‘Tudlui Sila nga Tumanon ang Tanan nga Butang nga Ginsugo Ko sa Inyo’
“Busa lakat kamo kag maghimo sing mga disipulo . . . , nagatudlo sa ila nga tumanon ang tanan nga butang nga ginsugo ko sa inyo.”—MATEO 28:19, 20.
1. Ano anay ang natabo nga pagsugilanunay ni disipulo Felipe kag sang tawo nga taga-Etiopia?
ANG tawo nga taga-Etiopia naglakbay padulong sa Jerusalem. Ginasimba niya didto ang Dios nga iya ginahigugma, si Jehova. Maathag nga ginahigugma man niya ang inspirado nga Pulong sang Dios. Samtang nagapauli sakay sa iya kangga, nagabasa sia sing isa ka kopya sang sinulatan ni manalagna Isaias sang nakita sia ni Felipe, nga isa ka disipulo ni Cristo. Ginpamangkot ni Felipe ang Etiopianhon: “Nahibaluan mo gid bala ang imo ginabasa?” Ang tawo nagsabat: “Paano ko bala ini mahimo, luwas kon may isa nga magtuytoy sa akon?” Nagsugod si Felipe sa pagbulig sa sining sinsero nga estudyante sang Kasulatan nga mangin isa ka disipulo ni Cristo.—Binuhatan 8:26-39.
2. (a) Sa anong paagi makahulugan ang sabat sang Etiopianhon? (b) Ano nga mga pamangkot may kaangtanan sa sugo ni Cristo nga maghimo sing mga disipulo ang binagbinagon naton?
2 Talalupangdon ang sabat sang Etiopianhon. Nagsiling sia: ‘Paano bala, luwas kon may isa nga magtuytoy sa akon?’ Huo, kinahanglan may magtuytoy sa iya, isa nga magapahangop sa iya sang iya ginabasa. Sa kaugalingon sini nga paagi, ginailustrar sining komento ang importansia sang isa ka espesipiko nga instruksion nga ginlakip ni Jesus sa iya sugo nga maghimo sing mga disipulo. Ano nga instruksion? Agod makita ang sabat, padayunon naton ang aton pagbinagbinag sa mga pulong ni Jesus nga masapwan sa Mateo kapitulo 28. Ang nagligad nga artikulo nagsentro sa mga pamangkot nga ngaa? kag diin? Binagbinagon naton karon ang duha pa ka pamangkot nga may kaangtanan sa sugo ni Cristo nga maghimo sing mga disipulo—ano? kag san-o?
“Nagatudlo sa Ila nga Tumanon ang Tanan nga Butang”
3. (a) Paano ang isa mangin disipulo ni Jesucristo? (b) Ano ang nalakip sa paghimo sing mga disipulo?
3 Ano ang dapat naton itudlo agod mabuligan ang iban nga mangin mga disipulo ni Cristo? Ginsugo ni Jesus ang iya mga sumulunod: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20) Busa, dapat naton itudlo ang mga butang nga ginsugo ni Cristo.a Apang, ano ang himuon naton agod mapat-od nga ang isa ka indibiduwal nga gintudluan sang mga sugo ni Jesus indi lamang mangin isa ka disipulo kundi magpadayon man sa sini? Ang isa ka importante nga punto makita sa mahalungon nga pagpili ni Jesus sing mga tinaga. Talupangda nga wala lamang sia magsiling: ‘Tudlui sila sang tanan nga butang nga ginsugo ko sa inyo.’ Sa baylo, nagsiling sia: ‘Tudlui sila nga tumanon ang tanan nga butang nga ginsugo ko sa inyo.’ (Mateo 19:17) Ano ang ginapahangop sini?
4. (a) Ano ang buot silingon sang pagtuman sa isa ka sugo? (b) Iilustrar kon paano naton tudluan ang isa sa pagtuman sang mga sugo ni Cristo.
