Madumduman Mo Bala?
Nalipay ka bala sa pagbasa sa ulihi nga mga gua sang Ang Lalantawan? Ngaa indi pagtilawan kon masabat mo ang masunod nga mga pamangkot?
• Ano ang Complutensian Polyglot, kag ngaa importante ini?
Isa ini ka naimprinta, lainlain sing lenguahe nga Biblia nga nahamtang sa mga kolumna sini nga nagatambihanay ang labing maayo nga badbad sadto sa Hebreo, Griego, kag Latin, upod ang pila ka bahin sa Aramaiko. Ining madamo sing badbad nga Biblia isa ka daku nga pag-uswag sa pagpatubas sang mas sibu nga teksto sa orihinal nga mga lenguahe.—4/15, pahina 28-31.
• Paano mapahalipay sang mga tawo ang Dios?
Subong isa ka buhi nga persona, si Jehova sarang makahunahuna, makapanghikot, kag makabatyag. Sia ang “malipayon nga Dios” nga nalipay sa pagtuman sang iya katuyuan. (1 Timoteo 1:11; Salmo 104:31) Kon mas sensitibo kita sa balatyagon sang Dios, labi pa gid nga mahibaluan naton kon ano ang aton himuon agod mapahalipay ang iya tagipusuon.—5/15, pahina 4-7.
• Ngaa gintugutan ni David ang iya asawa nga si Mical nga maghupot sing isa ka terapim nga imahen?
Sang nagplano si Hari Saul nga patyon si David, ginbuligan sia ni Mical nga makapalagyo paagi sa pagbutang sa hiligdaan sing isa ka imahen nga daw korte sang tawo. Mahimo nga may terapim sia bangod indi bug-os ang iya tagipusuon sa Dios. Mahimo nga wala ini mahibalui ni David ukon ginpasugtan niya ini bangod si Mical anak ni Hari Saul. (1 Cronica 16:25, 26)—6/1, pahina 29.
• Anong sadsaran nga kamatuoran ang ginpatalupangod sang mga sugo sang Dios tuhoy sa dugo?
Suno sa ginsiling sang Dios pagkatapos sang Anaw, sa Mosaikong Kasuguan, kag sa sugo nga masapwan sa Binuhatan 15:28, 29, ginpatalupangod niya ang halad nga naglakip sa ginpatulo nga dugo ni Jesus. Paagi lamang sa sinang dugo nga matigayon naton ang kapatawaran kag ang paghidait upod sa Dios. (Colosas 1:20)—6/15, pahina 14-19.
• Pila ka milagro ni Jesus ang ginsambit sa Biblia?
Ang kasaysayan sa Ebanghelyo nagapatuhoy sa 35 ka milagro ni Jesus. Apang ang eksakto nga kadamuon sang mga milagro ni Jesus, lakip ang wala mareport, wala ginpahibalo. (Mateo 14:14)—7/15, pahina 5.