Report sang mga Manugbantala sang Ginharian

“Nakabati” Sila sang Maayong Balita sang Ginharian sa Brazil

AGOD mabantala ang maayong balita sang Ginharian sa komunidad sang mga bungol, ginbaton sang mga Saksi ni Jehova sa Brazil ang hangkat nga magtuon sing Brazilian Sign Language. Nangin maayo ang mga resulta sang ila mga panikasog, subong sang ginapakita sang masunod nga mga eksperiensia.

Si Eva,⁠a nga isa ka bungol nga babayi sa São Paulo, nakatuon sing sign language sang, upod sa iya tatlo ka bata, nakigpuyopuyo sia sa isa ka bungol nga lalaki. Sa isa ka shopping mall, nasugilanon ni Eva kag sang iya bana-bana ang isa ka grupo sang bungol nga mga Saksi kag gin-agda sila nga magtambong sa isa ka miting sa Kingdom Hall. Ginbaton nila ang pangagda, nga nagahunahuna nga isa lang ini ka sosyal nga okasyon.

Bangod diutay lamang ang iya nahibaluan sa sign language, wala nahangpan sing maayo ni Eva ang ginhambalan sa miting. Pagkatapos sini, gin-agda sia sang pila ka Saksi nga mamahaw sa ila puluy-an. Gingamit nila ang mga laragway sa brosyur nga Agoma ang Kabuhi sa Duta Sing Dayon! agod ipaathag ang saad sang Dios tuhoy sa palaabuton nga paraiso sa duta. Naluyagan ni Eva ang iya natun-an kag nagsugod sia sa pagtambong sing regular sa mga miting.

Wala madugay pagkatapos sadto, ginbayaan ni Eva ang iya bana-bana agod magkabuhi suno sa mga talaksan sa Biblia. Walay sapayan sang mabaskog gid nga pagpamatok sang iya pamilya, nag-uswag sia sa espirituwal kag nabawtismuhan sang 1995. Pagligad sang anom ka bulan, nagpalista si Eva subong isa ka payunir, ukon bug-os tion nga manugbantala sang Ginharian. Sugod sadto nabuligan niya ang apat ka bungol nga tawo nga magdedikar kag magpabawtismo.

Si Carlos natawo nga isa ka bungol. Halin sa pagkabata nadalahig sia sa droga, imoralidad, kag pagpangawat. Bangod ginpahog sia sang mga miembro sang ila kontra nga gang, nagpalagyo sia pakadto sa São Paulo kag nag-istar sing makadali upod kay João. Si João, kaangay ni Carlos, isa man ka bungol nga may imoral nga kabuhi.

Paglipas sang pila ka tuig, natun-an ni Carlos ang mensahe sang Ginharian, nga nagpahulag sa iya nga ipahisanto ang iya estilo sang pagkabuhi sa Biblia kag ginhimo nga legal ang iya pag-asawahay. Sang nahimo na ang mga ginpatuman sang Kasulatan, nagpabawtismo si Carlos bilang simbulo sang iya dedikasyon kay Jehova. Sini man nga tion, lipod kay Carlos, natun-an man ni João ang maayong balita, kag sia man naghimo sing daku nga pagbag-o sa iya kabuhi. Sang mahibaluan niya nga wala nahamuot si Jehova sa paggamit sing relihioso nga mga imahen, ginhaboy ni João ang iya koleksion sang mga “santos.” Sa tapos talikdan ang iya anay estilo sang pagkabuhi, nagpabawtismo man si João.

Nalipay gid sanday Carlos kag João sang magkitaay sila sa Kingdom Hall kag makita ang pagbag-o nga ila nahimo! Sila nga duha responsable na nga mga ulo karon sang pamilya kag nagaalagad subong makugi nga mga manugbantala sang Ginharian.

Sa Brazil, may yara na karon 30 ka sign language nga kongregasyon kag 154 ka grupo, nga may kapin sa 2,500 ka manugbantala, kag mga 1,500 sini sa ila ang mga bungol. Sang 2001 nga “Mga Manunudlo Sang Pulong Sang Dios” Distrito nga mga Kombension para sa mga bungol sa Brazil, kapin sa 3,000 ang nagtambong, kag 36 ang ginbawtismuhan. Kon pakamaayuhon ni Jehova, ginalauman nga madamo pa nga mga bungol ang magabaton sang mensahe sang Ginharian.

[Nota]