Mga Tigulang​—Hamili nga mga Katapo sang Aton Cristianong Paghiliutod

‘Ang mga ginatanom sa balay sang GINUO magalambo. Magapamunga pa sila sa katigulangon.’​—SALMO 92:13, 14.

1. Paano ginatamod sang madamo nga tawo ang mga tigulang?

GINAHIGUGMA ni Jehova ang tanan niya nga matutom nga mga alagad, pati ang mga tigulang. Apang, suno sa isa ka pungsudnon nga pagbanabana, halos tunga sa milyon ka tigulang sa Estados Unidos ang ginaabusuhan ukon ginapatumbayaan kada tuig. Ginapakita sang kaanggid man nga mga report halin sa bug-os nga kalibutan nga ang pag-abuso sa mga tigulang isa ka tugob-globo nga problema. Ang gamot nga kabangdanan sini amo ang ginatawag sang isa ka organisasyon subong “ang lapnag nga panimuot sang madamo nga tawo . . . nga ang mga tigulang madugay na nga nagkabuhi kag gani indi na mapuslanon, indi na mabungahon kag nagasalig na lang sa bulig sang iban.”

2. (a) Paano ginatamod ni Jehova ang iya matutom nga tigulang nga mga alagad? (b) Anong mahinuklugon nga paglaragway ang mabasa naton sa Salmo 92:​12-​15?

² Ginapakabahandi ni Jehova nga Dios ang iya matutom nga tigulang nga mga alagad. Ginatan-aw niya ang ‘aton pagkatawo sa sulod’​—ang aton espirituwal nga kahimtangan​—kag indi ang aton pisikal nga mga limitasyon. (2 Corinto 4:16) Mabasa naton sa iya Pulong, ang Biblia, ang masunod nga makalilipay nga pasalig: “Ang matarong magalambo kaangay sang palma, magatubo sia kaangay sang sedro sa Libano. Ginatanom sila sa balay sang GINUO, magalambo sila sa mga luwang sang aton Dios. Magapamunga pa sila sa katigulangon, mapuno sila sang duga kag kalab-as, sa pagpakita nga ang GINUO matarong.” (Salmo 92:12-15) Ipakita sang pagbinagbinag sa sining mga bersikulo ang hamili nga mga butang nga sarang ninyo nga mga tigulang maamot sa Cristianong paghiliutod.

“Magapamunga Pa Sila sa Katigulangon”

3. (a) Ngaa ang mga matarong ginapaanggid sa mga palma? (b) Paano ang mga tigulang ‘magapamunga sa katigulangon’?

³ Ginapaanggid sang salmista ang mga matarong sa mga palma nga ‘natanom sa mga luwang sang aton Dios.’ “Magapamunga pa sila sa katigulangon.” Ang isa pa ka bersion nagasiling: “Sa katigulangon nagapamunga gihapon sila.” (Tanakh) Wala ka bala nagaugyon nga isa ini ka makapalig-on nga panghunahuna? Ang matahom kag matadlong nga mga palma kinaandan na nga makita sa mga luwang sa Sidlangan sang panahon sang Biblia. Wala labot nga dekorasyon, ang mga palma ginapakabahandi bangod sang madamo nga bunga sini, ang iban sini nagapamunga sa sulod sang kapin sa isa ka gatos ka tuig.a Bangod natanom sing mabakod sa matuod nga pagsimba, mahimo man ikaw ‘magpamunga sa tagsa ka maayong buhat.’​—Colosas 1:​10.

4, 5. (a) Anong importante nga bunga ang kinahanglan ipatubas sang mga Cristiano? (b) Maghatag sing Makasulatanhon nga mga halimbawa sang mga tigulang nga nagpatubas sing “bunga sang mga bibig.”

⁴ Si Jehova nagapaabot nga ang mga Cristiano magpatubas sing “bunga sang mga bibig”​—mga pulong sang pagdayaw sa iya kag sa iya mga katuyuan. (Hebreo 13:15) Naaplikar bala ini sa imo subong isa ka tigulang nga tawo? Huo.

