang tiggulutom.—1 Corinto 16:2-4; 2 Corinto 8:4,15; Colosas 1:23.
Subong man karon, ginpakamaayo ni Jehova ang iya katawhan, kag padayon sia nga magapakamaayo sa ila, paagi sa paghatag sa ila sang ila kinahanglanon agod matapos ang pinakadaku nga kampanya sa pagbantala kag pagpanudlo nga nakita sang kalibutan.—Mateo 24:14; 28:19,20.
Ano ang mga Kinahanglanon Karon?
Sining ulihi nga tinuig ang mga Saksi ni Jehova ginrehistro sa madamo nga pungsod diin gindumilian anay ang ila hilikuton. Subong resulta, nakita sang madamo sini nga mga pungsod ang daku nga pag-uswag sa kadamuon sang mga manugbantala. Sing halangpunon, ang mga Biblia kag ang pasad-sa-Biblia nga literatura kinahanglanon gid.
Amo man ang mga Kingdom Hall. Mga 9,000 ka Kingdom Hall ang kinahanglanon karon sa bug-os nga kalibutan. Kon isa ka Kingdom Hall ang mapatindog kada adlaw, magakinahanglan sing 24 ka tuig agod mapun-an ang karon nga kinahanglanon! Samtang, mga pito ka kongregasyon ang ginatukod kada adlaw, madamo sini sa mga bahin sang kalibutan diin diutay lamang ang mga pundo. Sa pihak nga bahin, madamo sini nga duog ang wala nagakinahanglan sing malahalon nga mga tinukod. Sa iban nga mga duog, ang isa ka Kingdom Hall nga makahatag sang kinahanglanon kag mangin maayo nga panaksi sa komunidad sarang mahuman sa mga $6,000 lamang.
Sang unang siglo, ang pila ka mga Cristiano mas maayo sing kahimtangan sa pinansial sangsa iban, busa si apostol Pablo nagsulat: “Paagi sa pag-alangay mapun-an sang inyo sobra sa karon ang ila kinawad-on, agod mapun-an man sang ila sobra ang inyo kinawad-on, agod may pag-alalangay.” (2 Corinto 8:14) Sa karon, ang kaanggid nga “pag-alalangay” nagaaman sing mga pundo nga kinahanglanon sa pagsuplay sing mga Biblia, literatura sa Biblia, mga Kingdom Hall, bulig sa kalamidad, kag iban pa nga mga butang sa madamo nga bahin sang kalibutan. Daw ano nga pagpakamaayo ina nga paghatag—sa manughatag kag sa nagabaton!—Binuhatan 20:35.
Subong sang ginpakita sa mga sulat nga nabaton sang Sosiedad gikan sa maalwan-sing-tagipusuon nga mga tawo, madamo nga bumalasa sini nga magasin ang maluyag sa pagbulig apang indi makapat-od sa nagkalainlain nga mga paagi sa pag-amot. Wala sing duhaduha nga ang kaupod nga kahon makabulig sa pagsabat sa ila mga pamangkot.
Sa tion sang mahimayaon nga paggahom ni Solomon, “ang tanan nga mga hari sa duta” nga nakabati tuhoy sa iya nagduaw sa iya. Apang, ang Biblia naghingalan sing isa lamang ka gumalahom—ang reyna sang Sheba. (2 Cronica 9:23) Daku gid nga sakripisyo ang iya ginhimo! Apang bugana sia nga ginpadyaan—amo kon ngaa nga sa tapos sang iya pagduaw, “daw indi halos [sia] makaginhawa kag nahayanghag.”—2 Cronica 9:4, Today’s English Version.
Sa palaabuton, si Jehova, ang labing daku nga Hari kag Manughatag, magahimo sang labi pa sa nahimo ni Solomon sa mga nagahimo sing mga sakripisyo para sa Iya. Sa pagsabat, ini sila magatindog nga ‘daw indi halos makaginhawa kag mahayanghag,’ kay indi lamang luwason sila ni Jehova sa iya makakulugmat nga adlaw sang paghukom kundi pagkatapos sini ‘buksan niya ang iya kamot kag paayawan ang tagsa ka handum sang tagsa ka buhi nga butang.’—Salmo 145:16.
[Kahon sa pahina 22]
Mga Paagi nga Ginpili Sang Iban sa Paghatag Sing
MGA AMOT SA BUG-OS KALIBUTAN NGA HILIKUTON
MADAMO ang nagapain, ukon nagabadyet, sing kantidad nga ginahulog nila sa mga kahon-alamutan nga may ngalan “Contributions for the Society’s Worldwide Work—Matthew 24:14.” Kada bulan ginapadala sang kongregasyon ini nga kantidad sa bug-os kalibutan nga ulong-talatapan sa Brooklyn, New York, ukon sa lokal nga sanga talatapan.
Ang boluntaryo nga mga amot nga kuwarta mahimo man mapadala sing direkta sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, ukon sa talatapan sang Sosiedad nga nagapangalagad sa inyo pungsod. Ang mga alahas ukon iban pa nga mga bahandi mahimo man maamot. Ang isa ka malip-ot nga sulat nga nagasiling nga ini isa ka kinabubut-on nga dulot dapat ilakip sa sining mga amot.
