Kon Paano Mo Mapaayawan ang Imo Espirituwal nga mga Kinahanglanon

“SANG nagligad nga dekada, kapin sa 300 ka libro tuhoy sa papel sang espirituwalidad sa sekular nga trabaho​—⁠halin sa Jesus CEO tubtob sa The Tao of Leadership⁠​—⁠ang nagbaha sa mga balaligyaan sang libro,” siling sang U.⁠S.News & World Report. Ginapakita lamang sini nga sa madamo nga manggaranon nga mga pungsod, nagadamo ang nagapangita sing espirituwal nga direksion sa kabuhi. Nagakomento tuhoy sa sini, ang balasahon tuhoy sa negosyo nga Training & Development nagsiling: “Bangod ginaimpluwensiahan na sang teknolohiya ang halos tanan nga bahin sang aton kabuhi, nagapangita kita sing mas madalom nga kahulugan, sing katuyuan, kag sing mas daku nga personal nga kaayawan.”

Apang, diin ka makakita sing makaalayaw nga espirituwal nga panuytoy? Sang nagligad, ang mga tawo nagadangop sa establisado nga relihion agod mabuligan sila nga makita ang “mas madalom nga kahulugan” kag “katuyuan” sang kabuhi. Sa karon, madamo ang nagasikway sa organisado nga relihion. Natukiban sang isa ka surbe sa 90 ka mataas sing ranggo nga mga manedyer kag mga ehekutibo nga “nakita sang mga tawo nga tuhay gid ang relihion sa espirituwalidad,” siling sang Training & Development. Gintamod sang mga ginsurbe ang relihion subong “di-matinuguton kag nagapabahinbahin,” samtang ang espirituwalidad naman “nagadalahig sa tanan kag para sa tanan.”

Sa mga duog nga indi tanto ka relihioso ang mga tawo subong sang Australia, New Zealand, United Kingdom, kag Europa, nakita man sang madamo nga pamatan-on ang kinatuhayan sang relihion sa espirituwalidad. Sa iya ginsulat sa Youth Studies Australia, si Propesor Ruth Webber nagsiling: “Ang kalabanan sa mga pamatan-on nagapati sa Dios, ukon sa isa ka sahi sang labaw sa kinaugali nga puwersa, apang wala sila nagapati nga ang relihion importante ukon makabulig sa pagpalambo sang ila espirituwalidad.”

Ang Matuod nga Relihion Nagapalambo sang Espirituwalidad

Halangpunon ining negatibo nga pagtamod sa relihion. Madamo sing relihion ang nadalahig gid sa dinaya sa politika kag pagkasalimpapaw sa moral kag balasulon sa kamatayon sang inosente nga mga tawo sa madamo nga relihioso nga inaway. Apang, samtang ginasikway ang mga relihion nga nadagtaan sing pagkasalimpapaw kag pagpangdaya, may pila nga sayop nga nagsikway man sa Biblia, nga abi nila nagakunsinti sa sina nga mga buhat.

Ang matuod, ginapakamalaut sang Biblia ang pagkasalimpapaw kag pagkamalinapason. Si Jesus nagsiling sa mga lider sang relihion sang panahon niya: “Kailo kamo, mga escriba kag mga Fariseo, mga salimpapaw! kay kaangay kamo sang mga lulubngan nga ginpaputi, nga sa gua nagapakita nga matahom, apang sa sulod puno sang mga tul-an sang mga minatay kag sang tanan nga kahigkuan. Subong man kamo sa gua ninyo nagapakita nga matarong sa atubangan sang mga tawo, apang sa sulod puno kamo sang pagkasalimpapaw kag kalautan.”​​—⁠Mateo 23:​27, 28.

Dugang pa, ginasugo sang Biblia ang mga Cristiano nga mangin neutral sa politika. Sa baylo nga palig-unon ang mga tumuluo nga patyon ang isa kag isa, nagasugo ini nga dapat handa sila nga mapatay para sa isa kag isa. (Juan 15:​12, 13; 18:36; 1 Juan 3:​10-​12) Sa baylo nga mangin “di-matinuguton kag nagapabahinbahin,” ang matuod nga relihion, nga napasad sa Biblia, “para sa tanan.” Si apostol Pedro nagsiling: “Ang Dios walay ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.”​​—⁠Binuhatan 10:​34, 35.

