Ang Relihion Bala ang Gamot sang mga Problema sang Katawhan?

“KON ang relihion wala nagasuportar sa pinuyas nagapanghikot ini subong sang isa ka droga nga nagapatig-a sang konsiensia sang tawo kag nagapuno sang utok sang tawo sing mga ilusyon agod palagyuhan ang malaw-ay nga mga katunayan. . . . Kabangdanan [ini] agod ang tawo mangin makitid sing hunahuna, mapinatihon sa disparatis, puno sing pagdumot kag kahadlok.” Ang anay Metodista nga misyonero nga nagsulat sini nagdugang: “Ining mga panumbungon matuod. May yara malain kag maayo nga relihion.”​​​—⁠⁠Start Your Own Religion.

‘Indi gid ina makatarunganon nga kritisismo,’ mahimo isiling sang iban. Apang, sin-o ang makapanghiwala sa mga natabo sa maragtas? Sa kabilugan, ang relihion​​​—⁠⁠ginalaragway subong “ang pag-alagad kag pagsimba sa Dios ukon sa labaw sa kinaugali”​​​—⁠⁠may makasiligni nga maragtas. Dapat nagahatag ini sing kasanag kag nagainspirar sa aton. Apang, masami nga ginabangdan gid ini sang pinuyas, panatisismo, kag dumot. Ngaa amo sini?

Isa ka Nagapatalang nga “Anghel sang Kapawa”

Suno sa Biblia, simple lang ang sabat. Bangod nagapakunokuno subong “anghel sang kapawa,” ginpatalang ni Satanas nga Yawa ang minilyon nga sundon ang iya mga panudlo sa baylo sang mga panudlo sang Dios. (2 Corinto 11:​14, NW) Ginpakita ni apostol Juan nga ang impluwensia ni Satanas tuman kasangkad amo nga “ang bug-os nga kalibutan yara sa gahom sang malauton.” (1 Juan 5:19) Nahibaluan ni Juan nga si Satanas ‘nagadaya sang bug-os nga kalibutan.’​​​—⁠⁠Bugna 12:⁠9.

Ano ang nangin mga resulta sini? Ginsugdan ni Satanas ang relihioso nga mga sistema nga sa gua daw balaan tan-awon. Ang mga ini may “panampad sang ‘relihion,’” apang ginabuyagyag sang ila malaut nga mga bunga ang ila matuod nga kahimtangan. (2 Timoteo 3:​5, J. B. Phillips; Mateo 7:15-20) Sa baylo nga lubaron ang mga problema sang katawhan, ang relihion nangin bahin gid sang problema.

Indi gilayon pagsikwaya ina nga ideya subong indi gid matabo ukon indi makatarunganon. Dumduma nga ang kahulugan gid sang paglimbong amo nga ang isa nga nalimbungan wala makahibalo sini. Naghatag si apostol Pablo sing halimbawa tuhoy sini sang nagsulat sia: “Ang mga butang nga ginahalad sang mga pungsod ginahalad nila sa mga demonyo, kag indi sa Dios.” (1 Corinto 10:​20, NW) Ayhan makibot gid ini nga mga tawo sa paghunahuna nga mga demonyo gali ang ginasimba nila. Naghunahuna sila nga nagasimba sila sa maayo nga dios, ukon mga dios. Apang, ang matuod nalimbungan sila sang “espirituhanon nga mga kabon sang kalautan sa langitnon nga mga duog,” nga nagadampig kay Satanas sa iya mga panikasog nga patalangon ang katawhan.​​​—⁠⁠Efeso 6:⁠12.

Halimbawa, binagbinagon naton kon paano nadaya kag napatalang ni Satanas ang madamong nagapangangkon nga mga Cristiano nga namat-od nga indi pagsapakon ang paandam ni apostol Juan tuhoy sa sinang malaut nga impluwensia.​​​—⁠⁠1 Corinto 10:12.

Ang Gintudlo ni Jesus Naghalin sa Dios

“Ang akon pagtulun-an,” siling ni Jesucristo, “indi akon, kundi iya sang nagpadala sa akon.” (Juan 7:16) Huo, ang gintudlo niya naghalin sa Labing Gamhanan nga Dios. Gani ang mga panudlo ni Jesus may mabaskog kag makapasanag nga epekto sa mga nagapamati sa iya. Wala sini ‘ginapatig-a ang konsiensia sang tawo ukon ginapuno ang utok sang tawo sing mga ilusyon agod palagyuhan ang malaw-ay nga mga katunayan.’ Sa baylo, ang mga panudlo ni Jesus nagahilway sa mga tawo gikan sa relihioso nga kasaypanan kag tawhanon nga mga pilosopiya sang kalibutan nga ‘gindulman sing paghangop’ bangod sang paglimbong sang Yawa.​​​—⁠⁠Efeso 4:​18; Mateo15:14; Juan 8:​31, 32.

