Ginapaanggid Mo Bala ang Imo Kaugalingon sa Iban?
SIN-O sa aton ang wala makasumalang sing isa nga mas matahom ukon mas maambong sangsa aton, daw mas popular, mas maabtik makahangop, ukon mas maalam sa eskwelahan? Mahimo nga ang iban mas maayo sing panglawas ukon mas maayo sing trabaho, mas madinalag-on, ukon daw mas madamo sing abyan. Mahimo nga mas madamo sila sing pagkabutang, mas madamo sing kuarta, mas bag-o sing salakyan, ukon daw mas malipayon. Sa pagsambit sa sini nga mga butang, ginapaanggid bala naton ang aton kaugalingon sa iban? Indi bala malikawan ang pagpaanggid? Ngaa luyag ini likawan sang isa ka Cristiano? Kag paano kita mangin kontento nga wala ginapaanggid ang aton kaugalingon sa iban?
Kon Ngaa kag Kon San-o Kita Nagapaanggid
Ang isa ka pagpati kon ngaa ginapaanggid sang mga tawo ang ila kaugalingon sa iban amo nga nagabulig ini agod mahuptan ukon madugangan ang ila pagpabalor sa kaugalingon. Ang mga tawo masami nga kontento na kon mahibaluan nila nga subong sila ka madinalag-on sa ila mga katubotubo. Ginapatihan man nga ang pagpaanggid, mga paninguha agod mabuhinan ang pagkawalay kasiguruhan sa aton kaugalingon, agod mahangpan kon ano ang aton masarangan nga himuon kag kon ano ang aton mga limitasyon. Makita naton ang hinimuan sang iban. Kon pareho sila sa aton sa madamo nga butang kag nalab-ot nila ang pila ka tulumuron, mahimo kita magbatyag nga malab-ot man naton ang kaanggid nga mga tulumuron.
Ang pagpaanggid masami nga ginahimo sang mga tawo nga magkapareho—magkapareho sing sekso, magkapareho sing edad, kag magkapareho sing estado sa katilingban kag magkilalahay. Wala naton ginapaanggid ang aton kaugalingon sa iban nga daku ang kinatuhayan sa aton. Kon sa aton pa, wala ginapaanggid sang isa ka ordinaryo nga dalagita ang iya kaugalingon sa isa ka kilala nga modelo kundi sa iya mga kabutho lamang, kag wala ginapaanggid sang modelo ang iya kaugalingon sa dalagita.
Sa ano nga mga butang kita nagapaanggiray? Ang bisan ano nga pagkabutang ukon kinaiya nga may kabilinggan sa komunidad—halimbawa, kinaalam, katahom ukon kaambong, manggad, panapton—mahimo mangin basihan sang pagpaanggid. Apang, nagapaanggiray man kita sa mga butang nga interesado kita. Halimbawa, kon indi kita interesado sa pagpangolekta sing mga selyo, mahimo nga indi kita mahisa sa madamo nga selyo nga nakolekta sang isa sa aton mga kakilala.
Ang mga pagpaanggid nagaresulta sa lainlain nga reaksion, halin sa pagkakontento pakadto sa depresyon, halin sa pagdayaw kag handum nga ilugon ang iban pakadto sa pagkadimapahamtang ukon paglain sing buot. Ang pila sa sini nga mga emosyon makahalalit, kag wala ini nagahisanto sa Cristianong mga kinaiya.
Mapaindis-indison nga mga Pagpaanggid
Madamo sang nagapanikasog nga “magdaug” sa mga pagpaanggid ang mapaindis-indison. Luyag nila labawan ang iban, kag mangin kontento lamang sila kon sa banta nila labaw na sila. Indi maayo nga makig-upod sa subong sini nga mga indibiduwal. Ang pagpakig-abyan sa ila makapahuol. Ini nga mga tawo indi mapainubuson kag masami nga wala nila ginasunod ang laygay sang Biblia nga higugmaon ang ila isigkatawo, kay ang ila panimuot nagapabatyag sa iban nga kubos.—Mateo 18:1-5; Juan 13:34, 35.
