Sugilanon sang Kabuhi

Naeksperiensiahan Ko ang Mahigugmaon nga Kaayo kag Pag-atipan ni Jehova

PANUGIRON NI FAY KING

Mabuot ang akon mga ginikanan, apang kaangay sang iban, naugot sila sa relihion. Nagsiling anay si Nanay: “May Dios gid man, kay kon wala, sin-o abi ang naghimo sang mga bulak kag mga kahoy?” Apang amo lang ini ang iya ginapatihan.

NAPATAY ang akon amay sang 1939 sang 11 anyos ako, kag nag-istar kami sang akon iloy sa Stockport, sa bagatnan lang sang Manchester, Inglaterra. Luyag ko gid makilala pa ang akon Manunuga kag ginatahod ko ang Biblia, bisan pa wala ako sing namang-an sa sini. Gani namat-od ako nga magsimba sa Church of England agod mahibaluan kon makabulig ini sa akon.

Wala sing epekto sa akon ang mga seremonya sa simbahan, apang sang ginbasa ang mga Ebanghelyo, ang mga pulong ni Jesus nagkumbinse sa akon nga matuod ang Biblia. Sa paghinumdom, daw katingalahan nga wala ko gid ginbasa ang Biblia. Bisan sang ulihi, sang ginhatagan ako sang isa ka abyan sang amon pamilya sing “Bag-ong Testamento” nga isa ka modernong badbad, wala ko gid ini ginbasa.

Ang pagdabdab sang Korean War sang 1950 nagpahunahuna sa akon. Magalapnag bala ang inaway, subong sang natabo sa Bug-os Kalibutan nga Inaway II? Kon matabo ini, paano ko matuman ang sugo ni Jesus nga higugmaon ang akon mga kaaway? Apang, magapahimunong lang bala ako kag magtan-aw samtang ginasalakay sang mga tawo ang akon pungsod kag indi sila pagpunggan? Kon himuon ko ini, wala ko ginatuman ang akon responsabilidad. Bisan pa nagamuhan ako, kumbinsido ako gihapon nga ang mga sabat sa tanan ko nga pamangkot yara sa Biblia, bisan pa wala ako sing ideya kon paano ukon diin ini pangitaon.

Pagpangita sing Kamatuoran sa Australia

Sang 1954, namat-od kami ni Nanay nga magsaylo sa Australia, diin nagaistar ang akon magulang nga si Jean. Pila ka tuig sang ulihi, ginsilingan ako ni Jean nga ginpangabay niya ang mga Saksi ni Jehova nga duawon ako bangod nahibaluan niya nga interesado ako sa Biblia kag nagasimba. Luyag niya mahibaluan kon ano ang masiling ko tuhoy sa ila. “Ambot kon husto ukon indi ang ila pagpaathag,” siling niya sa akon, “apang nagapaathag sila, nga wala ginahimo sang mga simbahan.”

Maayo gid nga mag-asawa sanday Bill kag Linda Schneider, nga nagduaw sa akon. Manugsetenta anyos na sila kag madugay na nga mga Saksi. Nagtrabaho sila sadto sa estasyon sang radyo nga iya sang mga Saksi ni Jehova sa Adelaide, kag sang gindumilian ang pagbantala nga hilikuton sa Australia sa tion sang Bug-os Kalibutan nga Inaway II, nag-alagad sila subong bug-os tion nga mga ebanghelisador. Apang, samtang ginabuligan ako nanday Bill kag Linda, ginausisa ko gihapon ang iban pa nga mga relihion.

Isa ka kaupod sa trabaho ang nagpaupod sa akon sa isa ka miting sang evangelist nga si Billy Graham, nga sa tapos sadto pila sa amon ang nakigsapol sa isa ka klerigo kag mahimo kami makapamangkot sa iya. Ginpamangkot ko sia sang ginapaligban ko sadto: “Paano ka mangin isa ka Cristiano kag mahigugma ang imo mga kaaway kon nagapakigbahin ka sa inaway kag ginapatay sila?” Nagkinagual ang bug-os nga grupo​—⁠naligban man gali sila tanan sa sini nga pamangkot! Sang ulihi, ang klerigo nagsiling: “Wala ko mahibaluan ang sabat sa sina. Ginapaligban ko gihapon ini.”

