Sa Diin Mo Masapwan ang Matuod nga Espirituwal nga mga Talaksan?

“KON ginasunod mo ang isa ka relihion bangod lang sang tradisyon sang pamilya, ngaa indi mo pagpilion ang Celtic nga relihion nga ginapatihan sang aton mga katigulangan mga 2,000 ka tuig na ang nagligad?” ang daw makahalam-ot nga pamangkot ni Rodolphe. Nakayuhum sa sini nga ideya ang lamharon niya nga manugpamati.

“Importante gid sa akon ang akon kaangtanan sa Dios,” siling ni Rodolphe. “Batok gid ako sa ideya nga ipilit sa akon sang tradisyon ang relihioso nga mga pagtuluuhan, bangod lamang amo sini ang relihion sang mga miembro sang akon pamilya nga nagkabuhi sing napulo ukon bisan pa gani ginatos ka tuig na ang nagligad.” Mahalungon nga gintulutimbang ni Rodolphe ang mga butang; wala niya ginkabig ining importante nga butang nga isa lang ka pinanubli niya.

Bisan pa nagakadula na karon ang pagpanubli sang relihion halin sa isa ka henerasyon pakadto sa isa pa, ang kalabanan nagasunod gihapon sa relihion sang ila pamilya. Apang husto bala pirme nga sundon ang relihion sang mga ginikanan? Ano ang ginasiling sang Biblia?

Pagkatapos sang 40 ka tuig sa desyerto, ginpapili ni Josue, nga nagbulos kay Moises, ang mga Israelinhon: “Kag kon malaut sa inyo panulok ang mag-alagad kay Jehova, magpili kamo karon para sa inyo kaugalingon kon sin-o ang inyo alagdon, kon ang mga dios nga gin-alagad sang inyo mga katigulangan sa tabok sang Suba ukon ang mga dios sang mga Amornon nga sa ila duta nagapuyo kamo. Apang para sa akon kag sa akon panimalay, magaalagad kami kay Jehova.”​​—⁠Josue 24:⁠15.

Ang isa sa mga katigulangan nga ginpatuhuyan ni Josue amo si Tera, ang amay ni Abraham, nga nagpuyo sa siudad sang Ur, nga nahamtang sadto nga tion sa sidlangan sang Suba Eufrates. Wala gid man sang ginasugid ang Biblia tuhoy kay Tera, luwas lamang nga nagsimba sia sa iban nga mga dios. (Josue 24:⁠2) Ang iya anak nga si Abraham, bisan wala sing bug-os nga ihibalo sa katuyuan sang Dios, handa sa pagbiya sang iya natawhan nga siudad sang ginsugo sia ni Jehova nga himuon ini. Huo, ginpili ni Abraham ang isa ka relihion nga tuhay sa relihion sang iya amay. Bangod ginhimo niya ini, nabaton ni Abraham ang mga pagpakamaayo nga ginsaad sa iya sang Dios, kag nangin isa sia ka tawo nga ginakilala sang madamo nga relihion nga “amay sang tanan nga nagatuo sa Dios.”​​—⁠Roma 4:​11, Today’s English Version.

Positibo man nga ginasaysay sang Biblia ang istorya ni Rut, isa ka katigulangan ni Jesucristo. Si Rut, isa ka Moabnon nga babayi nga nakapamana sing isa ka Israelinhon, nabalo kag nag-atubang sa isa ka desisyon: magpabilin sa iya kaugalingon nga pungsod ukon magbalik sa Israel upod sa iya ugangan nga babayi. Bangod nakita ang superyor nga balor sang pagsimba kay Jehova kon ipaanggid sa idolatroso nga pagsimba sang iya mga ginikanan, nagpahayag si Rut sa iya ugangan nga babayi: “Ang imo katawhan mangin akon katawhan, kag ang imo Dios akon Dios.”​​—⁠Rut 1:​16, 17.

