Ang Dios Bala ang Dapat Basulon sa Aton mga Problema?

SANG ang utok sang anak nga babayi ni Marion malubha nga nahalitan, ginhimo ni Marion ang mahimo nga himuon sang madamo sa aton. Nangamuyo sia sing bulig sa Dios.a “Karon lang ako nagbatyag nga daw wala gid sing mahimo kag nagaisahanon,” siling ni Marion. Sang ulihi, naglala ang kahimtangan sang iya anak, kag si Marion nagsugod sa pagduhaduha sa Dios. “Ngaa nagakatabo ini?” pamangkot niya. Indi niya mahangpan kon ngaa ginpabay-an sia sang isa ka mahigugmaon kag mainulikdon nga Dios.

Ang eksperiensia ni Marion indi pinasahi. Di-maisip nga mga tawo sa bug-os nga kalibutan ang nagbatyag nga ginpabay-an sila sang Dios sang nagakinahanglan sila sing bulig. “Nagapalibog gihapon ako kon ngaa ginapahanugutan sang DIOS ang malain nga mga butang,” siling ni Lisa pagkatapos nga ginpatay ang iya apo nga lalaki. “Nagatuo gihapon ako sa Dios, apang indi na ini subong kabakod sangsa nagligad.” Sing kaanggid, pagkatapos maeksperiensiahan ang di-makatarunganon nga trahedya may kaangtanan sa iya lapsag nga anak nga lalaki, ang isa ka babayi nagsiling: “Wala ako ginlugpayan sang Dios sa natabo. Wala sia magpakita sing bisan ano nga tanda nga nagaulikid sia.” Nagsiling pa sia: “Indi ko gid mapatawad ang Dios.”

Nagahinakit ang iban sa Dios kon makita nila ang nagakatabo sa ila palibot. Nakita nila ang mga pungsod nga may sobra nga kaimulon kag gutom, ang wala na sing paglaum nga mga refugee sang inaway, ang di-mabanabana nga kadamuon sang mga bata nga nailo bangod sang AIDS, kag ang minilyon ka tawo nga naapektuhan sang iban nga mga balatian. Bangod sini kag sang kaanggid nga mga trahedya, ginabasol sang madamo ang Dios bangod daw wala sia nagasapak.

Apang, ang Dios indi gid dapat basulon sa mga problema nga nagapapiot sa katawhan. Sa katunayan, may makatarunganon nga mga rason agod magpati kita nga dulaon sang Dios sa dili madugay ang halit sa tawhanon nga pamilya. Basaha ang masunod nga artikulo kag hibalua kon paano ang Dios nagaulikid gid sa aton.

[Nota]