4 Ang pagtuman sa sugo nagakahulugan sing “pagpahisuno sang buhat sang isa” sa isa ka sugo. Nian, paano naton matudluan ang isa sa pagtuman sa mga butang nga ginsugo ni Cristo? Bueno, hunahunaa kon paano ginatudluan sang instruktor sa pagmaneho ang iya mga estudyante sa pagtuman sa mga kasuguan sang trapiko. Samtang yara pa sa hulot-klasehan mahimo tudluan sang instruktor ang iya mga estudyante kon ano ang mga pagsulundan sa dalan. Apang, agod tudluan ang iya mga estudyante kon paano tumanon ining mga pagsulundan, dapat niya tuytuyan ang mga estudyante samtang sila mismo ang aktual nga nagamaneho sa masako nga dalan kag nagapanikasog sa pag-aplikar sang ila natun-an. Sing kaanggid, kon nagatuon kita sang Biblia upod sa mga tawo, ginapaathag naton sa ila ang mga sugo ni Cristo. Apang, dapat man naton tuytuyan ang mga estudyante samtang nagapanikasog sila sa pag-aplikar sa mga instruksion ni Jesus sa ila matag-adlaw nga pagkabuhi kag sa ministeryo. (Juan 14:15; 1 Juan 2:3) Busa, agod bug-os naton nga matuman ang sugo ni Cristo nga maghimo sing mga disipulo kinahanglan naton ipaathag ko ano ang mga sugo kag maghatag sing panuytoy kon paano ini iaplikar. Sa sining paagi, ginailog naton ang halimbawa nga ginpahamtang ni Jesus kag ni Jehova mismo.—Salmo 48:14; Bugna 7:17.
5. Ngaa ang tawo nga ginatun-an naton sa Biblia mahimo magpangalag-ag sa pagtuman sa sugo ni Cristo nga maghimo sing mga disipulo?
5 Nalakip sa aton pagtudlo sa iban nga tumanon ang mga sugo ni Jesus amo ang pagbulig sa ila nga tumanon ang sugo nga maghimo sing mga disipulo. Mahimo mabudlay ini para sa pila nga ginatun-an naton sing Biblia. Bisan pa aktibo sila anay nga mga katapo sang simbahan sang Cristiandad, mahimo nga wala sila gintudluan sang ila mga manunudlo sa relihion kon paano maghimo sing mga disipulo. Prangka nga ginbaton sang pila ka lider sang mga relihion nga kon pagtudlo sa ila panong nga magbantala ang pagahambalan, napaslawan gid ang mga relihion sang Cristiandad. Nagakomento sa sugo ni Jesus nga magkadto sa kalibutan kag buligan ang tanan nga sahi sang mga tawo nga mangin mga disipulo, ang iskolar sa Biblia nga si John R. W. Stott nagtalupangod: “Ang kapaslawan naton sa pagtuman sa kahulugan sining sugo amo ang pinakadaku nga kaluyahon sang ebangheliko nga mga Cristiano sa patag sang pag-ebanghelyo karon.” Nagsiling pa sia: “Naanad na lang kita sa pagbantala sang ebanghelyo sing di-personal. Kon kaisa kaangay kita sang mga tawo nga nagasinggit sa paglaygay sa nagakalumos nga mga tawo kon ano ang himuon samtang yara lamang kita sa higad baybay. Wala kita nagalukso sa tubig agod luwason sila. Nahadlok kita mabasa.”
6. (a) Paano naton mailog ang halimbawa ni Felipe kon nagabulig sa isa ka estudyante sa Biblia? (b) Paano naton mapakita ang aton pag-ulikid kon nagasugod na sa pagpakigbahin sa pagbantala ang isa ka estudyante sa Biblia?
6 Kon ang ginatun-an naton sa Biblia miembro anay sang isa ka relihion nga ang mga katapo ‘nahadlok mabasa,’ mahimo mabudlay para sa iya nga daugon ang iya kahadlok sa tubig, kon sa aton pa, kag magtuman sa sugo ni Cristo nga maghimo sing mga disipulo. Dapat sia buligan. Busa, kinahanglan mangin mapailubon kita samtang ginahatagan naton sia sing instruksion kag panuytoy nga magapadalom sang iya paghangop kag magapahulag sa iya, subong nga ang mga panudlo ni Felipe naghatag sang kasanagan sa Etiopianhon kag nagpahulag sa iya nga magpabawtismo. (Juan 16:13; Binuhatan 8:35-38) Dugang pa, ang aton handum nga tudluan ang mga estudyante sa Biblia sa pagtuman sa sugo nga maghimo sing mga disipulo nagapahulag sa aton nga mag-upod sa ila agod tuytuyan sila samtang nagasugod sila sa pagbantala sang Ginharian.—Manugwali 4:9, 10; Lucas 6:40.
