Paano Naton Dapat Tamdon ang mga Tawo Samtang Nagahilapit ang Adlaw ni Jehova?
“Si Jehova indi mahinay may kaangtanan sa iya saad, . . . kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.”—2 PEDRO 3:9.
1, 2. (a) Paano ginatamod ni Jehova ang mga tawo karon? (b) Ano ang mahimo naton ipamangkot sa aton kaugalingon?
ANG mga alagad ni Jehova may hilikuton nga “maghimo sing mga disipulo sa mga tawo sa tanan nga kapungsuran.” (Mateo 28:19) Samtang ginatuman naton ini kag ginahulat ang “dakung adlaw ni Jehova,” dapat tamdon naton ang mga tawo subong sang pagtamod niya. (Sofonias 1:14) Kag paano sila ginatamod ni Jehova? Si apostol Pedro nagasiling: “Si Jehova indi mahinay may kaangtanan sa iya saad, subong sang ginakabig sang iban nga kahinayon, kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol.” (2 Pedro 3:9) Ginatamod sang Dios ang mga tawo subong mga indibiduwal nga may posibilidad nga maghinulsol. “Ang iya kabubut-on amo nga ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Timoteo 2:4) Nalipay pa gani si Jehova kon ‘magbiya ang malauton gikan sa iya dalanon agod padayon sia nga mabuhi’!—Ezequiel 33:11.
2 Ginatamod man bala naton ang mga tawo subong sang pagtamod ni Jehova? Kaangay sa iya, ginakabig bala naton ang mga indibiduwal gikan sa tagsa ka rasa kag pungsod subong posible nga mangin “mga karnero sang iya halalban”? (Salmo 100:3; Binuhatan 10:34, 35) Binagbinagon naton ang duha ka halimbawa nga nagapakita sang importansia sang pagtigayon sing pagtamod sang Dios. Sa duha ka halimbawa, malapit na ang kalaglagan, kag ginpahibalo sing abanse ang mga alagad ni Jehova tuhoy sa sini. Ini nga mga halimbawa importante gid samtang ginahulat naton ang dakung adlaw ni Jehova.
Si Abraham May Kaangay nga Pagtamod kay Jehova
3. Ano ang pagtamod ni Jehova sa mga pumuluyo sang Sodoma kag Gomorra?
3 Ang una nga halimbawa amo ang may kaangtanan sa matutom nga patriarka nga si Abraham kag sa malaut nga mga siudad sang Sodoma kag Gomorra. Sang nabatian ni Jehova “ang singgit sang pagyamo tuhoy sa Sodoma kag Gomorra,” wala niya ginlaglag gilayon yadto nga mga siudad kag ang mga pumuluyo sini. Nagpangusisa sia anay. (Genesis 18:20, 21) Ginpadala niya ang duha ka anghel sa Sodoma, diin nagdayon sila sa balay sang matarong nga si Lot. Sang gab-i nga nag-abot ang mga anghel, “ginlibutan sang mga lalaki sang siudad . . . ang balay, halin sa bata nga lalaki tubtob sa tigulang nga lalaki, ang tanan nga mga tawo subong isa ka guban,” nga luyag makighulid sa mga anghel. Maathag nga ang malaut nga kahimtangan sang mga pumuluyo sang siudad nagpamatuod nga takus gid ini laglagon. Apang, ginsilingan sang mga anghel si Lot: “May iban ka pa bala diri? Umagad nga lalaki kag ang imo mga anak nga lalaki kag imo mga anak nga babayi kag ang tanan nga imo sa siudad, paguaa sila gikan sa sining duog!” Ginbuksan ni Jehova ang dalan agod luwason ang pila ka pumuluyo sadto nga siudad, apang sang ulihi, si Lot lamang kag ang iya duha ka anak nga babayi ang naluwas sa kalaglagan.—Genesis 19:4, 5, 12, 16, 23-26.
4, 5. Ngaa naghingyo si Abraham para sa mga pumuluyo sang Sodoma, kag ang pagtamod bala niya sa mga tawo kaangay sa pagtamod ni Jehova?