Kon maghunahuna ang mga tawo nga “pierde” sila, nagakasaklaw sila. Suno sa isa ka manunulat, “ang aton mga kapaslawan mas masakit kon ang mga tawo nga pareho sing kahimtangan sa aton nakaangkon sang mga pagkabutang nga naluyagan naton.” Kon amo, ang pagkamapaindis-indison nagapukaw sing kahisa, kaakig, kag kaugot sa iban bangod sang iya mga pagkabutang, kahamungaya, kahimtangan, reputasyon, bentaha, kag iban pa. Nagadul-ong ini sa dugang pa kag wala katapusan nga paindisanay. Ginapakamalaut sang Biblia ang “nagasulsol sang pagpaindisanay.”—Galacia 5:26.
Paagi sa pagpakanubo sa hinimuan sang mga karibal, ginatinguhaan sang mga mahisaon nga salbahon ang ila nasaklaw nga pagpabalor sa kaugalingon. Ini nga mga reaksion daw indi salapakon, apang kon indi pagbatunon kag punggan, magadul-ong ini sa paghimo sing sala. Binagbinaga ang duha ka sugilanon sa Biblia may kaangtanan sa kahisa.
Sang nagapuyo si Isaac sa tunga sang mga Filistinhon, ginpakamaayo sia sing “mga panong sang mga karnero kag mga kabakahan kag daku nga hubon sang mga alagad, amo nga nahisa sa iya ang mga Filistinhon.” Ginpakita nila ini paagi sa pagtampok sa mga bubon nga ginkutkot sang amay ni Isaac, nga si Abraham, kag ginpahalin si Isaac sang ila hari sa ila lugar. (Genesis 26:1-3, 12-16) Ang ila kahisa madinumtanon kag malaglagon. Indi gid nila mabaton ang pagtin-ad ni Isaac sa tunga nila.
Mga siglo sang ulihi, si David nangin bantog sa patag-awayan. Ang iya kaisog masunson nga ginasambit sang mga kababayin-an sang Israel, nga nag-amba: “Si Saul nagpatay sang iya linibo, kag si David sang iya linaksa.” Bisan pa gindayaw man si Saul, ginkabig niya yadto nga pagpaanggid nga daw pagpakanubo, kag nagtubo ang kahisa sa iya tagipusuon. Sugod sadto, nagtanom sia sing malain nga buot kay David. Sang ulihi ginhimo niya ang una sa pila ka pagtinguha nga patyon si David. Daku gid nga kalautan ang mahimo magresulta bangod sang kahisa!—1 Samuel 18:6-11.
Gani kon ang pagpaanggid sang aton kaugalingon sa iban—sa ila mga hinimuan ukon mga kadalag-an—nagapukaw sing mga balatyagon nga kaanggid sa kahisa ukon pagkamapaindis-indison, mag-andam kita! Ini nga mga balatyagon makahalalit kag wala nagahisanto sa panghunahuna sang Dios. Apang antes usisaon kon paano sumpungon ini nga mga panimuot, binagbinagon anay naton ang isa pa ka butang nga nagaresulta sa pagpaanggid.
Pagtulutimbang sa Kaugalingon kag Pagkakontento
‘Ako bala maalam, matahom ukon maambong, may ikasarang, maayo sing panglawas, talahuron, hiligugmaon? Kag sa ano nga kasangkaron?’ Talagsa lang naton ginapamangkot ini nga mga butang sa atubang sang espeho. Apang, suno sa isa ka manunulat, “walay duhaduha nga ini nga mga pamangkot masunson nga nagalabay sa aton hunahuna kag nagahatag sing mahipos kag daw makaalayaw nga mga sabat.” Mahimo ini pamensaron sing di-mapaindis-indison ukon sing di-mahisaon sang isa ka tawo nga indi sigurado sa kon ano ang iya masarangan nga himuon. Ginatulutimbang lamang niya ang iya kaugalingon. Wala gid man sing malain sa sini. Apang, ang husto nga paagi sa paghimo sa sini amo ang indi pagpaanggid sang aton kaugalingon sa iban.