“Ang Tanan nga Butang”
7. Ang pagtudlo sa iban nga “tumanon ang tanan nga butang” nagalakip sang pagtudlo sa ila sang ano nga mga sugo?
7 Indi lamang paghimo sing mga disipulo ang ginatudlo naton sa bag-ong mga disipulo. Ginsilingan kita ni Jesus nga tudluan ang iban nga “tumanon ang tanan nga butang” nga iya ginsugo. Pat-od nga nalakip sa sini ang duha ka labing daku nga sugo—higugmaon ang Dios kag higugmaon ang isigkatawo. (Mateo 22:37-39) Paano naton matudluan ang isa ka bag-ong disipulo nga tumanon ining mga sugo?
8. Iilustrar kon paano matudluan ang isa ka bag-ong disipulo sa pagtuman sa sugo nga magpakita sing gugma.
8 Hunahunaa liwat ang ilustrasyon sang estudyante sa pagmaneho. Samtang nagamaneho sa masako nga dalan ang estudyante sa tupad sang iya instruktor, ang estudyante nagatuon sa pagmaneho indi lamang paagi sa pagpamati sa iya instruktor kundi paagi man sa pag-obserbar sa iban nga mga drayber. Halimbawa, mahimo itudlo sang instruktor ang isa ka drayber nga mainayuhon nga ginapaoberteyk ang isa ka salakyan; ukon ang isa ka drayber nga matinahuron nga ginapadulom ang suga sa atubangan sang iya salakyan agod indi masilawan ang nagasugata nga mga salakyan; ukon ang isa ka drayber nga nagabulig sa iban nga salakyan nga naaberiya. Ini nga mga halimbawa magatudlo sa estudyante sing mapuslanon nga mga leksion nga maaplikar niya kon nagamaneho sia. Sing kaanggid, ang isa ka bag-ong disipulo nga nagalakbay sa dalanon padulong sa kabuhi nagatuon indi lamang sa iya manunudlo kundi sa iban man nga maayong mga halimbawa nga iya nakita sa kongregasyon.—Mateo 7:13, 14.
9. Paano matun-an sang isa ka bag-ong disipulo kon ano ang buot silingon sang pagtuman sa sugo nga magpakita sing gugma?
9 Halimbawa, mahimo maobserbahan sang estudyante sang Biblia ang isa ka nagasolo nga ginikanan nga nagapanikasog gid sa pagkadto sa Kingdom Hall nga ginabakintol ang iya magagmay nga kabataan. Mahimo makita niya ang isa ka ginapung-awan nga tawo nga matutom nga nagatambong sa mga miting walay sapayan sang iya pagpakig-away sa kapung-aw, isa ka tigulang nga balo nga babayi nga may salakyan nga nagapangdul-ong sa iban nga mga tigulang sa kada miting sang kongregasyon, ukon sa isa ka tin-edyer nga nagapakigbahin sa pagpaninlo sa Kingdom Hall. Mahimo maobserbahan sang estudyante sang Biblia ang isa ka gulang sa kongregasyon nga matutom nga nagapanguna sa pag-alagad sa latagon walay sapayan sang iya madamo nga mga responsabilidad sa kongregasyon. Mahimo makapakigsugilanon sia sa isa ka baldado nga Saksi kag indi na makahalin sa balay apang isa ka tuburan sang espirituwal nga pagpalig-on sa tanan nga nagaduaw sa iya. Mahimo maobserbahan sang estudyante ang isa ka mag-asawa nga naghimo sing daku nga mga pagpasibu sa ila kabuhi agod maatipan ang ila tigulang na nga mga ginikanan. Paagi sa pag-obserbar sa sining mainayuhon, mabinuligon, kag masaligan nga mga Cristiano, ang isa ka bag-ong disipulo makatuon paagi sa halimbawa kon ano ang buot silingon sang pagtuman sang sugo ni Cristo nga higugmaon ang Dios kag ang isigkatawo, ilabi na ang paghigugma sa masigkatumuluo. (Hulubaton 24:32; Juan 13:35; Galacia 6:10; 1 Timoteo 5:4, 8; 1 Pedro 5:2, 3) Sa sining paagi, ang kada katapo sang Cristianong kongregasyon sarang—kag dapat—mangin isa ka manunudlo kag isa ka manugtuytoy.—Mateo 5:16.
