Report sang mga Manugbantala sang Ginharian
Naayawan ang Iya Espirituwal nga mga Kinahanglanon
ANG Cipre isa ka isla sa naaminhan-sidlangan nga bahin sang Dagat Mediteraneo. Sa panahon sang Biblia, ang Cipre bantog sa iya saway kag maayo nga tapi. Diri nagbantala sing maayong balita sanday Pablo kag Bernabe sang ila una nga paglakbay subong misyonero. (Binuhatan 13:4-12) Sa karon, ang maayong balita may yara gihapon positibo nga epekto sa kabuhi sang madamo nga taga-Cipre. Nangin matuod gid ini kay Lucas, isa ka tawo nga nagapangidaron sing 40 anyos. Sia nagasugid:
“Natawo ako sa isa ka pamilya nga may pito ka kabataan sa isa ka bakahan. Halin sang pagkabata, maluyagon gid ako magbasa. Ang akon paborito nga libro amo ang de-bulsa nga edisyon sang Cristianong Griegong Kasulatan. Sang napulo ka tuig ang edad ko, nagporma kami sang akon mga abyan sing isa ka diutay nga grupo sang pagtinuon sa Biblia. Apang, wala yadto nagdugay kay ang pila ka tigulang nga mga tawo sa amon minuro nagtawag sa amon nga mga erehes.
“Sang ulihi, samtang nagaeskwela ako sa Estados Unidos, nasumalang ko ang mga tawo gikan sa lainlain nga relihion. Ginpukaw sini liwat ang akon handum sa espirituwal nga mga butang. Naghinguyang ako sang madamo nga adlaw sa pagtuon sa lainlain nga relihion sa librarya sang unibersidad. Nagkadto man ako sa pila ka simbahan, apang walay sapayan sang akon pagpangabudlay, wala ako gihapon naayawan sa espirituwal.
“Sang matapos ko ang akon pagtuon, nagbalik ako sa Cipre kag nagtrabaho subong isa ka direktor sang laboratoryo sang bulong. Ginabisitahan ako sa akon ulubrahan sang isa ka gulang-gulang nga tawo nga si Antonis, nga isa sang mga Saksi ni Jehova. Apang, ang iya pagbisita natalupangdan sang Griegong Ortodokso nga Simbahan.
“Wala magdugay, ginkadtuan ako sang isa ka teologo kag ginpalas-ay sa pagpakighambal sa mga Saksi ni Jehova. Bangod gintudluan ako halin sang pagkabata nga ang kamatuoran yara sa Griegong Ortodokso nga Simbahan, nagsunod ako kag nag-untat sa pagpakighambal kay Antonis samtang ginsugdan ko ang pagbinagbinag sang Biblia upod sa teologo. Ginbisitahan ko man ang madamo nga monasteryo sa Cipre. Nagkadto pa gid gani ako sa naaminhan nga Gresya kag nagbisita sa Mount Athos, nga ginakabig subong amo ang labi ka balaan nga bukid sa kalibutan sang Cristianong Ortodokso. Apang, ang mga pamangkot ko sa Biblia wala gihapon masabat.
“Gani, nangamuyo ako sa Dios nga buligan ako nga masapwan ang kamatuoran. Wala magdugay, ginbisitahan ako liwat ni Antonis sa akon ulubrahan, kag gintamod ko ini nga sabat sa akon pangamuyo. Nian, gin-untatan ko ang pagpakigkita sa teologo kag ginsugdan ang pagtuon sa Biblia upod kay Antonis. Padayon ako nga nag-uswag, kag sang Oktubre 1997, ginsimbuluhan ko ang akon dedikasyon kay Jehova paagi sa pagpabawtismo sa tubig.
“Ang akon asawa kag ang amon duha ka kamagulangan nga anak nga babayi, nga 14 kag 10 anyos ang pangidaron sadto nga tion, nagpamatok sang primero. Apang bangod sang akon maayo nga paggawi, namat-od ang akon asawa nga magtambong sa Kingdom Hall. Nahamuot gid sia sa kaayo kag personal nga interes nga ginpakita sang mga Saksi. Labi na nga nagdayaw gid sia sa ila paggamit sang Biblia. Subong resulta, ginbaton sang akon asawa kag duha ka kamagulangan nga bata nga babayi ang pagtuon sa Biblia upod sa mga Saksi ni Jehova. Handurawa ang akon kalipay sang sila nga tatlo ginbawtismuhan sa “Matagnaon nga Pulong sang Dios” nga Distrito nga Kombension sang 1999!
“Huo, ang akon pagpangita sa kamatuoran naayawan. Karon ang amon bug-os nga pamilya, lakip ang akon asawa kag apat ka kabataan, nahiusa sa putli nga pagsimba kay Jehova.”