Ang Biblia​—⁠Isa ka Masaligan nga Panuytoy sa Espirituwal nga Kapagros

Ang Biblia nagasiling nga ang mga tawo gintuga sa dagway sang Dios. (Genesis 1:​26, 27) Indi buot silingon nga pareho ang dagway sang Dios sa mga tawo sa pisikal, kundi ang mga tawo may ikasarang sa pagpabanaag sing mga kinaiya sang Dios, lakip ang kapasidad sa espirituwal nga mga butang, ukon espirituwalidad.

Bangod sini, makatarunganon nga paabuton naton nga ang Dios magaaman man sa aton sing paagi agod mapaayawan ang aton espirituwal nga mga kinahanglanon, kag magahatag man sia sing nagakaigo nga panuytoy agod makilala naton kon ano ang mapuslanon kag kon ano ang makahalalit sa aton espirituwalidad. Subong nga gindesinyo sang Dios ang aton lawas nga may dalayawon nga sistema sang imyunidad agod mabatuan ang mga balatian kag magpabilin kita nga mapagros, gindesinyo man niya kita nga may konsiensia, nga makabulig sa aton sa paghimo sing husto nga mga desisyon kag malikawan ang mga buhat nga makahalit sa aton sa pisikal kag sa espirituwal. (Roma 2:​14, 15) Nahibaluan naton nga agod makapanghikot ang aton sistema sang imyunidad, dapat kita magkaon sing nagakaigo nga sustansia. Sing kaanggid, agod makapanghikot ang aton konsiensia dapat man naton ini pakan-on sing masustansia nga espirituwal nga pagkaon.

Sa pagpakita kon ano nga sahi sang pagkaon ang makapapagros sa aton sa espirituwal, si Jesus nagsiling: “Indi lamang sa tinapay mabuhi ang tawo, kundi sa tagsa ka pulong nga nagagua sa baba sang Dios.” (Mateo 4:4) Ang mga pinamulong ni Jehova ginrekord sa iya Pulong, ang Biblia, kag ini “mapuslanon sa pagpanudlo, sa pagsabdong, sa pagsaway.” (2 Timoteo 3:16) Busa, salabton naton ang pagtinguha nga kaunon ining espirituwal nga pagkaon. Ang espirituwal kag pisikal nga mga benepisyo nga matigayon naton nagadepende sa aton ihibalo sa Biblia kag sa panikasog nga iaplikar ang mga prinsipio sini sa aton kabuhi.​​—⁠Isaias 48:​17, 18.

Takus Bala Ini Panikasugan?

Huo, nagakinahanglan sing tion agod mapauswag naton ang aton kapagros sa espirituwal paagi sa pagtuon sa Biblia; kag ang mga tawo daw wala na gid sing nabilin nga tion para sa sini. Apang ang mga padya takus gid panikasugan! Talupangda ang paathag sang pila ka masako nga propesyonal nga mga tawo kon ngaa importante sa ila ang paghinguyang sing tion sa pagtatap sang ila espirituwal nga kapagros.

Si Marina nga isa ka doktora, nagsiling: “Wala ko anay ginakabalak-an ang akon espirituwalidad tubtob sang nag-obra ako sa isa ka ospital kag natandog gid ako sa pag-antos sang iban. Nian narealisar ko nga dapat ko kilalahon kag paayawan ang akon espirituwal nga kinahanglanon agod nga matigayon ko ang pagkakontento kag kalinong sa hunahuna, bangod ang lakat sang kabuhi kag ang pag-atipan sa mga problema sang mga tawo tuman ka bug-at para sa mga doktor kaangay nakon.

“Ginatun-an ko karon ang Biblia upod sa mga Saksi ni Jehova. Ini nga pagtuon nagabulig sa akon nga usisaon sa husto nga paagi ang akon mga ginahimo kag mga motibo, kag nagahanas sang akon panghunahuna nga mangin positibo pa, agod nga mahuptan ko nga balanse ang akon kabuhi. Nalipay gid ako sa akon sekular nga karera. Apang ang akon pagtuon sa Biblia amo ang nagbulig sa akon nga mapauswag ang akon emosyon, nagabulig sa akon nga kontrolon ang negatibo nga mga balatyagon, mapahaganhagan ang tension, kag mangin mapailubon pa kag mahinuklugon sa mga tawo. Ang pag-aplikar sa mga prinsipio sang Biblia nakabulig man sa akon pag-asawahay. Labaw sa tanan, nakilala ko si Jehova kag naeksperiensiahan, sa pila ka kasangkaron, ang bugana nga pagpasagahay sang iya espiritu, sa amo nangin mas makahulugan ang akon kabuhi.”