“Tubtob sa Katapusan sang Sistema sang mga Butang”
10. (a) Tubtob san-o kita magpadayon sa paghimo sing mga disipulo? (b) Ano nga halimbawa ang ginpahamtang ni Jesus may kaangtanan sa pagtuman sang mga katungdanan?
10 Tubtob san-o naton dapat padayunon ang paghimo sing disipulo? Tubtob sa katapusan sang sistema sang mga butang. (Mateo 28:20) Sarang bala naton matuman ining aspekto sang sugo ni Jesus? Subong isa ka bug-os kalibutan nga kongregasyon, determinado kita sa pagtuman sini. Sang nagliligad nga mga tinuig, malipayon naton nga ginagamit ang aton tion, kusog, kag manggad agod pangitaon ang mga “husto nga nahuyog sa kabuhi nga walay katapusan.” (Binuhatan 13:48) Sa karon, ang mga Saksi ni Jehova nagahinguyang sing promedyo nga kapin sa tatlo ka milyon ka oras kada adlaw sang tuig sa pagbantala sang Ginharian kag paghimo sing mga disipulo nga hilikuton sa bug-os nga kalibutan. Ginahimo naton ini bangod ginasunod naton ang halimbawa ni Jesus. Sia nagsiling: “Ang akon kalan-on amo ang paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:34) Amo man ini ang aton tinagipusuon nga handum. (Juan 20:21) Indi naton luyag nga sugdan lamang ang hilikuton nga gintugyan sa aton; luyag naton nga tapuson ini.—Mateo 24:13; Juan 17:4.
11. Ano ang natabo sa pila naton ka Cristianong kauturan, kag ano ang dapat naton ipamangkot sa aton kaugalingon?
11 Apang, nagakasubo kita kon makita naton ang pila ka masigkatumuluo nga nagluya sa espirituwal kag, subong resulta, naghinay ukon nag-untat sa pagtuman sa sugo ni Cristo nga maghimo sing mga disipulo. May paagi bala agod mabuligan naton sila nga makapakig-upod liwat sa kongregasyon kag padayunon ang ila pagpakigbahin sa paghimo sing mga disipulo? (Roma 15:1; Hebreo 12:12) Ang paagi ni Jesus sa pagbulig sa iya mga apostol sang temporaryo sila nga nagluya nagapakita sang sarang naton mahimo karon.
Magpakita sing Pag-ulikid
12. (a) Ano ang ginhimo sang mga apostoles ni Jesus wala madugay antes sang iya kamatayon? (b) Paano ginpakig-angutan ni Jesus ang iya mga apostoles walay sapayan nga nagpakita sila sing serioso nga mga kaluyahon?
12 Sa katapusan sang ministeryo ni Jesus sa duta, sang malapit na ang iya kamatayon, ang iya mga apostol “nagbiya sa iya, kag nagpalagyo.” Subong sang gintagna ni Jesus, ‘naglinapta ang kada isa sa ila sa iya kaugalingon nga balay.’ (Marcos 14:50; Juan 16:32) Paano ginpakig-angutan ni Jesus ang iya nagluya sa espirituwal nga mga kaupdanan? Wala magdugay pagkatapos sang iya pagkabanhaw, ginsugiran ni Jesus ang pila niya ka sumulunod: “Indi kamo mahadlok! Kadto kamo, isiling ninyo sa akon mga utod, agod magkadto sila sa Galilea; kag didto nila ako makita.” (Mateo 28:10) Bisan pa may serioso nga mga kaluyahon ang iya mga apostol, gintawag sila gihapon ni Jesus nga “akon mga utod.” (Mateo 12:49) Wala nadula ang iya pagsalig sa ila. Sa sining paagi, si Jesus nangin maluluy-on kag mapinatawaron, subong nga si Jehova maluluy-on kag mapinatawaron. (2 Hari 13:23) Paano naton mailog si Jesus?