4 Balikan naton karon ang tion sang ginpahayag ni Jehova ang iya tuyo nga usisaon ang mga siudad sang Sodoma kag Gomorra. Amo yadto ang tion nga naghingyo si Abraham: “Pananglit may kalim-an ka matarong nga tawo sa sulod sang siudad. Nian, papason mo bala sila kag indi pagpaiwayon ang duog tungod sa kalim-an nga matarong nga yara sa sulod sini? Indi gid ikaw mapatihan nga himuon mo ang subong sini nga patyon ang matarong nga tawo upod sa isa nga malauton sa bagay nga ang matarong mangin subong sang malauton! Indi gid ikaw mapatihan sa sini. Indi bala ang Hukom sang bug-os nga duta magahimo sing matarong?” Duha ka beses nga gingamit ni Abraham ang ekspresyon nga “indi gid ikaw mapatihan.” Sa naeksperiensiahan niya, nahibaluan ni Abraham nga indi paglaglagon ni Jehova ang matarong upod sa malauton. Sang nagsiling si Jehova nga indi niya paglaglagon ang Sodoma kon may “kalim-an ka matarong nga tawo sa sulod sang siudad,” amat-amat nga ginbuhinan ni Abraham ang kadamuon tubtob naglab-ot ini sa napulo lamang.—Genesis 18:22-33.
5 Namati ayhan si Jehova sa mga hingyo ni Abraham kon supak ini sa iya pagtamod? Indi gid. Subong “abyan ni Jehova,” maathag nga nahibaluan ni Abraham ang pagtamod ni Jehova kag amo man sini ang iya pagtamod. (Santiago 2:23) Sang ginpatuhoy ni Jehova ang iya igtalupangod sa Sodoma kag Gomorra, handa sia nga binagbinagon ang mga pangabay ni Abraham. Ngaa? Bangod ‘indi luyag sang aton langitnon nga Amay nga ang bisan sin-o malaglag kundi luyag niya nga ang tanan makadangat sa paghinulsol.’
Ang Pagtamod ni Jonas sa mga Tawo—Kabaliskaran Gid
6. Ano ang reaksion sang mga taga-Ninive sa ginpahayag ni Jonas?
6 Binagbinaga karon ang ikaduha nga halimbawa—ang iya ni Jonas. Sa sini nga halimbawa ang siudad nga gintalana nga laglagon amo ang Ninive. Ginsugo si manalagna Jonas nga ipahayag niya nga ang kalainan sang siudad ‘nagdangat sa atubangan ni Jehova.’ (Jonas 1:2) Lakip ang mga lugar sa palibot, ang Ninive isa ka daku nga siudad, “nga may kalayuon nga lalakton nga tatlo ka adlaw.” Sang nagtuman sang ulihi si Jonas kag nagsulod sa Ninive, padayon sia nga nagpahayag: “Kap-atan pa ka adlaw, kag ang Ninive laglagon.” Kag sa amo, “ang katawhan sang Ninive nagtuo sa Dios, kag nagbantala sila sing puasa kag nagpanapot sing sako.” Bisan ang hari sang Ninive naghinulsol.—Jonas 3:1-6.
7. Paano gintamod ni Jehova ang mahinulsulon nga panimuot sang mga taga-Ninive?
7 Kabaliskaran gid ini sa reaksion sa Sodoma! Paano gintamod ni Jehova ang mahinulsulon nga mga taga-Ninive? Ang Jonas 3:10 nagasiling: “Nagkalisod ang matuod nga Dios nahanungod sa kalamidad nga ginsiling niya nga himuon niya kuntani sa ila; kag wala niya ini paghimua.” “Nagkalisod” si Jehova sa kahulugan nga ginbag-o niya ang iya pagpakig-angot sa mga taga-Ninive bangod ginbag-o nila ang ila mga dalanon. Ang mga talaksan sang Dios wala magbag-o, apang ginbag-o ni Jehova ang iya pamat-od sang nakita niya nga naghinulsol ang mga taga-Ninive.—Malaquias 3:6.
