Ano ang Sarang Mahimo sa Pagluya sing Buot?

PAANO mabatuan sang isa ka tawo ang pagluya sing buot? Amo ini ang ginpamangkot sa pila ka nagalakbay nga manugtatap, nga nagaduaw sing tayuyon sa mga kongregasyon sang mga Saksi ni Jehova. Ang ila mga sabat makabulig sa aton sa pag-analisar sa mga kabangdanan sang pagluya sing buot kag ang mga solusyon sa sining kahimtangan nga mahimo makaapektar kay bisan sin-o nga Cristiano.

Indi lamang pag-analisar ang kinahanglan agod malandas ang pagluya sing buot, kundi ang mga sintoma mahimo maglakip sang kakulang sing interes sa pangamuyo ukon sa personal nga pagtuon, indi tayuyon nga pagtambong sa mga miting, wala sing kapagsik, kag paglas-ay pa gani sa mga kaupod nga Cristiano. Apang, ang isa sang labing maathag nga mga tanda amo ang pagtahaw sa kakugi sa pag-ebanghelyo. Usisaon naton ang mga sintoma kag binagbinagon ang pila ka solusyon.

Pagluya sing Buot sa Aton Pag-ebanghelyo nga Hilikuton

Nahibaluan ni Jesucristo ang mga kabudlayan may kaangtanan sa sugo nga maghimo sing mga disipulo. (Mateo 28:19, 20) Ginpadala niya ang iya mga sumulunod subong “mga karnero sa tunga sang mga lobo,” nakahibalo nga hingabuton sila bangod sang ila pagbantala nga hilikuton. (Mateo 10:16-23) Apang, indi ini rason agod maluyahan sila sing buot. Sa katunayan, ang mga alagad sang Dios nga nagasalig sing mapangamuyuon kay Jehova masunson nga ginapabakod sang paghingabot.—Binuhatan 4:29-31; 5:41,42.

Bisan pa ang mga disipulo ni Cristo wala nagaantos sing daku nga paghingabot, wala sila pirme ginabaton sing maayo. (Mateo 10:11-15) Sing kaanggid, ang pagbantala nga hilikuton sang mga Saksi ni Jehova karon indi pirme mahapos.a Para sa madamo nga tawo, ang pagtuo sa Dios isa ka personal nga butang nga indi nila luyag hambalan. Ang iban naman indi luyag magpasilabot sa isa ka relihioso nga organisasyon nga malain ang panan-aw nila sa sini. Wala sing duhaduha nga ang di-pagsapak, wala sing natigayon nga mga resulta, ukon iban pa nanuhaytuhay nga mga problema mahimo mangin daku nga mga kabangdanan sang pagluya sing buot. Paano malandas ining mga balagbag?

Pagtigayon sing Mas Maayo nga mga Resulta

Ang kalipay nga matigayon naton sa aton ministeryo may kaangtanan sa pila ka kasangkaron sa mga resulta nga natigayon. Paano, nian, kita makatigayon sing mas mabungahon nga ministeryo? Bueno, kita “mga mangingisda sang mga tawo.” (Marcos 1:16-18) Ang mga mangingisda sang dumaan nga Israel nagapangisda sa gab-i, sa tion nga makadakop sila sing pinakamadamo nga isda. Dapat man naton tun-an sing maayo ang aton teritoryo agod ‘makapangisda’ man kita sa tion nga ang kalabanan nga mga tawo yara sa puluy-an kag labi nga mabinatunon sa aton mensahe. Mahimo nga ini sa gab-i, sa mga talipuspusan sang semana, ukon sa iban pa nga tion. Suno sa isa ka nagalakbay nga manugtatap, praktikal ini sa mga duog diin ang mga tawo nagatrabaho sa bug-os nga adlaw. Nagsiling sia nga ang pagpanaksi sa gab-i masami nga may maayo gid nga mga resulta. Ang pagpanaksi paagi sa telepono ukon sing di-pormal nagabulig man sa aton nga mabantalaan ang madamo pa nga tawo.