May yara kita nagkalainlain nga mga ikasarang, depende sa lainlain nga mga kahimtangan. Pirme may mga tawo nga daw mas maayo sangsa aton. Gani, sa baylo nga tan-awon sila sing mahisaon, dapat naton takson ang aton ginahimo nahisuno sa matarong nga mga talaksan sang Dios, nga amo gid ang sigurado nga talaksan sa kon ano ang husto kag maayo. Interesado si Jehova sa kada isa sa aton. Wala niya kita ginapaanggid sa iban. Si apostol Pablo naglaygay sa aton: “Pamatud-an sang kada isa kon ano ang iya kaugalingon nga binuhatan, kag nian ang rason niya sa pagpabugal mangin sa iya kaugalingon lamang kag indi sa pagpaanggid sa iban.”—Galacia 6:4.
Pagsumpong sa Kahisa
Bangod ang tanan nga tawo di-himpit, kinahanglan ang lakas kag dalayon nga mga panikasog agod sumpungon ang kahisa. Mahimo nga nahibaluan naton ang ginasiling sang Kasulatan: “Sa pagpadungog sa isa kag isa manguna kamo,” apang ang paghimo sini mas mabudlay. Ginbaton ni Pablo ang iya kaugalingon nga huyog sa pagpakasala. Agod pakigbatuan ini, ‘ginsakit niya ang iya lawas kag ginhimo ini nga ulipon.’ (Roma 12:10; 1 Corinto 9:27) Para sa aton, mahimo ini magkahulugan sang pagsumpong sa mapaindis-indison nga panghunahuna kag buslan ini sing makapalig-on nga panghunahuna. Kinahanglan nga mangamuyo kita, mangayo sing bulig kay Jehova nga “indi [kita] maghunahuna sing labaw sa dapat [naton] hunahunaon sa [aton] kaugalingon.”—Roma 12:3.
Ang pagtuon kag pagpamalandong sa Biblia makabulig man. Hunahunaa, halimbawa, ang palaabuton nga Paraiso nga ginasaad sang Dios. Sa sina nga tion ang tanan may paghidait, maayong panglawas, bugana nga pagkaon, masulhay nga puluy-an, kag makaalayaw nga hilikuton. (Salmo 46:8, 9; 72:7, 8, 16; Isaias 65:21-23) Mahuyog pa bala ang isa sa pagpaindis-indis? Indi na. Wala na sing rason agod himuon ini. Matuod, wala ginhatag ni Jehova sa aton ang tanan nga detalye sang pangabuhi sa sina nga tion, apang mahunahuna naton sing makatarunganon nga ang tanan magahimo sang mga butang nga makawiwili sa ila. Ang isa mahimo magtuon sing astronomiya, ang iban naman magdesinyo sing matahom nga mga tela. Ngaa abi mahisa ang isa sa iban? Ang ginahimo sang aton isigkatawo magapapagsik sa aton nga himuon ang iban pa nga butang, kag indi ini rason agod mahisa. Ini nga mga balatyagon wala na.
Kon amo sina nga kabuhi ang luyag gid naton, indi bala dapat nga panikasugan naton nga palambuon ini man nga panimuot karon? Yara na kita sa espirituwal nga paraiso, nga hilway sa madamo nga problema sang kalibutan sa palibot naton. Sanglit ang pagpaindis-indis wala na sa bag-ong kalibutan sang Dios, may rason gid nga likawan ini karon.
Kon amo, malain bala nga ipaanggid naton ang aton kaugalingon sa iban? Ukon may mga tion bala nga mahimo ini mangin nagakaigo?
Nagakaigo nga mga Pagpaanggid
Madamo nga pagpaanggid ang nagresulta sa kaakig ukon kapung-aw, apang indi kinahanglan nga amo sini pirme. May kaangtanan sini, talupangda ang laygay ni apostol Pablo: “Mangin mga manug-ilog nila nga paagi sa pagtuo kag pagpailob nagapanubli sang mga saad.” (Hebreo 6:12) Ang pagpanikasog nga mapalambo ang mga kinaiya kaangay sang ginpakita sang matutom nga mga alagad ni Jehova sang una mahimo mangin mapuslanon. Matuod, mahimo ini nagalakip sing mga pagpaanggid. Apang, makabulig ini sa aton nga makita ang mga halimbawa nga mahimo naton ilugon kag ang mga bahin nga dapat naton pauswagon.