Ginpadayon ko ang akon pagtuon sing Biblia upod kanday Bill kag Linda, kag sang Septiembre 1958, ginbawtismuhan ako. Luyag ko sundon ang halimbawa nanday Bill kag Linda, gani sang Agosto sang masunod nga tuig, nagsugod ako sa pagregular payunir, isa ka bug-os tion nga ebanghelisador. Walo ka bulan sang ulihi, gin-agda ako nga mangin espesyal payunir. Nalipay gid ako nga mahibaluan nga nagpadayon man sa pagtuon kag nabawtismuhan ang akon magulang nga si Jean!

Nabuksan ang Isa ka Kahigayunan

Nagaalagad ako sadto sa isa sa mga kongregasyon sa Sydney kag nagahiwat sing madamo nga pagtuon sa Biblia sa mga puluy-an. Isa ka adlaw nasugilanon ko ang isa ka retirado nga klerigo sang Church of England kag ginpamangkot ko sia kon ano ang ginasiling sang simbahan tuhoy sa katapusan sang kalibutan. Bisan pa ginsugid niya sa akon nga nagtudlo sia sang doktrina sang simbahan sa sulod sang 50 ka tuig, nakibot ako sa iya sabat: “Dapat pa ako magpanalawsaw sa sina bangod indi ko sunado ang Biblia subong sang mga Saksi ni Jehova.”

Wala madugay sa tapos sini, nagpangabay sing mga boluntaryo agod mag-alagad sa Pakistan. Nag-aplay ako, nga wala makahibalo nga wala gali ginapadala ang di-minyo nga mga babayi, kundi mga soltero lamang kag mga mag-asawa. Maathag nga ginpadala sa ulong-talatapan sa Brooklyn ang akon aplikasyon bangod nakabaton ako gilayon sing sulat nga nagasiling nga may kinahanglanon sa Bombay (ginatawag karon nga Mumbai), India, kon luyag ko ini batunon. Tuig 1962 sadto. Ginbaton ko ini kag nagtener ako sa Bombay sa sulod sang 18 ka bulan antes magsaylo sa Allahabad.

Nagkonsentrar ako gilayon sa pagtuon sing Hindi. Ini nga lenguahe sa India may pareho nga pagtigbato kag pagmitlang, gani indi ini tanto kabudlay tun-an. Apang, masami nga makapaluya sing buot kon pangabayon ako sang mga tagbalay nga mag-Iningles na lang sa baylo nga magtinguha sa paghambal sa ila lenguahe! Apang makawiwili kag makahalangkat ining bag-o nga pungsod, kag nalipay ako sa pagpakig-upod sa mga Saksi man halin sa Australia.

Sang bataon pa ako, namensar ako nga mamana, apang sang ginbawtismuhan ako, nangin masako gid ako sa pag-alagad kay Jehova amo nga wala ko na ini mapensaran. Apang, sa sining tion, nabatyagan ko naman nga kinahanglan ko ang kaupod sa kabuhi. Siempre pa, indi ko luyag biyaan ang akon asaynment sa iban nga pungsod, gani ginpangamuyo ko ini kay Jehova kag wala na ginpamensar pa.

Wala Ginpaabot nga Pagpakamaayo

Si Edwin Skinner amo sadto ang nagatatap sang hilikuton sa sanga sa India. Kaupod niya nga nag-eskwela sa ikawalo nga klase sang Watchtower Bible School of Gilead sang 1946 ang madamong matutom nga mga utod, lakip sanday Harold King kag Stanley Jones, nga ginpadala sa China.⁠a Sang 1958, ginbartolina sanday Harold kag Stanley bangod sang ila pagbantala sa Shanghai. Sang ginbuy-an si Harold sang 1963, ginsulatan sia ni Edwin. Nagbalos si Harold sang nagbalik sia sa Hong Kong pagkatapos sang paglakbay niya sa Estados Unidos kag Britanya kag ginsambit niya nga luyag niya nga mangasawa. Ginsugiran niya si Edwin nga ginpangamuyo niya ini sang didto sia sa bilangguan, kag ginpamangkot niya si Edwin kon may kilala sia nga Saksi nga bagay niya pangasaw-on.