⁵ Mabasa sa Biblia ang mga halimbawa sang mga tigulang nga maisog nga nagpanaksi sa ngalan kag mga katuyuan ni Jehova. Lampas na sa “kapituan ka tuig” si Moises sang gintangdo sia ni Jehova subong manalagna kag tiglawas niya. (Salmo 90:10; Exodo 4:10-17) Ang katigulangon wala mag-upang kay manalagna Daniel agod magpanaksi sing maisog tuhoy sa pagkasoberano ni Jehova. Si Daniel mahimo nga nobentahon na ang edad sang ginpatawag sia ni Belsasar sa pagpatpat sang makatalanhaga nga sulat sang kamot sa dingding. (Daniel, kapitulo 5) Kag kamusta naman ang tigulang nga si apostol Juan? Sa talipuspusan sang iya matutom nga pag-alagad, ginbilanggo sia sa pulo sang Patmos “bangod sa paghambal tuhoy sa Dios kag sa pagpanaksi tuhoy kay Jesus.” (Bugna 1:9, NW) Mahimo nga madumduman mo ang madamo pa nga karakter sa Biblia nga nagpatubas sing “bunga sang mga bibig” sang tigulang na sila.​—1 Samuel 8:​1, 10; 12:2; 1 Hari 14:​4, 5; Lucas 1:​7, 67-​79; 2:​22-​32.

6. Paano gingamit ni Jehova ang “mga tigulang” sa pagpanagna sa sining katapusan nga mga adlaw?

⁶ Nagbalikwat sa Hebreong manalagna nga si Joel, si apostol Pedro nagsiling: “‘Sa katapusan nga mga adlaw,’ nagasiling ang Dios, ‘nga ipasagahay ko ang akon Espiritu sa tanan nga unod [pati na sa “mga tigulang”], . . . kag magapanagna sila.’” (Binuhatan 2:17, 18; Joel 2:28) Gani, sa sining katapusan nga mga adlaw, gingamit ni Jehova ang tigulang nga mga katapo sang hinaplas nga klase kag sang “iban nga mga karnero” sa pagpahayag sang iya mga katuyuan. (Juan 10:16) Ang iban sa ila matutom nga nagpatubas sing bunga sang Ginharian sa sulod sang madamo nga tinuig.

7. Iilustrar kon paano ang mga tigulang padayon nga nagapatubas sing bunga sang Ginharian walay sapayan sang mga kasablagan sa lawas.

⁷ Binagbinaga si Sonia, nga nangin isa ka bug-os tion nga manugbantala sang Ginharian sang 1941. Walay sapayan sang pagpakigbato sa madugay na nga balatian, regular nga nagdumala sia sing mga pagtuon sa Biblia sa iya puluy-an. “Ang pagbantala sing maayong balita bahin na sang akon kabuhi,” paathag ni Sonia. “Sa katunayan, ini ang akon kabuhi. Indi ko luyag mag-untat sa pagbantala.” Wala pa lang madugay, ginpaambit ni Sonia kag sang iya magulang, nga si Olive, ang mensahe sang paglaum sang Biblia kay Janet, isa ka pasyente nga malip-ot na lang ang kabuhi nga nasugilanon nila sa hulot-hululatan sang ospital. Nalipay gid ang iloy ni Janet, nga isa ka debotada nga Katoliko, sa sining mahigugmaon nga interes nga ginpakita sa iya anak amo nga ginbaton niya ang isa ka pagtuon sa Biblia sa puluy-an kag sa karon maayo gid ang iya pag-uswag. Mahimuslan mo man bala ang kaanggid sini nga mga kahigayunan agod makapatubas sing bunga sang Ginharian?

8. Paano ginpakita sang tigulang nga si Caleb ang iya pagsalig kay Jehova, kag paano mailog sang tigulang nga mga Cristiano ang iya halimbawa?