Nagakomento sa pagkaimportante sining rekord sa kanon sang Biblia, ang Dictionnaire de la Bible nagpaathag nga ini nga kasaysayan nagapakita “kon paano ang isa ka babayi nga natawo sa iban nga pungsod, nga natawo sa tunga sang pagano nga katawhan nga nagapang-away kag ginakaugtan sang Israel, . . . bangod sang iya gugma sa katawhan ni Jehova kag sa pagsimba sa Iya, sa kabubut-on sang Dios nangin katigulangan sang diosnon nga si Hari David.” Wala nangalag-ag si Rut nga pilion ang isa ka relihion nga tuhay sa ila sang iya mga ginikanan, kag subong resulta sina nga desisyon, nabaton niya ang pagpakamaayo sang Dios.

Mas maathag nga ginapakita sa kasaysayan sang pamuno sang Cristianismo ang mga rason kon ngaa gintalikdan sang mga disipulo ni Jesus ang relihion sang ila mga katigulangan. Sa isa ka makabuluyok nga pamulongpulong, gin-agda ni apostol Pedro ang iya mga tagpalamati nga ‘manginluwas sa sining tiko nga kaliwatan’ paagi sa paghinulsol sang ila mga sala kag pagpabawtismo sa ngalan ni Jesucristo. (Binuhatan 2:​37-​41) Isa sang talalupangdon gid nga halimbawa amo si Saulo, isa ka Judiyo nga manughingabot sang mga Cristiano. Samtang nagapakadto sa Damasco, nakita niya sa isa ka palanan-awon si Cristo, kag pagkatapos sini nangin isa ka Cristiano si Saulo kag nakilal-an subong apostol Pablo.​​—⁠Binuhatan 9:​1-9.

Ang kalabanan nga mga Cristiano sang una wala sing subong sini nga tumalagsahon nga eksperiensia. Sa gihapon, tanan sila nagtalikod sa Judaismo ukon sa pagsimba sa nanuhaytuhay nga pagano nga mga dios. Ang mga nagbaton sang Cristianismo naghimo sini nga may bug-os nga ihibalo sang mga kamatuoran, masami pagkatapos sang malawig nga paghambalanay nahanungod sa papel ni Jesus subong Mesias. (Binuhatan 8:​26-​40; 13:​16-​43; 17:​22-​34) Maathag nga nahibaluan sang mga Cristiano sang una nga kinahanglan nila maghimo sing mga pagbag-o sa ila mga kabuhi. Ang pangagda ginhatag sa tanan, sa mga Judiyo kag indi Judiyo, apang pareho lang ang mensahe. Agod pahamut-an ang Dios, kinahanglan sundon ang isa ka bag-o nga porma sang pagsimba, nga amo ang Cristianismo.

Pagpili nga Nagadalahig sa Aton

Kinahanglan gid ang kaisog sang una nga siglo agod talikdan ang relihioso nga mga tradisyon sang pamilya​​—⁠ang Judaismo, ang pagsimba sa emperador, ang pagsimba sa pagano nga mga dios-dios​​—⁠kag magbuylog sa isa ka hublag nga ginatamay sang mga Judiyo kag mga Romano. Ining desisyon nagresulta gilayon sa mapintas nga paghingabot. Sa karon, kinahanglan ang kaanggid nga kaisog sa pagpangindi “nga madalahig ang kaugalingon kag mabuyo sa lapnag nga kahimtangan sang pagsunod sa kon ano ang ginahimo sang kadamuan,” subong sang ginpaathag ni Hippolyte Simon, Katoliko nga obispo sang Clermont-Ferrand, sa iya libro nga Vers une France païenne? (Ang Nangin Pagano nga Pransia?) Kinahanglan ang kaisog agod mangin katapo sang isa ka minoriya nga relihioso nga kahublagan nga ginamulay kon kaisa, subong sang mga Saksi ni Jehova.