8. Ngaa naakig si Jonas?
8 Sang nahisayran ni Jonas nga indi paglaglagon ang Ninive, gintamod bala niya ang mga butang subong sang pagtamod ni Jehova? Wala, kay ginasugiran kita: “Apang, indi gid yadto makapahamuot kay Jonas, kag nanginit sia sa kaakig.” Ano pa ang ginhimo ni Jonas? Ang rekord nagasiling: “Nangamuyo sia kay Jehova kag nagsiling: ‘A, karon, O Jehova, indi bala nga amo ini ang ginasiling ko sang didto pa ako sa akon duta? Amo ina kon ngaa nagdalidali ako kag nagpalagyo pa Tarsis; kay nakahibalo ako nga ikaw Dios nga mainayuhon kag maluluy-on, makuli sa pagpangakig kag bugana sa mahigugmaon nga kalulo, kag nagakalisod sa kalamidad.’” (Jonas 4:1, 2) Nahibaluan ni Jonas ang mga kinaiya ni Jehova. Apang sadto nga tion, naakig ang manalagna kag wala niya gintamod ang mahinulsulon nga mga pumuluyo sang Ninive subong sang pagtamod sang Dios.
9, 10. (a) Ano nga leksion ang ginhatag ni Jehova kay Jonas? (b) Ngaa makahinakop kita nga ang pagtamod ni Jonas sang ulihi sa mga taga-Ninive nahisanto na sa pagtamod ni Jehova?
9 Naggua si Jonas sa Ninive, nagtukod sing payagpayag, kag naglingkod sa pagpasilong sa sini “tubtob nga makita niya kon ano ang matabo sa siudad.” Nagpatubo si Jehova sing tangantangan nga tanom agod mapasilungan ni Jonas. Apang, pagkasunod nga adlaw nalaya ang tanom. Sang nangakig si Jonas bangod sini, si Jehova nagsiling: “Ikaw, sa imo bahin, nahilak sa tangantangan nga tanom . . . Kag, sa bahin ko, indi bala ako mahilak sa Ninive nga dakung siudad, nga may kapin sa isa ka gatos kag duha ka pulo ka libo ka tawo nga wala gid makahibalo sang kinatuhayan sa ulot sang ila kamot nga tuo kag sang ila wala, luwas pa sa madamong sapat?” (Jonas 4:5-11) Daw ano nga leksion para kay Jonas tuhoy sa pagtamod ni Jehova sa mga tawo!
10 Wala ginrekord ang reaksion ni Jonas sa pinamulong sang Dios tuhoy sa pagkahilak Niya sa mga pumuluyo sang Ninive. Apang, maathag nga ginpasibu sang manalagna ang iya pagtamod sa mahinulsulon nga mga taga-Ninive. Makahinakop kita sini bangod sang katunayan nga ginpasulat ni Jehova sa iya ining inspirado nga kasaysayan.
Ano ang Imo Panimuot?
11. Paano ayhan tamdon ni Abraham ang mga tawo nga nagakabuhi karon?
11 Sa karon, nagaatubang kita sang isa pa ka kalaglagan—ang kalaglagan sang karon malauton nga sistema sang mga butang sa tion sang dakung adlaw ni Jehova. (Lucas 17:26-30; Galacia 1:4; 2 Pedro 3:10) Paano ayhan tamdon ni Abraham ang mga tawo nga nagakabuhi sa sining kalibutan nga malapit na laglagon? Mahimo gid nga mabalaka sia sa mga tawo nga wala pa makabati sang “maayong balita sang ginharian.” (Mateo 24:14) Sulitsulit nga naghingyo si Abraham sa Dios tuhoy sa posible nga mga matarong sa Sodoma. Nabalaka gid bala kita sa mga tawo nga mahimo magsikway sa mga dalanon sining kalibutan nga kontrolado ni Satanas kon hatagan sila sing kahigayunan nga maghinulsol kag mag-alagad sa Dios?—1 Juan 5:19; Bugna 18:2-4.
12. Ngaa mahapos lang palambuon ang panimuot kaangay sang iya ni Jonas sa mga tawo nga masumalang naton sa aton ministeryo, kag ano ang aton sarang mahimo sa sini?