⁸ Paagi sa dalayon kag maisog nga pagbantala sing Ginharian walay sapayan sang mga limitasyon sang katigulangon, ginailog sang tigulang nga mga Cristiano ang halimbawa sang matutom nga Israelinhon nga si Caleb, nga nag-upod kay Moises sa kahanayakan sa sulod sang kap-atan ka tuig. Si Caleb 79 anyos sang nagtabok sia sa Suba Jordan pasulod sa Ginsaad nga Duta. Pagkatapos makig-away upod sa madinalag-on nga hangaway sang Israel sa sulod ang anom ka tuig, mahimo kuntani nga kontento na sia sa iya hinimuan kag magpahimunong na lang. Apang sa baylo sini, maisugon nga ginpangabay niya ang mabudlay nga asaynment nga sakupon ang “dalagku kag malig-on nga kabanwahanan” sa kabakuluran sang Juda, isa nga duog nga ginpuy-an sang mga Anakimnon, ang mga lalaki nga di-kinaandan ang kadakuon. Sa bulig ni Jehova, “nasubol sila” ni Caleb, “suno sa ginpamulong sang GINUO.” (Josue 14:9-14; 15:13, 14) Makasalig kamo nga si Jehova kaupod ninyo, subong nga kaupod sia anay ni Caleb, samtang padayon kamo nga nagapatubas sing bunga sang Ginharian sa katigulangon. Kag kon magpabilin kamo nga matutom, hatagan niya kamo sing duog sa iya ginsaad nga bag-ong kalibutan.​—Isaias 40:​29-​31; 2 Pedro 3:​13.

“Mapuno Sila sang Duga kag Kalab-as”

9, 10. Paano ang tigulang nga mga Cristiano nagpabilin nga mapagros sa pagtuo kag nahuptan nila ang ila espirituwal nga kusog? (Tan-awa ang kahon sa pahina 13.)

⁹ Nagapatalupangod sang pagkamabungahon sang tigulang nga mga alagad ni Jehova, ang salmista nag-amba: “Ang matarong magalambo kaangay sang palma, magatubo sia kaangay sang sedro sa Libano. Magapamunga pa sila sa katigulangon, mapuno sila sang duga kag kalab-as.”​—Salmo 92:12, 14.

¹⁰ Paano mo mahuptan ang imo espirituwal nga kusog walay sapayan sang katigulangon? Ang sekreto sang nagadugay nga katahom sang palma amo ang nagakaigo nga suplay sang lab-as nga tubig. Gani, makakuha ka man sing kusog gikan sa tubig sang kamatuoran sang Biblia paagi sa imo pagtuon sa Pulong sang Dios kag paagi sa pagpakig-upod sa iya organisasyon. (Salmo 1:1-3; Jeremias 17:7, 8) Bangod sang imo espirituwal nga kabaskog, hamili ikaw sa imo mga masigkatumuluo. Binagbinaga ang pamatuod tuhoy sini sa bahin sang tigulang nga Mataas nga Saserdote nga si Joiada.

11, 12. (a) Ano ang importante nga papel ni Joiada sa maragtas sang ginharian sang Juda? (b) Paano gingamit ni Joiada ang iya impluwensia sa pagsakdag sa matuod nga pagsimba?

¹¹ Si Joiada mahimo nga kapin sa isa ka gatos ka tuig ang edad sang gin-agaw sang ambisyosa nga si Reyna Atalia ang Juda paagi sa pagpatay sa iya mismo mga apo. Ano ang mahimo sang tigulang nga si Joiada? Sa sulod sang anom ka tuig, gintago nila nga mag-asawa ang nagaisahanon nga buhi nga manunubli sang trono, nga si Jehoas, sa templo. Nian, sa hinali kag sing makapakibot, ginproklamar ni Joiada ang pito ka tuig nga si Jehoas nga hari kag ginpapatay si Atalia.​—2 Cronica 22:⁠10-12; 23:​1-3, 15, 21.

¹² Subong manug-atipan sang hari, gingamit ni Joiada ang iya impluwensia sa pagsakdag sa matuod nga pagsimba. Naghimo sia sing “katipan sa tunga niya kag sang bug-os nga katawhan kag sang hari nga sila mangin katawhan sang GINUO.” Sa mando ni Joiada, ginguba sang katawhan ang balay sang butig nga dios nga si Baal kag ginkuha ang iya mga halaran, mga larawan, kag saserdote. Sa panuytoy man ni Joiada nga ginpasag-uli ni Jehoas ang mga kahimusan sa templo kag ginpakay-o ang templo. “Si Jehoas naghimo sang matarong sa mga mata sang GINUO sa tanan nga adlaw, bangod nga gintudluan sia ni Joiada nga saserdote.” (2 Cronica 23:​11, 16-​19; 24:​11-​14; 2 Hari 12:2) Sang napatay sia sa edad nga 130, si Joiada ginhatagan sing tumalagsahon nga kadungganan nga malubong upod sa mga hari bangod nga “naghimo sia sing maayo sa Israel, kag sa matuod nga Dios kag sa Iya balay.”​—2 Cronica 24:⁠15, 16, NW.