KAHIMUSAN SA PAGDONAR NGA MAY KONDISYON
Mahimo ihatag ang kuwarta sa Watch Tower Society upod ang pinasahi nga kondisyon nga kon kinahanglan ini sang nagdonar, ang donasyon iuli sa iya. Para sa dugang nga impormasyon, makig-angot palihug sa Treasurer’s Office sa direksion nga yara sa ibabaw.
GINPLANO NGA PAGHATAG
Dugang sa direkta nga mga dulot nga kuwarta kag pagdonar sing kuwarta nga may kondisyon, may iban pa nga paagi sa paghatag nga makabulig sa pag-alagad sa Ginharian sa bug-os nga kalibutan. Ini nagalakip sa:
Pasiguro: Ang Watch Tower Society mahimo hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension.
Mga Kuwenta sa Bangko: Ang mga kuwenta sa bangko, mga sertipiko sang deposito, ukon indibiduwal nga kuwenta sa pagretiro mahimo ipatago subong butang nga ginpiyar ukon ibayad sa tion sang kamatayon sa Watch Tower Society, nahisuno sa mga kinahanglanon sang lokal nga bangko.
Stocks kag Bonds: Mahimo idonar ang stocks kag bonds sa Watch Tower Society ayhan subong isa ka direkta nga donasyon ukon sa idalom sang kahimusan diin ang kinitaan padayon nga ihatag sa nagdonar.
Real Estate: Ang mahimo mabaligya nga real estate mahimo idonar sa Watch Tower Society paagi sa paghimo sing direkta nga regalo ukon paagi sa pagtigana sing bug-os kabuhi nga propiedad sa nagdonar, nga padayon nga makaistar sa sini tubtob buhi sia. Dapat makig-angot ang isa sa Sosiedad antes himuan sing kasulatan ang bisan ano nga real estate sa Sosiedad.
Testamento kag mga Butang nga Ginapiyar: Ang propiedad ukon kuwarta mahimo ipapanubli sa Watch Tower Society paagi sa legal nga testamento, ukon ang Sosiedad mahimo mahingadlan subong benepisyaryo sang isa ka kasugtanan tuhoy sa mga butang nga ginapiyar. Ang pagpiyar sang isa ka butang sa isa ka relihioso nga organisasyon subong amo ang benepisyaryo mahimo nga may mga bentaha sa buhis.
Subong ginapahangop sang termino nga “ginplano nga paghatag,” ini nga mga sahi sang pagdonar kinaandan nga nagakinahanglan sang pagplano sa bahin sang nagadonar. Agod buligan ang mga indibiduwal nga luyag magbulig sa Sosiedad paagi sa pila ka porma sang ginplano nga paghatag, ang Sosiedad naghanda sing Ingles nga brosyur nga natig-uluhan Planned Giving to Benefit Kingdom Service Worldwide. Ginsulat ang brosyur bilang sabat sa madamo nga pamangkot nga nabaton sang Sosiedad tuhoy sa mga regalo, testamento, kag mga butang nga ginpiyar. Nagaunod man ini sing dugang mapuslanon nga impormasyon tuhoy sa estate, pinansial, kag pagplano sa buhis. Kag gindesinyo ini sa pagbulig sa mga indibiduwal sa Estados Unidos nga nagaplano sa paghatag sing espesyal nga regalo sa Sosiedad karon ukon magbilin sing palanublion sa tion sang kamatayon sa pagpili kon ano ang labing maayo kag mapuslanon nga paagi nga ginabinagbinag ang ila pamilya kag personal nga mga kahimtangan. Ini nga brosyur sarang matigayon paagi sa pagpangabay sing isa ka kopya sing direkta gikan sa Charitable Planning Office.
Sa tapos mabasa ang brosyur kag makapakig-angot sa Charitable Planning Office, madamo ang nakabulig sa Sosiedad kag sa amo man nga tion, sa paghimo sini natigayon ang daku nga mga benepisyo nga ginatugot sang kahimusan sa buhis. Ang Charitable Planning Office dapat pahibaluon kag hatagan sing kopya sang bisan anong importante nga dokumento tuhoy sining mga kahimusan. Kon interesado ka sa bisan diin sini nga kahimusan sang ginplano nga paghatag, dapat ikaw magpakig-angot sa Charitable Planning Office, paagi sa pagsulat ukon paagi sa telepono, sa direksion nga ginlista sa ubos ukon sa talatapan sang Sosiedad sa inyo pungsod.
CHARITABLE PLANNING OFFICE
Watch Tower Bible and Tract Society of Pennsylvania
100 Watchtower Drive
Patterson, New York 12563-9204
Telepono: (914) 306-1000
[Mga laragway sa pahina 23]
Ang mga hilikuton sang mga Saksi ni Jehova ginasakdag sang boluntaryo nga mga amot