12 Nagakaigo nga handumon ang katapusan sang kalautan. (Habacuc 1:2, 3) Apang, mahapos lang palambuon ang panimuot kaangay sang iya ni Jonas, nga wala nagakabalaka sa kaayuhan sang mga tawo nga mahimo maghinulsol. Matuod ini ilabi na kon pirme naton masumalang ang mga indibiduwal nga wala nagasapak, nagapamatok, ukon maawayon pa gani kon nagaduaw kita sa ila mga puluy-an dala ang mensahe sang Ginharian. Mahimo naton malipatan ang mga pagatipunon pa ni Jehova gikan sa sining malaut nga sistema sang mga butang. (Roma 2:4) Kon sa pag-usisa naton sa aton kaugalingon masapwan naton nga medyo may pareho kita sa una anay nga panimuot ni Jonas sa mga taga-Ninive, makapangamuyo kita sing bulig agod ang aton pagtamod mangin kaangay sa iya ni Jehova.
13. Ngaa makasiling kita nga nabalaka si Jehova sa mga tawo karon?
13 Nabalaka si Jehova sa mga wala pa nagaalagad sa iya, kag ginapamatian niya ang mga pangabay sang iya dedikado nga katawhan. (Mateo 10:11) Halimbawa, ‘pahanabuon niya nga mahatagan sila sing katarungan’ bilang sabat sa ila mga pangamuyo. (Lucas 18:7, 8) Dugang pa, tumanon ni Jehova ang tanan niya nga mga saad kag mga katuyuan sa gintalana niya nga tion. (Habacuc 2:3) Magalakip ini sang pagdula sa duta sing tanan nga kalautan, subong sang paglaglag niya sa Ninive sang ang mga pumuluyo sini nagbalik sa kalautan.—Nahum 3:5-7.
14. Ano dapat ang aton ginahimo samtang nagahulat sa dakung adlaw ni Jehova?
14 Tubtob wala pa malaglag ining malaut nga sistema sang mga butang sa dakung adlaw ni Jehova, mapailubon bala kita nga magahulat, kag masako sa paghimo sang iya kabubut-on? Wala naton mahibaluan ang mga detalye tuhoy sa kasangkaron sang pagbantala nga hilikuton nga pagahimuon pa antes mag-abot ang adlaw ni Jehova, apang nahibaluan naton nga ang maayong balita sang Ginharian ibantala sa bug-os napuy-an nga duta suno sa kabubut-on sang Dios antes mag-abot ang katapusan. Kag dapat gid kita mabalaka sa “kalahamut-an nga mga butang” nga pagapasudlon pa samtang padayon nga ginapuno ni Jehova sing himaya ang iya balay.—Hageo 2:7.
Ang Aton Pagtamod Ginapakita sang Aton mga Buhat
15. Ano ang nagapadugang sa aton apresasyon sa pagbantala nga hilikuton?
15 Ayhan nagapuyo kita sa isa ka komunidad diin diutay lamang ang interesado sa aton pagbantala nga hilikuton kag ang aton kahimtangan wala nagatugot sa aton nga makasaylo sa kon diin may daku nga kinahanglanon sang mga manugbantala sang Ginharian. Pananglitan may napulo nga masapwan sa aton teritoryo antes mag-abot ang katapusan. Nagabatyag bala kita nga takus pangitaon ining napulo? “Naluoy” si Jesus sa kadam-an “kay ginpanitan sila kag nag-alaplaag kaangay sang mga karnero nga wala sing manugbantay.” (Mateo 9:36) Paagi sa pagtuon sa Biblia kag pagbasa sa mga artikulo sa Ang Lalantawan kag Magmata!, labi pa nga mahantop naton ang kahimtangan sining kalibutan. Kag makadugang ini sa aton apresasyon sa kinahanglanon nga ibantala ang maayong balita. Isa pa, ang mainapresyahon nga paggamit sa pasad-sa-Biblia nga materyal nga ginaaman paagi sa “matutom kag mainandamon nga ulipon” makabulig sa aton nga mangin makabuluyok pa kon nagabantala kita sa masunson ginakobrehan nga teritoryo.—Mateo 24:45-47; 2 Timoteo 3:14-17.