13. Paano ang tigulang nga mga Cristiano ‘makahimo sing maayo sa matuod nga Dios kag sa iya balay’?

¹³ Ayhan bangod sang indi maayo nga panglawas ukon iban pa nga mga kahimtangan, limitado ang imo mahimo sa pagsakdag sa matuod nga pagsimba. Walay sapayan sini, sarang mo ‘mahimo ang maayo sa matuod nga Dios kag sa iya balay.’ Mapakita mo ang kakugi para sa espirituwal nga balay ni Jehova paagi sa pagtambong kag sa pagkomento sa mga miting sang kongregasyon kag paagi sa pagpakigbahin sa ministeryo sa latagon kon posible. Ang imo kahanda sa pagbaton sa laygay sang Biblia kag ang imo mainunungon nga pagsuportar sa “ulipon nga matutom kag mainandamon” kag sa kongregasyon magapabakod sang Cristianong paghiliutod. (Mateo 24:45-47) Mapukaw mo man ang mga masigkasumilimba “sa gugma kag maayong mga buhat.” (Hebreo 10:24, 25; Filemon 8, 9) Kag mangin pagpakamaayo ka sa iban kon magpanghikot ka nahisanto sa laygay ni apostol Pablo: “Ang tigulang nga mga lalaki mangin mahaganhaganon sa mga batasan, serioso, maligdong sing hunahuna, mapagros [“mabaskog,” An American Translation] sa pagtuo, sa gugma, sa pagbatas. Subong man ang tigulang nga mga babayi mangin matinahuron sa pagginawi, indi mapasipalahon, wala naulipon sa madamo nga alak, mga manunudlo sing maayo.”—Tito 2:2-4, NW.

14. Ano ang mahimo sang madugay na nga Cristianong mga manugtatap sa pagsakdag sa matuod nga pagsimba?

¹⁴ Nagaalagad ka bala subong gulang sa kongregasyon sa sulod sang madamong tinuig? “Gamita sing di-makagod ang kaalam nga natipon mo sing tinuig,” laygay sang isa ka madugay na nga gulang sa kongregasyon. “Itugyan sa iban ang responsibilidad, kag ipaambit ang imo eksperiensia sa iban nga handa sa pagtuon . . . Tukiba ang ikasarang sang iban. Palambua kag pauswaga ini. Magtukod para sa palaabuton.” (Deuteronomio 3:27, 28) Ang imo matuod nga interes sa nagasangkad nga pagbantala sing Ginharian nga hilikuton magaresulta sa madamo nga mga benepisyo para sa iban sa aton Cristianong paghiliutod.

“Isaysay nga si Jehova Matarong”

15. Paano ‘ginasaysay sang tigulang nga mga Cristiano nga si Jehova matarong’?

¹⁵ Malipayon nga ginahimo sang tigulang nga mga alagad ni Jehova ang ila responsibilidad “agod isaysay nga si Jehova matarong.” Kon ikaw isa ka tigulang nga Cristiano, ang imo mga pulong kag mga buhat magapakita sa iban nga ‘si Jehova ang imo Igang, nga sa iya wala sing di-matarong.’ (Salmo 92:15, NW) Ang kahoy nga palma nagapanaksi sing mahipos sa superlatibo nga mga kinaiya sang Manunuga sini. Apang ginhatagan ka ni Jehova sing pinasahi nga kahigayunan nga magpanaksi tuhoy sa iya sa mga nagabaton karon sa matuod nga pagsimba. (Deuteronomio 32:7; Salmo 71:17, 18; Joel 1:2, 3) Ngaa importante ini?