Ang kalabanan nga pag-asawahay sa India ginapatigayon, kag pirme ginapangabay si Edwin nga magpatigayon, apang wala sia nagahimo sini. Gani ginhatag niya ang sulat ni Harold kay Ruth McKay, nga ang iya bana, si Homer, isa ka nagalakbay nga manugtatap. Sang ulihi, nagsulat si Ruth sa akon nga may isa ka misyonero nga madugay na sa kamatuoran nga nagapangita sing palangasaw-on, kag namangkot sia kon luyag ko magsulat sa sini nga misyonero. Wala na sia sing ginsugid pa tuhoy sa sini nga utod, bisan ang iya ngalan.

Siempre pa, si Jehova lang ang nakahibalo sang akon pangamuyo para sa isa ka kaupod, kag sang primero ginbale-wala ko ini. Apang, samtang ginapamensaran ko ini, labi ako nga makahinakop nga masami ginasabat ni Jehova ang aton mga pangamuyo sa paagi nga wala naton ginahunahuna. Gani nagbalos ako kay Ruth nga nagasiling nga basta indi ako obligado sa pagpamana sa utod, mahimo niya pangabayon ang utod nga magsulat liwat. Ang ikaduha nga sulat ni Harold King para na sa akon.

Makita ang mga laragway kag sugilanon ni Harold sa nanuhaytuhay nga mga pamantalaan kag mga magasin sang mahilway sia sa bilangguan sa China. Sa amo nga tion, bantog sia sa bug-os nga kalibutan, apang nagdayaw ako sa iya bangod sang iya matutom, teokratiko nga pag-alagad. Gani nagsulatay kami sa sulod sang lima ka bulan, kag dayon nagkadto ako sa Hong Kong. Ginkasal kami sang Oktubre 5, 1965.

Luyag namon magminyo kag magpabilin sa bug-os tion nga pag-alagad, kag samtang nagatigulang kami, labi namon nga ginkinahanglan ang kaupod. Ginhigugma ko si Harold, kag samtang nakita ko ang iya mainayuhon kag mapatugsilingon nga pagpakig-angot sa mga tawo kag pag-atubang sa mga problema may kaangtanan sa amon pag-alagad, nagtudok ang pagtahod ko sa iya. Sa sulod sang 27 ka tuig nangin malipayon gid ang amon pag-asawahay kag nakabaton kami sing madamong pagpakamaayo gikan kay Jehova.

Mapisan ang mga Tsino kag nanamian gid ako sa ila. Ang lenguahe sa Hong Kong amo ang Cantonese, isa ka dialekto sang China nga mas madamo sing pagbag-o sa tono sang tingog sangsa Mandarin amo nga mabudlay ini tun-an. Ginsugdan namon ni Harold ang amon pag-asawahay sa puluy-an sang mga misyonero sa sanga talatapan sang mga Saksi ni Jehova, kag dason nag-alagad kami sa lainlain nga mga bahin sang teritoryo. Huo, malipayon gid kami, apang sang 1976, nangin daku nga problema ang akon panglawas.

Pag-atubang sa Balatian

Gindugo ako sa sulod sang pila ka bulan, kag nagnubo gid ang akon blood count. Kinahanglan ako operahan, apang ginsilingan ako sang mga doktor sa ospital nga indi sila mag-opera nga wala sing dugo kay mahimo nga mapatay ako. Isa ka adlaw sang ginahambalan sang mga doktor ang akon kahimtangan, gintinguhaan sang mga nars nga magbag-o ang akon desisyon, nga nagasiling nga wala ako sing kinamatarong nga pabay-an ang akon kabuhi. Dose ka operasyon ang naiskedyul sa amo nga adlaw, ang napulo sa sini aborsion, apang wala gid sing nagpamatok sa pagpahulog sang nagabusong nga mga babayi sa ila mga lapsag.