Si Paul, isa ka lamharon nga lalaki nga taga-Bastia, Corsica, nga nagdaku sa Katoliko nga relihion, nagpakigbahin kon kaisa sa mga hilikuton sa simbahan, subong sang pagbaligya sing mga keyk agod makatipon sing pundo para sa isa ka Katoliko nga organisasyon nga nagabulig sa mga kubos. Bangod luyag niya mahangpan sing maayo ang Biblia, nagpasugot sia sa regular nga mga paghinun-anon upod sa mga Saksi ni Jehova. Sang ulihi, narealisar niya nga makahatag sing dalayon nga mga benepisyo ang iya natun-an. Gani, lubos nga ginbaton ni Paul ang mga prinsipio sang Biblia kag nangin isa sang mga Saksi ni Jehova. Gintahod sang iya mga ginikanan ang iya desisyon, nga wala nag-apektar sa ila suod nga pagtamdanay sa pamilya.

Si Amélie taga-bagatnan nga Pransia. Mga Saksi ni Jehova ang mga miembro sang iya pamilya sa sulod na sang apat ka henerasyon. Ngaa ginpili niya ang relihion sang iya mga ginikanan? “Indi ka mangin isa sang mga Saksi ni Jehova bangod lang ang imo mga ginikanan ukon lolo kag lola mga Saksi ni Jehova,” siling niya. “Apang sa isa ka adlaw, isiling mo sa imo kaugalingon: ‘Relihion ko ini bangod amo ini ang akon mga pagpati.’” Subong sang iban pa lamharon nga mga Saksi ni Jehova, nahibaluan ni Amélie nga ang iya mapag-on nga relihioso nga mga pagtuluuhan nagahatag sa iya sing katuyuan sa kabuhi kag tuburan sang dalayon nga kalipay.

Kon Ngaa Dapat Batunon ang mga Talaksan sang Dios

Ang Hulubaton, kapitulo 6, bersikulo 20, nagapalig-on sa mga luyag magpahamuot sa Dios: “Tumana, anak ko, ang sugo sang imo amay, kag indi pagsikwaya ang kasuguan sang imo iloy.” Sa baylo nga irekomendar ang bulag nga pagtuman, ginapalig-on sini nga laygay ang mga pamatan-on nga batunon ang diosnon nga mga talaksan paagi sa pagpabakod sang ila pagtuo kag paagi sa pagpanindugan dampig sa Dios. Gin-agda ni apostol Pablo ang iya mga kaupod nga ‘pat-uron ang tanan nga butang,’ nga usisaon kon bala ang ginatudlo sa ila nagahisanto sa Pulong sang Dios kag sa Iya kabubut-on, kag manghikot suno sa sini.​​—⁠1 Tesalonica 5:⁠21.

Ginpadaku man ukon indi sa isa ka Cristiano nga panimalay, ang kapin sa anom ka milyon nga mga Saksi ni Jehova, bata kag tigulang, naghimo sini nga desisyon. Paagi sa mahalungon nga pagtuon sa Biblia, nasapwan nila ang masaligan nga mga sabat sa ila mga pamangkot tuhoy sa katuyuan sang kabuhi kag maathag nila nga nahangpan ang kabubut-on sang Dios para sa katawhan. Pagkatapos matigayon ini nga ihibalo, ginbaton nila ang mga talaksan sang Dios kag ginhimo ang ila bug-os nga masarangan agod tumanon ang kabubut-on sang Dios.

Regular man ikaw nga bumalasa sining magasin ukon indi, ngaa indi mo pagbatunon ang ginatanyag sang mga Saksi ni Jehova nga buligan ka sa pag-usisa sa espirituwal nga mga talaksan sang Biblia. Sa sining paagi, ‘matilawan mo kag makita nga si Jehova maayo’ kag matigayon ang ihibalo nga, kon iaplikar, magadul-ong sa kabuhi nga walay katapusan.​​—⁠Salmo 34:⁠8; Juan 17:⁠3.

[Retrato sa pahina 5]

Apat ka henerasyon sang isa ka pamilya nga mga Saksi ni Jehova sa Pransia

[Retrato sa pahina 7]

Ginpili ni Rut nga alagaron si Jehova sa baylo sang mga dios sang iya mga katigulangan