Maayo nga mga Halimbawa—Nagabenepisyo Ka Bala Gikan sa Ila?

“NANGIN halimbawa kamo sa tanan nga tumuluo sa Macedonia kag Acaya.” Ginsulat ni apostol Pablo ini nga mga pulong sa matutom nga mga Cristiano nga nagapuyo sa Tesalonica. Dalayawon gid ang halimbawa nga ginpahamtang nila para sa mga masigkatumuluo. Apang, ang mga taga-Tesalonica nagsunod mismo sa halimbawa nga ginpahamtang ni Pablo kag sang iya mga kaupod. Si Pablo nagsiling: “Ang maayong balita nga ginabantala namon indi masapwan sa tunga ninyo paagi sa hambal lamang kundi paagi sa gahom man kag paagi sa balaan nga espiritu kag malig-on nga pagsalig, subong sang nahibaluan ninyo kon ano nga sahi kami sang mga tawo sa inyo tungod sa inyo kaayuhan; kag kamo nangin manug-ilog sa amon.”​—⁠1 Tesalonica 1:​5-7.

Huo, si Pablo wala lamang nagbantala sing mga sermon. Ang iya mismo kabuhi isa ka sermon​—⁠isa ka halimbawa sang pagtuo, pagbatas, kag pagsakripisyo sa kaugalingon. Bangod sini, si Pablo kag ang iya mga kaupod nangin isa ka mabaskog nga impluwensia sa kabuhi sang mga taga-Tesalonica, nga nagpahulag sa ila nga batunon ang kamatuoran “sa idalom sang daku nga kapipit-an.” Apang, pat-od gid nga indi lamang sanday Pablo kag ang iya mga masigkamanugpangabudlay ang may positibo nga impluwensia sa amo nga mga tumuluo. Ang halimbawa sang iban nga nagbatas sing kapipit-an isa man ka pagpalig-on. Si Pablo nagsulat sa mga taga-Tesalonica: “Kamo nangin mga manug-ilog, mga kauturan, sa mga kongregasyon sang Dios nga yara sa Judea nga nahiusa kay Cristo Jesus, bangod kamo man nagsugod nga mag-antos sa mga kamot sang inyo kaugalingon nga mga kasimanwa sing amo nga mga butang nga ginaantos man nila sa mga kamot sang mga Judiyo.”​—⁠1 Tesalonica 2:⁠14.

Si Jesucristo​—⁠Ang Panguna nga Huwaran

Bisan pa nagpahamtang si Pablo sing isa ka halimbawa nga takus ilugon, gintudlo niya si Jesucristo subong amo ang panguna nga halimbawa nga dapat sundon sang mga Cristiano. (1 Tesalonica 1:6) Si Cristo amo anay kag amo karon ang aton panguna nga Huwaran. Si apostol Pedro nagsulat: “Sa sining dalanon gintawag kamo, bangod bisan si Cristo nag-antos tungod sa inyo, nga nagabilin sa inyo sing huwaran agod nga pagsundon ninyo sing maayo ang iya mga tikang.”​—⁠1 Pedro 2:⁠21.

Apang, ang kabuhi ni Jesus subong tawo natapos sing halos 2,000 ka tuig na ang nagligad. Sa karon sia “nagapuyo sa kapawa nga di-mapalapitan” subong di-mamalatyon nga espiritu nga tinuga. Subong amo sini, “walay tawo nga nakakita ukon makakita” sa iya. (1 Timoteo 6:16) Kon amo, paano naton sia mailog? Ang isa ka paagi amo ang pagtuon sa apat ka kasaysayan sang Biblia tuhoy sa kabuhi ni Jesus. Ang mga Ebanghelyo nagahatag sing paghantop sa iya personalidad, dalanon sang pagkabuhi, kag “panimuot sang hunahuna.” (Filipos 2:​5-​8) Dugang pa nga paghantop ang matigayon paagi sa maid-id nga pagtuon sa libro nga Ang Pinakabantog nga Tawo nga Nagkabuhi, nga nagabinagbinag sang kabuhi ni Jesus sing detalyado gid kag sing pasunod suno sa tion.⁠a

Ang nagasakripisyo-sa-kaugalingon nga halimbawa ni Jesus may daku nga epekto kay apostol Pablo. Ginsilingan niya ang mga Cristiano sa Corinto: “Sa akon bahin malipay gid ako sa paghinguyang kag nga pagahinguyangon sing bug-os para sa inyo mga kalag.” (2 Corinto 12:15) Isa gid ka tulad-Cristo nga panimuot! Samtang ginapamalandungan naton ang himpit nga halimbawa ni Cristo, dapat man kita mapahulag nga ilugon sia sa aton dalanon sang kabuhi.