Sang ulihi, nagsulat si Harold nga nagahilway sa ospital sa bisan ano nga responsabilidad engkaso mapatay ako, kag nagpasugot ang mga doktor nga operahan ako. Gindala ako sa hulot-uluperahan kag ginhanda para hatagan sang anesthesia. Apang sang ulihi, nangindi ang manughatag sing anesthesia, kag ginpagua ako sang ospital.

Nagpakonsulta kami dayon sa isa ka gynecologist nga indi konektado sa ospital. Sang nahibaluan niya nga grabe ang akon kahimtangan, nagsugot sia nga operahan ako sa manubo nga presyo​—⁠basta indi kami manugid sa iban kon pila ang sukot niya sa amon. Nagmadinalag-on ang iya pag-opera​—⁠nga wala gid naggamit sing dugo. Maathag gid ang mahigugmaon nga kaayo kag pag-atipan ni Jehova sa amon ni Harold sa sini nga tion.

Sang 1992, nagbalatian sing grabe si Harold. Nagsaylo kami sa sanga talatapan kag mahigugmaon nga gin-atipan didto. Natapos sang akon pinalangga nga bana ang iya dutan-on nga kabuhi sang 1993 sa edad nga 81 anyos.

Pagbalik sa Inglaterra

Nalipay ako nga mangin katapo sang pamilya Bethel sa Hong Kong, apang nabudlayan ako bangod sang tiempo nga mainit kag mapaang. Nian nakibot ako sang nag-abot ang isa ka sulat halin sa ulong-talatapan sa Brooklyn, nga nagapamangkot kon bala, bangod sang akon panglawas, luyag ko magsaylo sa isa ka sanga talatapan nga mas madamo ang pasilidad. Gani sang tuig 2000, nagbalik ako sa Inglaterra kag nagbuylog sa pamilya Bethel sa London. Isa gid ini ka mahigugmaon nga kahimusan! Gin-abiabi gid ako, kag nalipay ako sing daku sa lainlain nga trabaho ko didto, nga nagalakip sa pag-atipan sa librarya sang pamilya Bethel kag sa 2,000 ka libro sini.

Nagpakig-upod man ako sa Chinese nga kongregasyon nga nagatipon sa London, apang nagbag-o na ang kahimtangan. Sa karon, diutay na lang nga tawo ang naghalin sa Hong Kong, sa baylo, naghalin sila sa China. Mandarin ang ila hambal, gani bag-o ini nga hangkat sa pagbantala. May mga report halin sa bug-os nga pungsod tuhoy sa madamong makawiwili nga mga pagtuon sa Biblia upod sa mga estudyante nga gradwado na sa kolehiyo halin sa China. Mapisan sila kag ginaapresyar nila ang kamatuoran sang Biblia nga ila ginatun-an. Makalilipay gid ang pagbulig sa ila.

Sa akon malinong nga bag-o nga puluy-an, masami ko ginapamalandungan ang akon malipayon nga kabuhi kag padayon nga nagadayaw sa mahigugmaon nga kaayo ni Jehova. Yara gid ini sa tanan nga butang nga may kaangtanan sa iya katuyuan, kag maathag gid ang iya pag-atipan sa iya tagsa ka alagad. Madamo gid ako sing rason nga magpasalamat bangod sang iya mahigugmaon nga pag-atipan sa akon.​—⁠1 Pedro 5:​6, 7.

[Mga nota]

[Retrato sa pahina 24]

Nagaalagad sa India

[Mga retrato sa pahina 25]

Si Harold King sang 1963 kag sang nagaalagad sa China sang katuigan 1950

[Mga retrato sa pahina 26]

Ang amon kasal sa Hong Kong, Oktubre 5, 1965

[Retrato sa pahina 26]

Kaupod ang mga katapo sang Bethel sa Hong Kong, ang mag-asawa nga Liang sa tunga, ang mag-asawa nga Gannaway sa tuo