Binagbinaga si Jonatan. Daw may rason gid sia nga mahisa. Subong panganay nga anak nga lalaki ni Hari Saul sang Israel, ayhan naglaum anay si Jonatan nga mangin hari sia, apang ginpili ni Jehova ang isa ka lalaki nga mas bata sa iya sing mga 30 ka tuig kag ini amo ang pamatan-on nga si David. Sa baylo nga magtanom sing aligutgot, si Jonatan nakilal-an bangod sang iya di-makagod nga pagpakig-abyan kag pagsuportar kay David subong ang gintangdo ni Jehova nga hari. Si Jonatan isa gid ka espirituwal nga tawo. (1 Samuel 19:1-4) Indi kaangay sa iya amay, nga nagkabig kay David nga isa ka karibal, ginkilala ni Jonatan ang pagtuytoy ni Jehova sa mga hitabo kag nagpasakop sia sa Iya kabubut-on; wala niya ginpaanggid ang iya kaugalingon kay David, nga nagapamangkot, “Ngaa si David kag indi ako ang ginpili?”
Sa tunga sang mga masigka-Cristiano, indi gid kita dapat magbatyag nga daw ginapahog, subong nga daw ginatinguhaan sang iban nga labawan kita ukon agawan sing katungdanan. Ang pagribalay indi nagakaigo. Makilal-an ang hamtong nga mga Cristiano paagi sa kooperasyon, paghiusa, kag gugma, indi sa pagpaindisanay. “Ang gugma amo ang daku nga kaaway sang kahisa,” siling sang sosyologo nga si Francesco Alberoni. “Kon ginahigugma naton ang isa ka tawo, luyag naton kon ano ang maayo sa iya, kag nalipay kita kon madinalag-on kag malipayon sia.” Gani kon ang isa sa Cristianong kongregasyon napili para sa isa ka pribilehiyo, ang mahigugmaon nga butang nga dapat himuon amo ang magkalipay sa sini. Amo sini ang ginhimo ni Jonatan. Kaangay niya, pagapadyaan kita kon suportahan naton ang mga matutom nga nagaalagad sa responsable nga mga katungdanan sa organisasyon ni Jehova.
Ang maayo gid nga halimbawa sang mga masigka-Cristiano mahimo dayawon sing nagakaigo. Ang timbang nga pagpaanggid sa ila magapahulag sa aton nga ilugon ang ila pagtuo. (Hebreo 13:7) Apang kon indi kita maghalong, ang handum sa pag-ilog mahimo mangin mapaindis-indison. Kon magbatyag kita nga nalabawan kita sang iban nga ginadayaw naton kag tinguhaan naton nga pakanubuon ukon mulayon sia, wala na kita nagatinguha nga ilugon sia kundi nahisa na kita sa iya.
Wala sing di-himpit nga tawo ang makahatag sing himpit nga huwaran. Gani, ang Kasulatan nagalaygay: “Mangin mga manug-ilog kamo sang Dios, subong nga mga anak nga hinigugma.” Subong man, “si Cristo nag-antos tungod sa inyo, nga nagabilin sa inyo sing huwaran agod nga sundon ninyo sing maayo ang iya mga tikang.” (Efeso 5:1, 2; 1 Pedro 2:21) Ang mga kinaiya ni Jehova kag ni Jesus—ang ila gugma, pagkamainabyanon, kahanuklog, kag pagkamapainubuson—amo ang dapat naton tinguhaan nga ilugon. Dapat kita maghinguyang sing tion agod mailog ang ila mga kinaiya, mga katuyuan, kag mga paagi sa paghimo sang mga butang. Ini nga pagpaanggid makapauswag sang aton kabuhi, nga nagahatag sing pat-od nga pagtuytoy, kalig-unan, kag seguridad, kag makabulig sa aton nga matigayon ang kinaiya sang hamtong nga Cristianong mga lalaki kag mga babayi. (Efeso 4:13) Kon magkonsentrar kita sa paghimo sang aton bug-os nga masarangan agod ilugon ang ila himpit nga halimbawa, pat-od gid nga indi kita mahuyog sa pagpaanggid sang aton kaugalingon sa aton isigkatawo.
[Retrato sa pahina 28, 29]
Si Hari Saul nahisa kay David
[Retrato sa pahina 31]
Wala gid gintamod ni Jonatan ang mas bataon nga si David subong karibal