Ang pagkaukod sa ministeryo nagabunga man sing maayo. Sa Sidlangan nga Europa kag sa pila ka pungsod sa Aprika, nagauswag sing maayo ang pagbantala sing Ginharian nga hilikuton, kag nagresulta ini sa daku nga pag-uswag. Sing kaanggid, madamo nga kongregasyon ang naporma sa mga lugar nga madugay na ginakabig nga di-mabungahon ukon bisan sa teritoryo nga pirme gid ginapangabudlayan. Apang, kamusta kon indi subong sina ang mga resulta sa inyo teritoryo?

Paghupot sing Maayo nga Panimuot

Ang maathag nga pagdumdom sa mga tulumuron nga ginpahamtang ni Jesus magabulig sa aton nga indi maluyahan sing buot walay sapayan sang di-pagsapak sa ministeryo. Luyag ni Cristo nga pangitaon sang iya mga disipulo ang mga takus, indi ang paghimo sing pangmadamo nga pagkumbertir. Sa pila ka okasyon ginpakita niya nga ang kadamuan indi magabaton sang maayong balita, subong nga ang kalabanan nga mga Israelinhon wala magpamati sa mga manalagna sang una.—Ezequiel 9:4; Mateo 10:11-15; Marcos 4:14-20.

Ang “maayong balita sang ginharian” ginabaton sing mapinasalamaton sang mga indibiduwal nga “mahunahunaon sang ila espirituwal nga kinahanglanon.” (Mateo 5:3; 24:14) Luyag nila alagaron ang Dios suno sa paagi nga ginasiling niya. Busa, ang mga resulta sang aton hilikuton may mas daku nga kaangtanan sa kahimtangan sang tagipusuon sang mga tawo sangsa ikasarang naton sa pagpresentar sa mensahe. Sa pagkamatuod, dapat naton himuon ang aton bug-os nga masarangan agod mangin makagalanyat ang maayong balita. Apang, ang mga resulta nagasandig sa Dios, kay si Jesus nagsiling: “Wala sing tawo nga makakari sa akon luwas kon buyukon sia sang Amay, nga nagpadala sa akon.”—Juan 6:44.

Ang aton pag-ebanghelyo nga hilikuton nagapakilala sang ngalan ni Jehova. Mamati man ukon indi ang mga tawo, ang aton pagbantala nga hilikuton nagabulig sa pagpakabalaan sa balaan nga ngalan ni Jehova. Dugang pa, paagi sa aton pag-ebanghelyo nga hilikuton, ginapamatud-an naton nga kita mga disipulo ni Cristo, kag may pribilehiyo kita nga makapakigbahin sa labing importante nga hilikuton nga ginahimo karon sa aton adlaw.—Mateo 6:9; Juan 15:8.

Pagluya sing Buot kag mga Kaangtanan

Ang pila ka tawhanon nga kaangtanan, sa pamilya man ukon sa kongregasyon, mahimo tunaan sang pagluya sing buot. Halimbawa, yara ang balatyagon nga wala mahangpan. Ang mga di-kahimpitan sang mga masigkatumuluo mahimo man magpaluya sang aton buot. Sa liwat, makabulig gid sa aton ang Kasulatan.

“Ang bug-os nga katilingban sang mga kauturan” sa bug-os nga kalibutan nagahuman sing isa ka daku espirituwal nga pamilya. (1 Pedro 2:17) Apang ang balatyagon nga katapo sang isa ka nahiusa nga katawhan mahimo magtahaw kon mag-utwas ang mga kabudlayan bangod sang magkatuhay nga personalidad. Maathag nga ang mga Cristiano sang unang-siglo naapektuhan man sini nga mga problema, kay sulitsulit nga ginpahanumdom sila ni apostol Pablo nga magkabuhi sing tingob nga may paghiusa. Halimbawa, ginlaygayan niya ang duha ka Cristianong babayi—sanday Eudias kag Sintique—nga husayon ang ila di-paghangpanay.—1 Corinto 1:10; Efeso 4:1-3; Filipos 4:2,3.

Kon amo sini ang problema, paano naton mapapagsik liwat ang hanuot nga gugma para sa aton kauturan nga lalaki kag babayi? Paagi sa pagpahanumdom sa aton kaugalingon nga si Cristo napatay para sa ila kag nga sila, kaangay naton, nagtuo sa iya halad nga gawad. Dumdumon man naton nga madamo sa aton kauturan ang handa nga ilugon si Jesucristo paagi sa pagtaya sang ila kabuhi para sa aton.