13. Paano naton dapat tamdon ang mga nagluya sa espirituwal?
13 Dapat kita mag-ulikid sa mga naghinay ukon nag-untat sa pagpakigbahin sa ministeryo. Madumduman gihapon naton ang mga buhat sang gugma nga ginhimo sang aton mga masigkatumuluo sang una—ang pila ayhan sing mga dinekada. (Hebreo 6:10) Nahidlaw gid kita sa ila pagpakig-upod. (Lucas 15:4-7; 1 Tesalonica 2:17) Apang, paano naton mapakita ang aton pag-ulikid sa ila?
14. Bilang pag-ilog kay Jesus, paano naton mabuligan ang isa ka maluya nga tawo?
14 Ginsilingan ni Jesus ang iya nasubuan nga mga apostoles nga dapat sila magkadto sa Galilea kag agod makita nila sia didto. Daw subong bala nga ginaagda sila ni Jesus sa pagtambong sa isa ka pinasahi nga miting. (Mateo 28:10) Sing kaanggid, ginapalig-on man naton karon ang mga nagluya sa espirituwal nga magtambong sa mga miting sang Cristianong kongregasyon, kag mahimo nga indi lamang naton sila makaisa palig-unon nga magtambong. Sa kaso sang mga apostoles, nagbunga ang pangagda, kay “ang napulog isa ka disipulo nagkadto sa Galilea sa bukid nga gintudlo ni Jesus sa ila.” (Mateo 28:16) Daw ano nga kalipay ang aton mabatyagan kon amo man sini ang himuon sang mga maluya sa aton mainit nga mga pangagda sa ila kag magtambong sila liwat sa Cristianong mga miting!—Lucas 15:6.
15. Paano naton masunod ang halimbawa ni Jesus sa pag-abiabi sa mga maluya nga nagakadto sa aton duog tilipunan?
15 Ano ang ginahimo naton kon magkadto sa Kingdom Hall ang isa ka mas maluya nga Cristiano? Bueno, ano ang ginhimo ni Jesus sang nakita niya ang iya mga apostoles, nga nagluya ang pagtuo sing temporaryo, sa gintangdo nga duog tilipunan? “Si Jesus nagpalapit kag nagpamulong sa ila.” (Mateo 28:18) Wala lamang niya sila gintan-aw gikan sa malayo kundi ginpalapitan sila. Hunahuna lamang kon paano naumpawan ang mga apostoles sang si Jesus ang una nga nagpalapit sa ila! Kabay nga kita man ang mag-una palapit kag mainit nga mag-abiabi sa mga maluya sa espirituwal nga nagatinguha nga magbalik sa Cristianong kongregasyon.
16. (a) Ano ang matun-an naton sa paagi sang pagpakig-angot ni Jesus sa iya mga sumulunod? (b) Paano naton mapadayag ang pagtamod ni Jesus sa mga maluya? (Tan-awa ang footnote.)
16 Ano pa ang ginhimo ni Jesus? Una, nagpahibalo sia: “Ang bug-os nga awtoridad ginhatag na sa akon.” Ikaduha, may ginpahimo sia sa ila: “Busa lakat kamo kag maghimo sing mga disipulo.” Ikatlo, nangako sia: “Ako kaupod ninyo sa tanan nga adlaw.” Apang natalupangdan mo bala kon ano ang wala ginhimo ni Jesus? Wala niya gin-akigan ang iya mga disipulo bangod sang ila mga kapaslawan kag mga pagduhaduha. (Mateo 28:17) Epektibo bala ang iya paagi sa pagpalapit? Huo. Wala magdugay, ang mga apostoles nagpadayon liwat sa “pagpanudlo kag sa pagpahayag sing maayong balita.” (Binuhatan 5:42) Paagi sa pagsunod sa halimbawa ni Jesus kon paano pakig-angutan ang mga maluya, mahimo nga maeksperiensiahan man naton ang kaanggid nga makapalig-on nga mga resulta sa aton lokal nga kongregasyon.b—Binuhatan 20:35.
“Ako Kaupod Ninyo sa Tanan nga Adlaw”
17, 18. Ano nga makapalig-on nga panghunahuna ang nalakip sa mga pinamulong ni Jesus nga “ako kaupod ninyo sa tanan nga adlaw”?