Halimbawa, gintudluan kita ni Jesus nga dapat kita magsalig sa saad sang Dios nga mag-aman sing materyal. Apang indi lamang amo sina ang iya ginhimo. Ginpakita niya ang amo nga pagtuo kag pagsalig kay Jehova sa adlaw-adlaw. Sia nagsiling: “Ang mga sora may mga lungib kag ang mga pispis sa langit may mga hapunan, apang ang Anak sang Dios wala gid sing ulunlan sang iya ulo.” (Mateo 6:​25; 8:20) Ang kabalaka bala sa materyal nagapangibabaw sa imo panghunahuna kag mga buhat? Ukon ginapamatud-an bala sang imo pagkabuhi nga ginauna mo ang Ginharian? Kag kamusta naman ang imo panimuot sa pag-alagad kay Jehova? Kaangay bala ini sa aton Huwaran, nga si Jesus? Ginapakita sang Biblia nga si Jesus wala lamang nagbantala sing kakugi kundi nagpakita sing mainit nga kakugi sa madamo nga okasyon. (Juan 2:​14-​17) Dugang pa, daw ano kaayo nga halimbawa ang ginpahamtang ni Jesus may kaangtanan sa gugma! Ti, ginsakripisyo niya ang iya mismo kabuhi para sa iya mga disipulo! (Juan 15:13) Ginailog mo bala si Jesus paagi sa pagpakita sing gugma sa imo Cristianong mga kauturan? Ukon ginatugutan mo bala ang di-kahimpitan sang iban nga mag-upang sang imo gugma sa ila?

Sa aton pagtinguha nga sundon ang halimbawa ni Cristo, masami nga mapaslawan kita. Apang pat-od nga nahamuot si Jehova sa mga panikasog naton nga ‘isuklob si Ginuong Jesucristo.’​—⁠Roma 13:⁠14.

“Mga Halimbawa sa Panong”

May mga indibiduwal bala sa kongregasyon karon nga mahimo mangin mga halimbawa para sa aton? May yara gid! Ang mga kauturan nga lalaki nga gintangdo sa katungdanan nga may responsabilidad ilabi na nga dapat magpahamtang sing halimbawa. Ginsilingan ni Pablo si Tito, nga nag-alagad sa mga kongregasyon sa Creta kag nagtangdo sing mga manugtatap, nga ang tagsa ka gintangdo nga gulang dapat isa ka “lalaki nga hilway sa panumbungon.” (Tito 1:​5, 6) Ginlaygayan man ni apostol Pedro ang “tigulang nga mga lalaki” nga “mangin mga huwaran sa panong.” (1 Pedro 5:​1-3) Kag kamusta naman ang mga nagaalagad subong ministeryal nga mga alagad? Dapat man sila mangin “mga lalaki nga nagaalagad sa maayo nga paagi.”​—⁠1 Timoteo 3:⁠13.

Sa pagkamatuod, indi realistiko nga magpaabot nga ang tagsa ka gulang ukon ministeryal nga alagad mangin lantip sing tumalagsahon sa tanan nga bahin sang Cristianong ministeryo. Ginsilingan ni Pablo ang mga Cristiano sa Roma: “May mga dulot kita nga nagakatuhaytuhay suno sa di-bagay nga kaayo nga ginhatag sa aton.” (Roma 12:6) Ang nanuhaytuhay nga kauturan nga lalaki sampaton sa nanuhaytuhay nga bahin. Indi makatarunganon nga magpaabot nga ang mga gulang magahimo kag magasiling sang tanan nga butang sa himpit nga paagi. “Kita tanan nagakasandad sa madamong beses,” siling sang Biblia sa Santiago 3:⁠2. “Kon ang bisan sin-o wala nagakasandad sa pulong, ang isa nga ini himpit nga tawo, nga sarang man makapugong sang iya bug-os nga lawas.” Apang, walay sapayan sang ila pagkadihimpit, ang mga gulang sarang gihapon, kaangay ni Timoteo, “mangin [mga] halimbawa sa mga matutom sa paghambal, sa paggawi, sa gugma, sa pagtuo, sa kaputli.” (1 Timoteo 4:12) Kon himuon ini sang mga gulang, mahapos nga iaplikar sang mga yara sa panong ang laygay sang Hebreo 13:​7: “Dumduma ang mga nagapanguna sa inyo, . . . kag samtang ginapamalandungan ninyo ang resulta sang ila paggawi iluga ang ila pagtuo.”