Pila ka tuig na ang nagligad, sa Paris, Pransia, wala magpangalag-ag ang isa ka lamharon nga Saksi nga bulakwiton ang isa ka maleta nga may unod nga bomba nga ginbutang sa guwa sang Kingdom Hall. Nagdalagan sia panaug sa pila ka andana sang hagdan kag ginhaboy ini sa isa ka fountain, diin naglupok ini. Sang ginpamangkot kon ano ang nagpahulag sa iya nga itaya ang iya kabuhi sa sining paagi, sia nagsabat: “Narealisar ko nga ang amon kabuhi yara sa katalagman. Gani ginhunahuna ko nga mas maayo pa nga ako na lang ang mapatay sangsa kami tanan ang mapatay.”b Daw ano nga pagpakamaayo nga may subong sini nga mga kaupod nga handa gid mag-ilog sang huwaran ni Jesus!

Dugang pa, mahimo naton pamalandungan ang espiritu sang pagbuligay nga nagluntad sa tunga sang mga Saksi ni Jehova sa mga kampo konsentrasyon sadtong Bug-os Kalibutan nga Inaway II.c Sining karon lang, matutom man nga ginhuptan sang aton kauturan nga lalaki kag babayi sa Malawi ang ila integridad subong matuod nga mga Cristiano. Indi bala ang paghunahuna nga ang aton mga kauturan sa lokal nga kongregasyon magahulag sa amo man nga paagi sa idalom sang di-maayo nga mga kahimtangan magapahulag sa aton nga indi pagsapakon ukon sa di-magkubos buhinan ang mga kapiutan kag mga kabudlayan sa adlaw-adlaw? Kon ginapalambo naton ang hunahuna ni Cristo, ang matag-adlaw nga kaangtanan naton sa mga masigkasumilimba mangin tuburan sang kapagsik, indi sang pagluya sing buot.

Makapaluya sing Buot nga Personal nga mga Balatyagon

“Ang pagpaabot nga napalantang nagapasakit sang tagipusuon, apang ang butang nga ginahandum isa ka kahoy sang kabuhi kon mag-abot ini.” (Hulubaton 13:12) Sa mga mata sang pila ka mga alagad ni Jehova, ang katapusan sining sistema sang mga butang madugay pa magaabot. Nasapwan sang mga Cristiano nga nagakabuhi kita sa tion nga ‘makahalanguyos kag mabudlay pakigbagayan,’ subong sang nasapwan man sang madamo nga di-tumuluo.—2 Timoteo 3:1-5.

Apang, kabaliskaran sa mga di-tumuluo, dapat malipay ang mga Cristiano nga makita sa sining mabudlay nga mga kahimtangan ang “tanda” sang presensia ni Jesus, nga nagapakita nga sa indi madugay dulaon na sang Ginharian sang Dios ining malaut nga sistema sang mga butang. (Mateo 24:3-14) Bisan maglain pa ang kahimtangan—subong sang matabo gid sa tion sang “dakung kapipit-an”—ining mga hitabo ginatunaan sang aton kalipay bangod ginapahibalo sini ang nagapakari nga bag-ong kalibutan sang Dios.—Mateo 24:21; 2 Pedro 3:13.

Ang pagpaisol sa hunahuna sang pagpasilabot sang Ginharian sa mga hitabo karon mahimo tunaan nga ang isa ka Cristiano maghugod sing madamo pa nga tion sa paghingamo sing mga materyal. Kon pahanugutan niya nga ubuson sang mga butang subong sang sekular nga trabaho kag paglingawlingaw ang iya tion kag kusog, mabudlayan sia sa pagtuman sing nagakaigo sang iya Makasulatanhon nga mga katungdanan. (Mateo 6:24, 33, 34) Ina nga panimuot nagahatag sing kapaslawan kag nian sing pagluya sing buot. Ang isa ka nagalakbay nga manugtatap nagkomento: “Indi realistiko nga tinguhaan nga magtukod sing palsipikado nga bag-ong sistema sa sining sistema sang mga butang.”