16. Anong halimbawa sa Biblia ang nagailustrar sang importansia sang ‘pagsaysay nga si Jehova matarong’?

¹⁶ Sang si Josue nga lider sang Israel “tigulang na kag subol sa panuigon,” “ginpatawag [niya] ang bug-os nga Israel, ang ila mga tigulang kag ang ila mga pangulo, ang ila mga hukom kag ang ila mga manugdumala,” kag ginpahanumdom sa ila ang matarong nga mga pagpakig-angot sang Dios. Nagsiling sia: “Wala sing isa ka butang nga nakulang sa tanan nga butang nga maayo nga ginpamulong nahanungod sa inyo sang GINUO nga inyo Dios; ang tanan nahanabo sa inyo.” (Josue 23:1, 2, 14) Sa pila ka tion, ining mga pulong nagpabakod sa pamat-od sang katawhan nga magpabilin nga matutom. Apang, sang napatay na si Josue, “may nagbangon nga isa pa ka kaliwatan . . . nga wala makakilala sa GINUO ukon sang buhat nga iya nahimo tungod sa Israel. Kag ang katawhan sang Israel naghimo sang malaut sa itululok sang GINUO kag nag-alagad sa mga Baal.”​—Hukom 2:​8-​11.

17. Paano ginpakig-angutan ni Jehova ang iya katawhan sa modernong tion?

¹⁷ Ang integridad sang Cristianong kongregasyon sa karon wala nasandig sa ginpamulong nga testimonya sang tigulang nga mga alagad sang Dios. Apang, ang aton pagtuo kay Jehova kag sa iya mga saad nagabakod kon mabatian naton mismo ang mga sugilanon tuhoy sa “daku nga mga buhat” nga ginhimo niya para sa iya katawhan sining katapusan nga mga adlaw. (Hukom 2:7; 2 Pedro 1:16-19) Kon madugay ka na nga nagapakig-upod sa organisasyon ni Jehova, mahimo madumduman mo ang tion sang diutay pa lang ang mga manugbantala sang Ginharian sa inyo duog ukon pungsod ukon sang ang pagbantala nga hilikuton ginpamatukan sing daku. Sa paglipas sang tion, nakita mo nga ginkuha ni Jehova ang mga balagbag kag ‘ginpadali’ ang pagdamo sang mga manugbantala sang Ginharian. (Isaias 54:17; 60:22) Nakita mo ang pag-athag sang mga kamatuoran sang Biblia kag nasaksihan ang progresibo nga pagpaputli sa kitaon nga bahin sang organisasyon sang Dios. (Hulubaton 4:18; Isaias 60:17) Nagatinguha ka bala nga palig-unon ang iban paagi sa pagsugid sa ila sang imo eksperiensia may kaangtanan sa matarong nga mga pagpakig-angot ni Jehova? Magapapagsik kag magapabakod gid ini sa Cristianong paghiliutod!

18. (a) Iilustrar ang mapuslanon nga epekto sang ‘pagsaysay nga si Jehova matarong.’ (b) Paano mo personal nga naeksperiensiahan ang pagkamatarong ni Jehova?

¹⁸ Kamusta naman ang mga okasyon sang naeksperiensiahan mo ang mahigugmaon nga pag-atipan kag pagtuytoy ni Jehova sa imo personal nga kabuhi? (Salmo 37:25; Mateo 6:33; 1 Pedro 5:7) Ang tigulang nga utod nga si Marta, pirme anay nagapalig-on sa iban paagi sa pagsiling: “Bisan ano man ang matabo, indi gid pagbayai si Jehova. Sakdagon ka niya.” Ini nga laygay may daku nga epekto kay Tolmina, isa sa mga ginatudluan ni Marta sa Biblia nga nabawtismuhan sang maaga nga bahin sang katuigan 1960. “Sang napatay ang akon bana,” hinumdom ni Tolmina, “nagluya gid ako, apang yadto nga mga pulong nagpabaskog sang akon determinasyon nga indi magpalya sa miting. Kag ginpabakod gid ako ni Jehova sa pagpadayon.” Amo man ini ang ginalaygay ni Tolmina sa madamo nga ginatudluan niya sa Biblia sa sulod sang mga tinuig. Sa pagkamatuod, paagi sa pagpalig-on kag sa paghinumdom sa matarong nga mga pagpakig-angot ni Jehova, daku gid ang imo mahimo agod mapalig-on ang pagtuo sang mga masigkatumuluo.

Ginapakabahandi ni Jehova ang Matutom nga mga Tigulang

19, 20. (a) Paano ginatamod ni Jehova ang mga ginahimo sang iya tigulang nga mga alagad? (b) Ano ang binagbinagon sa masunod nga artikulo?

