“Magpalapit Kamo sa Dios, kag Magapalapit Sia sa Inyo”
Sang Una kag Karon—Madulom nga Nagligad, Masanag nga Palaabuton
“ANG pulong sang Dios buhi kag gamhanan kag matalom pa sa bisan ano nga espada nga duha sing sulab . . . kag may ikasarang sa paghantop sang mga hunahuna kag mga tinutuyo sang tagipusuon.” (Hebreo 4:12) Amo sini ang ginsiling ni apostol Pablo tuhoy sa nagatudok nga gahom sang mensahe sang Dios. Ang ikasarang sini sa paglab-ot sang tagipusuon nakita ilabi na sang unang siglo C.E. Walay sapayan sang indi maayo nga impluwensia sadto, ang nangin mga Cristiano nagsul-ob sang bag-ong personalidad.—Roma 1:28, 29; Colosas 3:8-10.
Ang makapabag-o nga gahom sang pulong sang Dios, nga ginrekord sa Biblia, makita man sa karon. Halimbawa, binagbinaga ang halimbawa sang isa ka mataas, makusog nga tawo nga si Richard. Bangod maakigon, manapungol dayon si Richard bisan sa diutay lamang nga rason. Ang kasingki naghalit sa iya pagkabuhi. Nag-entra pa gani si Richard sa isa ka klab sang boksing. Naghanas sia sing maayo kag nangin kampeon sa heavyweight nga boksing sa Westphalia, Alemanya. Palahubog man si Richard kag masami nga nagakadalahig sa mga pag-ilinaway. Sa isa sini nga pag-ilinaway, may napatay, kag diutayan lang mabilanggo si Richard.
Kamusta naman ang kabuhi ni Richard subong may asawa? “Antes kami nagtuon ni Heike sa Biblia,” hinumdom ni Richard, “wala kami nagapasilabot sa isa kag isa. Masami si Heike sa iya mga amiga, samtang ako naman masami sa akon mga kalingawan—ilabi na sa boksing, surfing, kag pagsalom.”
Sang nagtuon na sa Biblia sanday Richard kag Heike upod sa mga Saksi ni Jehova, nabug-atan si Richard sa panghunahuna nga dapat maghimo sing daw imposible nga mga pagbag-o agod ipahisuno ang iya kabuhi sa mataas nga mga talaksan sang Pulong sang Dios. Apang, samtang nakilala pa gid niya sing maayo si Jehova nga Dios, naglambo ang handum ni Richard nga pahamut-an sia. Nahangpan ni Richard nga wala ginakahamut-an sang Dios ang mga nagahigugma sa kasingki ukon nagagamit sini sa kalingawan. “Ang bisan sin-o nga nagahigugma sa kasingki pat-od nga dumtan sang Iya [ni Jehova] kalag,” natun-an ni Richard.—Salmo 11:5.
Dugang pa, nangin interesado gid sanday Richard kag Heike sa paglaum nga mabuhi sing dayon sa paraiso nga duta. Luyag nila nga magkabuhi sa paraiso nga magkaupod! (Isaias 65:21-23) Ang pangagda nga “magpalapit kamo sa Dios, kag magapalapit sia sa inyo” nagtudok gid sa tagipusuon ni Richard. (Santiago 4:8) Nahangpan niya ang kapuslanan sang pagpamati sa sining inspirado nga laygay: “Dili ka mahisa sa tawo nga masingki, ukon dili pagpilia ang bisan ano sa iya mga dalanon. Kay ang malimbungon nga tawo kangil-aran kay Jehova, apang ang Iya pagpakigsuod yara sa mga matadlong.”—Hulubaton 3:31, 32.
Bisan pa may mabaskog nga handum nga bag-uhon ang iya mga dalanon, narealisar ni Richard nga indi niya ini mahimo sa iya kaugalingon lamang nga kusog. Nahisayran niya nga kinahanglan ang pagpangayo sing bulig sa Dios sa pangamuyo. Gani naghulag sia nahisuno sa mga pulong ni Jesus sa Iya mga apostoles: “Mangamuyo sing padayon, agod indi kamo magsulod sa pagsulay. Ang espiritu, sa pagkamatuod, nalangkag, apang ang unod maluya.”—Mateo 26:41.
Sang mahibaluan kon ano ang pagtamod sang Dios sa kasingki kag pagsilabo sang kaakig, napat-od ni Richard nga ang boksing indi kalahamut-an nga isport. Paagi sa bulig ni Jehova kag sa pagpalig-on sang mga nagtudlo sing Biblia sa iya, nag-untat si Richard sa pagpakigbahin sa kasingki. Ginbiyaan niya ang boksing kag pag-ilinaway kag nagdesisyon nga pauswagon ang iya pagkabuhi sa pamilya. “Ang pagtuon sa kamatuoran gikan sa Biblia nagbulig sa akon nga binagbinagon anay ang isa ka butang antes ko ini himuon,” siling ni Richard, nga isa na karon ka mabuot nga manugtatap sa isa sang mga kongregasyon sang mga Saksi ni Jehova. Sia nagsiling pa: “Ang mga prinsipio sang gugma kag pagtahod giya nakon karon sa akon kaangtanan sa akon asawa kag kabataan. Subong resulta, suod sa isa kag isa ang amon pamilya.”
May tion nga ang mga tawo nga nakabaton sing sayop nga impormasyon nagasumbong nga ginaguba sang mga Saksi ni Jehova ang mga pamilya. Apang, ang mga halimbawa sang mga indibiduwal kaangay ni Richard nagapamatuod nga sayop ang ila panumbungon. Ang matuod, ang kamatuoran sa Biblia makahatag sang kalig-on sa pamilya kag isa ka masanag nga palaabuton para sa mga may madulom nga nagligad.—Jeremias 29:11.
[Blurb on page 9]
“Ang paglaum sa isa ka paraiso nga duta nagpahulag sa akon nga magbag-o”
[Kahon sa pahina 9]
Epektibo nga mga Prinsipio sang Biblia
Ang Biblia makaimpluwensia gid sa kabuhi sang mga tawo. Yari ang pila ka Makasulatanhon nga mga prinsipio nga nagbulig agod magbag-o ang masingki nga mga tawo:
“Sia nga makuli sa pagpangakig maayo pa sa gamhanan nga tawo, kag sia nga nagapugong sang iya espiritu sangsa isa nga nagaagaw sing siudad.” (Hulubaton 16:32) Ang indi makontrol nga kaakig isa ka tanda sang kaluyahon, indi sang kabakod.
“Ang paghantop sang tawo nagapahinay gid sang iya kaakig.” (Hulubaton 19:11) Ang paghantop kag paghangop sang kahimtangan magabulig sa isa nga usisaon ang matuod nga mga rason sang pagbaisay kag malikawan ang pagsilabo sang kaakig.
‘Indi ka magpakig-upod sa kay bisan sin-o nga madali maakig agod indi ka makatuon sang iya mga dalanon.’ (Hulubaton 22:24, 25) Maalamon nga ginalikawan sang mga Cristiano ang pagpakig-upod sa mga madali maakig.