Duha sang Labing Maayo nga mga Solusyon

Sa tion nga nahimo na ang pagsayasat, paano ang indibiduwal makakita sing maayo nga solusyon? Ang personal nga pagtuon amo ang isa sang labing maayo nga mga pamaagi nga matigayon. Ngaa? “Ginapahanumdom kita sini kon ngaa dapat naton himuon ang aton ginahimo,” siling sang isa ka nagalakbay nga manugtatap. Ang isa pa gid nagsiling: “Ang pagbantala bangod lamang nga obligasyon ini mangin mabug-at sa ulihi.” Apang ang maayo personal nga pagtuon nagabulig sa aton nga matigayon liwat ang maathag nga pagtamod sa aton katungdanan samtang labi kita nga nagahilapit sa katapusan. Sa amo man nga panghunahuna, sulitsulit nga ginapahanumdom sa aton sang Kasulatan ang kinahanglanon nga magkaon sing maayo sa espirituwal agod matigayon ang matuod nga kalipay sa paghimo sing kabubut-on sang Dios.—Salmo 1:1-3; 19:7-10; 119:1,2.

Ang mga gulang makabulig sa iban sa paglandas sang pagluya sing buot paagi sa paghimo sing makapalig-on nagabantay nga pagduaw sa ila. Sa tion sining pribado nga mga pagduaw, mapakita sang mga gulang nga ang tagsatagsa sa aton ginaapresyar sing daku kag may importante nga bahin sa tunga sang katawhan ni Jehova. (1 Corinto 12:20-26) Ginapatuhuyan ang mga masigka-Cristiano, ang isa ka gulang nagsiling: “Agod mapadaku ang ila balor, ginapahanumdom ko sila sang ila hinimuan sang nagligad. Ginapatalupangod ko nga hamili sila sa mga mata ni Jehova kag nga ang dugo sang iya Anak ginhatag para sa ila. Ini nga pangatarungan pirme ginabaton sing maayo. Sa tion nga ginasakdag ini sang malig-on nga mga reperensia sa Biblia, ang mga naluyahan sing buot yara sa kahimtangan nga magpahamtang sing bag-o nga mga tulumuron, subong sang pagpangamuyo kag pagtuon sang pamilya kag pagbasa sing Biblia.”—Hebreo 6:10.

Sa tion sang nagabantay nga pagduaw, dapat maghalong ang mga gulang nga wala nila ginapakita nga ang Dios daw mabudlay gid pahamut-an. Sa baylo, buligan sang mga gulang ang naluyahan sing buot nga mga masigkasumilimba nga makita nga ang lulan sang mga sumulunod ni Jesus mamag-an. Sa amo, ang aton Cristianong pag-alagad isa ka tuburan sang kalipay.—Mateo 11:28-30.

Paglandas sa Pagluya sing Buot

Ano man ang mga kabangdanan sini, ang pagluya sing buot isa ka salot nga dapat pakigbatuan. Apang, dumduma nga wala kita nagaisahanon sa sining pagpakig-away. Kon ginaluyahan kita sing buot, batunon naton ang bulig sang aton Cristianong mga kaupod, ilabi na sang mga gulang. Sa paghimo sini, mapahaganhagan naton ang mga balatyagon sang pagluya sing buot.

Labaw sa tanan, dapat kita mangayo sing bulig sa Dios sa paglandas sa pagluya sing buot. Kon mapangamuyuon kita nga magsandig kay Jehova, mahimo niya kita buligan nga malandas sing bug-os ang pagluya sing buot. (Salmo 55:22; Filipos 4:6, 7) Ano man ang kahimtangan, subong iya katawhan mangin subong man ang aton balatyagon sa salmista nga nag-amba: “Malipayon ang katawhan nga nakahibalo sang malipayon nga pagsinggit. O Jehova, sa kapawa sang imo nawong padayon sila nga nagalakat. Sa imo ngalan nagakalipay sila sa bug-os nga adlaw kag sa imo pagkamatarong ginabayaw sila. Kay ikaw ang katahom sang ila kusog; kag paagi sa imo maayo nga kabubut-on ginabayaw ang amon sungay.”—Salmo 89:15-17.

[Mga footnote]

[Laragway sa pahina 31]

Ang makapalig-on nagabantay nga pagduaw sang mahigugmaon nga mga gulang makabulig sa mga Cristiano nga malandas ang pagluya sing buot