16. Paano kita mangin epektibo pa sa aton ministeryo?
16 Ang aton kabalaka sa mga tawo nga mahimo pa magbaton sa nagahatag-kabuhi nga mensahe sang Biblia nagapahulag sa aton nga pasibusibuon ang mga oras kag mga paagi sang pagpalapit sa mga tagbalay sa aton ministeryo. Madamo bala ang wala sa ila puluy-an kon magduaw kita? Kon amo, mahimo nga mangin epektibo pa kita sa aton ministeryo kon lainlainon naton ang oras kag lugar sa aton pagpanaksi. Ang mga mangingisda nagapangisda sa tion nga makadakop sila sing isda. Mahimo man bala naton ini sa aton espirituwal nga pagpangisda? (Marcos 1:16-18) Ngaa indi pagtilawan ang pagpanaksi sa gab-i kag sa telepono, kon wala ini nagalapas sa kasuguan? Nasapwan sang iban nga ang mga paradahan, pulunduhan sang salakyan, gasolinahan, kag balaligyaan mabungahon nga ‘palangisdaan.’ Ang aton tulad-Abraham nga panimuot sa mga tawo makita man kon ginakalitan naton ang mga kahigayunan sa pagpanaksi sing di-pormal.
17. Sa anong mga paagi mapalig-on naton ang mga misyonero kag ang iban pa nga nagaalagad sa iban nga pungsod?
17 Madamo pa ang wala makabati sa mensahe sang Ginharian. Dugang pa sa aton pagbantala, mapakita bala naton ang kabalaka sa sini nga mga tawo bisan yara lang kita sa aton puluy-an? Bueno, may kilala bala kita nga mga misyonero ukon bug-os tion nga mga ministro nga nagaalagad sa iban nga pungsod? Kon amo, mahimo naton sila masulatan nga nagapakita sang aton apresasyon sa ila hilikuton. Paano ini nagapakita sing kabalaka sa mga tawo sa kabilugan? Ang aton mga sulat sang pagpalig-on kag komendasyon makapabakod sa mga misyonero nga magpabilin sa ila asaynment, sa amo mabuligan nila ang madamo pa nga mga tawo nga makatigayon sing ihibalo sa kamatuoran. (Hukom 11:40) Mahimo ipangamuyo man naton ang mga misyonero kag ang mga ginagutom sa kamatuoran sa iban nga mga pungsod. (Efeso 6:18-20) Ang isa pa ka paagi sa pagpakita sing kabalaka amo ang pag-amot sing kuarta para sa bug-os kalibutan nga hilikuton sang mga Saksi ni Jehova.—2 Corinto 8:13, 14; 9:6, 7.
Makasaylo Ka Bala?
18. Ano ang ginhimo sang pila ka Cristiano agod mapauswag ang mga intereses sang Ginharian sa pungsod nga ila ginapuy-an?
18 Ang mga nagsaylo sa mga duog diin mas daku ang kinahanglanon para sa mga manugbantala sing Ginharian ginpakamaayo bangod sang ila masinakripisyuhon nga mga panikasog. Apang, samtang nagapabilin sa ila kaugalingon nga pungsod, ang iban nga mga Saksi ni Jehova nagtuon sing iban nga lenguahe agod makahatag sing espirituwal nga bulig sa mga imigrante. Makapaladya gid ini nga mga panikasog. Halimbawa, ang pito ka Saksi nga nagabulig sa mga Intsik sa isa ka siudad sa Texas, E.U.A., nag-abiabi sa 114 ka indibiduwal sa pagsaulog sa Panihapon sang Ginuo sang 2001. Nakita sang mga nagabulig sa sini nga mga grupo nga ang ila latagon handa na nga anihon.—Mateo 9:37, 38.
19. Ano ang maayo nga himuon kon nagaplano nga magsaylo sa iban nga pungsod agod pasangkaron ang pagbantala nga hilikuton didto?