17 Ang katapusan nga mga pulong sang sugo ni Jesus nga, “ako kaupod ninyo sa tanan nga adlaw,” may makapalig-on nga epekto sa tanan nga nagapanikasog sa pagtuman sa sugo ni Cristo nga maghimo sing mga disipulo. Bisan ano man nga pagpamatok ang himuon sang mga kaaway sa aton pagbantala sang Ginharian nga hilikuton kag bisan ano man nga porma sang pasipala ang ila pagguaon batok sa aton, indi kita dapat mahadlok. Ngaa indi? Si Jesus nga aton Lider, nga may ‘bug-os nga awtoridad sa langit kag sa duta,’ kaupod naton sa pagsakdag sa aton!
18 Ang saad ni Jesus nga “ako kaupod ninyo sa tanan nga adlaw” isa man ka tuburan sang daku nga lugpay. Samtang mapisan kita nga nagatuman sa sugo ni Cristo nga maghimo sing mga disipulo, makaeksperiensia kita indi lamang sing malipayon nga mga adlaw kundi sing masubo man nga mga adlaw. (2 Cronica 6:29) Ang pila sa aton nakaeksperiensia sing masubo nga mga tion samtang nagalalaw sa kamatayon sang isa ka pinalangga nga hinigugma. (Genesis 23:2; Juan 11:33-36) Ang iban nagabatas sang pagtigulang, ang tion nga nagaluya ang panglawason kag kusog. (Manugwali 12:1-6) Ang iban naman nagaatubang sing mga adlaw nga nagabatyag sila sing kapung-aw. (1 Tesalonica 5:14) Kag nagadamo sa aton ang nagaantos sang kapigaduhon. Walay sapayan sining mga kabudlayan, nagamadinalag-on kita sa aton ministeryo bangod kaupod naton si Jesus “sa tanan nga adlaw,” lakip sa pinakamasubo nga mga adlaw sang aton kabuhi.—Mateo 11:28-30.
19. (a) Ang sugo ni Jesus nga maghimo sing mga disipulo nagalakip sing ano nga mga instruksion? (b) Ano ang makabulig sa aton sa pagtuman sa sugo ni Cristo?
19 Subong sang nakita naton sa sini kag sang nagligad nga artikulo, ang sugo ni Jesus nga maghimo sing mga disipulo nagadalahig sang tanan nga aspekto. Ginsugiran kita ni Jesus kon ngaa kag kon diin dapat naton tumanon ang iya sugo. Ginsugiran man niya kita kon ano ang dapat naton itudlo kag tubtob san-o kita dapat maghimo sini. Sa pagkamatuod, isa ka hangkat ang pagtuman sa sining daku nga hilikuton. Apang paagi sa pagsakdag sa aton sang awtoridad ni Cristo kag sang iya presensia sa tupad naton, sarang naton ini matuman! Nagaugyon ka bala?
[Mga nota]
a Ang isa ka reperensia nagapatalupangod sa ginsiling ni Jesus, “nagabawtismo sa ila . . . nagatudlo sa ila,” indi ‘nagabawtismo sa ila kag nagatudlo sa ila.’ Busa, ang sugo nga magbawtismo kag magtudlo “indi estrikto nga . . . duha ka sagunson nga buhat.” Sa baylo, “ang pagtudlo isa ka nagapadayon nga proseso, nga sa pila ka kasangkaron mas nauna sa bawtismo . . . kag sa pila ka kasangkaron nagapadayon pagkatapos sang bawtismo.”
b Ang dugang nga impormasyon kon paano tamdon kag buligan ang mga maluya makita sa Ang Lalantawan sang Pebrero 1, 2003, pahina 15-18.
Paano Mo Sabton?
• Paano naton tudluan ang iban sa pagtuman sa ginsugo ni Jesus?
• Ano nga mga leksion ang mahimo matun-an sang isa ka bag-ong disipulo gikan sa iban sa kongregasyon?
• Ano ang mahimo naton agod mabuligan ang mga nagluya sa espirituwal?
• Ano nga pagpalig-on kag lugpay ang makuha naton sa saad ni Jesus nga “ako kaupod ninyo sa tanan nga adlaw”?
[Mga retrato sa pahina 15]
Kinahanglan kita mangin mga manunudlo kag mga manugtuytoy
[Mga retrato sa pahina 17]
Ang bag-ong disipulo makatuon sing mapuslanon nga mga leksion sa halimbawa nga ginapakita sang iban