Ang matuod nga mga Cristiano nakilal-an, indi paagi sa pagpangangkon lamang nga diosnon, kundi paagi sa pagtuo nga nagapabanaag sang makagalanyat nga mga kinaiya nga ginapatubas sang balaan nga espiritu sang Dios. (Galacia 5:​22, 23; Santiago 1:22; 2:26) Talalupangdon sa sini nga mga kinaiya​​​—⁠⁠kag nagapakilala nga tanda sang matuod nga Cristianismo​​​—⁠⁠amo ang mataas nga kalidad sang gugma.​​​—⁠⁠Juan 13:​34, 35.

Apang, talupangda ining importante nga punto: Si Jesus ukon ang iya mga apostoles wala nagpaabot nga ang Cristianong kongregasyon magapabilin sa orihinal nga kahimtangan sang gintukod ini. Nahibaluan nila nga ang apostasya magaluntad kag ang matuod nga relihion matabunan sa sulod sang pila ka tion.

Ang Matuod nga Relihion Natabunan sa Sulod sang Pila ka Tion

Sa ilustrasyon tuhoy sa trigo kag mga gamhon, nagtagna si Jesus nga ang matuod nga relihion matabunan sa sulod sang pila ka tion. Basaha ang rekord sa Mateo 13:24-30, 36-43. Si Jesus nagsab-ug sa uma sing trigo, ang “maayong binhi,” nga nagalaragway sa iya matutom nga mga disipulo nga magahuman sang orihinal nga Cristianong kongregasyon. Nagpaandam sia nga ang “kaaway,” si Satanas nga Yawa, magasab-ug man sa ulihi sa uma sang trigo sing “mga gamhon”​​​—⁠⁠mga tawo nga nagapangangkon nga nagasunod kay Jesucristo apang ang matuod, nagasikway sang iya mga panudlo.

Wala madugay pagkatapos napatay ang mga apostoles ni Jesus, nagluntad ang mga indibiduwal nga napamatud-an nga “mga gamhon,” nga nagpili sang ginpatiko nga mga panudlo sang tawo sangsa “pulong sang Ginuo.” (Jeremias 8:​8, 9; Binuhatan 20:​29, 30) Gani, ang ginpatiko kag di-matuod nga Cristianismo nagluntad sa kalibutan. Gingamhan ini sang ginatawag sang Biblia nga “malinapason”​​​—⁠⁠ang garok nga klerigo nga klase nga nahupog gid sa “bug-os nga malauton nga daya.” (2 Tesalonica 2:6-10) Nagtagna si Jesus nga ining kahimtangan magabalhin sa “konklusion sang sistema sang mga butang.” (NW) Ang tulad-trigo nga mga Cristiano tipunon kag ang “mga gamhon” sunugon sa ulihi.

Ining di-matuod nga Cristianismo amo ang manabat sa “mga siglo sang tuman nga barbarismo” kag sa espirituwal nga kadudulman sa Cristiandad sa mga siglo nga nagsunod. Napanan-aw ini kag ang tanan nga iban pa nga kalainan kag kasingki nga ginhimo sugod sadto sa ngalan sang relihion, si apostol Pedro nagtagna sing husto nga “bangod sa ila [nagapangangkon nga mga Cristiano] ang dalanon sang kamatuoran himalauton.”​​​—⁠⁠2 Pedro 2:​1, 2.

“Isa ka Teolohiya sang Kasingkal kag Pagdumot”

Indi lamang ang Cristiandad ang naghatag sing malain nga reputasyon sa relihion. Halimbawa, hunahunaa ang pundamentalista nga mga bersion sang “militante nga pagkamadebosyonon” nga siling sang anay madre nga si Karen Armstrong naggikan sa “tanan nga pangunang relihioso nga tradisyon.” Suno kay Armstrong, ang isa ka importante nga pagtilaw sa bisan ano nga relihion amo nga dapat ini magdul-ong sa “praktikal nga pagkaawa.” Ano ang rekord sang pundamentalista nga mga relihion sa sini nga bahin? “Ang pundamentalista nga pagtuo,” sulat niya, “Judiyo man ini, Cristiano, ukon Muslim, indi makapasar sa sining importante nga pagtilaw kon ini nangin isa ka teolohiya sang kasingkal kag pagdumot.” (The Battle for God​​​—⁠⁠Fundamentalism in Judaism, Christianity and Islam) Apang ang “pundamentalista” lamang bala nga relihion ang wala makapasar sa sining pagtilaw kag nangin “isa ka teolohiya sang kasingkal kag pagdumot”? Tuhay ang ginapakita sang maragtas.

Ang matuod, si Satanas nagtukod sing isa ka bug-os kalibutan nga emperyo sang butig nga relihion, nga nakilal-an bangod sang kasingkal, pagdumot, kag halos wala katapusan nga pagpatulo sing dugo. Ginatawag sang Biblia ini nga emperyo nga “Babilonia nga Daku, iloy . . . sang mga kangil-aran sang duta,” kag ginalaragway ini subong isa ka babayi nga makihilawason nga nagasakay sa likod sang tulad-sapat nga sistema sang politika. Talalupangdon nga manabat sia sa “dugo . . . sang tanan nga ginpatay sa duta.”​​​—⁠⁠Bugna 17:​4-6; 18:⁠24.