19 Ayhan nabatyagan mo kag sang imo pamilya nga mahimo kamo makasaylo sa isa ka duog diin mas daku ang pagkinahanglan sa mga manugbantala sang Ginharian. Siempre, maalamon nga ‘maglingkod anay kag bulubantaon ang kabilihanan.’ (Lucas 14:28) Matuod ini ilabi na kon nagahunahuna ang isa nga magsaylo sa iban nga pungsod. Ang bisan sin-o nga nagahunahuna sini dapat magpamangkot sa iya kaugalingon: ‘Masuportahan ko bala ang akon pamilya? Makakuha bala ako sing nagakaigo nga visa? Makahibalo na bala ako sa lenguahe sang pungsod, ukon handa bala ako nga tun-an ini? Nahunahuna ko na bala ang klima kag ang kultura? Mangin isa ka “nagapabakod nga bulig” gid bala ako kag indi isa ka pabug-at sa mga masigkatumuluo sa amo nga pungsod?’ (Colosas 4:10, 11) Agod mahibaluan kon daw ano ka daku ang pagkinahanglan sa pungsod nga ginahunahuna mo nga sayluhan, nagakaigo pirme nga sulatan ang sanga talatapan sang mga Saksi ni Jehova nga nagadumala sang pagbantala nga hilikuton sa amo nga duog.a
20. Paano gingamit sang isa ka lamharon nga Saksi ang iya kaugalingon agod makabenepisyo ang mga masigkatumuluo kag ang iban pa sa iban nga pungsod?
20 Nahibal-an sang isa ka Cristiano nga nagbulig sa pagpatindog sing mga Kingdom Hall sa Japan nga nagakinahanglan sing malantipon nga mga trabahador sa pagpatindog sing isa ka duog para sa pagsimba sa Paraguay. Bangod di-minyo kag lamharon pa, nagsaylo sia sa amo nga pungsod kag nagtrabaho sa sulod sang walo ka bulan subong nagaisahanon nga bug-os tion nga trabahador sa amo nga proyekto. Samtang didto sia, nagtuon sia sing Kinatsila kag nagdumala sing mga pagtuon sa Biblia sa puluy-an. Nakita niya nga kinahanglan ang mga manugbantala sing Ginharian sa amo nga pungsod. Bisan pa nagpauli sia sa Japan, nagbalik sia dayon sa Paraguay kag nagbulig sa pagtipon sa mga tawo sa sini mismo nga Kingdom Hall.
21. Ano dapat ang panguna naton nga ginakabalak-an kag ang aton pagtamod samtang ginahulat naton ang dakung adlaw ni Jehova?
21 Pat-uron sang Dios nga ang pagbantala nga hilikuton ginahimo sing bug-os, suno sa iya kabubut-on. Sa karon, ginapadasig niya ang katapusan nga espirituwal nga pag-ani. (Isaias 60:22) Kon amo, samtang ginahulat naton ang adlaw ni Jehova, makigbahin kita sing makugi sa pag-ani nga hilikuton kag tamdon ang mga tawo subong sang pagtamod sang aton mahigugmaon nga Dios sa ila.
[Nota]
a Indi pirme makabulig nga magsaylo ka sa isa ka pungsod diin ang pagbantala nga hilikuton ginadumilian. Ang paghimo sini mahimo maghalit sa mga manugbantala sang Ginharian nga nagapanghikot sing mainandamon sa idalom sini nga mga kahimtangan.
Madumduman Mo Bala?
• Samtang ginahulat naton ang adlaw ni Jehova, paano naton dapat tamdon ang mga tawo?
• Ano ang pagtamod ni Abraham sa mga matarong nga mahimo nagapuyo sa Sodoma?
• Paano gintamod ni Jonas ang mahinulsulon nga mga pumuluyo sang Ninive?
• Paano naton mapakita nga ginatamod naton ang mga tawo nga wala pa makabati sing maayong balita subong sang pagtamod ni Jehova sa ila?
[Retrato sa pahina 16]
Gintamod ni Abraham ang mga tawo subong sang pagtamod ni Jehova
[Retrato sa pahina 17]
Gintamod sang ulihi ni Jonas ang mahinulsulon nga mga taga-Ninive subong sang pagtamod ni Jehova
[Retrato sa pahina 18]
Ang kabalaka sa mga tawo nagapahulag sa aton nga binagbinagon ang nanuhaytuhay nga oras kag paagi sa pagbantala sing maayong balita