Paghimo sing mga Desisyon—Isa ka Di-malikawan nga Hangkat
“WALA na sing mas mabudlay pa, kag busa mas bilidhon pa sangsa makahibalo kon paano magdesisyon,” siling anay ni Napoleon Bonaparte, ang emperador sang Pransia sang ika-19 nga siglo. Mahimo ugyon ka sa sini, bangod kinaandan na nga ginapakabahandi sang katawhan nga sila ang magakontrol sang ila kabuhi. Sa amo man nga tion, narealisar nila kon kaisa nga indi gali mahapos ang paghimo sing mga desisyon.
Mahapos man ini ukon indi, ang paghimo sing mga desisyon indi gid malikawan. Ginahimo naton ini adlaw-adlaw. Pagbugtaw sa aga, dapat kita magdesisyon kon ano ang aton isuksok, kon ano ang aton pamahawon, kag kon paano himuon ang madamo pa nga mga butang sa amo nga adlaw. Kalabanan sining mga desisyon indi man gid importante. Talagsa lang naton ini liwat nga ginabinagbinag. Talagsa lang kita nga indi makatulog bangod sang pagkabalaka kon bala maalamon ang mga ini ukon indi.
Sa pihak nga bahin, ang iban nga mga desisyon may daku nga epekto. Madamo nga mga pamatan-on sa kalibutan karon ang dapat magdesisyon kon ano nga karera ang dapat nila himud-usan. Dapat sila magdesisyon kon ano nga pag-eskwela ang ila kinahanglanon kag kon daw ano ini kadugay. Sa ulihi magadesisyon ang kalabanan sa ila kon bala magaminyo sila ukon indi. Ang nagpakamaayo nga magminyo dapat mamat-od: ‘Sa husto na bala ako nga edad kag hamtong na bala ako agod magminyo? Ano nga sahi sang kaupod ang naluyagan ko, ukon sing mas importante, ano nga sahi sang kaupod ang akon ginakinahanglan?’ Ang aton desisyon sa pagpili sing tiayon nagaimpluwensia gid sing daku sa aton kabuhi.
Kon tuhoy sa importante gid nga mga butang, kinahanglan ang paghimo sing maalamon nga mga desisyon, bangod nasandig sa sini ang kalipay. Ang iban mahimo magbatyag nga mas sangkol sila sa paghimo sini nga mga desisyon kag mahimo indi magbaton sing bulig. Maalamon bala ini? Tan-awon naton.
[Credit Line sang retrato sa pahina 3]
Napoleon: From the book The Pictorial History of the World