Si Nicholas nga isa ka arkitekto, nagsiling: “Antes ako magtuon sing Biblia sa mga Saksi ni Jehova, wala ako sing interes sa espirituwal nga mga butang. Ang akon lamang tulumuron amo ang magmadinalag-on sa akon ginpili nga karera. Sa akon pagtuon sa Biblia natun-an ko nga indi lamang gali propesyon ang importante sa kabuhi kag nga ang paghimo sing kabubut-on ni Jehova amo ang nagahatag sing matuod kag dayon nga kalipay.

“Ang akon sekular nga karera nagahatag sa akon sing kaayawan, apang ang Biblia lamang ang nagtudlo sa akon sang importansia sang pagpasimple sang kabuhi paagi sa pagsentro sa espirituwal nga mga butang. Sa paghimo sini, nalikawan namon nga mag-asawa ang daku nga kahuol nga tuga sang materyalistiko nga estilo sang pagkabuhi. Nakatigayon man kami sing madamo nga matuod nga mga abyan paagi sa amon pagpakig-upod sa mga tawo nga may amo man nga espirituwal nga pagtamod sa kabuhi.”

Si Vincent nga isa ka abogado, nagsiling: “Ang isa ka maayo nga sekular nga karera nagahatag man sing kaayawan. Apang, nakita ko nga kapin pa ang kinahanglanon agod matigayon ang kalipay kag pagkakontento. Sang wala ko pa matun-an ang panudlo sang Biblia tuhoy sa sini, narealisar ko ang pagkawalay katuyuan sang kabuhi​—⁠ang mabun-ag, magdaku, magpangasawa, magtrabaho agod may isagod sa mga bata, maghanas sa ila agod sundon ang amo man nga siklo sang kabuhi, kag sa ulihi magtigulang kag mapatay.

“Sang nakatuon lamang ako sa Biblia upod sa mga Saksi ni Jehova nga nabaton ko ang makaalayaw nga mga sabat sa akon mga pamangkot tuhoy sa katuyuan sang kabuhi. Ang akon pagtuon sa Biblia nagbulig sa akon nga makilala si Jehova subong isa ka persona kag mapalambo ang tudok nga gugma sa iya. Naghatag ini sa akon sing rason agod huptan ang mapagros nga espirituwal nga pagtamod samtang nagapanikasog ako sa pagpahisuno sang akon kabuhi sa nahibaluan ko nga katuyuan niya. Nakatigayon kami karon nga mag-asawa sing kaayawan bangod nahibaluan namon nga ginagamit namon ang amon kabuhi sa makahulugan gid nga paagi.”

Matigayon mo man ang may katuyuan kag makahulugan nga kabuhi paagi sa pagtuon sing Biblia. Malipay ang mga Saksi ni Jehova sa pagbulig sa imo. Kaangay nanday Marina, Nicholas, kag Vincent, matigayon mo ang kaayawan nga nagagikan sa pagtuon tuhoy kay Jehova kag sa iya mga katuyuan para sa katawhan sa kabilugan kag para sa imo subong indibiduwal. Indi lamang kalipay ang imo matigayon bangod napaayawan mo ang imo espirituwal nga mga kinahanglanon karon kundi may paglaum ka man nga mabuhi sing walay katapusan nga himpit sa pisikal nga kapagros​—⁠isa ka paglaum nga matigayon lamang sang mga “mahunahunaon sang ila espirituwal nga kinahanglanon.”​​—⁠Mateo 5:​3, NW.

Ang isa pa ka paagi nga mapalambo naton ang aton espirituwalidad amo ang pangamuyo. Naghinguyang si Jesus sing tion agod tudluan ang iya mga disipulo kon paano mangamuyo, nagtudlo sa ila sang ginatawag karon nga Amay Namon. Ano ang kahulugan sini nga pangamuyo sa imo karon? Paano ka makabenepisyo gikan sa sini? Makita mo ang mga sabat sa masunod nga duha ka artikulo.

[Mga retrato sa pahina 6]

Si Marina

[Mga retrato sa pahina 7]

Si Nicholas

[Mga retrato sa pahina 7]

Si Vincent