Nagakabuhi sa Katalagman

“Ang tanan nga ginahimo mo kada adlaw​—lakip ang pagtulog​—may katalagman nga mahimo maghalit sa imo kabuhi.”—Discover nga magasin.

ANG kabuhi ginpaanggid sa paglakat sa isa ka lugar nga may nalubong nga mga bomba, kay mahimo mahanabo ang halit ukon kamatayon sa bisan anong tion, sa masami nga wala sing paandam. Nanuhaytuhay ang mga katalagman sa lainlain nga mga pungsod. Nagalakip ini sa mga aksidente sa trapiko, inaway sibil, gutom, AIDS, kanser, balatian sa tagipusuon, kag madamo pa. Halimbawa, sa bagatnan sang Sahara sa Aprika, ang AIDS nangin numero uno nga manugpatay, sining karon lang nga tuig “nagpatay sang 2.2 milyones, 10 ka pilo sang napatay sa tanan nga inaway sibil sa Aprika,” siling sang U.⁠S.News & World Report.

Sa amo man nga tion, binilyon ang ginagasto sang bug-os nga kalibutan sa pagpalawig sang kabuhi kag sa pagbuhin sang katalagman nga magbalatian kag mangin inutil. Madamo sang ginapasanyog nga mga ideya, subong sang makapaayo-sa-lawas nga mga batasan sa pagkaon kag pag-inom kag pisikal nga pag-ehersisyo, ang mahimo nga may maayo nga mga resulta. Apang, may isa ka tuburan sang masaligan nga impormasyon para sa tagsa ka importante nga bahin sang kabuhi nga makabulig sa imo nga magkabuhi nga mas hilway sa katalagman kag may kapin nga kalig-unan. Ina nga tuburan amo ang Biblia. Nagaunod ini sing mga panuytoy sa pag-atubang sa nagkalainlain nga mga kabalaka nga nagaapektar sa aton kapagros kag kaayuhan. Sa pagkamatuod, ang Biblia wala nagabinagbinag sing detalyado sang tanan nga problema. Apang, nagahatag ini sang labing maayo nga mga prinsipio sa pagtuytoy sa aton sa mga butang kaangay sang batasan sa pagkaon, pisikal nga kaayuhan, panimuot sa hunahuna, sekso, paggamit sing alkoholiko nga ilimnon, tabako, kag sang ginatawag nga mga droga sa paglipaylipay, kag madamong iban pa nga butang.

Para sa madamo, ang kabuhi puno sing pagkawalay kasiguruhan sa pinansial. Makabulig man diri sa aton ang Biblia. Wala lamang sini ginapalig-on ang maalamon nga pagtamod kag paggamit sa kuwarta kundi ginapakita man sini kon paano mangin isa ka mas maayo nga empleyado ukon amo. Sa simple nga hambal, ang Biblia isa ka maayo nga giya, indi lamang para sa pinansial nga kalig-unan kag pisikal nga kaayuhan, kundi para sa kabuhi mismo. Luyag mo bala makita kon daw ano ka praktikal ang Biblia karon? Kon amo padayuna palihug ang pagbasa.