Iban Pa nga Modernong-Adlaw nga mga Halimbawa

Sa sulod sang nagligad nga pila ka dekada, madamo ka iban pa ang nagpakita sang ila kaugalingon subong maayo nga mga halimbawa. Kamusta ang linibo ka nagasakripisyo-sa-kaugalingon nga mga misyonero nga “nagbiya sang mga balay ukon mga utod nga lalaki ukon mga utod nga babayi ukon amay ukon iloy ukon mga anak ukon mga kadutaan” agod tumanon ang Cristianong komisyon sa mga latagon sa luwas? (Mateo 19:29) Binagbinaga, man, ang nagalakbay nga mga manugtatap kag ang ila mga asawa, ang mga lalaki kag mga babayi nga nagaalagad subong mga boluntaryo sa mga talatapan sang ­Watch ­Tower So­ciety, kag ang mga payunir nga nagaalagad sa mga kongregasyon. Ini bala nga mga halimbawa makapahulag sa iban? Ang isa ka Cristianong ebanghelisador sa Asia naghinumdom sa isa ka misyonero gikan sa ikawalo nga klase sang Watch­tower Bi­ble ­School of Gilead. Nagsiling sia nga ining matutom nga utod nga lalaki “handa nga atubangon ang panong sang mga lamok kag ang sobra nga kagin-ot. . . . Ang labi pa ka dalayawon amo ang iya ikasarang sa paghimo sing mga presentasyon sa Inintsik kag Malay nga mga lenguahe walay sapayan nga naghalin sia sa Inglaterra.” Ang epekto sining maayo nga halimbawa? Ang utod nga lalaki nagsiling: “Ang iya pagkakalmado kag kompiansa nagpahulag sa akon nga maghandum nga mangin isa ka misyonero sa pagdaku ko.” Indi makapakibot, nga ining utod nga lalaki nangin misyonero gid.

Ang Watch Tower Publications Index may listahan sang madamo nga sugilanon sang kabuhi nga ginbalhag sa Lalantawan kag Magmata! nga mga magasin. Ini nga mga sugilanon nagasugid tuhoy sa mga indibiduwal nga nagsikway sang kalibutanon nga mga karera kag mga tulumuron, naglandas sang mga kaluyahon, naghimo sing daku nga mga pagbag-o sa personalidad, naghupot sing positibo nga panimuot sa atubangan sang mga kalalat-an, kag nagpakita sing kapisan, pagbatas, katutom, pagkamapainubuson, kag nagasakripisyo-sa-kaugalingon nga espiritu. Ang isa ka bumalasa nagsulat tuhoy sa sining mga kasaysayan: “Nangin labi pa ako ka mapainubuson kag mapinasalamaton nga Cristiano samtang ginabasa ko ang inagihan sang iban, kag nabuligan ako sini nga indi paghunahunaon sing sobra ang akon kaugalingon ukon mangin makagod.”

Dugang pa, indi pagkalimti ang maayo nga mga halimbawa sa inyo mismo kongregasyon: mga ulo sang pamilya nga di-mapatumbayaon nga nagaatipan sang materyal kag espirituwal nga mga kinahanglanon sang ila pamilya; mga utod nga babayi​—⁠lakip ang nagasolo nga mga iloy​—⁠nga nagaatubang sang mga pag-ipit sa pagpadaku sa kabataan samtang aktibo gihapon nga nagapakigbahin sa ministeryo; mga tigulang kag mga maluya nga padayon nga matutom walay sapayan sang nagadugang nga pagluya kag balatian. Wala ka bala ginapahulag sining mga halimbawa?

Matuod, ang kalibutan puno sing malain nga mga halimbawa. (2 Timoteo 3:13) Apang, binagbinaga ang laygay ni Pablo sa mga Cristiano sa Judea. Sa tapos maasoy ang huwaran nga panimuot sang madamong dumaan nga lalaki kag babayi sang pagtuo, ginpalig-on sila ni apostol Pablo: “Busa, nian, sanglit ginalibutan kita sing tama kadaku nga panganod sang mga saksi, . . . magdalagan kita nga may pagbatas sang dalaganon nga ginabutang sa aton atubangan, samtang nagatulok kita sing maayo sa Pangulo nga Ahente kag Manughimpit sang aton pagtuo, si Jesus.” (Hebreo 12:​1, 2) Ang mga Cristiano karon ginalibutan man sang ‘daku nga panganod’ sang maayo nga mga halimbawa​—⁠sa dumaan kag modernong adlaw. Nagabenepisyo gid bala ikaw gikan sa ila? Makabenepisyo ka kon determinado ka nga mangin ‘manug-ilog, indi sang kon ano ang malain, kundi sang kon ano ang maayo.’​—⁠3 Juan 11.

Indi realistiko nga magpaabot nga ang tagsa ka gulang ukon ministeryal nga alagad mangin lantip sa tanan nga bahin sang Cristianong ministeryo

Ang mga gulang dapat mangin “mga halimbawa sa panong”