Indi Tanan Nadaya

Apang, ginapamatud-an sang maragtas nga indi tanan nadaya. Bisan sa labing makakulugmat nga tion sa maragtas sang tawo, siling ni Melvyn Bragg, “madamong maayo nga mga kalag ang naghimo sing maayo samtang ang kadamuan sa palibot nila malaut.” Ang matuod nga mga Cristiano padayon nga ‘nagsimba sa Dios sa espiritu kag kamatuoran.’ (Juan 4:21-24) Ginpain nila ang ila kaugalingon gikan sa bug-os kalibutan nga relihioso nga sistema nga nakighilawas subong “sumalakdag sang puwersa militar.” Wala sila mabuyok nga makigrelasyon sa Simbahan kag Estado nga ginpakita sang maragtas subong “kasugtanan nga ginhimo ni Satanas kag indi ni Jesus sang Nazaret.”​​​—⁠⁠Two Thousand Years​​​—⁠⁠The Second Millennium: From Medieval Christendom to Global Christianity.

Sining ulihi nga mga tion, ang mga Saksi ni Jehova nakilal-an bangod sang ila maayo nga impluwensia. Agod indi madagtaan sang butig nga relihion, ginpasad nila ang ila mga pagpati kag mga buhat sa inspirado nga Pulong sang Dios lamang, ang Biblia. (2 Timoteo 3:​16, 17) Kag kaangay sang unang-siglo nga mga Cristiano, ginsunod nila ang sugo ni Jesus nga mangin “indi bahin sang kalibutan.” (Juan 15:​17-​19; 17:​14-​16, NW) Sa Nazi Alemanya, halimbawa, wala nila ginkompromiso ang Cristianong mga prinsipio kag gani indi sila anay kalahamut-an suno sa ideolohiya sang mga Nazi. Ginkaugtan sila ni Hitler bangod sini. Ang isa ka libro sa eskwelahan nagsiling: “Ang mga Saksi ni Jehova . . . nagsunod sang panudlo sang Biblia nga indi maggamit sing mga hinganiban sa bisan ano nga kausa. Gani nangindi sila sa pagsoldado ukon sa pagpasilabot sa mga Nazi. Bilang balos, ginbilanggo sang SS ang bug-os nga mga pamilya sang mga Saksi ni Jehova. Mga un-tersia sang tanan nga mga Saksi ni Jehova [sa Alemanya] ang ginpatay sa mga kampo konsentrasyon.”​​​—⁠⁠Germany​​​—⁠⁠1918-​45.

Matuod nga ang iban pa nga maisugon nga mga indibiduwal sang nagkalainlain nga mga relihion nag-antos bangod sang ila mga pagtuluuhan. Apang ang mga Saksi ni Jehova nag-antos subong isa ka nahiusa nga relihioso nga hubon. Pat-od gid nga ang kalabanan nanindugan sing malig-on sa sadsaran nga prinsipio sang Kasulatan: ‘Tumana ang Dios subong manuggahom sa baylo sang mga tawo.’​​—⁠⁠Binuhatan 5:​29, NW; Marcos 12:17.

Ang Gamot sang Problema

Gani indi matuod nga ang tanan nga relihion amo ang gamot sang tanan nga mga problema sang katawhan. Ang butig nga relihion amo ang gamot. Apang, katuyuan sang Dios nga dulaon ang tanan nga butig nga relihion sa malapit na gid karon nga palaabuton. (Bugna 17:​16, 17; 18:21) Ang iya sugo kay bisan sin-o nga nagahigugma sing katarungan kag pagkamatarong amo: “Gua ka sa iya [kon sayuron, Babilonia nga Daku, ang bug-os kalibutan nga emperyo sang butig nga relihion], katawhan nakon, agod nga indi kamo makaambit sa iya mga sala, agod nga indi kamo makaagom sang iya mga kalalat-an. Kay ang iya mga sala natumpi tubtob sa langit, kag ang Dios nakadumdom sang iya mga kalautan.” (Bugna 18:​4, 5) Huo, ang Dios mismo naakig gid sa relihion nga ‘nagapalig-on sang pinuyas, nagapatig-a sang tawhanon nga konsiensia, nagapuno sang utok sing mga ilusyon agod palagyuhan ang malaw-ay nga mga katunayan, kag ginabangdan nga ang mga tawo nangin makitid sing hunahuna, mapinatihon sa disparatis, kag puno sing pagdumot kag kahadlok’!

Sa karon, ginatipon sang Dios ang mga nagahigugma sang kamatuoran sa putli nga relihion. Ini ang relihion nga nagasunod sa mga prinsipio kag mga panudlo sang isa ka mahigugmaon, makatarunganon, kag mainawaon nga Manunuga. (Miqueas 4:​1, 2; Sofonias 3:​8, 9; Mateo 13:30) Mahimo ka mangin bahin sini. Kon luyag mo ang dugang nga impormasyon kon paano makilala ang putli nga relihion, sulati ang mga manugbalhag sining magasin, ukon mangayo sing bulig kay bisan sin-o nga Saksi ni Jehova.

[Retrato sa pahina 7]

Ang mga tawo gikan sa tanan nga ginhalinan nakasapo sing kalipay sa putli nga pagsimba