¹⁹ Ang kalibutan sa karon, nga makilal-an bangod sang pagkawalay kabalaslan, wala nagapatugsiling sa mga tigulang. (2 Timoteo 3:1, 2) Ang mga tigulang masami nga ginadumdom bangod sang ila nagligad nga hinimuan​—kon ano sila sadto, sa baylo nga kon ano sila karon. Apang, ang Biblia nagasiling: “Ang Dios indi di-matarong nga malimot sang inyo binuhatan kag sang gugma nga ginpakita ninyo tungod sa iya ngalan nga nag-alagad kamo sa mga balaan, kag nagaalagad pa.” (Hebreo 6:10) Sa pagkamatuod, ginadumdom ni Jehova nga Dios ang imo nagligad nga rekord sang matutom nga mga buhat. Apang ginapabaloran ka man niya bangod sang imo padayon nga ginahimo sa pag-alagad sa iya. Huo, ginatamod niya ang matutom nga mga tigulang subong mabungahon, mapagros sa espirituwal, kag mabakod nga mga Cristiano​—isa ka buhi nga pamatuod sang iya gahom.​—Filipos 4:​13.

²⁰ Ginatamod mo bala ang tigulang nga mga katapo sang aton Cristianong paghiliutod subong sang pagtamod ni Jehova sa ila? Kon amo, mapahulag ka nga pakitaan sila sing gugma. (1 Juan 3:18) Binagbinagon sang masunod nga artikulo ang pila ka praktikal nga mga paagi sa pagpakita sini nga gugma sa pag-atipan sang ila mga kinahanglanon.

[Nota]

Ano ang Imo Sabat?

• Paano “nagapamunga” ang mga tigulang?

• Ngaa ang espirituwal nga kusog sang tigulang nga mga Cristiano isa ka mapuslanon nga butang?

• Paano ang mga tigulang ‘nagasaysay nga si Jehova matarong’?

• Ngaa ginapakabahandi ni Jehova ang iya tigulang nga mga alagad?

[Kahon sa pahina 13]

Kon Paano Sila Nagpabilin nga Mabakod sa Pagtuo

Ano ang nagbulig sa madugay na nga mga Cristiano sa pagpabilin nga mabakod sa pagtuo kag sa paghupot nga malig-on sang ila espirituwalidad? Yari ang ginsiling sang iban:

“Ang pagbasa sing mga kasulatan nga nagapadaku sang aton relasyon kay Jehova importante katama. Halos kada gab-i, ginabinalaybay ko ang Salmo 23 kag 91.”​—Olive, ginbawtismuhan sang 1930.

“Ginapat-od ko nga tambungan ang tanan nga pamulongpulong sa bawtismo kag mamati sing maayo, subong nga daw ako mismo ang mapabawtismo. Ang paghupot sang akon dedikasyon nga maathag sa akon hunahuna isa ka importante nga tikang sa pagpabilin nga matutom.”​—Harry, ginbawtismuhan sang 1946.

“Ang pagpangamuyo adlaw-adlaw kinahanglanon gid​—nga pirme nagapangayo sing bulig, pag-amlig, kag pagpakamaayo ni Jehova, ‘ginatalupangod sia sa tanan naton nga dalanon.’” (Hulubaton 3:5, 6, NW)​—Antônio, ginbawtismuhan sang 1951.

“Ang pagpamati sa mga eksperiensia sadtong matutom gihapon nga nagaalagad kay Jehova paglipas sang madamo nga tinuig nagapabaskog sang akon determinasyon nga magpabilin nga mainunungon kag matutom sa iya.”​—Joan, ginbawtismuhan sang 1954.

“Importante nga indi paghunahunaa sing tuman ang kaugalingon. Naagom naton ang tanan nga butang tungod sa di-bagay nga kaayo sang Dios. Ini nga panimuot magabulig sa aton nga pirme magtulok sa husto nga direksion para sa espirituwal nga pagkaon nga kinahanglan agod makabatas tubtob sa katapusan.”​—Arlene, ginbawtismuhan sang 1954.

[Retrato sa pahina 11]

Ang mga tigulang nagapatubas sing hamili nga bunga sang Ginharian

[Retrato sa pahina 14]

Ang espirituwal nga kusog sang tigulang isa ka hamili nga butang